Vahe 65
Ko ha Fononga Fakafufū ki Selusalema
KO E faʻahitaʻu fakatōlau ʻo e 32 T.S., pea naʻe ofi ʻa e Kātoanga Fale-Louʻakaú. Naʻe fakangatangata pē ʻe Sīsū ʻene ngāué ʻo fakatefito pē ki Kāleli talu mei he Laka-Atu ʻo e 31 T.S. ʻi he feinga ʻa e kau Siú ke tāmateʻi iá. Ngalingali, talu mei he taimi ko iá, naʻe toki ʻaʻahi pē ʻa Sīsū ki Selusalemá ke kau ki he ngaahi kātoanga ʻe tolu fakataʻu ʻa e kau Siú.
Naʻe naʻinaʻi ange leva ʻa e ngaahi tokoua ʻo Sīsuú kiate ia: “Ke ke hiki mei heni ʻo mole ki Siutea.” Ko Selusalemá ko e kolo lahi ia ʻo Siuteá pea ko e senitā fakalotu ia ki he fonuá kotoa. Ko e fakakaukau ʻa hono ngaahi tokouá naʻe pehē: “He talaʻehai ʻoku ai ha taha te ne fai fufū ha meʻa, ʻosi ʻokú ne feinga ke ʻilolahia.”
Neongo ko Sēmisi, Saimone, Siosefa, mo Siutasi naʻe ʻikai te nau tui ko honau taʻoketé, ʻa Sīsū, ko e Mīsaiá moʻoni ia, naʻa nau loto ke ne fakahā hono ngaahi mafai fakaemaná kiate kinautolu kotoa naʻa nau fakatahataha ʻi he kātoangá. Kae kehe, naʻe ʻiloʻi ʻe Sīsū ʻa e fakatuʻutāmakí. “Talaʻehai ʻe lava ʻe māmani ke fehiʻa kiate kimoutolu,” ko ʻene leá ia, “ko au pē ʻokú ne fehiʻa ki aí, koeʻuhi ko au pē ʻoku ou fakahāʻia ʻoku kovi ʻene ngāué.” Ko ia naʻe tala ʻe Sīsū ki hono ngaahi tokouá: “Mou ʻalu hake kimoutolu ki he kātoangá; ʻe ʻikai te u ʻalu leva ki he kātoangá ni.”
Ko e Kātoanga Fale-Louʻakaú ko e kātoanga ʻi he ʻaho ʻe fitu. Naʻe fakaʻosi ʻaki ia ʻa e ngaahi ngāue molumalu ʻi he ʻaho hono valú. Ko e kātoanga naʻá ne fakaʻilongaʻi ʻa e ngataʻanga ʻo e taʻu fakangoué pea ko e taimi ia ki he fiefia lahi mo e fakamālō. ʻI he ʻosi ha ngaahi ʻaho mei he mavahe ʻa e ngaahi tokoua ʻo Sīsuú ke nau kau fakataha mo e kulupu ʻo e kau fonongá, naʻe ʻalu fakafufū ia mo ʻene kau ākongá, ʻo ʻikai ke ʻilo ki ai ʻa e kakaí. Naʻa nau ō kinautolu ʻi he hala ʻoku fou atu ʻi Samēlia, kae ʻikai ko e hala ko ia naʻe fou ai ʻa e tokolahi ʻo e kakaí ʻa ia naʻe ofi ki he Vaitafe Sioataní.
Koeʻuhi ʻe fiemaʻu ʻe Sīsū mo ʻene kau fonongá ha ngaahi nofoʻanga ʻi he kolo Samēliá, naʻá ne fekau ai ha kau talafekau ke nau muʻomuʻa ʻo fai ha teuteu. Kae kehe, naʻe fakafisi ʻa e kakaí ke fai ha meʻa maʻa Sīsū ʻi he hili ʻenau ʻiloʻi ko ʻene fonongá ki Selusalema. ʻI he fisiʻia ʻa Sēmisi mo Sioné, naʻá na kole: “ʻEiki, ko ho lotó ke ma tuputupulefanua ke tō hifo ha afi mei langi ʻo fakaʻauha kinautolu?” Naʻe valokiʻi kinaua ʻe Sīsū ʻi hono fokotuʻu ange ha meʻa peheé, pea hoko atu ʻenau fonongá ki he kolo kehe.
ʻI heʻenau fononga atu ʻi he halá, naʻe pehē ʻe ha sikalaipe kia Sīsū: “ʻEiki, te u muimui kiate koe, neongo pe ko e fē ha potu te ke meʻa ki ai.”
“Ko e fanga fōkisí ʻoku ʻi ai hanau tafu, mo e fanga manupuna ʻo e ʻataá hanau pununga,” ko e tali ia ʻa Sīsuú, “ka ko e Fanautama ʻa tangatá ʻoku ʻikai siʻa potu ke ʻolunga ki ai hono ʻulú.” Naʻe fakahā ʻe Sīsū ʻe hokosia ʻe he sikalaipé ʻa e ngaahi faingataʻa kapau te ne hoko ko Hono muimui. Pea ʻoku ngalingali ko e fakahuʻuhuʻungá ʻe fuʻu loto-pōlepole ʻa e sikalaipé ia ke ne tali ʻa e founga moʻui ko ʻení.
Ki ha tangata ʻe taha, naʻe pehē ʻe Sīsū: “Muimui koe kiate au.”
“Ke ke tuku mai au ke u lele muʻa, ʻo tanu siʻeku tamaí,” ko e tali ia ʻa e tangatá.
“Tuku ki he kau maté ke nau tanu ʻa e mate ʻanautolú,” ko e tali ia ʻa Sīsuú, “ka ke ʻalu koe ʻo malangaʻaki ʻa e puleʻanga ʻo e ʻOtuá.” Ko e tamai ʻa e tangata ko ʻení ʻoku hā mahino naʻe teʻeki ai ke mate ia, he kapau naʻe pehē, ngalingali ʻe ʻikai ke ʻi ai hono fohá ʻo fanongo kia Sīsū. ʻOku ngalingali ko e kole ʻa e fohá ia ke nofo ʻi ha taimi ʻo tali ki he mate ʻa ʻene tamaí. Naʻe teʻeki ai ke ne mateuteu ke ne fakamuʻomuʻa ʻa e Puleʻanga ʻo e ʻOtuá ʻi heʻene moʻuí.
ʻI heʻenau hoko atu ʻa e fononga ʻi he hala ki Selusalemá, naʻe pehē ʻe ha tangata ʻe taha kia Sīsū: “ʻEiki, te u muimui kiate koe; ka ke tuku mai muʻa ke u fai ʻeku tatau kiate kinautolu ʻi ʻapí.”
ʻI he talí naʻe pehē ʻe Sīsū: “Ko ia ʻoku ala ke fakaʻuli ʻa e palaú, mo kilokilo ki he ngaahi meʻa ʻi muí, ʻoku ʻikai te ne tuha mo e puleʻanga ʻo e ʻOtuá.” Ko kinautolu ʻe hoko ko e kau ākonga ʻa Sīsuú kuo pau ke ʻai honau matá ke fakahanga ki he ngāue ki he Puleʻangá. Hangē pē ko ha palau ʻe ngalingali pikopiko kapau ʻe ʻikai ke sio hangatonu ʻa e tokotaha palaú ki muʻa, ko ia ka ʻi ai ha taha ʻoku sio ki mui ki he ngaahi meʻa ʻo e tuʻu motuʻa ko ʻení ʻe malava ke ne humu ʻo tō mei he hala ʻoku taki atu ki he moʻui taʻengatá. Sione 7:2-10; Luke 9:51-62; Mātiu 8:19-22.
▪ Ko hai ʻa e ngaahi tokoua ʻo Sīsuú, pea naʻe anga-fēfē ʻenau ongoʻi fekauʻaki mo iá?
▪ Ko e hā naʻe anga-taʻefakaʻapaʻapa ai ʻa e kau Samēliá, pea ko e hā naʻe loto ʻa Sēmisi mo Sione ke faí?
▪ Ko e hā ʻa e ngaahi fetalanoaʻaki ʻe tolu naʻe fai ʻe Sīsū ʻi he halá, pea naʻe anga-fēfē ʻene fakamamafaʻi ʻa e fiemaʻu ke ngāue feilaulauʻi-kitá?