Founga ke ʻIloʻi Ai ʻa e Lotu Moʻoní

Kapau ʻokú ke loto ke ke hoko ko ha kaumeʻa ʻo e ʻOtuá, kuo pau ke ke fai ʻa e lotu ko ia ʻoku hōifua ki ai ʻa e ʻOtuá. Naʻe pehē ʻe Sīsū “ko e kakai ʻoku lotu moʻoni” te nau lotu ki he ʻOtuá ʻo fehoanaki mo e “moʻoni.” (Sione 4:23, 24) ʻOku ʻi ai ʻa e founga tonu pē ʻe taha ke lotu ai ki he ʻOtuá. (Efeso 4:4-6) ʻOku iku ʻa e lotu moʻoní ki he moʻui taʻengatá, pea ʻoku iku ʻa e lotu loí ki he ʻauha.​—Mātiu 7:13, 14.

ʻOku lava ke ke ʻiloʻi ʻa e lotu moʻoní ʻaki hono siofi ʻa e kakai ʻoku nau fai iá. Koeʻuhi ʻoku lelei ʻa Sihova, ko e faʻahinga ko ia ʻoku nau hoko ko ʻene kau lotu moʻoní kuo pau pē ko e kakai lelei. Hangē pē ko e ʻomai ʻe ha fuʻu moli lelei ha ngaahi foʻi moli lelei, ʻoku ʻomai ʻe he lotu moʻoní ʻa e kakai lelei.​—Mātiu 7:15-20.

ʻOku ʻapasia loloto ʻa e ngaahi kaumeʻa ʻo Sihová ki he Tohitapú. ʻOku nau ʻiloʻi ko e Tohitapú ʻoku mei he ʻOtuá ia. ʻOku nau fakaʻatā ʻa e meʻa ʻokú ne leaʻakí ke ne tataki ʻenau moʻuí, ke solova ʻenau ngaahi palopalemá, pea ke tokoniʻi kinautolu ke nau ako ʻo fekauʻaki mo e ʻOtuá. (2 Timote 3:16) ʻOku nau feinga ke fai ʻa e meʻa ʻoku nau malangaʻakí.

Ko e ngaahi kaumeʻa ʻo Sihová ʻoku nau fakahāhā ʻa e feʻofaʻaki. Naʻe fakahaaʻi ʻe Sīsū ʻa e ʻofa ki he kakaí ʻaki hono akoʻi kinautolu ʻo fekauʻaki mo e ʻOtuá, mo hono fakamoʻui ʻa e faʻahinga ko ia naʻe puké. Ko e faʻahinga ko ia ʻoku nau fai ʻa e lotu moʻoní ʻoku nau toe fakahāhā ʻa e feʻofaʻakí. ʻI he hangē ko Sīsuú, ʻoku ʻikai te nau siolalo ki he faʻahinga ko ia ʻoku nau masiva pe ʻi ha kulupu fakamatakali kehé. Naʻe pehē ʻe Sīsū ʻe ʻiloʻi ʻe he kakaí ʻa ʻene kau ākongá ʻi he ʻofa ko ia ʻoku nau fefakahāhāʻakí.​—Sione 13:35.

Ko e ngaahi kaumeʻa ʻo e ʻOtuá ʻoku nau fakalāngilangiʻi ʻa e huafa ʻo e ʻOtuá, ʻa Sihova. Kapau ʻoku fakafisi ha taha ke ngāueʻaki ho hingoá, ʻe hoko ʻa e tokotaha ko iá ko ho kaumeʻa ofi? ʻIkai! ʻI he taimi ʻoku ʻi ai ai hatau kaumeʻá, ʻoku tau ngāueʻaki ʻa hono hingoá pea ʻoku tau leaʻaki ʻa e ngaahi meʻa lelei ʻo fekauʻaki mo e kaumeʻa ko iá ki he niʻihi kehé. Ko ia, ko e faʻahinga ko ia ʻoku nau fakaʻamu ke hoko ko e ngaahi kaumeʻa ʻo e ʻOtuá ʻoku totonu ke nau ngāueʻaki ʻa hono huafá pea talanoa ʻo fekauʻaki mo ia ki he niʻihi kehé. ʻOku fiemaʻu ʻe Sihova ke tau fai ʻa e meʻa ko iá.​—Mātiu 6:9; Loma 10:13, 14.

ʻI he hangē ko Sīsuú, ʻoku akoʻi ʻe he ngaahi kaumeʻa ʻo e ʻOtuá ʻa e kakaí ʻo fekauʻaki mo e Puleʻanga ʻo e ʻOtuá. Ko e Puleʻanga ʻo e ʻOtuá ʻa e founga-pule fakahēvani ko ia te ne ʻai ʻa e foʻi māmaní ko ha palataisí. Ko e ngaahi kaumeʻa ʻo e ʻOtuá ʻoku nau vahevahe atu ʻa e ongoongo lelei ko eni ʻo fekauʻaki mo e Puleʻanga ʻo e ʻOtuá ki he niʻihi kehé.​—Mātiu 24:14.

Ko e Kau Fakamoʻoni ʻa Sihová ʻoku nau feinga ke hoko ko e ngaahi kaumeʻa ʻo e ʻOtuá. ʻOku nau ʻapasia ki he Tohitapú pea ʻoku nau feʻofaʻaki. ʻOku nau toe ngāueʻaki mo fakalāngilangiʻi ʻa e huafa ʻo e ʻOtuá pea akoʻi ʻa e niʻihi kehé ʻo fekauʻaki mo e Puleʻanga ʻo e ʻOtuá. Ko e Kau Fakamoʻoni ʻa Sihová ʻoku nau fai ʻa e lotu moʻoní ʻi he foʻi māmaní he ʻaho ní.