Ko e Hā ʻOku Mahuʻinga Moʻoní?

ʻI HE ʻaho ʻe taha naʻe haʻu ai ha tangata ke sio kia Sīsū. Naʻá ne ʻiloʻi ko Sīsuú naʻe poto ʻaupito, ko ia naʻá ne pehē kiate ia: ‘Faiako, tala ki hoku tokouá ke ne foaki mai ha niʻihi ʻo e ngaahi meʻa ʻokú ne maʻú.’ Naʻe fakakaukau ʻa e tangatá ʻoku totonu ke ne maʻu ʻa e niʻihi ʻo e ngaahi meʻa ko iá.

Kapau naʻa ko Sīsū koe, ko e hā naʻá ke mei leaʻakí?— Naʻe vakai ʻa Sīsū ko e tangatá naʻe ʻi ai ʻene palopalema. Ka ko e palopalemá naʻe ʻikai ko ʻene fiemaʻu ʻa e meʻa naʻe maʻu ʻe hono tokouá. Ko e palopalema ʻa e tangatá ko e ʻikai te ne ʻilo ʻa e meʻa naʻe mahuʻinga moʻoni ʻi he moʻuí.

Ta fakakaukau angé ki he meʻa ko ení. Ko e hā ʻoku totonu ke mahuʻinga taha kia kitauá? ʻOku totonu ke pehē ko hono maʻu ʻa e ngaahi meʻa-vaʻinga leleí, vala foʻoú, pe ko e ngaahi meʻa hangē ko iá?— ʻIkai, ʻoku ʻi ai ʻa e meʻa ʻoku mahuʻinga lahi ange ia. Pea ko e lēsoni eni naʻe fiemaʻu ʻe Sīsū ke akoʻí. Ko ia, naʻá ne fai leva ha talanoa ʻo fekauʻaki mo ha tangata naʻe ngalo ai ʻa e ʻOtuá. Te ke fie fanongo ki ai?—

Ko e tangatá ni naʻe koloaʻia ʻaupito. Naʻá ne maʻu ha kelekele mo ha ngaahi fale tauhiʻanga koloa. Ko e ngoue naʻá ne toó naʻe tupu lelei ʻaupito. Naʻe ʻikai ke ʻi ai ha feituʻu ʻatā ʻi hono ngaahi fale tauhiʻanga koloá ke faʻoaki ai ʻa e fua kotoa ʻo e ngoué. Ko ia, ko e hā ʻa e meʻa naʻe teu ke ne faí? Sai, naʻá ne pehē kiate ia: ‘Te u holoki hoku ngaahi fale tauhiʻanga koloá pea langa ha ngaahi fale ʻoku lalahi angé. Pea te u toki faʻoaki kotoa ʻa e ngaahi fua ʻo ʻeku ngoué mo ʻeku ngaahi meʻa lelei kotoa pē ʻi he ngaahi fale tauhiʻanga koloa foʻoú ni.’

Naʻe fakakaukau ʻa e tangata koloaʻiá ko e meʻa fakapotopoto eni ke faí. Naʻá ne fakakaukau ʻokú ne fuʻu poto ʻaupito ʻi hono faʻoaki ha ngaahi meʻa lahi. Naʻá ne pehē kiate ia: ‘Kuo faʻoaki maʻaku ʻa e ngaahi meʻa lelei lahi. ʻE feʻunga ia kiate au ʻi he ngaahi taʻu lahi. Ko ia leva ʻe lava ke u fiemālie he taimí ni. Te u kai, inu mo fiefia.’ Ka naʻe ʻi ai ʻa e meʻa naʻe fehālaaki ʻi he fakakaukau ʻa e tangata koloaʻiá. ʻOkú ke ʻilo pe ko e hā ia?— Naʻá ne fakakaukau pē kiate ia pea mo ʻene fiefia ʻaʻaná. Naʻe ngalo ai ʻa e ʻOtuá.

Ko ia, naʻe lea ʻa e ʻOtuá ki he tangata koloaʻiá. Naʻá ne pehē: ‘ʻA e tangata vale. Te ke mate ʻi he poó ni. Ko hai leva te ne maʻu ʻa e ngaahi meʻa naʻá ke faʻoakí?’ ʻE lava ke ngāueʻaki ʻe he tangata koloaʻia ko iá ʻa e ngaahi meʻa ko iá ʻi he hili ʻene maté?— ʻIkai, ʻe maʻu ia ʻe ha taha kehe. Naʻe pehē ʻe Sīsū: ‘Ko e anga ʻeni ʻo ia ʻoku fokotuʻu koloa maʻaná, ka ʻoku ʻikai te ne koloaʻia ki he ʻOtuá.’—Luke 12:​13-21.

ʻOku ʻikai te ke loto ke hangē ko e tangata koloaʻia ko iá, ʻikai ko ia?— Ko ʻene taumuʻa tefito ʻi he moʻuí ko hono maʻu ʻa e ngaahi meʻa fakamatelié. Ko ha fehālaaki ia. Naʻá ne fiemaʻu maʻu pē ʻa e meʻa lahi ange. Ka naʻe ʻikai te ne ‘koloaʻia ki he ʻOtuá.’

Ko e kakai tokolahi ʻoku nau hangē ko e tangata koloaʻia ko iá. ʻOku nau fiemaʻu maʻu pē ʻa e meʻa lahi ange. Ka ʻe lava ke iku ʻa e meʻá ni ki he ngaahi palopalema lahi. Ko e fakatātaá, ʻoku ʻi ai hoʻo ngaahi meʻa-vaʻinga, ʻikai ko ia?— Ko e hā ʻa e niʻihi ʻo e ngaahi meʻa-vaʻinga ʻokú ke maʻú? Tala mai angé.— Fēfē kapau ko e taha ʻo ho ngaahi kaumeʻá ʻoku ʻi ai haʻane foʻi pulu pe ko haʻane tamapua pe ko haʻane meʻa-vaʻinga kehe ʻoku ʻikai te ke maʻu? ʻE tonu nai kia koe ke ke feinga ke ʻai ʻa hoʻo ongo mātuʻá ke na fakatau mai ha taha maʻau?—

ʻOku ʻi ai nai ha taimi ʻoku hā mātuʻaki mahuʻinga ai ha meʻa-vaʻinga. Ka ko e hā ʻoku hoko ki aí ʻi ha taimi nounou mei ai?— ʻOku fakaʻau ke motuʻa ia. ʻE maumau nai, pea ʻe ʻikai leva te ke toe fiemaʻu ia ʻe koe. Ko hono moʻoní, ʻokú ke maʻu ʻa e meʻa ʻoku mātuʻaki mahuʻinga ange ia ʻi he meʻa-vaʻingá. ʻOkú ke ʻilo pe ko e hā ia?—

Ko hoʻo moʻuí. Ko hoʻo moʻuí ʻoku mātuʻaki mahuʻinga koeʻuhí ʻi he ʻikai ha moʻuí, ʻe ʻikai lava ke ke fai ha meʻa. Ka ko hoʻo moʻuí ʻoku fakatefito ia ʻi hono fai ʻa e meʻa ʻoku fiefia ai ʻa e ʻOtuá, ʻikai ko ia?— Ko ia, ʻai ke ʻoua te ta hangē ko e tangata koloaʻia vale ko ia naʻe ngalo ai ʻa e ʻOtuá.

ʻOku ʻikai ko e fānaú pē ʻa e faʻahinga te nau fai nai ha ngaahi meʻa fakavalevale ʻo hangē ko e tangata koloaʻiá. ʻOku tokolahi ʻa e kakai lalahi ʻoku nau fai pehē foki. Ko e niʻihi ʻo kinautolu ʻoku nau fiemaʻu maʻu pē ha meʻa lahi ange ʻi he meʻa ʻoku nau maʻú. ʻOku nau maʻu nai ha meʻakai ki he ʻahó, vala ke tui, pea mo ha feituʻu ke nofo ai. Ka ʻoku nau kei fiemaʻu pē ʻa e meʻa lahi ange. ʻOku nau fiemaʻu ke lahi ʻa e valá. Pea ʻoku nau fiemaʻu ʻa e ngaahi fale lalahi ange. Ko e ngaahi meʻá ni ʻoku totongiʻaki ʻa e paʻanga. Ko ia, ʻoku nau ngāue mālohi ke maʻu ha paʻanga lahi. Pea ko e lahi ange ʻa e paʻanga ʻoku nau maʻú, ko e lahi ange ia ʻa e meʻa ʻoku nau fiemaʻú.

ʻOku hoko ʻa e kakai lalahi ʻe niʻihi ʻo fuʻu femoʻuekina ʻi he feinga ke maʻu ha paʻangá ʻo ʻikai ai ke ʻi ai hanau taimi ke fakataha ai mo honau fāmilí. Pea ʻoku ʻikai ke ʻi ai hanau taimi maʻá e ʻOtuá. ʻE lava ʻe heʻenau paʻangá ke tauhi kinautolu ke nau moʻui?— ʻIkai, ʻoku ʻikai te ne lava. ʻE lava ke nau ngāueʻaki ʻenau paʻangá ʻi he hili ʻenau maté?— ʻIkai. ʻOku hoko ení koeʻuhí ko e kau maté ʻoku ʻikai lava ke nau fai ha meʻa ʻe taha.—Koheleti 9:​5, 10.

ʻOku ʻuhinga ení ʻoku hala ke maʻu ha paʻanga?— ʻIkai. ʻE malava ke ta fakatau mai ha meʻakai mo ha vala ʻaki ʻa e paʻangá. ʻOku pehē ʻe he Tohitapú ko ha maluʻanga ia. (Koheleti 7:12) Ka ʻo kapau ʻokú ta ʻofa ʻi he paʻangá, ʻe ʻi ai leva ʻa e palopalema ʻe hoko kia kitaua. Te ta hangē ko e tangata koloaʻia vale ko ia naʻe faʻoaki koloa maʻana pea ʻikai te ne koloaʻia ki he ʻOtuá.

Ko e hā ʻa e ʻuhinga ʻo e pehē ke koloaʻia ki he ʻOtuá?— ʻOku ʻuhinga iá ke fakamuʻomuʻa ʻa e ʻOtuá ʻi heʻeta moʻuí. ʻOku pehē ʻe he kakai ʻe niʻihi ʻoku nau tui ki he ʻOtuá. ʻOku nau fakakaukau ko e tuí pē ʻa e meʻa ʻoku fiemaʻú. Ka ʻoku nau koloaʻia moʻoni ki he ʻOtuá?— ʻIkai, ʻoku nau hangē kinautolu ko e tangata koloaʻia naʻe ngalo ai ʻa e ʻOtuá.

Naʻe ʻikai ʻaupito ngalo ʻia Sīsū ʻa ʻene Tamai ʻoku ʻi hēvaní. Naʻe ʻikai te ne feinga ke maʻu ha paʻanga lahi. Pea naʻe ʻikai te ne maʻu ha ngaahi meʻa fakamatelie lahi. Naʻe ʻiloʻi ʻe Sīsū ʻa e meʻa naʻe mahuʻinga moʻoni ʻi he moʻuí. ʻOkú ke ʻilo pe ko e hā ʻa e meʻa ko iá?— Ko e hoko ʻo koloaʻia ki he ʻOtuá.

Tala mai angé, ʻe lava fēfē ke ta hoko ʻo koloaʻia ki he ʻOtuá?— ʻE malava ke ta hoko ʻo koloaʻia ki he ʻOtuá ʻaki hono fai ʻa e meʻa ʻokú ne leleiʻia aí. Naʻe pehē ʻe Sīsū: ‘ʻOku ou fai maʻu ai pē ʻa e ngaahi meʻa ʻokú ne leleiʻia aí.’ (Sione 8:29) ʻOku saiʻia ʻa e ʻOtuá ʻi heʻeta fai ʻa e ngaahi meʻa ʻokú ne fiemaʻu mai ke ta faí. Tala mai he taimí ni, ko e hā ʻa e ngaahi meʻa ʻe lava ke ke fai ke leleiʻia ai ʻa e ʻOtuá?— ʻIo, ʻe lava ke ke lau ʻa e Tohitapú, ʻalu ki he ngaahi fakataha faka-Kalisitiané, lotu ki he ʻOtuá pea mo tokoniʻi ʻa e niʻihi kehé ke ako kiate ia. Ko e moʻoni ko e ngaahi meʻa mahuʻinga taha ia ʻi he moʻuí.

Koeʻuhi naʻe koloaʻia ʻa Sīsū ki he ʻOtuá, naʻe tokangaʻi ia ʻe Sihova. Naʻá ne foaki kia Sīsū ʻa e pale ko e moʻui taʻengata. Kapau ʻokú ta hangē ko Sīsuú, ʻe ʻofaʻi kitaua ʻe Sihova mo tokangaʻi foki kitaua. Ko ia, ʻofa ke ta hangē ko Sīsuú pea ʻoua ʻaupito naʻá ta hangē ko e tangata koloaʻia ko ia naʻe ngalo ai ʻa e ʻOtuá.