ʻOku Totonu Ke Ta Pōlepole ʻi ha Meʻa?

KO E HĀ ʻa e ʻuhinga ʻo e pōlepolé? ʻOkú ke ʻilo?— Ko ha fakatātā eni. Kuó ke feinga ʻi ha taimi ke fai ha meʻa ʻoku ʻikai te ke fuʻu poto ai? Mahalo naʻá ke feinga ke ʻakahi ha foʻi pulu soka. Pe mahalo naʻá ke feinga ke tāfue. Naʻe ʻi ai nai ha taha naʻá ne pehē atu, “He! He! He! ʻE sai ange ʻeku ʻai ʻaʻakú ia ʻia koe”?— Sai, ko e tokotaha ko iá naʻe pōlepole.

ʻOku fēfē hoʻo ongoʻí ʻi he taimi ʻoku fai ai ia ʻe he niʻihi kehé? ʻOkú ke saiʻia ai?— ʻOku anga-fēfē leva hoʻo fakakaukau ki he ongoʻi ʻa e niʻihi kehé kapau ʻokú ke pōlepoleʻaki koe?— Ko e anga-lelei ia ke tala ki ha taha kehe, “ʻOku ou sai ange au ʻia koe”?— ʻOku saiʻia ʻa Sihova ʻi he kakai ʻoku nau fai iá?—

Naʻe ʻiloʻi ʻe he Faiako Lahí ha kakai naʻa nau fakakaukau ʻoku nau lelei ange ʻi he niʻihi kehé. Naʻa nau pōlepole pe fiemāʻolunga mo siolalo ki he tokotaha kehe kotoa pē. Ko ia, ʻi he ʻaho ʻe taha naʻe fai ai ʻe Sīsū kia kinautolu ha talanoa ke fakahā kia kinautolu ʻa e mātuʻaki hala ko ia ke pōlepoleʻaki kinautolú. Ta fanongo leva ki ai.

Ko e talanoá ʻoku fekauʻaki pea mo ha Fālesi mo ha tokotaha tānaki tukuhau. Sai, ko e kau Fālesí ko e kau faiako fakalotu, ʻa ia naʻa nau faʻa fai ʻo hangē naʻa nau māʻoniʻoni ange ʻi he kakai kehé. Ko e Fālesi ʻi he talanoa ʻa Sīsuú naʻá ne ʻalu hake ki he temipale ʻo e ʻOtuá ʻi Selusalemá ke fai ʻene lotu.

Naʻe pehē ʻe Sīsū naʻe toe ʻalu hake mo ha tokotaha tānaki tukuhau ki he temipalé ke fai ʻene lotu. Ko e tokolahi taha ʻo e kakaí naʻe ʻikai te nau saiʻia ʻi he kau tānaki tukuhaú. Naʻa nau ongoʻi naʻe feinga ʻa e kau tānaki tukuhaú ke kākaaʻi kinautolu. Pea ʻoku moʻoni ko e kau tānaki tukuhau tokolahi naʻe ʻikai te nau faitotonu maʻu pē.

ʻI he temipalé, naʻe kamata lotu ai ʻa e Fālesí ki he ʻOtuá ʻo peheni: ‘ʻE ʻOtua, ʻoku ou fakamālō atu he ʻoku ʻikai ko ha tangata angahala au ʻo hangē ko e kakai kehé. ʻOku ʻikai te u kākaaʻi ʻa e kakaí pe fai ha ngaahi meʻa kehe ʻoku kovi. ʻOku ʻikai te u hangē ko e tangata tānaki tukuhau ko ená. Ko ha tangata māʻoniʻoni au. ʻOku ou taʻekai tuʻo ua ʻi he uike koeʻuhi ke ʻi ai ha taimi lahi ange ke u fakakaukau atu ai kiate koe. Pea ʻoku ou foaki ki he temipalé ha vahe hongofulu ʻo e meʻa kotoa pē ʻoku ou maʻú.’ Naʻe fakakaukau moʻoni ʻa e Fālesí naʻe lelei ange ia ʻi he niʻihi kehé, ʻikai ko ia?— Pea naʻá ne tala foki ia ki he ʻOtuá.

Ka ko e tokotaha tānaki tukuhaú naʻe ʻikai ke pehē ia. Naʻe aʻu ʻo ʻikai hanga hake hono matá ki he langí ʻi he taimi naʻe lotu aí. Naʻá ne hanganaki tuʻu pē ʻi he mamaʻó mo punou hono ʻulú. Naʻe fakatomala ʻaupito ʻa e tangata tānaki tukuhaú ʻi heʻene ngaahi angahalá, pea naʻá ne tā hono fatafatá ʻi he mamahi. Naʻe ʻikai te ne feinga ke tala ki he ʻOtuá haʻane lelei. ʻI hono kehé, naʻá ne lotu: ‘ʻE ʻOtua, ke ke anga-ʻofa kiate au ko e angahala.’

Ko fē ʻi he ongo tangatá ni ʻokú ke fakakaukau naʻe leleiʻia ai ʻa e ʻOtuá? Ko e Fālesí, ʻa e tokotaha naʻá ne fakakaukau naʻe lelei ʻaupitó? Pe ko e tānaki tukuhaú, ʻa e tokotaha naʻá ne ongoʻi fakatomala ʻi heʻene ngaahi angahalá?—

Naʻe pehē ʻe Sīsū, ko e tānaki tukuhaú ʻa e tokotaha naʻe leleiʻia ai ʻa e ʻOtuá. Ko e hā hono ʻuhingá? Naʻe fakamatala ʻa Sīsū: ‘Koeʻuhí ko ia kotoa pē ʻoku feinga ke ʻai ke hā ʻo hangē ʻoku lelei ange ia ʻi he kakai kehé ʻe fakamāʻulaloʻi. Ka ko ia ʻoku anga-māʻulalo ʻi heʻene vakai ʻaʻaná ʻe hakeakiʻi.’—Luke 18:​9-14.

Ko e hā ʻa e lēsoni naʻe akoʻi ʻe Sīsū ʻi heʻene talanoá?— Naʻá ne akoʻi ʻoku hala ke fakakaukau ʻokú ta lelei ange ʻi he niʻihi kehé. ʻE ʻikai nai ke ta leaʻaki ʻoku pehē ʻeta fakakaukaú, ka ʻi he founga ʻo ʻeta ngāué, ʻe lava ke ta fakahā ai ʻokú ta fakakaukau ʻokú ta lelei ange ʻi he niʻihi kehé. Kuó ke fai pehē ʻi ha taimi?— Fakakaukau ki he ʻapositolo ko Pitá.

ʻI he taimi naʻe tala ai ʻe Sīsū ki heʻene kau ʻapositoló te nau liʻaki kotoa ia ʻi he taimi ʻe puke ai iá, naʻe pōlepole ʻa Pita: ‘Neongo kapau ʻe liʻaki koe ʻe he tokotaha kotoa, ʻe ʻikai ʻaupito te u liʻaki koe!’ Ka naʻe hala ʻa Pita. Naʻá ne fuʻu falala kiate ia. Ko e moʻoni naʻá ne liʻaki ʻa Sīsū. Kae kehe, naʻá ne toe foki mai, ʻo hangē ko ia te ta ako ʻi he Vahe 30 ʻo e tohí ni.—Mātiu 26:​31-33.

Ta sio angé ki ha fakatātā he ʻahó ni. Mahalo nai ʻoku ʻeke atu kia koe pea mo ho kaungāakó ha ngaahi fehuʻi ʻi he ʻapiakó. Fēfē kapau ʻokú ke lava ke ʻoatu ʻa e talí he taimi pē ko iá, ka ʻoku ʻikai malava ia ʻe he tokotaha ako ʻe tahá? Ko e moʻoni, ʻokú ke ongoʻi fiefia ʻi hoʻo ʻilo ʻa e talí. Ka ko e anga-ʻofa ia ke fakahoa koe ki he tokotaha ʻoku tuai ʻene talí?— ʻOku tonu ke feinga ke ʻai koe ke ke hā lelei ʻaki hono ʻai ke hā kovi ʻa e tokotaha kehé?—

Ko e meʻa ia naʻe fai ʻe he Fālesí. Naʻá ne pōlepole ʻokú ne lelei ange ʻi he tangata tānaki tukuhaú. Ka naʻe pehē ʻe he Faiako Lahí ia ʻoku hala ʻa e Fālesí. Ko e moʻoni ʻoku malava nai ʻe ha taha ke fai ha meʻa ʻo lelei ange ia ʻi hono fai ʻe he tokotaha kehé. Ka ʻoku ʻikai ke ʻuhinga iá ko ha tokotaha lelei moʻoni ia.

Ko ia, kapau ʻoku lahi ange ʻeta ʻiló ʻi ha tokotaha kehe, ko ha ʻuhinga lelei ia ke pōlepole ai?— Fakakaukau ki ai. Naʻá ta ngaohi hota foʻi ʻutó?— ʻIkai, ko e ʻOtuá ʻa e tokotaha naʻá ne foaki taki taha mai kia kitaua ha foʻi ʻutó. Pea ko e lahi taha ʻo e ngaahi meʻa ʻokú ta ʻiló, naʻá ta ako ia mei ha tokotaha kehe. Mahalo ʻokú ta lau ha ngaahi meʻa ʻi ha tohi. Pe mahalo naʻe tala mai ia ʻe ha taha kia kitaua. Neongo kapau naʻá ta ʻilo ha meʻa ʻiate kitaua pē, naʻe anga-fēfē ʻeta ʻilo iá?— ʻIo, ʻaki hono ngāueʻaki ʻa e foʻi ʻuto naʻe foaki mai ʻe he ʻOtuá.

ʻI he taimi ʻoku feinga mālohi ai ha taha, ko e meʻa leleí ke ke leaʻaki ha meʻa ʻoku ʻai ai ia ke ne ongoʻi leleí. Tala ange ki ai ʻokú ke saiʻia ʻi he meʻa naʻá ne faí. Mahalo ʻe aʻu ʻo lava ke ke tokoni ki ai ke toe lelei ange ʻene ngāué. Ko e meʻa ia ʻokú ke loto ke fai atu ʻe he kakaí kia koé, ʻikai ko ia?—

Ko e kakai ʻe niʻihi ʻoku nau mālohi ange ʻi he faʻahinga kehé. Fēfē kapau ʻokú ke mālohi ange ʻi ho tokouá, tuofefiné pe tuongaʻané? Ko ha faʻahinga ʻuhinga ia ke ke pōlepole ai?— ʻIkai, ʻoku ʻikai ko ha ʻuhinga ia ke pōlepole ai. Ko e meʻakai ia ʻokú ta kaí ʻoku tokoni ki heʻeta tupu ʻo mālohí. Pea ko e ʻOtuá ʻokú ne foaki mai ʻa e laʻaá pea mo e ʻuhá mo e meʻa kehe kotoa pē ʻoku fiemaʻu ke tupu ai ʻa e meʻakaí, ʻikai ko ia?— Ko ia, ko e ʻOtuá leva ʻoku totonu ke ta fakamālō ki aí kapau ʻokú ta tupu ʻo mālohi.—Ngāue 14:​16, 17.

ʻOku ʻikai ha taha ʻia kitaua ʻoku fie fanongo ki ha taha ʻokú ne pōlepoleʻaki ia, ʻikai ko ia?— Ta manatuʻi ʻa e lea ʻa Sīsuú: ‘Hangē ko hoʻo loto ke fai atu ʻe he kakai kehé kia koé, fai pehē kia kinautolu.’ Kapau te ta fai ia, ʻe ʻikai ʻaupito ai te ta hangē ko e Fālesi ʻa ia naʻá ne pōlepoleʻaki ia ʻi he talanoa naʻe fai ʻe he Faiako Lahí.—Luke 6:⁠31.

ʻI he taimi ʻe taha, naʻe ʻi ai ha taha naʻá ne ui ʻa Sīsū ʻoku lelei. Naʻe pehē ʻe he Faiako Lahí, ‘ʻIo, ʻoku ou lelei’?— ʻIkai, naʻe ʻikai te ne lea pehē. ʻI he kehe mei aí, naʻá ne pehē: “ʻOku ʻikai ha taha ʻoku lelei, ngata pe ʻi he ʻOtua toko taha.” (Maake 10:18) Neongo naʻe haohaoa ʻa e Faiako Lahí, naʻe ʻikai te ne pōlepoleʻaki ia. ʻI hono kehé, naʻá ne tuku ʻa e fakahīkihiki kotoa pē ki heʻene Tamaí, kia Sihova.

Ko ia, ʻoku ʻi ai ha taha ʻe lava ke ta pōlepoleʻaki?— ʻIo, ʻoku ʻi ai. ʻOku malava ke ta pōlepoleʻaki hota Tokotaha-Fakatupú, ʻa Sihova ko e ʻOtuá. ʻI he taimi ʻokú ta sio ai ki he fakaʻofoʻofa ʻa e tō ʻa e laʻaá pe ko ha meʻa fakaofo kehe ʻo e fakatupú, ʻe lava ke ta tala ki ha taha, ‘Ko hotau ʻOtua lelei ko Sihová naʻá ne ngaohi ení!’ Ta mateuteu maʻu pē ke lea ʻo fekauʻaki mo e ngaahi meʻa lelei ʻaupito kuo ʻosi fai ʻe Sihová pea mo ia te ne fai ʻi he kahaʻú.