KONGA 5

Ko e Fuʻu Lōmakí—Ko Hai Naʻe Fanongó? Ko Hai Naʻe ʻIkai Fanongó?

Ko e tokolahi taha ʻo e kakai ʻi he taimi ʻo Noá naʻa nau fai ʻa e meʻa naʻe kovi. Sēnesi 6:5

Liliu sino fakakakano ‘a e kau ‘āngeló ‘o feohi mo e kakai fefiné

Naʻe maʻu fānau ʻa ʻĀtama mo ʻIvi, pea naʻe hoko ʻo tokolahi ʻa e kakaí ʻi he māmaní. ʻI he faai mai ʻa e taimí, naʻe kau ha kau ʻāngelo ʻi he angatuʻu ʻa Sētané.

Naʻa nau haʻu ki he māmaní pea nau ʻai ʻa e ngaahi sino fakaetangata koeʻuhi ke nau malava ʻo mali mo ha kakai fefine. Naʻe fāʻeleʻi ʻe he kakai fefiné ha ngaahi foha naʻe mahulu hake ia he tangatá, ʻa ia naʻa nau anga-kakaha mo mālohi.

Fua ‘e ha fefine ha ki‘i pēpē kae tā ia ‘e ha ki‘i tamasi‘i; ko e Nefilimi, ko e ngaahi foha ‘o e kau ‘āngelo fulikivanú, na‘a nau tō‘onga fakamālohi

Naʻe hoko ʻo fonu ʻa e māmaní ʻi he kakai naʻa nau fai ʻa e ngaahi meʻa naʻe kovi. ʻOku lave ʻa e Tohi Tapú “ki he lahi fau ʻa e fulikivanu ʻa e tangatá ʻi he māmaní pea ko e hehema kotoa ʻo e ngaahi fakakaukau ʻo hono lotó naʻe kovi pē ʻi he taimi kotoa pē.”

Naʻe fanongo ʻa Noa ki he ʻOtuá peá ne langa ha ʻaʻake. Sēnesi 6:13, 14, 18, 19, 22

Ko Noá ko ha tangata lelei. Naʻe folofola ʻa Sihova kia Noa te Ne fakaʻauha ʻa e kakai fulikivanú ʻaki ha fuʻu lōmaki.

Naʻe toe folofola ʻa e ʻOtuá kia Noa ke ne langa ha fuʻu vaka lahi, naʻe ui ko ha ʻaʻake, pea ke ne fakahū ki ai hono fāmilí pea mo e faʻahinga kotoa pē ʻo e fanga manú.

Fakatokanga ‘a Noa ki he kakaí fekau‘aki mo e hoko mai ‘a e Lōmakí ka na‘a nau kata‘i ia

Naʻe fakatokanga ʻa Noa ki he kakaí ʻo fekauʻaki mo e Lōmaki naʻe teu ke hoko maí, ka naʻe ʻikai te nau fanongo. Naʻe kataʻi ʻe he niʻihi ʻa Noa; ko e niʻihi naʻa nau fehiʻa ʻiate ia.

Fakatahataha‘i ‘e Noa mo hono fāmilí ‘a e fanga manú ke nau hū ki he ‘a‘aké

ʻI he ʻosi ʻa e ʻaʻaké, naʻe fakahū ʻe Noa ʻa e fanga manú ki loto.