KONGA 8

Ko e Hā ʻEne ʻUhinga Kiate Koe ʻa e Pekia ʻa Sīsuú?

Naʻe pekia ʻa Sīsū koeʻuhi kae lava ke tau moʻui. Sione 3:16

Sio ‘a e kau fefiné ki he fonualoto ‘o Sīsuú ‘oku ‘ikai ‘i ai ha taha

ʻI he hili ʻa e ʻaho ʻe tolu mei he pekia ʻa Sīsuú, naʻe ʻaʻahi ha kau fefine ki hono fonualotó ʻo nau ʻiloʻi ʻoku ʻikai ʻi ai ha taha. Naʻe ʻosi fokotuʻu ʻe Sihova ia ʻa Sīsū mei he maté.

Hā ‘a Sīsū ki he‘ene kau ‘apositoló, pea toki ‘alu hake leva ki hēvani

Naʻe hā ʻa Sīsū ki mui ai ki heʻene kau ʻapositoló.

ʻIo, naʻe fokotuʻu mai ʻe Sihova ʻa Sīsū ki he moʻuí ʻi he tuʻunga ko ha meʻamoʻui laumālie mālohi taʻefaʻamate. Ko e kau ākonga ʻa Sīsuú naʻa nau mamata kiate ia heʻene ʻalu hake ki hēvaní.

Naʻe fokotuʻu hake ʻe he ʻOtuá ʻa Sīsū pea ʻai ia ko ha Tuʻi ʻo e Puleʻanga ʻo e ʻOtuá. Taniela 7:13, 14

Mei hono taloni ‘i he Pule‘angá, ‘e pule mai ‘a Sīsū ki he kakai ‘i ha māmani palataisi

Naʻe foaki ʻe Sīsū ʻa ʻene moʻuí ke totongi ai ha huhuʻi maʻá e faʻahinga ʻo e tangatá. (Mātiu 20:28) Fakafou ʻi he huhuʻi ko iá, ʻoku ʻai ai ʻe he ʻOtuá ʻo malava kiate kitautolu ke tau moʻui taʻengata.

Naʻe fakanofo ʻe Sihova ʻa Sīsū ko ha Tuʻi ke pule mai ki he māmaní. ʻE kau fakataha mo ia ha kakai faitōnunga ʻe toko 144,000 ʻa ia kuo fokotuʻu hake mei he māmaní ki he moʻui ʻi hēvaní. Ko Sīsū mo e toko 144,000 ʻoku faʻuʻaki kinautolu ha founga-pule fakahēvani māʻoniʻoni—ko e Puleʻanga ʻo e ʻOtuá.—Fakahā 14:1-3.

Ko e Puleʻanga ʻo e ʻOtuá te ne ʻai ʻa e foʻi māmaní ko ha palataisi. ʻE ʻikai ke toe ʻi ai ha tau, faihia, masiva, mo e fiekaia. ʻE fiefia moʻoni ʻa e kakaí.—Saame 145:16.