ʻOku Fēfē ʻEmau Tokoni ki Homau Fanga Tokoua ʻOku Faingataʻaʻiá?

ʻI he taimi ʻoku hoko ai ha fakatamaki, ʻoku fokotuʻutuʻu maau leva ʻe he Kau Fakamoʻoni ʻa Sihová ʻa e tokoni ke ʻoatu ha fakafiemālie ki honau fanga tokoua ʻoku uesiá. Ko e ngaahi feinga peheé ʻoku fakahaaʻi ai ʻa e moʻoni ʻo ʻemau feʻofaʻakí. (Sione 13:34, 35; 1 Sione 3:17, 18) ʻI he ngaahi founga fē ʻoku mau tokoni aí?

ʻOku mau foaki ʻa e paʻanga. ʻI he taimi naʻe hoko ai ha honge lahi ʻi Siuteá, ko e muʻaki kau Kalisitiane ʻi ʻAniteoké naʻa nau ʻave ʻa e tokoni fakapaʻanga ki honau fanga tokoua fakalaumālié. (Ngāue 11:27-30) ʻOku pehē pē, ʻi he taimi ʻoku mau ʻilo ai ʻoku fehangahangai homau fanga tokoua ʻi he feituʻu ʻe niʻihi ʻo e māmaní mo e faingataʻá, ʻoku mau ʻave ʻa e ngaahi tokoni fakafou ʻi heʻemau fakatahaʻanga fakalotofonuá ke faiʻaki ʻa e tokoni fakamatelie ki he faʻahinga ko ia ʻoku ʻi ai ʻenau fiemaʻu vivilí.​—2 Kolinitō 8:13-15.

ʻOku mau tokonaki ʻa e tokoni ʻaonga. Ko e kau mātuʻa ʻoku nau ʻi he feituʻu ʻo ha fakatamakí ʻoku nau kumi ʻa e mēmipa taki taha ʻo e fakatahaʻangá ke fakapapauʻi ʻoku nau ʻi ai pea ʻoku malu ʻa e tokotaha kotoa. ʻOku fokotuʻutuʻu nai ʻe ha kōmiti tokoni ʻa e tokonaki meʻakai, vai inu maʻa, vala, nofoʻanga, mo e tokoni fakafaitoʻo. Ko e Kau Fakamoʻoni tokolahi ʻoku ʻi ai ʻenau ngaahi pōtoʻi ʻoku fiemaʻú ʻoku nau pole ke ʻalu ʻi he fakamole pē ʻa kinautolu ʻo kau ʻi he ngāue tokoní pe ke monomono ʻa e ngaahi ʻapi mo e ngaahi Fale Fakatahaʻanga kuo maumaú. Ko e fāʻūtaha ʻoku mau maʻu ʻi he tuʻunga ko ha kautahá mo e taukei kuo mau maʻu ʻi he ngāue fakatahá kuo ʻai ai ke mau malava ʻo tānaki vave ʻa e tokoni mo e kau ngāue ʻoku fiemaʻú ʻi he ngaahi taimi ʻo e faingataʻá. Neongo ʻoku mau fakaaʻu atu ʻemau tokoní ki he ‘faʻahinga ʻoku fekauʻaki mo kimautolu ʻi he tuí,’ ʻoku mau toe tokoni foki ki he niʻihi kehé ʻo ka malava, ʻo tatau ai pē pe ko e hā ʻa e lotu ʻoku nau kau ki aí.​—Kalētia 6:10.

ʻOku mau ʻoatu ʻa e poupou fakalaumālie mo fakaeongo. Ko e kau maʻukovia ʻi ha fakatamaki ʻoku nau fiemaʻu tefito ʻa e fakafiemālie. ʻI he ngaahi taimi peheé, ʻoku mau maʻu ʻa e mālohi meia Sihova, ʻa e “ʻOtua ʻo e fakafiemālie kotoa pē.” (2 Kolinitō 1:3, 4) ʻOku mau vahevahe fiefia ʻa e ngaahi talaʻofa ʻa e Tohi Tapú ki he faʻahinga ʻoku siva ʻenau ʻamanakí, ʻo ʻoatu ʻa e fakapapau kuo vavé ni ke hanga ʻe he Puleʻanga ʻo e ʻOtuá ʻo fakangata ʻa e ngaahi meʻa fakamamahi kotoa pē ʻokú ne fakatupunga ʻa e langá mo e faingataʻaʻiá.​—Fakahā 21:4.

• Ko e hā ʻoku malava ai ʻa e Kau Fakamoʻoní ke fakafeangai vave ʻi he lolotonga ʻa e ngaahi fakatamakí?

• Ko e hā ʻa e fakafiemālie fakalaumālie ʻe lava ke mau vahevahe ki he kau hao moʻuí?