ʻOku Anga-Fēfē Ngāue he ʻAhó Ni ʻa e Kulupu Pulé?

ʻI he ʻuluaki senitulí, ko ha kiʻi kulupu, ʻa ia ko e ‘kau ʻapositolo pea mo e kau mātuʻa ʻi Selusalema,’ naʻa nau ngāue ko ha kulupu pule ke nau fai ʻa e ngaahi fili mahuʻinga maʻá e fakatahaʻanga Kalisitiane paní fakakātoa. (Ngāue 15:2) ʻI he taimi naʻa nau fai ai ha fili loto-tahá, ko e tupu ia mei ha lāulea ki he meʻa ʻoku leaʻaki ʻe he Folofolá mo e ʻulutukua ki he tataki ʻa e laumālie ʻo e ʻOtuá. (Ngāue 15:25) Ko e sīpinga ko iá ʻoku muimui ki ai he ʻaho ní.

ʻOku ngāueʻaki ia ʻe he ʻOtuá ke fai hono finangaló. Ko e fanga tokoua pani ʻoku nau ngāue ʻi he Kulupu Pulé ʻoku nau mahuʻingaʻia lahi ʻi he Folofola ʻa e ʻOtuá pea maʻu ʻa e taukei lahi ʻi hono fakapapauʻi ʻa e founga ke fai ai ʻa e ngāué mo e ngaahi meʻa fakalaumālié. ʻOku nau fakataha ʻi he uike taki taha ke lāulea ai ki he ngaahi fiemaʻu ʻa e fetokouaʻaki ʻi māmani lahí. Hangē ko ia ʻi he ʻuluaki senitulí, ko e ngaahi fakahinohino makatuʻunga ʻi he Tohi Tapú ʻoku tokonaki mai ia fakafou ʻi he ngaahi faitohi pe fakafou ʻi he kau ʻovasia fefonongaʻaki pea mo e niʻihi kehe. ʻOku pouaki ʻe he meʻá ni ʻa e fāʻūtaha ʻi he fakakaukau mo e ngāue ʻi he haʻohaʻonga ʻo e kakai ʻa e ʻOtuá. (Ngāue 16:4, 5) ʻOku tokangaʻi ʻe he Kulupu Pulé ʻa hono teuteu ʻo e meʻakai fakalaumālié, fakamuʻomuʻa ʻa e ngāue malangaʻi ʻo e Puleʻangá, pea tokangaʻi ʻa hono fakanofo ʻo e fanga tokouá ki he ngaahi tuʻunga fua fatongiá.

ʻOku ongongofua ia ki he tataki ʻa e laumālie ʻo e ʻOtuá. ʻOku hanga ʻa e Kulupu Pulé ki he Hau Fakalevelevá, ʻa Sihova, pea ki he ʻUlu ʻo e fakatahaʻangá, ʻa Sīsū, ki ha tataki. (1 Kolinitō 11:3; ʻEfesō 5:23) Ko hono kau mēmipá ʻoku ʻikai ke nau vakai kia kinautolu ko e kau taki ʻo e kakai ʻa e ʻOtuá. Ko kinautolu, fakataha mo e kau Kalisitiane paní kotoa, “ʻoku nau hanganaki muimui ʻi he Lamí [ʻa Sīsū] ʻo tatau ai pē pe ko fē ʻokú ne ʻalu ki aí.” (Fakahā 14:4) Ko e Kulupu Pulé ʻoku nau houngaʻia ʻi heʻemau ngaahi lotu ʻoku fai maʻanautolú.

• Ko hai naʻe kau ʻi he kulupu pule he ʻuluaki senitulí?

• ʻOku anga-fēfē kumi he ʻahó ni ʻa e Kulupu Pulé ki he tataki ʻa e ʻOtuá?