ʻE Lava Fēfē Ke Ke ʻUnuʻunu Ofi ki he ʻOtuá?

1. ʻOku fanongo mai ʻa e ʻOtuá ki he ngaahi lotu kotoa pē?

ʻOku fakaafeʻi ʻe he ʻOtuá ʻa e kakai ʻo e ngaahi puleʻanga kotoa pē ke nau ʻunuʻunu ofi ange kiate ia ʻi he lotu. (Saame 65:2) Kae kehe, ʻoku ʻikai te ne fanongo, pe tali, ʻa e ngaahi lotu kotoa pē. Ko e fakatātaá, ko e ngaahi lotu ʻa ha tangata ʻokú ne ngaohikoviʻi hono uaifí ʻe ʻikai ke fanongo mai ki ai ʻa e ʻOtuá. (1 Pita 3:7) Pehē foki, ʻi he taimi naʻe kīvoi ai ʻa e kau ʻIsilelí ʻi he faikoví, naʻe fakafisi ʻa e ʻOtuá ke fanongo ki heʻenau ngaahi lotú. ʻOku hā mahino, ko e lotú ko ha monū. Ka neongo ia, ʻe tali ʻe he ʻOtuá ʻa e ngaahi lotu ʻa e faʻahinga naʻa mo e kau faiangahala mamafá kapau ʻoku nau fakatomala.​—Lau ʻa e ʻAisea 1:15; 55:7.

Sio ʻi he vitiō ʻOku Fanongo Mai ʻa e ʻOtuá ki he Ngaahi Lotu Kotoa Pē?

2. ʻOku totonu ke fēfē ʻetau lotú?

Ko e lea ʻo lotú ko ha konga ia ʻo e lotu ʻoku tau faí, ko ia ʻoku totonu ke tau lotu pē ki hotau Tokotaha-Fakatupú, kia Sihova. (Mātiu 4:10; 6:9) Pehē foki, koeʻuhi ʻoku tau taʻehaohaoa, ʻoku totonu ke tau lotu ʻi he huafa ʻo Sīsuú koeʻuhí naʻá ne pekia koeʻuhí ko ʻetau ngaahi angahalá. (Sione 14:6) ʻOku ʻikai ke fiemaʻu mai ʻe Sihova ke tau toutou leaʻaki ha ngaahi lotu ʻoku maʻuloto pe kuo hiki. ʻOkú ne fiemaʻu mai ke tau lotu mei hotau lotó.​—Lau ʻa e Mātiu 6:7; Filipai 4:6, 7.

ʻOku malava ʻa hotau Tokotaha-Fakatupú ke ne fanongo mai ʻo aʻu ki he ngaahi lotu fakalongolongó. (1 Sāmiuela 1:12, 13) ʻOkú ne fakaafeʻi mai kitautolu ke tau lotu ange ʻi he taimi kotoa pē, hangē ko ia ʻi he kamataʻanga mo e ngataʻanga ʻo e ʻahó, ʻi he ngaahi taimi kaí, pea ʻi he taimi ʻoku tau fehangahangai ai mo e ngaahi palopalemá.​—Lau ʻa e Saame 55:22; Mātiu 15:36.

3. Ko e hā ʻoku fakataha fakatahataha ai ʻa e kau Kalisitiané?

ʻOku ʻikai faingofua ke ʻunuʻunu ofi ki he ʻOtuá koeʻuhí ʻoku tau nofo ʻi he lotolotonga ʻo e kakai ʻoku ʻikai ke nau tui ki he ʻOtuá pea mo manukiʻi ʻene talaʻofa ki ha melino ʻi he māmaní. (2 Tīmote 3:1, 4; 2 Pita 3:3, 13) Ko ia ʻoku fiemaʻu kiate kitautolu ʻa e feohi fakalototoʻa ʻa e ngaahi kaungātuí, pea ʻoku nau fiemaʻu kitautolu.​—Lau ʻa e Hepelū 10:24, 25.

Ko e feohi mo e kakai ʻoku nau ʻofa ki he ʻOtuá ʻe tokoniʻi ai kitautolu ke tau ʻunuʻunu ofi ki he ʻOtuá. ʻOku tokonaki mai ʻe he ngaahi fakataha ʻa e Kau Fakamoʻoni ʻa Sihová ʻa e ngaahi faingamālie lelei ke tau maʻu ʻaonga ai mei he tui ʻa e niʻihi kehé.​—Lau ʻa e Loma 1:11, 12.

4. ʻE lava fēfē ke ke ʻunuʻunu ofi ki he ʻOtuá?

ʻE lava ke ke ʻunuʻunu ofi kia Sihova ʻaki hoʻo fakalaulauloto ki he meʻa kuó ke ako mei heʻene Folofolá. Fakakaukauloto atu ki heʻene ngaahi ngāué, ki heʻene faleʻí, pea mo ʻene ngaahi talaʻofá. Ko e fakalaulauloto faʻa lotú ʻoku langa hake ai ʻa e houngaʻia ʻi hotau lotó ki he ʻofa mo e poto ʻa e ʻOtuá.​—Lau ʻa e Siosiua 1:8; Saame 1:1-3.

ʻE lava ke ke ofi ki he ʻOtuá ʻo kapau pē ʻokú ke falala kiate ia, kapau ʻokú ke tui kiate ia. Ka ko e tuí ʻoku hangē ha meʻamoʻuí ʻa ia ʻoku fiemaʻu ke fafangaʻi. Kuo pau ke ke fafangaʻi tuʻumaʻu hoʻo tuí ʻaki hono toe vakaiʻi ʻa e makatuʻunga ki hoʻo ngaahi tuí.​—Lau ʻa e Mātiu 4:4; Hepelū 11:1, 6.

5. ʻE ʻaonga fēfē kiate koe ʻa e ʻunuʻunu ofi ki he ʻOtuá?

ʻOku tokanga mai ʻa Sihova ki he faʻahinga ʻoku ʻofa ʻiate iá. ʻOku lava ke ne maluʻi kinautolu mei ha meʻa pē ʻe lava ke ne maumauʻi ʻenau tuí mo ʻenau ʻamanaki ki he moʻui taʻengatá. (Saame 91:1, 2, 7-10) ʻOkú ne fakatokanga mai kiate kitautolu fekauʻaki mo e founga moʻui ʻa ia ʻokú ne fakamanamanaʻi ʻetau moʻui leleí mo ʻetau fiefiá. ʻOku akoʻi mai ʻe Sihova kiate kitautolu ʻa e founga moʻui lelei tahá.​—Lau ʻa e Saame 73:27, 28; Sēmisi 4:4, 8.