Ko e Hā ʻa e Ongoongo Lelei Fekauʻaki mo e Lotú?

1. ʻOku lelei ʻa e lotu kotoa pē?

ʻOku ʻi ai ha kakai loto-totonu ʻi he ngaahi lotu kotoa pē. Ko e ongoongo lelei ia ʻa e ʻafio mai ʻa e ʻOtuá ki he kakai ko iá pea tokanga mai fekauʻaki mo kinautolu. Ka ko e meʻa fakamamahí, kuo ngāueʻaki ʻa e lotú ki he ngaahi taumuʻa kovi. (2 Kolinitō 4:3, 4; 11:13-15) Fakatatau ki he ngaahi ongoongó, ʻoku aʻu ʻa e ngaahi lotu ia ʻe niʻihi ʻo kau ʻi he ngāue fakaetautoitoí, fakaʻauha fakafaʻahingá, taú, mo e ngaohikoviʻi ʻa e fānaú. He fakalotomamahi ē ko e meʻá ni ki he kau tui loto-totonu ki he ʻOtuá!​—Lau ʻa e Mātiu 24:3-5, 11, 12.

Lolotonga ʻoku fakalāngilangiʻi ʻe he lotu moʻoní ʻa e ʻOtuá, ʻoku taʻefakahōifuaʻi ia ʻe he lotu loí. ʻOkú ne akoʻi ʻe ia ʻa e ngaahi fakakaukau ʻoku ʻikai ke ʻi he Tohi Tapú, ʻo kau ai ʻa e ngaahi akonaki loi fekauʻaki mo e ʻOtuá pea fekauʻaki mo e kau maté. Ka ʻoku fiemaʻu ʻe Sihova ia ʻa e kakaí ke nau ʻiloʻi ʻa e moʻoni ʻo kau kiate iá.​—Lau ʻa e ʻIsikeli 18:4; 1 Tīmote 2:3-5.

2. Ko e hā ʻa e ongoongo lelei fekauʻaki mo e lotú?

Ko e meʻa fakafiefiá, ʻoku ʻikai ke kākaaʻi ʻa e ʻOtuá ʻe he ngaahi lotu ʻoku nau taukaveʻi ʻoku nau ʻofa ʻiate ia ka ʻoku nau ʻofa moʻoni kinautolu ʻi he māmani ʻa Sētané. (Sēmisi 4:4) ʻOku lave ʻa e Folofola ʻa e ʻOtuá ki he lotu loi kotoa pē ko “Pāpilone ko e Lahi.” Ko Pāpiloné ko e fuʻu kolo ia ʻi he kuonga muʻá naʻe kamata ai ʻa e lotu loí hili ʻa e Lōmaki ʻo e ʻaho ʻo Noá. Kuo vavé ni, ke ʻomai ʻe he ʻOtuá ha ngataʻanga fakafokifā ki he lotu ko ia ʻokú ne kākaaʻi mo lōmekina ʻa e faʻahinga ʻo e tangatá.​—Lau ʻa e Fakahā 17:1, 2, 5, 16, 17; 18:8.

ʻOku ʻi ai ʻa e ongoongo lelei lahi ange. Kuo ʻikai ngalo ʻia Sihova ʻa e kakai loto-totonu ko ia ʻoku nau movetevete holo ʻi he lotolotonga ʻo e ngaahi lotu loí ʻi māmani lahí. ʻOkú ne fakafāʻūtahaʻi ʻa e kakai peheé ʻaki hono akoʻi kiate kinautolu ʻa e moʻoní.​—Lau ʻa e Maika 4:2, 5.

3. Ko e hā ʻoku totonu ke fai ʻe he kakai loto-totonú?

ʻOku tokanga mai ʻa Sihova fekauʻaki mo e kakai ko ia ʻoku nau ʻofa ʻi he meʻa ʻoku moʻoní mo leleí. ʻOkú ne enginaki kiate kinautolu ke nau mavahe mei he lotu loí. Ko e kakai ʻoku nau ʻofa ʻi he ʻOtuá ʻoku nau loto-lelei ke fai ha ngaahi liliu ke fakahōifuaʻi ia.​—Lau ʻa e Fakahā 18:4.

ʻI he ʻuluaki senitulí, ʻi he taimi naʻe fanongo ai ʻa e kakai loto-totonú ki he ongoongo leleí mei he kau ʻapositoló, naʻa nau tali ia mo e fiefia. Naʻa nau ako ai ha founga moʻui foʻou meia Sihova, ko ha founga moʻui fiefia ange fakataha mo ha taumuʻa pea mo ha ʻamanaki. Ko ha faʻifaʻitakiʻanga lelei kinautolu kiate kitautolu ʻi he ʻaho ní koeʻuhí naʻa nau fai ha tali ki he ongoongo leleí ʻaki hono ʻai ʻa Sihova ke muʻomuʻa ʻi heʻenau moʻuí.​—Lau ʻa e 1 Tesalonaika 1:8, 9; 2:13.

ʻOku talitali lelei ʻe Sihova ki hono fāmili ʻo ʻene kau lotú ʻa e faʻahinga ko ia ʻoku nau tafoki mei he lotu loí. Kapau ʻokú ke tali ʻa e fakaafe loto-māfana ʻa Sihová, te ke hoko ai ko hono kaumeʻa, ko ha fāmili foʻou mo ʻofa ʻo e ngaahi kaungālotu kia Sihová, mo e moʻui taʻengata.​—Lau ʻa e Maʻake 10:29, 30; 2 Kolinitō 6:17, 18.

4. ʻE anga-fēfē hono ʻomai ʻe Sihova ʻa e fiefia ki he fonua kotoa pē?

Ko e fakamaau ʻo e lotu loí ʻoku tuʻunuku maí ko ha ongoongo lelei ia. Te ne ʻomai ʻa e nonga ki māmani lahi mei he fakafeʻātungiá. ʻE ʻikai ʻaupito ke toe hanga ʻe ha lotu loi ʻo takihalaʻi mo fakamavahevaheʻi ʻa e faʻahinga ʻo e tangatá. Ko e faʻahinga kotoa pē ʻe moʻuí te nau fāʻūtaha ʻi he lotu ki he ʻOtua moʻoni pē tahá.​—Lau ʻa e Fakahā 18:20, 21; 21:3, 4.