Ko ha Fakapulipuli ʻOku Tau Fiefia ke ʻIloʻi

Kuo ʻosi tala atu ʻe ha taha ha fakapulipuli kia koe?—a ʻOku talanoa ʻa e Tohi Tapú fekauʻaki mo ha fakapulipuli makehe naʻe ui ko e “fakalilolilo toputapu” pe fakapulipuli. ʻOku toputapu ia koeʻuhí ko e ʻomai mei he ʻOtuá. Pea ʻoku ui ko e fakapulipulí koeʻuhí naʻe ʻikai ke ʻilo ki ai ʻa e kakaí. Naʻa mo e kau ʻāngeló naʻa nau loto ke ʻilo lahi ange fekauʻaki mo eni. Te ke saiʻia ke ʻilo pe ko e hā ʻa e fakapulipuli ko ení?—

ʻI he taimi fuoloa atú, naʻe fakatupu ʻe he ʻOtuá ʻa e ʻuluaki tangatá mo e fefiné. Ko hona hingoá ko ʻĀtama mo ʻIvi. Naʻe ʻoange ʻe he ʻOtuá kiate kinaua ha ʻapi fakaʻofoʻofa naʻe ui ko e ngoue ko ʻĪtení. Kapau naʻe talangofua ʻa ʻĀtama mo ʻIvi ki he ʻOtuá, ko kinaua mo ʻena fānaú naʻe mei malava ke nau ngaohi ʻa e kotoa ʻo e māmaní ko ha palataisi ʻo hangē ko e ngoue ko iá. Pea ʻe lava ke nau nofo ʻi he Palataisí ʻo taʻengata. Ka ʻokú ke manatuʻi ʻa e meʻa naʻe fai ʻe ʻĀtama mo ʻIví?—

Naʻe talangataʻa ʻa ʻĀtama mo ʻIvi ki he ʻOtuá, pea ko e ʻuhinga ia ʻoku ʻikai ke tau nofo ai ʻi ha palataisi he ʻaho ní. Ka naʻe tala ʻe he ʻOtuá te ne ʻai ʻa e māmaní kotoa ke fakaʻofoʻofa pea ko e tokotaha kotoa pē ʻe lava ke nau moʻui taʻengata mo fiefia. ʻE anga-fēfē ʻene fai ení? ʻI ha vahaʻa taimi fuoloa, naʻe ʻikai ke ʻilo ia ʻe he kakaí. Ko ha fakapulipuli ia.

ʻI he taimi naʻe haʻu ai ʻa Sīsū ki he māmaní, naʻá ne akoʻi lahi ange ʻa e kakaí fekauʻaki mo e fakapulipuli ko ení. Naʻá ne pehē ʻoku fekauʻaki ia mo e Puleʻanga ʻo e ʻOtuá. Naʻe tala ʻe Sīsū ki he kakaí ke nau lotu ke hoko mai ʻa e Puleʻanga ko ení. Te ne ʻai ʻa e māmaní ko ha palataisi fakaʻofoʻofa.

ʻOkú ke fiefia ke ʻilo ki he fakapulipuli ko ení?— Manatuʻi ko e faʻahinga pē ʻoku talangofua kia Sihová ʻe nofo ʻi he Palataisí. ʻOku tala mai ʻe he Tohi Tapú kiate kitautolu ʻa e ngaahi talanoa fekauʻaki mo e kau tangata mo e kau fefine naʻa nau talangofua kia Sihova. Te ke saiʻia ke ke ako fekauʻaki mo kinautolu?— Tau sio angé ki he niʻihi ʻo kinautolu pea mo e founga ʻe lava ke tau hoko ai ʻo hangē ko kinautolú.