Naʻe Fai Maʻu Pē ʻe Sāmiuela ʻa e Meʻa Naʻe Totonú

ʻI he taimi naʻe kei siʻi ai ʻa Sāmiuelá, naʻá ne nofo mo ngāue ʻi he tāpanekalé, ko e feituʻu ia naʻe haʻu ki ai ʻa e kakaí ke lotu kia Sihova. ʻOkú ke ʻiloʻi ʻa e ʻuhinga naʻe ʻi he tāpanekalé ai ʻa Sāmiuelá? Tau ʻuluaki ako angé fekauʻaki mo e faʻē ʻa Sāmiuelá, ʻa ʻAna.

Ko e taimi fuoloa, ʻa e ʻikai malava ʻa ʻAna ke maʻu ha tama neongo naʻá ne fiemaʻu moʻoni ia. Ko ia, naʻá ne lotu kia Sihova ʻo kōlenga kiate ia ke tokoni mai ki ai. Naʻá ne palōmesi kapau te ne maʻu ha tama te ne ʻave ia ke nofo mo ngāue ʻi he tāpanekalé. Naʻe tali ʻe Sihova ʻa e lotú ʻa ʻAná, pea naʻá ne maʻu ha tama. Naʻá ne fakahingoa ia ko Sāmiuela. Pea hangē ko ia ko e palōmesi ʻa ʻAná, ʻi he taimi naʻe taʻu tolu pe taʻu fā ai ʻa Sāmiuelá naʻá ne ʻave ia ki he tāpanekalé ke ngāue ai ki he ʻOtuá.

Ko ʻĪlai naʻe taulaʻeiki lahi ʻi he tāpanekalé. Naʻe ngāue foki ʻi ai hono ongo fohá. Manatuʻi, ko e tāpanekalé ko e fale ia ʻo e ʻOtuá ʻoku fai ai e lotú, ko e kakaí kuo pau ke nau fai ʻi ai ʻa e ngaahi meʻa ʻoku leleí. Ka ko e ongo foha ʻo ʻĪlaí naʻá na fai ʻa e ngaahi meʻa naʻe kovi ʻaupito. Naʻe sio ʻa Sāmiuela ki he meʻa naʻá na faí. Naʻe fai ʻe Sāmiuela ha meʻa kovi ʻo hangē ko e ongo foha ʻo ʻĪlaí?— ʻIkai, naʻá ne fai maʻu pē ʻa e meʻa naʻe totonú, ʻo hangē ko e meʻa naʻe akoʻi ange heʻene ongo mātuʻá.

Ko e hā hoʻo fakakaukau ki he meʻa naʻe totonu ke fai ʻe ʻĪlai ki hono ongo fohá?— Naʻe totonu ke ne tauteaʻi kinaua. Naʻe totonu ke ʻoua te ne toe fakangofua ke na ngāue ʻi he fale ʻo e ʻOtuá. Ka naʻe ʻikai ke fai ia ʻe ʻĪlai, ko ia naʻe houhau ʻa Sihova kiate ia mo hono ongo fohá. Naʻe fakapapauʻi ʻe Sihova ke tauteaʻi kinautolu.

ʻI ha pō ʻe taha ʻi he kei mohe ʻa Sāmiuelá, naʻá ne fanongo ki ha tokotaha ʻokú ne ui ia: ‘Sāmiuela!’ Naʻá ne lele kia ʻĪlai, ka naʻe tala ange ʻe ʻĪlai: ‘Naʻe ʻikai ke u ui koe.’ Naʻe tuʻo ua ʻa e hoko ʻa e meʻá ni. ʻI hono tuʻo tolú, naʻe tala ange ʻe ʻĪlai kia Sāmiuela kapau te ne toe fanongo ki ha leʻo, ʻoku totonu leva ke ne pehē: ‘Fakamolemole Sihova, Lea mai; ʻoku ou fanongo atu.’ Ko ia ko e meʻa ia naʻe fai ʻe Sāmiuelá. Naʻe toki pehē ʻe Sihova kia Sāmiuela: ‘Tala kia ʻĪlai te u tauteaʻi hono fāmilí ki he ngaahi meʻa kovi kuo nau faí.’ ʻOkú ke fakakaukau naʻe faingofua kia Sāmiuela ke ne fakahoko ʻa e fekau ko ení kia ʻĪlai?— ʻIkai, naʻe ʻikai ke faingofua. Ka neongo naʻe ilifia ʻa Sāmiuela, naʻá ne fai ʻa e meʻa naʻe tala ange ʻe Sihova kiate ia ke ne faí. Ko e meʻa naʻe leaʻaki ʻe Sihová naʻe hoko moʻoni ia. Naʻe tāmateʻi ʻa e ongo foha ʻo ʻĪlaí pea naʻe mate mo ʻĪlai foki.

Ko Sāmiuelá ko ha faʻifaʻitakiʻanga lelei kia kitautolu. Naʻá ne fai ʻa e meʻa naʻe totonú neongo naʻá ne sio ki he niʻihi kehé naʻa nau fai ʻa e ngaahi meʻa naʻe koví. Kae fēfē koe? Te ke hangē ko Sāmiuelá ʻo fai maʻu pē ʻa e meʻa ʻoku totonú? Kapau te ke fai pehē te ke ʻai ai ʻa Sihova mo hoʻo ongo mātuʻá ke nau fiefia.