Poupouʻi Fakalotofonua mo Fakamāmanilahi ʻa e Ngāue ʻo e Puleʻangá

ʻI HONO fakahoko ʻo e kikite ʻa Sīsū fekauʻaki mo e ngaahi ʻaho fakaʻosí, kuo malangaʻi ai ʻe he Kau Fakamoʻoni ʻa Sihová ʻa e ongoongo leleí “ki he feituʻu taupotu taha ʻo e māmaní.” (Ngā. 1:8; Māt. 24:14) Ke fai ení, kuo nau foaki tauʻatāina ai honau taimí mo honau iví ʻi hono vahevahe atu ʻo e ngaahi meʻa fakalaumālié. ʻI he falala ʻe tokonaki ʻa Sihova maʻa hono kaungāngāué, ʻoku nau hokohoko atu ʻi hono fakamuʻomuʻa ʻa e Puleʻanga ʻo e ʻOtuá ʻi heʻenau moʻuí. (Māt. 6:25-34; 1 Kol. 3:5-9) Ko hono ngaahi olá ʻoku ʻomai ai ʻa e fakamoʻoni māʻalaʻala ki he hōifua mo e tāpuaki ʻa Sihová.

TOKANGAʻI ʻA E NGAAHI MEʻA ʻO E PULEʻANGÁ ʻI MĀMANI LAHI

² ʻI hono fakatokangaʻi ʻa e ngaahi founga ʻetau ngāue fakamalangá pea ʻiloʻi ʻoku tau tufaki ʻa e ngaahi Tohi Tapú mo e ʻū tohi Fakatohitapú ʻo taʻetotongi ki he kakaí, ʻe ʻeke nai ʻe ha niʻihi: “ʻOku malava fēfē ʻa e ngaahi meʻa kotoa ko ení?” Ko e moʻoni, ko hono pulusi mo hono ngaohi ʻa e Tohi Tapú mo e ʻū tohi Fakatohitapú ʻoku ʻi ai ʻa e fakamole fakapaʻanga ki ai. Ko hono langa mo monomono ʻa e ngaahi ʻapi Pēteli ki he kau faifekau ʻoku nau tokangaʻi ʻa e ngaahi mīsini pulusí, tokangaʻi ʻa e ngāue fakamalangá, pea ngāue ʻi he ngaahi founga kehe ki hono ʻai ke laka ki muʻa ʻa e ongoongo leleí ʻoku toe ʻi ai ʻa e fakamole fakapaʻanga ki ai. Tānaki atu ki ai, ko e kau ʻovasia sēketí, kau misinale ʻi he ngāue fakamalangá, kau tāimuʻa makehé mo e niʻihi ʻi he ngāue taimi-kakato makehé ʻoku ʻoange kia kinautolu ha kiʻi tokoni fakamatelie ke tokoniʻi kinautolu ke nau hokohoko atu ʻi he ngāué. ʻOku hā mahino, ko e ngāue ʻo hono malangaʻi ʻa e ongoongo leleí ʻi hotau ʻahó ni, tatau ai pē pe ʻoku fakahoko fakalotofonua pe fakamāmanilahi, ʻoku kau ki ai ʻa e fakamole fakapaʻanga lahi ʻaupito. ʻOku haʻu kotoa ia mei fē?

³ Koeʻuhí ko e houngaʻia ʻa e kakai tokolahi ʻi he ngāue fakaeako Tohi Tapu ʻa e Kau Fakamoʻoni ʻa Sihová ʻoku nau fiefia ke tokoni fakapaʻanga ki he ngāue ʻi māmani lahí. Kae kehe, ko ʻetau ngāué ʻoku poupouʻi tefito ia ʻe he Kau Fakamoʻoní tonu, ko e niʻihi ʻoku nau ʻave ʻa e ngaahi tokoni loto-fiefoaki ki he ngaahi ʻōfisi vaʻa fakafeituʻu ʻo e Kau Fakamoʻoni ʻa Sihová. ʻOku nau fakahāhā ha laumālie loto-lelei hangē ko e kau sevāniti ʻa e ʻOtuá he kuonga muʻá ʻa ia naʻa nau poupouʻi nima-homo ʻa hono langa ʻa e feituʻu faiʻanga lotu ʻo Sihová. (ʻEki. 35:20-29; 1 Kal. 29:9) ʻOku maʻu ʻa e ngaahi meʻaʻofa ʻe niʻihi mei he ngaahi koloa fakafou he ngaahi tohi-tuku, lolotonga ia ko e ngaahi tokoni kehe ʻoku haʻu mei he faʻahinga tāutaha, ngaahi fakatahaʻanga mo e ngaahi sēketí pea ʻoku faʻa siʻisiʻi ʻa e tokoni ʻoku maʻu mei aí. Ka ʻi hono tānaki fakatahá, ko e ngaahi meʻaʻofá ni ʻokú ne fakapaʻanga ʻa e hokohoko atu ʻa e ngāue fakafaifekaú.

⁴ ʻOku lau ʻe he Kau Fakamoʻoni ʻa Sihová ko ha monū ia ke ngāueʻaki ʻenau paʻangá mo ʻenau koloá ke laka ki muʻa ʻa e ngāue fakamalangá. Naʻe tauhi ʻe Sīsū mo ʻene kau ākongá ha puha paʻanga ʻa ia naʻe toʻo mei ai ʻa e paʻanga ke tokangaʻiʻaki ʻa e ngaahi fakamolé. (Sione 13:29) ʻOku tala mai ʻe he Tohi Tapú kia kitautolu ʻa e kakai fefine naʻa nau tauhi ʻa Sīsū mo ʻene kau ākongá. (Mk. 15:40, 41; Luke 8:3) Naʻe tali houngaʻia ʻe he ʻapositolo ko Paulá ʻa e tokoni fakamatelie naʻe tokonaki anga-ʻofa ʻe he faʻahinga naʻa nau mahuʻingaʻia ʻi hono ʻai ke laka ki muʻa ʻa e ongoongo leleí pea naʻa nau fakaʻamu ke poupouʻi ʻa ʻene ngāue fakafaifekaú. (Fil. 4:14-16; 1 Tes. 2:9) ʻOku hokohoko atu ʻa e Kau Fakamoʻoni ʻa Sihová ʻi he muimui ki he ngaahi sīpinga ko eni ʻo e kuonga muʻá ʻi he ngāue faivelenga mo e foaki nima-homó. Ko ia ai, ʻoku malava ke tuʻuaki “taʻetotongi ʻa e vai ʻo e moʻuí” ki he faʻahinga loto-totonu ʻi he feituʻu kotoa pē.—Fkh. 22:17.

TOKANGAʻI ʻO E NGAAHI FIEMAʻU ʻA E FAKATAHAʻANGA FAKALOTOFONUÁ

⁵ Ko e ngaahi fakamole ʻa e fakatahaʻanga fakalotofonuá ʻoku toe fua ia ʻaki ʻa e ngaahi tokoni loto-fiefoaki. ʻOku ʻikai fai ha tānaki paʻanga; pea ʻoku ʻikai fikaʻi ha foaki tukupau fakatāutaha pe ko ha kole paʻanga. ʻOku ʻi ai ʻa e ngaahi puha tokoni ʻi he ngaahi feituʻu faiʻanga fakatahá koeʻuhi ke lava ʻo kau ʻa e tokotaha taki taha ʻi he foaki ʻa e “meʻa tofu pē ko ia kuó ne fakapapauʻi ʻi hono lotó.”—2 Kol. 9:7.

⁶ Ko e paʻanga tokoní ʻoku ʻuluaki ngāueʻaki ia ke totongi ʻa hono tokangaʻi mo hono monomono ʻo e Fale Fakatahaʻangá. Ko e kulupu ʻo e kau mātuʻá te nau fili nai pe ʻe ʻave ʻa e niʻihi ʻo e paʻanga ko iá ki he ʻōfisi vaʻa fakafeituʻu ʻo e Kau Fakamoʻoni ʻa Sihová ke ngāueʻaki ki hono fakalahi atu ʻa e ngāue ʻi māmani lahí. Ko ha fakapapau ʻe fai ia ʻe he fakatahaʻangá. ʻI he foungá ni, ʻoku fai ai ʻe he ngaahi fakatahaʻanga lahi ʻa e ngaahi tokoni tuʻumaʻu ki he ngāue ʻi māmani lahí. ʻI he lāuʻilo ʻa e tokotaha kotoa ki he ngaahi fiemaʻu fakalotofonua ʻe malanga hake mei he taimi ki he taimi, heʻikai fiemaʻu ia ke toutou fai ha ngaahi fanongonongo ʻo fekauʻaki mo e ngaahi tokoní.

TOKANGAʻI ʻO E NGAAHI TOKONÍ

⁷ ʻI he hili ʻa e fakataha taki taha, ko e tokoua ʻe ua te na toʻo ʻa e paʻanga kotoa pē kuo lī ki he ngaahi puha tokoní pea lēkooti ia. (2 Tuʻi 12:9, 10; 2 Kol. 8:20) ʻE fai ʻe he kulupu ʻo e kau mātuʻá ʻa e ngaahi fokotuʻutuʻu feʻungamālie ki hono maluʻi ʻo e paʻangá ni kae ʻoua ke lava ʻo ʻoatu ia ki he ʻōfisi vaʻá, pe ko hono ngāueʻaki ki he ngaahi fiemaʻu ʻa e fakatahaʻangá. Ko e tokoua ʻokú ne tokangaʻi ʻa e paʻanga ʻa e fakatahaʻangá ʻokú ne teuteu ha fakamatala paʻanga fakamāhina ke fakahā ki he fakatahaʻangá, pea ʻi he māhina ʻe tolu kotoa pē ʻoku fokotuʻutuʻu ai ʻe he sea ʻo e kulupu ʻo e kau mātuʻá ke fai hano ʻaotitaʻi ʻa e paʻangá.

FAKAMOLE ʻA E SĒKETÍ

⁸ Ko e ngaahi fakamole ʻoku hilifaki ki hono fakahoko ʻo e ngaahi ʻasemipilií, pehē foki ki he ngaahi fakamole kehe ʻa e sēketí, ʻoku fua ia ʻe he ngaahi tokoni mei he Kau Fakamoʻoni ʻoku kau ʻi he sēketi ko iá. ʻOku ʻi ai ʻa e ngaahi puha tokoni ʻoku ʻi he ngaahi fale ʻasemipilií, koeʻuhí ke lava ke fai ai ʻa e ngaahi tokoni loto-fiefoaki ki he sēketí. Tānaki atu ki aí, ke tokangaʻi hokohoko ʻa e fakamolé, ko e ngaahi fakatahaʻangá ʻoku nau fai nai ʻa e ngaahi tokoní ʻi ha taimi kehe.

⁹ Ko e lelei tahá, ʻoku totonu ke lava ʻe he ngaahi sēketí ʻo fua ha fakamole pē ʻoku fiemaʻu, pea ko e paʻanga hulú ʻoku ʻave ia ki he ngāue ʻi māmani lahí. Kapau ʻoku ʻikai ha paʻanga feʻunga ʻi he ʻakauni ʻa e sēketí ke totongiʻaki ʻa e ngaahi fakamole ki he ʻasemipilií pe feauʻaki ʻa e ngaahi ʻuluaki fakamole ki he ʻasemipilī hoko maí, hangē ko ha tipōsiti ke maluʻiʻaki hano ngāueʻaki ʻo ha fale, ʻe fakahinohino nai ʻe he ʻovasia sēketí ke fakahā ki he ngaahi fakatahaʻangá ʻa e monū ke fai ha tokoní. Ko e kulupu taki taha ʻo e kau mātuʻá te nau lāulea ki he meʻá ni pea fakapapauʻi ai pe ko e hā ʻa e tokoni ʻe malava ke fai ʻe he fakatahaʻangá ki he paʻanga sēketí. Te nau fakahoko leva ʻa e tokoni ko ení fakafou ʻi ha fakapapau.

¹⁰ ʻI he malanga hake ha fiemaʻu fakapaʻanga ʻo fiemaʻu ai ʻa e tokanga ʻa e kau mātuʻa ʻi he sēketí, ʻe fai ha fakataha ʻa e kau mātuʻa ʻi he sēketí ʻi he ʻaho ʻo e ʻasemipilī fakasēketí. Ko e ngaahi fili kotoa tuku kehe ʻa e fili ko ia fekauʻaki mo e fakamole ʻa e sēketí ʻoku totonu ke fai ia ko e ngaahi fakapapau kuo tali ʻe he kau mātuʻá. Ko e ngaahi fakapapaú ni kuo pau ke fai fakapepa ia ki he ngaahi fika pau ʻo e paʻanga ʻoku fiemaʻú pea ʻoatu ia ke fakangofua mai ʻi he taimi taki taha ʻoku ʻomai ai ʻa e paʻanga sēketí ki he ngaahi fakamolé.

¹¹ ʻOku fai ʻa e fokotuʻutuʻu ke ʻaotitaʻi ʻi ha vahaʻa taimi pau ʻa e ʻakauni ʻa e sēketí.

TOKANGAʻI ʻO E KAU MASIVÁ

¹² Ko e taumuʻa ʻe taha naʻe tauhi ai ʻe Sīsū mo ʻene kau ākongá ha puha paʻangá, ke tokoniʻiʻaki ʻa e kau masivá. (Mk. 14:3-5; Sione 13:29) Ko e ngafa faka-Kalisitiane ko iá kuo hokohoko mai, he naʻe pehē ʻe Sīsū: “ʻOku ʻiate kimoutolu maʻu pē ʻa e kau masivá.” (Mk. 14:7) ʻOku anga-fēfē hono tokangaʻi he ʻahó ni ʻe he Kau Fakamoʻoni ʻa Sihová ʻa e fatongia ko ení?

¹³ ʻI he taimi ʻe niʻihi, ko e kau faitōnunga ʻi he fakatahaʻangá ʻoku nau fiemaʻu nai ha tokoni fakamatelie koeʻuhi ko e taʻumotuʻá, vaivaí pe ko ha faingataʻa ʻoku ʻikai lava ke nau mapuleʻí. Ko e lāuʻilo ʻa e ngaahi mēmipa ʻo e fāmilí, kāingá mo e niʻihi kehé ki he fiemaʻu peheé ʻoku ueʻi nai ai kinautolu ke tokoni. ʻOku fehoanaki eni mo e ngaahi lea ʻa e ʻapositolo ko Sioné: “ʻIlonga ʻa ia ʻokú ne maʻu ʻa e ngaahi koloa fakamatelie ʻo e māmani ko ʻení peá ne sio atu ki hono tokouá ʻokú ne fusimoʻomo ka ʻokú ne fakafisi ke fakahāhā kiate ia ʻa e manavaʻofá, ʻoku nofo fēfē ai ʻiate ia ʻa e ʻofa ki he ʻOtuá? Siʻi fānau, ʻoku totonu ke tau ʻofa ʻo ʻikai ʻi he lea pē, pe ʻaki ʻa e ʻeleló pē, ka ʻi he ngāue mo e moʻoni.” (1 Sio. 3:17, 18; 2 Tes. 3:6-12) Ko e lotu moʻoní ʻoku kau ki ai ʻa hono tokangaʻi ʻa e kau faitōnunga ko ia ʻoku nau fiemaʻu nai ha tokoni fakamatelié.—Sēm. 1:27; 2:14-17.

¹⁴ ʻI heʻene ʻuluaki tohi kia Tīmoté, naʻe fakamatala ai ʻa e ʻapositolo ko Paulá ki he founga ʻe lava ke tokonaki ai ʻa e tokoni fakamatelie ki he faʻahinga ʻoku tuha mo iá. ʻE lava ke ke lau ʻa ʻene akonaki ko iá ʻi he 1 Tīmote 5:3-21. Ko e fatongia muʻomuʻa ia ʻoku hilifaki ki he Kalisitiane taki taha ke ne tokangaʻi ʻa e ngaahi fiemaʻu ʻa hono falé tonu. Ko e kau taʻumotuʻá pe vaivaí ʻoku totonu ke nau maʻu ʻa e tokoni mei heʻenau fānaú, makapuná pe ko e ngaahi kāinga ofí. ʻI he taimi ʻe niʻihi, ʻoku ala maʻu ʻa e tokoni fakamatelie fakafou ʻi he ngaahi polokalama fakapuleʻangá pe fakasōsialé, ko ia ai ko e ngaahi kāingá pe ko e niʻihi kehé te nau tokoni ki he tokotaha masivá ke ne kole ki he ngaahi tokoni peheé. ʻE malanga hake nai ha tuʻunga ʻa ia ʻe fiemaʻu nai ai ʻa e fakatahaʻangá fakalūkufua ke nau fakakaukau ki hono fai ha faʻahinga tokoni ki he fanga tokoua mo e fanga tuofāfine masiva ʻe niʻihi ʻoku nau maʻu ha hisitōlia fuoloa ʻo e ngāue faitōnungá. Kapau ʻoku ʻikai ha ngaahi mēmipa ʻo e fāmilí pe ha ngaahi kāinga kehe ke tokoni ki he faʻahinga peheé pea ʻikai ha tokoni feʻunga ʻe ala maʻu mei he ngaahi kautaha fakapuleʻangá, ʻe lava ke fai ʻe he kulupu ʻo e kau mātuʻá ha ngaahi fokotuʻu feʻungamālie ke tokonaki ai ha tokoni. Ko e kau Kalisitiané ʻoku nau lau ko ha monū ia ke vahevahe atu ʻenau ngaahi koloa fakamatelié ki he faʻahinga ʻoku masivá.

¹⁵ Ko e fanga tokoua mo e fanga tuofāfine tokolahi te nau hoko nai ʻo masiva koeʻuhi ko e fakatangá, taú, mofuiké, tāfeá, hongé pe ko e hoko ha ngaahi fakatamaki kehe ʻa ia ʻoku hokolahia ʻi he ngaahi taimi fakalilifu ko ení. (Māt. 24:7-9) Ko e ngaahi fakatahaʻanga fakalotofonuá heʻikai te nau maʻu nai ha meʻa ke fevahevaheʻaki ai, ko ia ʻoku fokotuʻutuʻu ai ʻe he Kulupu Pulé ʻa e ngaahi feinga ʻa e fanga tokoua ʻi he feituʻu kehé ke tokonaki ʻa e meʻa ʻoku fiemaʻú. ʻOku hangē eni ko e founga naʻe tokonaki ai ʻe he kau Kalisitiane ʻi ʻĒsia Mainá ʻa e meʻakai ki he fanga tokoua ʻi Siuteá he lolotonga ha taimi honge. (1 Kol. 16:1-4; 2 Kol. 9:1-5) ʻI he muimui ki heʻenau faʻifaʻitakiʻangá, ʻoku fakapapauʻi ʻetau ʻofa ki hotau fanga tokouá pea fakahaaʻi ai ko e kau ākonga moʻoni kitautolu ʻa Sīsū Kalaisi.—Sione 13:35.

TUFAKI ʻO E ʻŪ TOHÍ

¹⁶ Ko e Tohi Tapú mo e ʻū tohi Fakatohitapú ʻoku nau fakahoko ha ngafa mahuʻinga ʻi hono fakamafola ʻa e pōpoaki ʻo e Puleʻangá. ʻOku faʻa vaheʻi ʻe he kulupu ʻo e kau mātuʻá ha sevāniti fakafaifekau ke ne tokangaʻi ʻa e sitoka ʻū tohi ʻa e fakatahaʻangá. Ko e fanga tokoua ʻoku vaheʻi ke nau tokangaʻi ʻa e ngaahi meʻa ko ení ʻoku nau fai fakamātoato honau ngaahi fatongiá. ʻOku nau tauhi ha ngaahi lēkooti lelei koeʻuhí ke ʻi ai ha ngaahi tokonaki feʻunga ke feau ʻa e ngaahi fiemaʻu ʻa e fakatahaʻangá.

¹⁷ ʻI he tuʻunga ko e kau Kalisitiane fakatapuí, ʻoku tau ʻiloʻi ko hotau taimí, ngaahi malava fakaeʻatamaí mo fakaesinó, ngaahi talēnití mo e koloa fakamatelié naʻa mo ʻetau moʻuí tonu ko e ngaahi meʻaʻofa ia mei he ʻOtuá pea ʻoku fakataumuʻa ia ke ngāueʻaki ʻi heʻene ngāué. (Luke 17:10; 1 Kol. 4:7) ʻI hono ngāueʻaki totonu ʻa e kotoa ʻo ʻetau koloá, ʻoku tau fakahāhā ai ʻa e loloto ʻo ʻetau ʻofa kia Sihová. Ko ʻetau holí ia ke fakalāngilangiʻi ʻa Sihova ʻaki ʻetau ngaahi meʻa mahuʻingá, ʻi he ʻiloʻi ʻokú ne hōifua ki ha meʻaʻofa pē ʻoku foaki ko e fakahāhā ʻo e līʻoa ʻaufuatō. (Pal. 3:9; Mk. 14:3-9; Luke 21:1-4; Kol. 3:23, 24) Naʻe pehē ʻe Sīsū: “Kuo mou maʻu taʻetotongi, foaki taʻetotongi.” (Māt. 10:8) ʻI heʻetau foaki atu kitautolu mo ʻetau ngaahi koloá ʻi he ngāue ʻa Sihová, ko hono olá, ʻoku tau maʻu ai ʻa e fiefia lahi ange.—Ngā. 20:35.