KONGA 3
Loto-Mamahi—ʻI Heʻetau Maʻu ha “ʻUhinga ke Lāunga Ai”
“Naʻe tukuakiʻi hala au ʻe ha tuofefine ʻi heʻemau fakatahaʻangá naʻá ku kaihaʻasi ʻene paʻangá. Naʻe ʻiloʻi eni ʻe he niʻihi ʻi he fakatahaʻangá pea nau kamata ke fakafaʻafaʻahi. Faifai atu pē, naʻe tala mai ʻe he tuofefiné naʻá ne maʻu ʻa e fakamatala foʻou naʻe ʻikai ko au. Neongo naʻá ne kole fakamolemole mai, naʻá ku ongoʻi naʻe ʻikai ʻaupito malava ke u fakamolemoleʻi ia ʻi he meʻa naʻe hokó.”—Linda.
ʻOKÚ KE mahinoʻi ʻa e anga ʻo e ongoʻi ʻa Linda, ʻa ia naʻá ne loto-mamahi ʻaupito ʻi he tōʻonga ʻa ha kaungātui? Ko e meʻa fakamamahí, kuo mātuʻaki fakalotomamahiʻi ʻa e niʻihi ʻe he tōʻonga ʻa e niʻihi kehé ʻo uesia ai ʻenau founga-tuʻumaʻu fakalaumālié. Kuó ke hokosia moʻoni ia?
ʻE Lava ʻe ha Taha Ke Ne “Fakamavaheʻi Kitautolu mei he ʻOfa ʻa e ʻOtuá”?
Ko hono moʻoní, ʻoku tau ʻiloʻi nai ʻoku mātuʻaki faingataʻa ke fakamolemoleʻi ha kaungātui kuó ne fakalotomamahiʻi kitautolu. Kae hili ko iá, ʻoku totonu ki he kau Kalisitiané ke nau feʻofaʻaki. (Sione 13:34, 35) Kapau kuo faihala mai kia kitautolu ha kaungātui, ʻe lava ke hoko ʻa e ʻitá mo e loto-mamahí ʻo mātuʻaki fakatupu maumau.—Saame 55:12.
Ko e moʻoni, ʻoku pehē ʻe he Tohi Tapú ʻe ʻi ai ʻa e taimi ʻe niʻihi ʻe maʻu ai ʻe he kau Kalisitiané ha “ʻuhinga ke lāunga ai” ʻia kinautolu. (Kolose 3:13) Neongo ia, ʻi heʻetau hokosia fakafoʻituitui iá, te tau ʻiloʻi nai ʻe mātuʻaki faingataʻa ke fekuki mo ia. ʻOku ʻi ai ha meʻa ʻe lava ke ne tokoniʻi kitautolu? Fakakaukau ki he tefitoʻi moʻoni Fakatohitapu ʻe tolu:
ʻOku ʻafioʻi ʻe heʻetau Tamai fakahēvaní ʻa e meʻa kotoa. ʻOku ʻiloʻi ʻe Sihova ʻa e meʻa kotoa ʻoku hokó, kau ai ha fakamaau taʻetotonu te tau fehangahangai mo ia mo e nunuʻa ʻe hoko aí. (Hepelū 4:13) ʻIkai ko ia pē, ʻoku mahinoʻi ʻe Sihova ʻetau faingataʻaʻiá. (ʻAisea 63:9) Heʻikai ʻaupito te ne fakaʻatā ʻa e “mamahí pe faingataʻaʻiá” pe ko ha toe meʻa—naʻa mo haʻane sevāniti—“ke ne fakamavaheʻi kitautolu mei he ʻofa ʻa e ʻOtuá.” (Loma 8:35, 38, 39) ʻIkai ʻoku ueʻi kitautolu ke tau fai ʻa e meʻa tatau, ʻo ʻoua ʻe fakaʻatā ha meʻa pe ko ha taha ke ne fakamavaheʻi kitautolu meia Sihova?
Ke fakamolemoleʻí ʻoku ʻikai ko hono tali ʻene tōʻongá. ʻI he taimi ʻoku tau fakamolemoleʻi ai ʻa e faʻahinga ʻoku faihala maí, ʻoku ʻikai ai ke tau fakasiʻia, fakatonuhiaʻi, fakaoleoleʻi pe tali ʻenau ngaahi tōʻongá. Manatuʻi, ʻoku ʻikai ʻaupito hōifua ʻa Sihova ki he faiangahalá, ka ʻokú ne fakamolemoleʻi ia kapau ʻoku ʻi ai ha makatuʻunga ke fai pehē ai. (Saame 103:12, 13; Hapakuke 1:13) ʻI he taimi ʻoku fakalototoʻaʻi ai kitautolu ʻe Sihova ke fakamolemoleʻi ʻa e niʻihi kehé, ʻokú ne kole mai ke tau faʻifaʻitaki kiate ia. ʻOku ʻikai ʻaupito te ne “tauhi ʻene ʻita ʻo taʻengata.”—Saame 103:9; Mātiu 6:14.
ʻI he tuku ʻetau ʻitá, ko e lelei pē maʻa kitautolu. ʻI he founga fē? Sioloto atu ki he fakatātā ko ení. Te ke toʻo hake ha foʻi maka ʻo pukepuke, ʻa ia ko hono mamafá ʻoku kilo nai ʻe taha. Te ke kiʻi mamate nai ʻi hono pukepuke ia ʻi ha kiʻi taimi nounou. Kae fēfē kapau te ke feinga ke fai pehē ʻi ha vahaʻa taimi lōloa? Ko e hā hono fuoloa hoʻo malava ke pukepuke iá—ngaahi miniti? ko ha houa? pe fuoloa ange? ʻOku ʻikai ha veiveiua ʻe mamate ʻaupito ho nimá! Ko hono moʻoni, ʻoku ʻikai toe liliu ʻa e mamafa ʻo e foʻi maká. Ka ko e fuoloa ange hoʻo pukepuke iá, ko ʻene mamafa ange ia kia koé. ʻOku pehē pē ʻa e ʻitá. Ko e fuoloa ange ʻetau tukulotoʻi iá—naʻa mo ha kiʻi ʻita siʻisiʻi—ko e lahi ange ia ʻetau loto-mamahí. ʻOku ʻikai ha ofo hono fakalototoʻaʻi kitautolu ʻe Sihova ke tuku ʻetau ʻitá. Ko e moʻoni, ko e tuku ʻa e ʻitá ko e lelei pē maʻa kitautolu.—Palōveepi 11:17.
ʻI he tuku ʻetau ʻitá, ko e lelei pē maʻa kitautolu
“Naʻá Ku Ongoʻi Hangē Naʻe Talanoa Mai ʻa Sihova Kiate Aú”
Ko e hā naʻá ne tokoniʻi ʻa Linda ke ʻoua ʻe tukulotoʻi ʻene ʻitá koeʻuhi ko e founga naʻe fakafeangai ange ki ai ha kaungātuí? Ko e taha ʻo e ngaahi meʻá, naʻá ne fakalaulauloto ki he ngaahi ʻuhinga Fakatohitapu ke fakahoko ai ʻa e fakamolemolé. (Saame 130:3, 4) Naʻe ueʻi moʻoni ʻa Linda ʻi heʻene ʻiloʻi ko e taimi ʻoku tau fakahoko ai ʻa e fakamolemolé, ʻe fakamolemoleʻi leva kitautolu ʻe Sihova. (ʻEfesō 4:32–5:2) Tatau ai pē pe naʻe lahi fēfē hono uesia ia ʻe he ngaahi ongoʻi ko iá, ʻokú ne pehē: “Naʻá ku ongoʻi hangē naʻe talanoa mai ʻa Sihova kiate aú.”
Faifai atu pē, naʻe malava ʻe Linda ke tuku ʻene ʻitá. Naʻá ne fakamolemoleʻi loto-lelei ʻa e tuofefiné, pea ʻi he taimi ní ko e tuofefine ko iá ko hono kaumeʻa fafale. Kuo hoko atu ʻa Linda ʻi heʻene ngāue kia Sihová. Fakapapauʻi ʻoku loto ʻa Sihova ke tokoniʻi koe ke ke fai ʻa e meʻa tatau.