FEHUʻI 7
ʻE Lava Fēfē Ke U Fekuki mo e Tenge ki he Fehokotaki Fakasinó?
KO E HĀ TE KE FAÍ?
Sioloto atu ki he talanoa ko ení: Kuo kaumeʻa eni ʻa Heta mo Maikolo ʻi he māhina pē ʻe ua, ka ʻoku ongoʻi ʻe Heta hangē kuó ne ʻosi ʻiloʻi ʻe ia ʻa Maikolo he laui taʻu. ʻOkú na feʻaveʻaki pōpoaki maʻu pē mo talanoa lau houa ʻi he taimi ʻe niʻihi he telefoní, pea aʻu pē ʻo na femahinoʻaki ʻi he anga ʻena fakakaukaú! Ka ʻi he taimi ní ʻoku fiemaʻu ʻe Maikolo ia ha meʻa lahi ange ʻi he fetalanoaʻakí pē.
Lolotonga ʻa e māhina ʻe ua kuohilí, naʻe ʻikai ha meʻa ʻe toe fai ʻe Maikolo mo Heta ka ko e piki nima pē mo e kiʻi ʻuma. ʻOku ʻikai ke loto ʻa Heta ke fakalaka atu ai. Ka, ʻoku ʻikai ke ne loto ke tukuange ʻa Maikolo. ʻOku ʻikai ha taha te ne ʻai ia ke ne ongoʻi ʻokú ne maʻa lahi mo makehe moʻoni. ʻOkú ne pehē loto pē, ‘ko au mo Maikoló ʻokú ma fuʻu feʻofaʻaki . . .’
Kapau ʻokú ke taʻumotuʻa feʻunga ke faisō pea naʻá ke ʻi he tuʻunga ʻo Hetá, ko e hā te ke faí?
TUʻU PEA FAKAKAUKAU!
Ko e fehokotaki fakasinó ko e meʻaʻofa ia mei he ʻOtuá ki he tokotaha ʻosi malí pē. Ko e fehokotaki fakasino ki muʻa ke malí ko hono ngāuehalaʻaki ia ʻa e meʻaʻofa ko iá. ʻOku hangē ia ko hano toʻo ha kofu fakaʻofoʻofa naʻe ʻoatu ʻe ha taha ʻo ngāueʻaki ia ko ha konga tupenu holo efu
Kapau te ke feinga ke puna hangē ko e manupuná mei ha fuʻu ʻakau, te ke faingataʻaʻia ʻi hono ngaahi nunuʻá. Ko e meʻa tatau pē ʻe hoko kapau te ke talangataʻa ki he lao fakaeʻulungāngá, hangē ko ia ʻoku fakahaaʻi mai ʻi he 1 Tesalonaika 4:3 ke “fakaʻehiʻehi mei he feʻauakí.”
Ko e hā ʻa e ngaahi nunuʻa ʻo e talangataʻa ki he fekau ko iá? ʻOku pehē ʻe he Tohi Tapú: “Ko ia ʻokú ne tōʻongaʻaki ʻa e feʻauakí ʻoku faiangahala ia ki hono sino pē ʻoʻoná.” (1 Kolinitō 6:18) ʻOku anga-fēfē ʻene moʻoni iá?
Kuo ʻiloʻi ʻe he kau fakatotoló ko e toʻutupu tokolahi kuo nau fehokotaki fakasino ki muʻa ke malí ʻoku nau faʻa hokosia ha taha pe lahi ange ʻo e ngaahi nunuʻa ko ení.
LOTO-MAFASIA. ʻOku pehē ʻe he tokolahi taha ʻo e toʻutupu naʻa nau fehokotaki fakasino ki muʻa ke malí, naʻa nau fakaʻiseʻisa hili hono fai iá.
MOLE FALALÁ. Hili ʻa e fehokotaki fakasino ʻa ha ongo meʻa, ʻoku kamata ke na fifili, ‘Ko hai ha toe taha naʻe fehokotaki fakasino mo ia?’
ʻAMANAKI-TŌNOA. ʻOku saiʻia ʻa e tamaiki fefine tokolahi ʻi ha taha te ne maluʻi kinautolú, kae ʻikai ko hono ngāueʻaki kinautolu. Pea ʻoku ʻiloʻi ʻe he tamaiki tangata tokolahi ʻoku ʻikai ke nau manako ʻi he tamaiki fefine ʻoku nau tōngofuá.
Ko e meʻa mahuʻinga tahá: Kapau te ke fehokotaki fakasino ki muʻa ke malí, ʻokú ke tuku hifo ai koe ʻaki hono fakamoleki ha meʻa mahuʻinga. (Loma 1:24) ʻOku mātuʻaki mahuʻinga ʻaupito ho sinó ke ʻoua ʻe foaki tavale ia!
Fakahaaʻi ʻokú ke maʻu ʻa e mālohi ke “fakaʻehiʻehi mei he feʻauakí.” (1 Tesalonaika 4:3) Kapau te ke mali ʻi ha ʻaho, ʻe lava leva ai ke ke fehokotaki fakasino. Pea ʻe malava ke ke fiefia kakato ai ʻo ʻikai ha hohaʻa, fakaʻiseʻisa mo ongoʻi taʻemalu, ʻa ia ʻoku faʻa hoko ia ko e konga ʻo e nunuʻa ʻo e fehokotaki fakasino ki muʻa ke malí.—Palōveepi 7:22, 23; 1 Kolinitō 7:3.
KO E HĀ HOʻO FAKAKAUKAÚ?
ʻE hanga ʻe ha taha ʻoku ʻofa moʻoni ʻiate koé ʻo ʻai koe ke ke faingataʻaʻia fakaesino mo fakaeongo?
ʻE hanga ʻe ha taha ʻoku tokanga moʻoni kiate koé ʻo fakataueleʻi koe ke maumauʻi ho vahaʻangatae mo e ʻOtuá?—Hepelū 13:4.