Faiakoʻaki ʻa e Talanoa Fakatātā

Mātiu 13:34, 35

MEʻA KE FAÍ: Fakaleleiʻi ʻa hoʻo faiakó ʻaki ʻa e ngaahi talanoa fakatātā faingofua ʻa ia ʻoku fakamānako ki hoʻo kau fanongó pea akoʻi ai mo e ngaahi poini tefitó.

FOUNGA KE FAI AI IÁ:

• Filifili ha talanoa fakatātā faingofua. Hangē ko Sīsuú, ngāueʻaki ʻa e ngaahi meʻa anga-maheni ʻi he moʻui fakaʻaho ʻa e kakaí ke fakamatalaʻiʻaki ʻa e ngaahi meʻa mahuʻingá. ʻOua ʻe toe tānaki ha ngaahi fakaikiiki ʻikai fiemaʻu ke ne ʻai ke fihi ʻa e talanoa fakatātaá. Fakapapauʻi ko e ngaahi tafaʻaki ʻa hoʻo talanoa fakatātaá ʻoku kaunga moʻoni ki he lēsoni ʻokú ke akoʻí koeʻuhí ke ʻoua naʻa fakaleluʻi ʻa hoʻo kau fanongó ʻe ha ngaahi fakamatala ʻikai hoamālie.

• Fakakaukau maʻu pē ki hoʻo kau fanongó. Fili ha ngaahi talanoa fakatātā ʻoku kau ki ai ha ngaahi ngāue mo e meʻa ʻoku mahuʻingaʻia ai ʻa hoʻo kau fanongó. Tokanga ke ʻoua naʻa fakamaaʻi pe fakaʻitaʻi kinautolu ʻe hoʻo ngaahi talanoa fakatātaá.

• Akoʻi ʻa e poini tefitó. Tokangataha ki hono fakatātaaʻi ʻa e ngaahi poini tefitó, ʻikai ko e fanga kiʻi fakaikiikí. Fakapapauʻi ʻe manatuʻi ʻe hoʻo kau fanongó ʻo ʻikai ko e talanoa fakatātaá pē kae pehē foki ki he poini ʻo e talanoa fakatātaá.