KAMATAʻI HA FETALANOAʻAKI
LĒSONI 5
Fakapotopoto
Tefitoʻi Moʻoní: “Tuku ke hoko maʻu pē hoʻomou leá ʻo anga-ʻofa.”—Kol. 4:6.
Meʻa Naʻe Fai ʻe Paulá
1. Sio ʻi he VITIOÓ, pe lau ʻa e Ngāue 17:22, 23. Fakakaukau leva ki he ongo fehuʻi ko ení:
a. Naʻe anga-fēfē ongoʻi ʻa Paula fekauʻaki mo e ngaahi tōʻonga fakalotu loi naʻá ne sio ki ai ʻi ʻAtenisí?—Sio ki he Ngāue 17:16.
e. ʻI he ʻikai ke fakahalaiaʻi ʻe Paula ʻa e kau ʻAtenisí, naʻe anga-fēfē ʻene ngāueʻaki fakapotopoto ʻenau ngaahi tuí ke vahevahe atu ai ʻa e ongoongo leleí?
Ko e Hā ʻOku Tau Ako meia Paulá?
2. ʻOku ngalingali ange ʻe fie fanongo mai ʻa e kakaí kapau te tau filifili lelei ʻa e meʻa ke leaʻakí pea pehē ki he founga mo e taimi ke lea aí.
Faʻifaʻitaki kia Paula
3. Filifili lelei hoʻo ngaahi leá. Ko e fakatātaá, ʻi he taimi ʻokú ke lea ai ki ha tokotaha mei ha puipuituʻa ʻikai ko ha Kalisitiane, ʻe fiemaʻu nai ke ke feʻunuʻaki ʻa e founga ʻokú ke fakahaaʻi ai ʻa e Tohi Tapú pe ko e founga ʻokú ke lave ai kia Sīsuú.
4. ʻOua ʻe fakavave ke fakatonutonuʻi ha tokotaha. Fakaʻatā ia ke ne fakahaaʻi tauʻatāina mai ʻene fakakaukaú. Kapau ʻokú ne leaʻaki ha meʻa ʻoku fepaki mo e ngaahi akonaki Fakatohitapú, talitekeʻi ha holi pē ke fakafekiki. (Sēm. 1:19) Te ke ʻiloʻi ʻa e anga ʻene fakakaukaú ʻaki hoʻo fanongo kiate ia.—Pal. 20:5.
5. Loto-tatau mo e tokotahá pea fakaongoongoleleiʻi ia ʻo ka malava. Te ne tui loto-moʻoni nai ko ʻene ngaahi tui fakalotú ʻoku moʻoni. ʻUluakí, fokotuʻu ha makatuʻunga ke loto-tatau pea tokoniʻi māmālie ia ke ne mahinoʻi ʻa e meʻa ʻoku akoʻi ʻe he Tohi Tapú.