ʻAi ke Faingofua

Meʻa Naʻe Fai ʻe Sīsuú

VITIŌ: Fakatātaaʻi ʻe Sīsū ʻa e Tokanga Mai ʻEtau Tamaí

1. Sio ʻi he VITIOÓ, pe lau ʻa e Mātiu 6:​25-27. Fakakaukau leva ki he ongo fehuʻi ko ení:

1. a. Naʻe anga-fēfē hono fakatātaaʻi ʻe Sīsū ʻa e tokanga mai ʻa Sihova kiate kitautolú?

2. e. Neongo naʻe ʻiloʻi ʻe Sīsū ʻa e ngaahi meʻa lahi fekauʻaki mo e fanga manupuná, ko e hā ʻa e meʻa faingofua naʻá ne hangataha ki aí? Ko e hā ko ha founga fakafaiako ola lelei ai iá?

Ko e Hā ʻOku Tau Ako meia Sīsuú?

2. ʻI he taimi ʻoku tau faiako ai ʻi ha founga faingofua, ʻe manatuʻi ʻe he kakaí ʻa e meʻa naʻa tau akoʻi kiate kinautolú pea ʻe maongo ia ki honau lotó.

Faʻifaʻitaki kia Sīsū

3. ʻOua ʻe lahilahi fakamatala. Tokangataha ki he fakamatala ʻi he tohi akó kae ʻikai ko e fakamatala ʻa e meʻa kotoa ʻokú ke ʻiloʻi fekauʻaki mo ha kaveinga. Hili hoʻo ʻeke ha fehuʻi, tatali anga-kātaki ki hoʻo tokotaha akó ke ʻomai ʻene talí. Kapau ʻoku ʻikai ke ne ʻiloʻi ʻa e talí pe ʻokú ne fakahaaʻi ha fakakaukau ʻoku fepaki mo e akonaki Fakatohitapú, ngāueʻaki ha ngaahi fehuʻi tānaki ke tokoniʻi ia ke ne fakaʻuhinga ʻi he fakamatalá. ʻI hono mahinoʻi pē ʻe hoʻo tokotaha akó ʻa e poini tefitó, hoko atu leva.

4. Ngāueʻaki ʻa e meʻa ʻoku ʻosi ʻiloʻi ʻe hoʻo tokotaha akó ke tokoniʻi ia ke ne mahinoʻi ʻa e ngaahi akonaki foʻoú. Ko e fakatātaá, ki muʻa ke kamata ʻi ha lēsoni fekauʻaki mo e toetuʻú, te ke fakamanatu nounou nai ʻa e meʻa kuo ʻosi ʻiloʻi ʻe he tokotaha akó fekauʻaki mo e tuʻunga ʻo e kau maté.

5. Ngāueleleiʻaki ʻa e ngaahi talanoa fakatātaá. Ki muʻa ke ke ngāueʻaki ha talanoa fakatātā, ʻeke hifo:

1. a. ‘ʻOku faingofua ʻa e talanoa fakatātaá?’

2. e. ‘ʻE mahinongofua ia ki heʻeku tokotaha akó?’

3. f. ‘Te ne tokoniʻi ʻeku tokotaha akó ke ne manatuʻi ʻa e poini tefitó—ʻo ʻikai ko e talanoa fakatātaá pē?’