Ko e Tokotaha Tā-Fakatātā Maʻongoʻonga—Ko Sihova!
“ʻOKU taʻefaʻalaua hono tā ʻe he kau tā-fakatātaá ʻa e hopo mo e tō ʻa e laʻaá, pea ko ʻenau ngaahi tā valivalí ʻoku fakatau atu ki he paʻanga laui teau, pea aʻu ʻo laui afe. Ka, ko e ʻOtua ko Sihová ko e Tokotaha Tā-fakatātā Maʻongoʻonga pea ko e Tupuʻanga ia ʻo e hopo mo e tō ʻa e laʻaá, ʻokú ne ʻomai ia kiate kitautolu ʻi he ʻaho taki taha—taʻetotongi. ʻOku laka mamaʻo ʻaupito ʻa e hopo mo e tō ʻa e laʻā moʻoní ʻi he ngaahi tā valivalí. ʻIkai ʻoku totonu ke ueʻi kitautolu ʻe he meʻá ni ke tau fakahoungaʻi ia ʻi he tuʻunga ko e Tokotaha-fakatupú?” Ko e fakamatala ia naʻe fai ʻe he ʻovasia fefonongaʻaki ʻa e Kau Fakamoʻoni ʻa Sihová lolotonga ʻa e taha ʻo ʻene ngaahi malanga ki ha fakatahaʻanga ʻi Hawaii.
Naʻe ʻi he lotolotonga ʻo e kau fanongó ha fefine naʻe ʻikai ke tui ki he ʻOtuá, ko ʻene ʻuluaki ʻaʻahi ia ki he Kingdom Hall. Naʻá ne fakatokangaʻi ʻa e anga ʻo e fakatupu fakakaukau ʻa e faifekau ke aʻu ki he fakamulitukú, ka naʻe kei mālohi pē ʻene veiveiua ʻo kau ki he ʻi ai ʻa e ʻOtuá. Kaekehe, ʻosi ʻa e taʻu ʻe ua mei ai lolotonga ʻene haʻu meʻalele mei he ngāué ʻo foki ki hono ʻapí, naʻá ne fihia tuʻu ai ʻi he lotolotonga ʻo e houa ʻoku lahi ʻa e feʻaluʻaki ʻi he halá. Naʻe ʻai ʻe he meʻa ni ke ne fakatokangaʻi ʻa e fakaholomamata ʻo e tō hifo ʻa e laʻaá. Naʻe foki ʻene fakakaukaú ki he malanga ʻa e ʻovasia fefonongaʻakí.
ʻOkú ne lea ʻaki ʻo pehē: “ʻI he ʻikai ke u loto-mamahi koeʻuhi ko e ʻefiʻefi ʻo e feʻaluʻakí, naʻá ku fakatokangaʻi ʻa e fakaʻofoʻofa ʻo e tō hifo ʻa e laʻaá, pea naʻe fakamanatuʻi mai ai kiate au ʻa e meʻa naʻe lea ki ai ʻa e tokotaha malangá ʻo kau ki he houngaʻia ʻi he ʻOtua ko Sihová ʻi hono tuʻunga ko e Tokotaha Tā-fakatātā Maʻongoʻonga mo e Tokotaha-fakatupu. Naʻe ʻai ʻe he meʻa ni ke u fakakaukau, ‘Mahalo ko e meʻa naʻá ne leaʻakí ʻoku moʻoni; mahalo pē ʻoku moʻoni ʻoku ʻi ai ha Tokotaha-fakatupu.’ Naʻá ku fakakaukau ki he meʻá ni ʻi heʻeku fononga ki ʻapí, pea ʻi he pō ko iá naʻá ku tā atu ki hoku kaungāmeʻa ʻa ia naʻá ne hanga ʻo ʻuluaki fakaafeʻi au ki he Kingdom Hall. Naʻá ku kamata ke ako ʻa e Tohitapú, pea ʻi he taimí ni ʻoku ou lotu kia Sihova ko hoku ʻOtua mo e Tokotaha-fakatupu.”
Hangē ko e tangata-tohi-sāmé, ko e fefine ko ení naʻe ʻikai ke ngata pē ʻene hoko ʻo houngaʻia ʻia Sihova ko e Tokotaha Tā-fakatātā Maʻongoʻonga ʻo e ngaahi meʻa kuo fakatupú ka naʻá ne toe hoko ʻo fakamālō kiate ia. Naʻe tohi ʻe he tangata-tohi-sāmé: “Fai mei langi na ʻa e fakamalo ʻo Sihova . . . fai hono fakamalo, ʻa e laʻa mo e mahina: fai hono fakamalo, ʻa e ngaahi fetuʻu ngingila. . . . Ke fakamaloʻia ʻekinautolu ʻa e huafa ʻo Sihova: he naʻa ne fekau, pea naʻe ngaohi ia.”—Sāme 148:1-5.