ʻOku Tali ʻe he ʻOtuá ʻa Hoʻo Ngaahi Lotú?

“ʻOKU teʻeki ai ke u ongoʻi kuo tali ʻeku ngaahi lotu,” ko e lea ia ʻa e fefine ʻoku nofo ʻi Hokkaido, Siapani. Fekauʻaki mo e meʻá ni ʻoku ʻikai ko ia tokotaha pē. ʻOku tokolahi ʻa e kakai ʻoku nau ongoʻi ko ʻenau ngaahi lotú ʻoku ʻikai ʻaupito ke tali. Pea ko hono moʻoní, mahalo pē ʻokú ke fifili pe ʻoku tali ʻe he ʻOtuá ʻa hoʻo ngaahi lotú.

Ko e laui miliona ʻoku nau fakahanga ʻa ʻenau ngaahi lotú ki he ngaahi ʻotua taʻefaʻalaua. Ko e hā ʻoku hā ngalingali ai ʻoku fuʻu lahi ʻa e ngaahi lotu ʻoku ʻikai ke talí? Ke tau maʻu ha tali, tau ʻuluaki siviʻi ʻa e ngaahi faʻahinga lotu kehekehe ʻoku faí.

ʻOku Lotu ʻa e Niʻihi ʻo Fekauʻaki mo e Hā?

Lolotonga ʻa e vahaʻa taimi ʻo e Taʻu Foʻoú, ko e vahe tolu ʻe ua ʻo e kakai ʻo Siapaní, pe ko e kakai ʻe toko 80 miliona nai, ʻoku nau lotu ʻi he ngaahi fale toputapu Sinitō pe ʻi he ngaahi temipale Putá. ʻOku nau foaki ʻa e ngaahi sēniti maka ko e ngaahi feilaulau pea lotu ke maʻu ha fakamonūʻia mo e malu ki he fāmilí.

ʻI Sānuali mo Fēpueli​—ki muʻa siʻi pē ʻi he ngaahi sivi hū faingataʻa​—ko e tamaiki akó ʻoku nau ʻaukolo ki he ngaahi fale toputapú ʻo hangē ko e taha ʻoku tuʻu ʻi Tokyo ʻoku ʻiloa ko e fale ki he ʻotua ʻo e akó. ʻOku nau tohi ʻenau ngaahi fakaʻamú ʻi he ngaahi laʻi papa lotu pea tautau kinautolu ʻi he ngaahi vaʻakau ʻoku tō takatakai ʻi tuʻa ʻi he ngaahi fale toputapú. Naʻe ʻikai ke siʻi hifo ʻi he 100,000 ʻa e ngaahi laʻi papa naʻe teuteuʻaki ʻa tuʻa ʻo e fale toputapu ʻiloa ʻi Tokyo he lolotonga ʻa e taimi sivi ʻo e 1990.

Ko e lahi ʻo e ngaahi lotú ʻoku fekauʻaki mo e moʻui lelei. ʻI ha fale toputapu ʻi Kawasaki, Siapani, ʻoku lotu ʻa e kakaí ke maluʻi mei he ʻEITISÍ. “Ko e ʻuhinga ʻo e lotu ʻo kau ki he ʻEITISÍ,” ko e fakamatala ia ʻa ha taulaʻeiki ʻo e fale toputapu ko iá, “ʻokú ne ʻai ʻa e kakaí ke nau fakapotopoto ʻi honau ʻulungaangá.” Ka ko e meʻa pē ia ʻoku fiemaʻu ki he lotú?

ʻI he temipale ʻe taha, ko ha fineʻeiki matuʻotuʻa naʻá ne lotu ke “mate fakafokifā.” Ko e hā hono ʻuhingá? Koeʻuhi naʻá ne fiemaʻu ke fai mo fakangata ʻa e mahaki ne fuoloa ʻene toka aí pea ʻoku ʻikai te ne saiʻia ke hoko ko ha kavenga ki hono fāmilí.

ʻI he fonua ʻe taha ʻoku lau ʻoku Kalisitiane, ko e kapiteni ʻo ha timi ʻakapulu naʻá ne lotu ke ikuna pea maluʻi ʻene kau vaʻingá mei ha lavea. Ko e kau Katolika ʻi Pōlani ʻoku nau lotu ʻo kau ki heʻenau moʻui lelei fakafoʻituitui pea nau teuteuʻi ʻenau tamapua ko Madonna ʻaki ʻa e ngaahi kahoa mo e ngaahi vesa mahuʻinga ʻi heʻenau tui ko ʻenau ngaahi lotú kuo fanongoa. ʻOku tokolahi ʻa e kakai ʻoku ʻaukolo ki he ngaahi fale lotu ʻo hangē ko ia ʻoku ʻiloa ko Guadalupe ʻi he fuʻu kolo lahi ko Mekisikou, pea mo Lourdes, ʻi Falanisē, ʻo kole ke nau maʻu ha ngaahi mana fakamoʻui.

ʻI he Hahaké pe Hihifó, ʻoku fai ʻe he kakaí ha ngaahi lotu lahi ʻi he ngaahi ʻuhinga fakafoʻituitui kehekehe. ʻOku hā mahino, ʻoku nau fiemaʻu ʻa ʻenau ngaahi lotú ke fanongoa mo tali. Kaekehe, ʻoku malava moʻoni ke ʻamanekina ko e ngaahi lotu kotoa pē ʻoku pau ke fanongoa fakahōifua ki ai? Fēfē hoʻo ngaahi lotu ʻaʻaú? Kuo tali kinautolu? ʻOku tali koā ʻe he ʻOtuá ʻa e ngaahi lotú?