Ko e Moʻuí​—Ko ha Meʻaʻofa mei he ʻOtuá

ʻOKU pamu ʻe hotau mafú ʻa e toto mahuʻinga ʻi hotau sinó ʻi he houa ʻe ua-fā ʻi he ʻaho. ʻOku tau mohe, pea ʻoku hoko atu ʻa e pupula mo fāʻū hotau maʻamaʻá. ʻOku tau kai ʻa e meʻakai, pea ʻoku fakatoka leva ia. Ko e ngaahi meʻá ni hono kotoa pē ʻoku hoko ʻi he ʻaho taki taha ka ʻoku ʻikai fai ha tokanga pe siʻisiʻi pē ʻa e tokanga ki ai. Ko e ngaahi angafai fakaofo mo taʻe mahino ko ʻení, ʻa ia ʻoku faingofua hono tukunoaʻí, ko e konga ia ʻo e meʻaʻofa ʻoku tau ui ko e moʻuí. ʻI he ʻuhinga ʻe taha, ko e meʻaʻofa ko iá ʻe lava ke ui ko e meʻa fakaemana.

Fakakaukau atu ki he founga ʻo e tuʻituʻia mo hono fāʻeleʻi ʻo e faʻahinga ʻo e tangatá. Neongo ʻoku faʻa talitekeʻi ʻe he sinó ha ngaahi konga faʻahinga kakano kehe, ʻoku talitali lelei ʻe he taungafanaú ia ʻa e foʻi fua kuo fakataha mo e tengá. ʻI he ʻikai ke ne talitekeʻi ʻa e konga toto kuo tupu ko ha konga faʻahinga kakano kehe, ʻokú ne fafangaʻi mo maluʻi ia kaeʻoua kuo mateuteu ke fotu mai ko ha pēpē. Kapau naʻe ʻikai malava ʻa e taungafanaú ke ne fai ʻa e talitali lelei mahuʻinga ko ʻeni ʻa ia ʻoku faikehe mei he lao totonu ko hono talitekeʻi ʻa e konga faʻahinga kakano kehé, ʻe taʻe malava ke fakahoko ha fanauʻi ʻo e faʻahinga ʻo e tangatá.

Ka neongo ia, ʻe fuonounou ʻa e moʻui ʻa ha pēpē fanauʻi foʻou ka ne ʻikai ke hoko ha meʻa ʻi he taungafanaú ʻi he kei māhina ʻe fā nai ʻa e motuʻa ʻo e pēpē teʻeki fanauʻí. ʻI he taimi ko iá ne kamata ai ʻene kai tuhu, ʻa ia ko hono fakamālohiʻi ʻo e ngaahi uoua ʻa ia te ne toki malava ʻamui ke ngāueʻaki ʻi heʻene maʻu meʻakai mei he huhu ʻo ʻene faʻeé. Pea ko e taha pē ʻeni ʻo e ngaahi meʻa mātuʻaki mahuʻinga ʻoku kau ki he moʻuí pe maté ʻoku fakapapauʻi ia ki muʻa fuoloa pea toki fāʻeleʻi ʻa e pēpeé.

Lolotonga ʻa e kei ʻi he taungafanaú ʻa e pēpē teʻeki ai fanauʻí, ʻoku ʻi ai ʻa e ava ʻi he holisi ʻo hono mafú. Kaekehe, ʻoku mapuni leva ʻa e ava ko ʻení ʻi he taimi hono fanauʻí. Tānaki atu ki ai, ʻoku ʻi ai ʻa e halanga toto lahi ʻoku afe ia mei he maʻamaʻá lolotonga ʻa e kei nofo ʻa e pēpē teʻeki ai fanauʻí ʻi he taungafanaú. Ka ʻi hono fanauʻí mai pē kuo mapuni leva ia. ʻOku ʻalu leva ʻa e totó ia ki he maʻamaʻá, ʻa ia ʻoku feohi ai mo e ʻokisená ʻi he ʻuluaki mānava pē ʻa e pēpeé.

Ko e ngaahi meʻá ni hono kotoa pē ko e kamataʻanga pē ia. ʻI he lolotonga ʻa e faai atu ʻa e moʻuí, ʻoku ʻi ai ʻa e ngaahi founga ngāue maau kuo faʻufaʻu (ʻo hangē ko e founga ngāue ʻa e mānavá, ko e founga ngāue fetafeaki takai ʻa e totó, ko e fāʻunga ʻo e neavé, pea mo e founga ngāue ʻo hono fakatupu ʻo tuku ange holo ha huhuʻa ʻi he tafeʻanga ʻo e totó) ʻoku nau fakahoko pea mo ngāue fāʻūtaha ʻo mātuʻaki lavameʻa ʻo ʻikai malava ke makupusi fakaefakakaukau ʻe he faʻahinga ʻo e tangatá. ʻOku hoko hono kotoa ʻa e ngaahi meʻá ni ke kei hokohoko maʻu ai pē ʻa e moʻuí. Tā neʻineʻi ke tohi ʻa e tangata-tohi ʻi he kuonga muʻá ʻo fekauʻaki mo e ʻOtuá: “Te u fakafetaʻi kiate koe; hono kuo fakangeingei mo fakaofo hoku ngaohi e. Ko hoʻo ngaahi ngaue ko e koto fakaofo pe, pea ʻoku matuʻaki ʻilo ia ʻe hoku laumalie.”​—Sāme 139:14.

ʻOku hā mahino, naʻe ʻikai ke tui ʻa e tangata-tohi ʻo e ngaahi lea fakaʻofoʻofa ko ʻení ko e moʻuí ko ha fua ʻo ha tuputupu māmālie taʻepau pe ko e hoko faainoa mai. Kapau naʻe pehē, ʻe ʻikai ke ʻi ai haʻatau ngaahi ngafa pe ngaahi fatongia moʻoni ʻo kau ki he founga te tau ngāueʻaki ai ʻetau moʻuí. Kaekehe, ko e anga ʻo e ngāue ʻa e sinó ʻoku hā maʻalaʻala ʻo fakatapua mai ai ʻoku ʻi ai ha sīpinga, pea ke ʻi ai ha sīpingá ʻoku fiemaʻu ke ʻi ai ha taha naʻá ne tā ʻa e sīpinga ko iá. ʻOku lave ʻa e Tohitapú ki he tefitoʻi moʻoni ko ʻení: “Seuke, ʻilonga ha ʻapi, kuo pau naʻe langa ʻe ha taha; pea ko ia naʻa ne langa ʻa e meʻa kotoa pe ko e ʻOtua.” (Hepelū 3:4) Ko ia ai, ʻoku mātuʻaki mahuʻinga ke “ilo ko Jihova ko ia be koe Otua: ko ia be naa ne gaohi akitautolu, ka nae ikai te tau gaohi akitautolu.” (Sāme 100:​3, PM) ʻIo, ʻoku ʻikai ko ha meʻa hokonoa mai pē ʻa e moʻuí; ko e meʻaʻofa ia mei he ʻOtuá tonu.​—Sāme 36:9.

ʻI he tuʻunga ko iá, ko e hā hotau ngaahi ngafa ke fai ki he Tokotaha-Foaki mai ʻo e moʻuí? Ko e hā ʻa e founga ʻokú ne ʻamanekina meiate kitautolu ke tau ngāueʻaki ai ʻetau moʻuí? ʻE fai ha lāulea ki he ongo fehuʻi ko ení pea mo e ngaahi fehuʻi kehe ʻoku kaunga ki ai ʻi he kupu hono hokó.