Naʻa Nau Fai ʻa e Finangalo ʻo Sihová

Naʻe Fekau Atu ʻe Sīsū ʻa e Kau Ākonga ʻe Toko 70

KO E faʻahitaʻu fakatōlau ia ʻo e 32 T.S. Ko e māhina pē ʻe ono naʻe toe ki muʻa ʻi he pekia ʻa Sīsuú. Mei hení, koeʻuhi ke fakavaveʻi ʻa e ngāue fakamalangá pea fakalahi ʻa hono akoʻi ʻa e niʻihi ʻo hono kau muimuí, naʻá ne fakanofo ʻa e kau ākonga ʻe toko 70 pea “fekau atu kinautolu, ʻo tautau toko ua, ke fakamelomelo kiate ia ki he kolo taki taha mo e potu ʻoku ne teu ʻalu ki ai ʻe ia.”​—Luke 10:1.a

Naʻe fekau atu ʻe Sīsū ʻene kau ākongá “ke fakamelomelo kiate ia” koeʻuhi ke malava ʻa e kakaí ʻo fakapapauʻi vave ange pe te nau kau, pe fakafepaki ki he Mīsaiá ʻi he taimi naʻe aʻu tonu mai ai ʻa Sīsū ki muí. Ka ko e hā naʻá ne fekau atu ai kinautolu “ʻo tautau toko ua”? ʻOku hā mahino, koeʻuhi ke nau hoko nai ʻo fefakalototoʻaʻaki ʻi he taimi naʻa nau fehangahangai ai mo e fakafepakí.

ʻI hono fakamamafaʻi ʻa e fakavavevave ʻo ʻenau ngāue fakamalangá, Naʻe tala ange ʻe Sīsū ki hono kau muimuí: “Kuo lahi ʻa e taʻu kuo motuʻu, ka ʻoku kaungatāmaki ʻa e kau ngāue: ko ia ke mou kole ki he ʻEiki ʻoku aʻana ʻa e taʻu, ke ne kouna atu mo ha kau ngāue ke utu ʻene taʻu.” (Luke 10:2) Ko e fakatatau ki ha utu-taʻú naʻe feʻungamālie, he ko ha toloi pē ʻi he taimi utu-taʻú ʻe iku ia ki ha maumau ʻo e ngaahi fua mahuʻingá. ʻOku pehē pē, kapau naʻe pau ke liʻaki ʻe he kau ākongá ʻenau ngāue fakamalanga kuo vaheʻí, ʻe lava ke mole ʻa e ngaahi moʻui mahuʻinga!​—Isikeli 33:6.

Kau Faifekau ʻIkai Fakaleluʻi

Naʻe toe fakahinohino ʻe Sīsū ʻa ʻene kau ākongá: “ʻOua naʻa toʻo ha kato paʻanga, pe ha kato ʻoho, pe ha ngaahi sū: pea naʻa mo e fetapa mo ha taha ʻi he hala, ʻoua.” (Luke 10:4) Naʻe angaʻaki ki ha tokotaha fononga ke ne toʻo ʻo ʻikai ko ha kato pē mo e meʻakai, ka ko ha toe ongo hoaʻi sū, he ʻe lava ke maumau ʻa e ngaahi ʻaofi vaʻé pea ʻe lava ke motumotu mo e ngaahi nonoʻó. Ka naʻe ʻikai pau ke hohaʻa ʻa e kau ākonga ʻa Sīsuú ia ki he ngaahi meʻa peheé. Ka, naʻe pau ke nau falala ʻe tokangaʻi kinautolu ʻe Sihova fakafou mai ʻi honau kaungā-ʻIsilelí, ʻa ia naʻe anga-fakafonuaʻaki ʻi honau lotolotongá ʻa e talitali-kakaí.

Ka ko e hā naʻe tala ai ʻe Sīsū ki heʻene kau ākongá ke ʻoua naʻa fāʻufua mo ha taha pē ʻi ha feʻiloakí? Naʻe pau ke nau anga-taʻefakakaumeʻa, naʻa mo taʻefakaʻapaʻapa? ʻIkai ʻaupito! Ko e foʻi lea faka-Kalisi ko e a·spaʹzo·mai, ko hono ʻuhingá ko e fāʻufua ʻi ha feʻiloakí, ʻoku ʻuhinga lahi ange nai ia ʻi ha lea “mālō e lelei” pe “mālō ʻetau lava” anga-fakaʻapaʻapa. ʻOku fakakau nai ai ʻa e anga-fakafonua ko e ngaahi ʻuma, ngaahi fāʻufua, mo e talanoa lōloa ʻa ia ʻe fakahoko ʻi he taimi ʻoku fetaulaki ai ha ongo meʻa ʻokú na maheni. ʻOku pehē ʻe he tokotaha fai līpooti ʻe taha: “Naʻe ʻikai ke ʻi ai ha lea fakafeʻiloaki ia ʻi he lotolotonga ʻo e Hahaké, ʻo hangē ko ia ʻi hotau lotolotongá, ko ha kiʻi punou, pe ko e hiki atu ʻo e nimá, ka naʻe faiʻaki ia ʻa e ngaahi fāʻufua lahi, mo e ngaahi tūʻulutui, pea naʻa mo e fakatōmapeʻe ʻo e sinó ʻi he kelekelé. Ko e meʻá ni kotoa naʻe fiemaʻu ki ai ʻa e taimi lahi.” (Fakafehoanaki mo 2 Tuʻi 4:​29.) Ko ia naʻe tokoniʻi ʻe Sīsū ʻa hono kau muimuí ke fakaʻehiʻehi mei he ngaahi fakalelu naʻe ʻikai fiemaʻu, neongo ko e anga-fakafonua.

Fakaʻosí, naʻe tala ʻe Sīsū ki heʻene kau ākongá, ʻi he taimi naʻa nau hū ai ki ha fale pea talitali leleí, naʻe totonu ke nau “nofo ʻi he fale pe ko ia, ʻo kai mo inu ʻa e ngaahi meʻa te nau ʻomi.” Ka ʻo kapau naʻa nau hū atu ki ha kolo pea ʻikai ke talitali-lelei, naʻe totonu ke nau ‘ʻalu atu ki he ngaahi malaʻe ʻo e kolo, ʻo nau pehē, Naʻa mo e efu ʻo hoʻomou koló, ʻa ia kuo piki ki homau vaʻé, ʻoku mau holoholo atu.’ (Luke 10:​7, 10, 11) Ko hono holoholoʻi pe tūtuuʻi ʻa e efú ʻi he vaʻe ʻo ha taha ʻe fakahaaʻi ai naʻe tuku atu ʻi he melino ʻe he kau ākongá ʻa e fale taʻefiefanongó pe koló ki he ngaahi nunuʻa ʻa ia ʻe faifai atu pē ʻo hoko mai mei he ʻOtuá. Ka ko e faʻahinga ko ia ʻa ia naʻa nau tali anga-ʻofa ʻa e kau ākonga ʻa Sīsuú ʻoku nau hanga atu ai ki he ngaahi tāpuaki. Naʻe tala ange ʻe Sīsū ʻi he taimi ʻe taha ki heʻene kau ʻaposetoló: “Ko ia ʻoku ne tali kimoutolu ʻoku ne tali au, pea ko ia ʻoku ne tali au, ʻoku ne tali ia ʻa ia naʻa ne fekau mai au. . . . ʻIo, ko ia te ne ʻange ha inu ki ha taha ʻi siʻi fanau ni, koeʻuhi pe ko e toko taha ia ʻi heʻeku kau ako, neongo ko ha huʻa vai momoko pe, ko au e, ʻoku ou tala atu, ʻE ʻikai ʻaupito mole ʻene totongi aʻana.”​—Mātiu 10:​40, 42.

Ngaahi Lēsoni Maʻatautolu

Ko e fekau ke malangaʻi ʻa e ongoongo lelei ʻo e Puleʻanga ʻo e ʻOtuá pea ke ngaohi ākongá ʻoku lolotonga fakahoko ia he taimí ni ʻe he Kau Fakamoʻoni ʻa Sihova, laka hake he toko 5,000,000 ʻi māmani lahi. (Mātiu 24:14; 28:​19, 20) ʻOku nau ʻilo ʻoku fakavavevave ʻenau pōpoakí. Ko ia ai, ʻoku nau ʻai ʻa e lahi taha ʻo honau taimí, ki hono kalofi ʻa e ngaahi fakalelu ʻa ia te ne taʻofi kinautolu mei he fai ʻa e tokanga kakato ki heʻenau ngāue mahuʻinga kuo vaheʻí.

ʻOku feinga mālohi ʻa e Kau Fakamoʻoni ʻa Sihová ke nau anga-fakakaumeʻa ki he tokotaha kotoa ʻoku nau fetaulakí. Ka neongo ia, ʻoku ʻikai te nau kau pē ki ha talanoa maumau taimi, pea ʻoku ʻikai te nau kau ʻi he ngaahi tipeiti ʻi he ngaahi ʻīsiu fakasōsialé pe ko e ngaahi feinga taʻemalava ʻa e māmani ko ʻení ke fakatonutonu ʻa e ngaahi fakamaau taʻetotonú. (Sione 17:16) ʻI hono kehé, ʻoku nau fakahangataha ʻenau talanoá ʻi he fakaleleiʻanga tuʻuloa pē ʻe taha ki he ngaahi palopalema ʻa e tangatá​—ko e Puleʻanga ʻo e ʻOtuá.

ʻOku faʻa fai ʻa e vakai ki he ngāue tautau toko ua ʻa e Kau Fakamoʻoni ʻa Sihová. ʻE ʻikai nai lava ke fakahoko ʻa e meʻa lahi ange kapau te nau taki taha ngāue tokotaha pē? Mahalo pē. Ka neongo ia, ʻoku ʻiloʻi ʻe he kau Kalisitiane ʻi he ʻaho ní ʻa hono ʻaonga ʻo e fengāueʻaki mo ha kaungā-tuí. ʻOkú ne ʻomai ha maluʻanga ʻi he taimi ʻo e faifakamoʻoni ʻi he ngaahi feituʻu fakatuʻutāmakí. ʻOku toe malava ki he faʻahinga foʻou angé ʻi he ngāue mo ha hoá, ke maʻu ʻa e ʻaonga mei he pōtoʻi ʻa e kau malanga taukei ange ʻo e ongoongo leleí. Ko e moʻoni, ʻoku lava fakatouʻosi ke na fai ha fefakalototoʻaʻaki.​—Palovepi 27:17.

ʻOku ʻikai ha veiveiua, ko e ngāue fakamalangá ʻa e ngāue fakavavevave taha kuo fakahoko ʻi he “kuonga fakamui” ko ʻení. (2 Timote 3:1) ʻOku fiefia ʻa e Kau Fakamoʻoni ʻa Sihová ʻi hono maʻu ʻa e poupou ʻa ha fetokouaʻaki ʻi māmani lahi ʻa ia ʻoku nau ngāue ai ʻi he “loto uouangataha pe he fakafitefitaʻa maʻa e lotu faka-kosipeli.”​—Filipai 1:27.

[Fakamatala ʻi lalo]