ʻOku ʻI Ai Hao ʻĀngelo Tauhi?

ʻOKÚ KE tui ʻoku ʻi ai hao ʻāngelo tauhi? ʻOku fakakaukau ʻa e kakai tokolahi ʻoku pehē. Fekauʻaki mo e meʻa ko iá, ʻoku pehē tokua ʻoku ʻi ai ha meʻaʻofa makehe ʻa ha fefine moʻoni ʻi he fakahihifo ʻo Kānatá fekauʻaki mo e kau ʻāngeló. Kapau te ke ʻoange kiate ia ho hingoa kakató fakataha mo ha CAD$200, ʻokú ne taukaveʻi te ne fakafetuʻutaki koe ki ho ʻāngelo tauhí. ʻUluakí, ʻokú ne fakalaulauloto ʻaki ʻene hangataha ki ha ulo ʻa ha foʻi teʻelango. Ko hono hokó, ʻoku ʻi ai leva ʻene vīsone ʻa ia ʻoku ʻoange ai kiate ia ʻe hoʻo ʻāngeló ha pōpoaki ke fakahoko mai kiate koe. ʻI ha pōnasi, ʻoku ʻomai ʻe he fefiné ha tā valivali ʻo e fōtunga ʻo hoʻo ʻāngeló.

Ki he niʻihi, ʻoku hā ngali tatau nai eni mo ha talanoa fekauʻaki mo e Tuʻi Falanisē ko Louis IX. Naʻe pehē koā naʻá ne fakatau mai ʻa e ngaahi fulufuluʻi manu mamafa ʻaupito ko e pehē naʻe ngangana hifo mei he ongo kapakau ʻo e ʻĀngelo-Pule ko Maikelí. Lolotonga hono fehuʻia ʻo e talanoa ko iá, heʻikai toe fehuʻia leva ʻe he tokolahi ia ʻa e ngaahi taukaveʻi ʻa e fefine Kānatá.

ʻĀvea ʻi he Kau ʻĀngeló

Kuo ʻi ai ʻa e mahuʻingaʻia fakaʻulia ki muí ni mai ʻi he kau ʻāngeló. ʻI he televīsoné pea ʻi he ngaahi heleʻuhilá, ko e ngaahi tohí, ngaahi makasiní, mo e ngaahi ʻuluʻi ongoongó, ʻoku tala mai ai kiate kitautolu ʻo fekauʻaki mo ha kau ʻāngelo ʻoku nau fakafiemālieʻi ʻa e faʻahinga ʻoku puke lahí, fakanonga ʻa e mamahí, foaki poto, pea hamusi ʻa e faʻahinga tāutaha mei he maté. ʻI he ʻIunaite Seteté, ko e kau mamata nai ʻe toko 20 miliona ʻoku nau sio ʻi he ngaahi konga televīsone hokohoko fakauike ʻoku fakahaaʻi ai ʻa e kau fakaeʻāngelo mai ki he moʻui ʻa e kakaí. ʻI he fale tohi ʻe taha ʻoku fakahokohoko ai ʻa e ngaahi tohi laka hake he 400 ʻa ia ʻoku fakahangataha ki he kau ʻāngeló.

ʻOku lave ha tohi ki muí ni ki he ngaahi meʻa naʻe hokosia fekauʻaki mo e anga ʻo hono fakahaofi ʻe he kau ʻāngelo tauhí ʻa e moʻui ʻa ha kau sōtia ʻi he taú. Ko e ngaahi sitika ʻi he pamupā ʻo e ngaahi meʻalelé ʻoku pehē ai ʻoku maluʻi ʻa e kau fakaʻulí ʻe he kau ʻāngelo tauhí. Ko e ngaahi kautahá, ngaahi konifelenisí, mo e ngaahi seminaá ʻoku nau poupouʻi ʻa e ako ki he kau ʻāngeló pea ʻoku pehē tokua ʻoku tokoniʻi ai ʻa e kakaí ke fetuʻutaki mo kinautolu.

Ko Eileen Freeman ko e tokotaha tohi ia ʻo e ngaahi tohi ʻe tolu ʻo fekauʻaki mo e kau ʻāngeló pea ko e faipulusi ia ʻo ha kupu ʻoku fakahanga maʻataʻatā pē kiate kinautolu. ʻOkú ne fakahaaʻi: “ʻOku ou tui ko e ʻāngelo kotoa pē ʻi hēvaní ʻoku ʻi ai ʻene ʻāngelo tauhi ʻi Māmani, ko ha meʻamoʻui ʻa ia ko hono ngaahi fatongiá ʻoku ʻikai ko e fakahīkihikiʻi ʻataʻatā pē ʻa e ʻOtuá ʻi he feituʻu fakahēvaní ka ko hono tokangaʻi moʻoni ʻa e faʻahinga ʻo e tangatá mo e tuʻunga moʻui kehe ʻi Māmaní. ʻOku vaheʻi mai ha ʻāngelo tauhi kiate kitautolu taki taha ʻi he taimi ʻo hotau feitamaʻí pea ʻokú ne leʻohi kitautolu ʻi he taimi ʻo ʻetau tupu ʻi he manavá, ʻi he taimi ʻo hotau fanauʻí, ʻi he taimi ʻo ʻetau moʻui ʻi he māmani ko ení, ʻo aʻu ki hono tataki kitautolu ʻe he ʻāngeló mei he ngaahi feituʻu ʻo e māmani ko ení ki he lāngilangi ʻo hēvaní.” ʻOku fakamatalaʻi lelei ʻe he meʻá ni ʻa e manakoa ʻo e vakai atu ki he kau ʻāngelo tauhí.

ʻI he taimi tauhaʻa mo faingataʻa ko ení, ʻoku fakafiemālie ke tui ʻoku tau maʻu haʻatau ʻāngelo tauhi tonu, ʻa ia ko hono fatongiá ke maluʻi kitautolu. Ko e hā e lau ʻa e Folofola ʻa e ʻOtuá, ko e Tohitapú, ʻo fekauʻaki mo e meʻá ni? ʻOku totonu ke tau feinga ke fetuʻutaki mo e kau ʻāngeló? ʻOku nau tokanga mai fekauʻaki mo hotau ngaahi tuʻunga fakaeʻulungāngá mo e ngaahi tui fakalotú? Ko e hā ʻa e tokoni ʻe lava ke tau ʻamanekina meiate kinautolú? Ko e ngaahi fehuʻí ni ʻe tali ia ʻi he kupu hono hokó.