Ko e Hā ke Tui Ai kia Sīsū Kalaisí?
“NAʻA mo e kakai tokolahi ko ia ʻoku ʻikai ko e kau Kalisitiané ʻoku nau tui ko ha faiako lahi Ia mo poto. Ko e taha moʻoni ia ʻo e kakai ivi tākiekina lahi taha kuo moʻui maí.” (The World Book Encyclopedia) Ko hai “Ia”? Ko Sīsū Kalaisi, ʻa e tokotaha fokotuʻu ʻo e lotu faka-Kalisitiané?
Kae kehe, neongo pe ko e hā ʻoku leaʻaki ʻe he ʻenisaikolopētiá, ki he lauingeau miliona ia ʻo e kakai ʻi he Hahaké mo ha feituʻu pē, ko Sīsū Kalaisí ia ko ha sola, ko ha hingoa pē ʻoku nau manatuʻi nai mei he ngaahi tohi ako ʻi he akoʻanga māʻolungá. Naʻa mo e ʻi he ngaahi siasi ʻo Puleʻanga-Haʻa-Kalisitiané, ʻoku ʻi ai ʻa e kau teolosia mo e kau tangata faifekau ʻoku nau pehē ʻoku ʻikai moʻoni ke tau ʻilo ʻa Sīsū pea tuku mai ʻa e veiveiua ki he moʻoni ʻo e ngaahi fakamatala ʻe fā ʻoku kei ʻi ai fekauʻaki mo ʻene moʻuí (ʻa e ngaahi Kōsipelí) ʻoku maʻu ʻi he Tohitapú.
Naʻe lava ke tohinima kākaaʻi ʻe he kau tohi Kōsipelí ʻa e talanoa ki he moʻui ʻa Sīsuú? ʻIkai ʻaupito! Ko e faihisitōlia ʻiloa ko ia ko Will Durant, ʻi he hili ʻene ʻanalaiso ʻa e ngaahi fakamatala Kōsipeli ko iá, naʻá ne tohi: “Ke fai ʻe ha kiʻi kau tangata lāuvale ʻi ha toʻutangata pē taha ha foʻi faʻu ʻo ha angaʻitangata mālohi pehē fau pea fakamānako, ha ʻulungaanga māʻolunga pehē fau, ha vīsone tākiekina pehē fau ʻo e fetokouaʻaki fakaetangatá, ʻe hoko ia ko ha mana ʻoku taumamaʻo atu ʻene fakaofó ʻi ha meʻa pē kuo lēkooti ʻi he ngaahi Kōsipelí. ʻI he hili ʻa e senituli ʻe ua ʻo e Ako Fakaangaʻi ʻo e Tohitapú, ʻoku kei hā mahino totonu ai pē ʻa e ngaahi fakamatala māʻopoʻopo fekauʻaki mo e moʻui, anga, mo e akonaki ʻa Kalaisí, pea fokotuʻu ʻa e tafaʻaki fakamānako lahi taha ʻi he hisitōlia ʻo e tangata ʻo e Hihifó.”
Ka, ʻoku kei ʻi ai ʻa e faʻahinga ʻoku nau liʻaki ʻa Sīsū Kalaisi ʻi he tuʻunga ʻoku taʻefeʻunga ke nau tokanga ki ai koeʻuhi ko e meʻa kuo fai ʻe he faʻahinga ʻoku taku ko hono kau muimuí. ‘Naʻa nau lī ha ʻātomi pomu ʻi Nagasaki,’ ko e lea ia ʻe fai ʻe ha niʻihi ʻi Siapani. ‘Pea naʻe tokolahi ange ʻa e kau Kalisitiane ia ʻi Nagasaki, ʻi he lahi taha ʻo e ngaahi kolo lalahi ʻi Siapaní.’ Ka ʻe lava ke ke tukuakiʻi ha toketā ki ha puke ʻa ha tokotaha mahaki kapau ʻoku ʻikai muimui ʻa e tokotaha mahakí ia ki he tataki ʻa e toketaá? Ko e tokolahi taha ʻo e kakai ʻoku taku ko e kau Kalisitiané kuo fuoloa pē ʻenau siʻaki ʻa e tohi-talavai ʻa Sīsū ke ikuʻi ʻaki ʻa e ngaahi mahamahaki ʻa e faʻahinga ʻo e tangatá. Neongo ia, naʻe ʻomai ʻe Sīsū ʻa e faitoʻo ki hotau ngaahi palopalema ʻi he ʻaho ki he ʻahó pea pehē ki he ngaahi mamahi ʻa e faʻahinga ʻo e tangatá ʻi māmani lahi. Ko e ʻuhinga ia ʻoku mau fakaafeʻi atu ai koe ke ke lau ʻa e kupu hoko maí pea sio ai maʻau pe ko e faʻahinga tangata fēfē naʻá ne ʻi aí.