ʻE Lava Fēfē ʻe Sīsū ʻo Liliu Hoʻo Moʻuí?

KO Sīsū Kalaisí ko ha Faiako Lahi naʻe nofo ʻi Pālesitaine ʻi he meimei taʻu ʻe 2,000 kuo maliu atú. ʻOku siʻi ʻaupito ʻa e ʻilo fekauʻaki mo ʻene kei siʻí. Kae kehe, ʻoku fakamoʻoniʻi lelei, ko e taimi ko ia naʻá ne taʻu 30 nai aí, naʻá ne kamata ai ʻa ʻene ngāue fakafaifekau ke “fakamooni ki he mooni.” (Sione 18:​37, PM; Luke 3:​21-23) Ko e kau ākonga ʻe toko fā naʻa nau tohi ʻa e ngaahi fakamatala fekauʻaki mo ʻene moʻuí naʻa nau fakahangataha ki he taʻu ʻe tolu mo e konga naʻe hoko atu aí.

ʻI he lolotonga ʻo ʻene ngāue fakafaifekaú, naʻe ʻoange ai ʻe Sīsū Kalaisi ki heʻene kau ākongá ha fekau ʻa ia ʻe lava ke hoko ko ha fakafiemālie ki he ngaahi faingataʻaʻia lahi ʻo e māmaní. Ko e hā ia? Naʻe pehē ʻe Sīsū: “Ko e tuʻutuʻuni foʻou ʻoku ou tuku kiate kimoutolu, ke mou feʻofaʻaki: hange ā ko ʻeku ʻofaʻi kimoutolu, ke pehē foki hoʻomou feʻofaʻaki.” (Sione 13:34) ʻIo, ko e fakaleleiʻanga ki he ngaahi palopalema lahi ʻa e faʻahinga ʻo e tangatá ko e ʻofá. ʻI he aʻu mai ki ha taimi ʻe taha, naʻe ʻeke ai kia Sīsū pe ko e fē ʻa e fekau ʻoku lahi tahá, naʻá ne tali: “Ke ke ofa kia Jihova ko ho Otua aki ho laumalie kotoa, mo hoo moui kotoa, mo ho loto kotoa. Koe uluaki bea koe lahi ia oe fekau. Bea ko hono ua oku tatau mo ia, Ke ke ofa ki ho kaugaabi o hage be ko koe.”​—Mātiu 22:​37-40, PM.

Naʻe fakahāhaaʻi mai ʻe Sīsū kiate kitautolu ʻaki ʻa e lea mo e ngaahi ngāue ʻa e founga ke ʻofa ai ki he ʻOtuá mo e kaungā faʻahinga ʻo e tangatá. Tau lāulea ange ki ha ngaahi faʻifaʻitakiʻanga ʻe niʻihi pea sio pe ko e hā ʻe lava ke tau ako meiate iá.

Ko ʻEne Ngaahi Akonakí

ʻI he taha ʻo e ngaahi malanga ʻiloa taha ʻi he hisitōliá, naʻe tala ai ʻe Sīsū Kalaisi ki hono kau muimuí: “ʻOku ʻikai ke lava ʻe ha taha ke ne ʻeikiʻaki ha ʻeiki ʻe toko ua: he te ne fehiʻa ki he taha kae ʻofaʻi ʻa e taha, pe te ne piki ki he taha kae taʻetokaʻi ʻa e taha. ʻOku ʻikai te mou lava ke eikiʻaki ʻa e ʻOtua mo Koloa fakatouʻosi.” (Mātiu 6:24) ʻOku kei ʻaonga ʻi he ʻahó ni ʻa e akonaki ko ia ʻa Sīsū fekauʻaki mo hono fakamuʻomuʻa ʻa e ʻOtuá ʻi heʻetau moʻuí, lolotonga ia ʻoku tui ʻa e kakai tokolahi fau ko e paʻangá ʻokú ne solova ʻa e ngaahi palopalema kotoa pē? Ko e moʻoni, ʻoku fiemaʻu ʻa e paʻangá ke tau moʻui ai. (Koheleti 7:12) Ka, ʻo kapau ʻoku tau ʻai ʻa e “Koloa” ko hotau pulé ia, ʻe hanga ʻe he “ʻofa ki he paʻanga” ʻo puleʻi kitautolu, ʻo puleʻi ʻetau moʻuí kotoa. (1 Timote 6:​9, 10) Ko e tokolahi kuo nau tō ki he tauhele ko ʻení kuo nau iku atu ai ki he mole honau fāmilí, ʻenau moʻui leleí, pea naʻa mo ʻenau moʻuí.

ʻI he tafaʻaki ʻe tahá, ko e hanga ki he ʻOtuá ʻi he tuʻunga ko hotau Pulé iá ʻoku ʻomai ai ʻa e ʻuhinga ki he moʻuí. ʻI he tuʻunga ko e Tokotaha-Fakatupú, ko ia ʻa e Matavai ʻo e moʻuí, pea ko ia ai, ko ia pē tokotaha ʻoku taau ke tau lotu ki aí. (Sāme 36:9; Fakahā 4:11) Ko e faʻahinga ko ia ʻoku nau ako fekauʻaki mo hono ngaahi ʻulungāngá pea hoko ʻo ʻofa kiate iá ʻoku ueʻi kinautolu ke nau tauhi ʻene ngaahi fekaú. (Koheleti 12:13; 1 Sione 5:3) ʻI he fai peheé, ʻoku ʻaonga ia kiate kitautolu.​—Aisea 48:17.

ʻI he Malanga ʻi he Moʻungá, naʻe toe akoʻi ai ʻe Sīsū ʻene kau ākongá ki he founga ke fakahāhā ai ʻa e ʻofa ki he kaungā faʻahinga ʻo e tangatá. Naʻá ne pehē: “Ko ia ʻilonga ha meʻa ʻoku mou loto ke fai ʻe he kakai kiate kimoutolu, fai pehe foki kiate kinautolu.” (Mātiu 7:12) Ko e foʻi lea “kakai” naʻe ngāueʻaki heni ʻe Sīsuú ʻoku kau ki ai naʻa mo hoto ngaahi filí. ʻI he malanga tatau pē, naʻá ne pehē ai: “Mou ʻofaʻi homou ngāhi fili, pea hufia ʻa kinautolu ʻoku nau fakatangaʻi kimoutolu.” (Mātiu 5:​43, 44) ʻIkai ʻe hanga ʻe he ʻofa peheé ʻo solova ʻa e ngaahi palopalema lahi ʻoku tau fehangahangai mo ia he ʻaho ní? Naʻe pehē ʻa e fakakaukau ʻa e taki Hinitū ko Mohandas Gandhi. ʻOku lave ki heʻene leá ʻo pehē: “ʻO ka [ta] fakataha ʻi he ngaahi akonaki naʻe tuku ʻe Kalaisi ʻi he Malanga ko eni ʻi he Moʻungá, te ta lava ʻo solova ʻa e ngaahi palopalema . . . ʻa e māmaní kotoa.” Ko e ngaahi akonaki ʻa Sīsū fekauʻaki mo e ʻofá, kapau ʻe ngāueʻaki, ʻe lava ke solova ai ʻa e ngaahi faingataʻaʻia lahi ʻa e faʻahinga ʻo e tangatá.

Ko ʻEne Ngaahi Ngāué

Naʻe ʻikai ke ngata pē ʻi hono akoʻi ʻe Sīsū ʻa e ngaahi moʻoni loloto fekauʻaki mo e founga ke fakahāhā ai ʻa e ʻofá ka naʻá ne toe ngāueʻaki ʻa e meʻa naʻá ne akoʻí. Ko e fakatātaá, naʻá ne fakamuʻomuʻa ʻe ia ʻa e ngaahi mahuʻingaʻia ʻa e niʻihi kehé ʻi haʻaná tonu. ʻI he ʻaho ʻe taha naʻe moʻumoʻua ʻaupito ai ʻa Sīsū mo ʻene kau ākongá ʻi hono tokoniʻi ʻa e kakaí ʻo ʻikai ai naʻa mo ha taimi ke nau kai ai. Naʻe ʻilo ʻe Sīsū ʻa e fiemaʻu ki heʻene kau ākongá ke nau kiʻi mālōloó, pea naʻá ne ʻave kinautolu ki ha potu maomaonganoa. Ka ʻi heʻenau aʻu ki aí, naʻa nau ʻilo ai ha fuʻu kakai tokolahi ʻoku nau tali mai kiate kinautolu. ʻE fēfē haʻo tali ʻi haʻo sio ki ha fuʻu kakai tokolahi naʻa nau ʻamanekina mai koe ke ke ngāue ʻi he taimi ʻokú ke ongoʻi ai ʻe koe ʻoku fiemaʻu ke ke kiʻi mālōlō? Sai, ko Sīsuú “naʻe langa hono fatu ʻi he ʻofa kiate kinautolu” peá ne “hanga ʻo ako kiate kinautolu ha ngāhi meʻa lahi.” (Maake 6:34) Ko e tokanga ko ʻeni ki he niʻihi kehé naʻá ne ueʻi maʻu pē ʻa Sīsū ke ne tokoniʻi kinautolu.

Naʻe lahi ange ʻa e meʻa naʻe fai ʻe Sīsū maʻá e kakaí ʻo ʻikai ko hono akoʻi pē kinautolu. Naʻá ne toe tuku atu ʻa e tokoni ʻaonga. Ko e fakatātaá, ʻi he taimi ʻe taha naʻá ne fafangaʻi ai ha kakai tokolahi hake he toko 5,000 ʻa ia naʻa nau nofo ʻo fanongo kiate ia ʻo aʻu ki he efiafí. ʻI he hili pē iá, naʻá ne fafangaʻi mo ha toe fuʻu kakai tokolahi​—ʻi he taimi ko ʻení naʻe laka hake ia ʻi he toko 4,000​—ʻa ia naʻa nau fanongo kiate ia ʻi he ʻaho ʻe tolu pea naʻe ʻikai ha meʻa ʻe toe ke kai. ʻI he ʻuluaki taimí, naʻá ne ngāueʻaki ai ʻa e foʻi mā ʻe nima mo e mataʻiika ʻe ua, pea ʻi hono uá, ko e foʻi mā ʻe fitu mo e fanga kiʻi mataʻiika. (Mātiu 14:​14-22; 15:​32-38) Ko ha ngaahi mana? ʻIo, naʻá ne hoko ko ha tokotaha ngāue mana.

Naʻe fakamoʻui foki ʻe Sīsū ʻa e kau mahamahaki tokolahi. Naʻá ne fakamoʻui ʻa e kuí, ʻa e heké, ʻa e kiliá, pea mo e tulí. Naʻe aʻu ʻo ne fokotuʻu hake ʻa e maté! (Luke 7:22; Sione 11:​30-45) ʻI he taimi ʻe taha naʻe kōlenga ai kiate ia ha tokotaha kilia: “Ka ne ke loto ke fai, te ke lava ke fakamaʻa au.” Naʻe anga-fēfē ʻa e tali ki ai ʻa Sīsuú? “Pea langa ʻa e fatu ʻo Sisū ʻi he ʻofa, ʻo ne mafao atu hono nima ʻo ala kiate ia, mo ne pehe, ʻOku ou loto pe; ke ke maʻa koe.” (Maake 1:​40, 41) Fakafou ʻi he ngaahi mana peheé, naʻe fakahāhaaʻi ai ʻe Sīsū ʻa ʻene ʻofa ki he faingataʻaʻiá.

ʻOkú ke pehē ʻoku faingataʻa ke tui ki he ngaahi mana ʻa Sīsuú? ʻOku pehē ʻa e niʻihi ia. Kae, manatuʻi, naʻe fakahoko ʻe Sīsū ʻene ngaahi maná ʻi he ʻao ʻo e kakaí. Naʻa mo hono kau fakafepakí, ʻa ia naʻa nau feinga ke maʻu haʻane hala ʻi he taimi kotoa pē, naʻe ʻikai malava ke nau fakaʻikaiʻi ko ha tokotaha ngāue mana ia. (Sione 9:​1-34) ʻIkai ko ia pē, naʻe ʻi ai ha taumuʻa ʻo ʻene ngaahi maná. Naʻa nau tokoni ke ʻiloʻi ʻe he kakaí ia ʻi he tuʻunga ko e Tokotaha naʻe fekau mai ʻe he ʻOtuá.​—Sione 6:14.

ʻI hono fakahoko ʻa e ngaahi maná, naʻe ʻikai ke fakahanga ai ʻe Sīsū ʻa e tokangá kiate ia tonu. Ka, naʻá ne fakalāngilangiʻi ai ʻa e ʻOtuá, ʻa e Matavai ʻo hono mālohí. ʻI Kāpaneume, naʻá ne ʻi ha fale ai naʻe fonu ʻi he kakaí. Naʻe ʻi ai ha tangata mamatea naʻe loto ke fakamoʻui ia ka naʻe ʻikai malava ke ne hū ki loto. Ko ia naʻe tukutuku hifo ia ʻe hono ngaahi kaumeʻá ʻi ha meʻa-fata ʻo ʻohifo ʻi he ʻató. ʻI he vakai atu ki heʻenau tuí, naʻe fakamoʻui ai ʻe Sīsū ʻa e tokotaha mamateá. Ko hono olá, naʻe hanga ai ʻe he kakaí ʻo “fakamaloʻia ʻa e ʻOtua” mo pehē: “Kuo teʻeki ke tau mamata ki ha meʻa pehē.” (Maake 2:​1-4, 11, 12) Naʻe hanga ʻe he ngaahi mana ʻa Sīsuú ʻo ʻoatu ʻa e fakahīkihiki kia Sihova, ko hono ʻOtuá, pea tokoniʻi ai ʻa e faʻahinga naʻa nau faingataʻaʻiá.

Kae kehe, ko hono fakamoʻui fakaemana ʻo e puké, naʻe ʻikai ko e meʻa tefito ia ʻo e ngāue fakafaifekau ʻa Sīsuú. Ko ha tokotaha ʻa ia naʻá ne tohi ha fakamatala fekauʻaki mo e moʻui ʻa Sīsuú naʻá ne fakamatalaʻi: “Kuo tohi ʻeni koeʻuhi ke mou tui ko Sisū ko e Misaia ia, ko e ʻAlo ʻo e ʻOtua: pea ʻi hoʻomou tui ke mou maʻu moʻui ʻi hono huafa.” (Sione 20:31) ʻIo, naʻe haʻu ʻa Sīsū ki māmaní koeʻuhi ke maʻu nai ai ʻa e moʻuí ʻe he faʻahinga ʻo e tangatá ʻe tuí.

Ko ʻEne Feilaulaú

‘Naʻe haʻu ʻa Sīsū ki māmani?’ ko haʻo ʻeke nai ia. ‘Naʻá ne haʻú mei fē?’ Naʻe pehē ʻe Sīsū tonu: “Kuo u ʻalu hifo mei he langi, ʻo ʻikai te u fai ʻa e loto ʻoʻoku, ka ko e finangalo ʻo ia naʻa ne fekau mai au.” (Sione 6:38) Naʻá ne ʻi ai ki muʻa ke tangatá ʻi he tuʻunga ko e ʻAlo tofu-pē-taha-ne-fakatupu ʻo e ʻOtuá. Ko e hā leva ʻa e finangalo ʻo e Tokotaha ko ia naʻá ne fekauʻi hifo ia ki he māmaní? “Naʻe ʻofa pehe ʻa e ʻOtua ki māmāni, ko ia naʻa ne foaki hono ʻAlo-tofu-pe-taha-ne-fakatupu,” ko e lea ia ʻa Sioné, ko e taha ʻo e kau tohi Kōsipelí, “koeʻuhi ko ia kotoa pe ʻoku tui pikitai kiate ia ke ʻoua naʻa ʻauha, kae maʻu ʻa e moʻui taʻengata.” (Sione 3:16) Naʻe malava fēfē ʻeni?

ʻOku fakahaaʻi mai ʻe he Tohitapú ʻa e founga ne hoko ai ʻa e maté ko ha meʻa taʻealakalofi ia ki he faʻahinga ʻo e tangatá. Naʻe maʻu ʻe he ʻuluaki ongo meʻa fakaetangatá ʻa e moʻui mei he ʻOtuá fakataha mo e ʻamanaki ko e moʻui taʻengata. Kae kehe, naʻá na fili kinaua ke na angatuʻu ki hona Tokotaha-Faʻú. (Senesi 3:​1-19) Ko e ola ʻo e foʻi ngāue ko ʻení, ko e ʻuluaki angahala fakaetangatá, ʻa e fānau ʻa ʻĀtama mo ʻIví naʻa nau hokosi ai ʻa e koloa tukufakaholo taʻetalitalilelei ko ia ko e maté. (Loma 5:12) Koeʻuhi ke ʻoange ki he faʻahinga ʻo e tangatá ʻa e moʻui moʻoní, kuo pau ke toʻo ʻaupito atu ʻa e angahalá mo e maté.

ʻOku ʻikai ha faisaienisi te ne lava ke toʻo atu ʻa e maté ʻaki ha faʻahinga fokotuʻutuʻu fakakēnisi. Ka, ko e Tokotaha-Fakatupu ʻo e faʻahinga ʻo e tangatá ʻokú ne maʻu ʻa e founga ke ʻomai ai ʻa e faʻahinga talangofua ʻo e tangatá ki he haohaoá koeʻuhi ke nau malava ʻo moʻui taʻengata. ʻOku ui ʻa e tokonaki ko ʻení ʻi he Tohitapú ko e huhuʻi. Naʻe hanga ʻe he ʻuluaki ongo meʻa fakaetangatá ʻo fakatau atu kinaua mo ʻena fānaú ke pōpula ki he angahalá mo e maté. Naʻá na fakafetongi ʻa e moʻui ʻi he tuʻunga ko e faʻahinga haohaoa ʻo e tangatá ʻo talangofua ki he ʻOtuá ʻaki ʻa e moʻui ʻo tauʻatāina mei he ʻOtuá, ʻi hono fai pē ʻena fili ʻa kinaua ki he meʻa ʻoku tonú mo e meʻa ʻoku halá. Ke fakatau mai ʻa e moʻui fakaetangata haohaoá, naʻe pau ke tatau ʻa e mahuʻinga ko ia naʻe totongí ki he moʻui fakaetangata haohaoa ko ia naʻe tukuange atu ʻe heʻetau ʻuluaki ongo mātuʻá ke molé. ʻI hono maʻu tukufakaholo ʻa e taʻehaohaoá, naʻe ʻikai ke taau ai ʻa e faʻahinga ʻo e tangatá ke nau tokonaki mai ʻa e mahuʻinga ko iá.​—Sāme 49:7.

Ko ia naʻe kau mai leva ʻa Sihova ko e ʻOtuá ke fai ha tokoni. Naʻá ne hiki hifo ʻa e moʻui haohaoa ʻa hono ʻAlo tofu-pē-taha-ne-fakatupú ki he manava ʻo ha tāupoʻou, ʻa ē naʻá ne ʻaloʻi mai ʻa Sīsuú. ʻI he ngaahi hongofuluʻi taʻu kuo maliu atú, mahalo pē naʻá ke fakataleʻi ʻa e foʻi fakakaukau ko ia fekauʻaki mo e fāʻele ʻa ha tāupoʻoú. Kae kehe, ʻi he ʻahó ni, kuo ʻai ʻe he kau faisaienisí ʻa e meʻamoʻuí ke tupu mei ai ha meʻamoʻui ʻe taha ʻo ha sela kehe pea mo hono fakahoko ʻo ha ngaahi kēnisi mei ha monumanu ʻe taha ki ha monumanu ʻe taha. Ko hai leva, ʻe lava ke ne fehuʻia totonu ʻa e malava ʻa e Tokotaha-Fakatupú ke fakafou mai ʻi ha founga ʻe taha ʻa e foʻi ngāue angamaheni ʻo e fakafanaú?

ʻI he ʻi ai ha moʻui fakaetangata haohaoá, naʻe hoko leva ʻo ala maʻu ʻa e totongi ke huhuʻi mai ʻaki ʻa e faʻahinga ʻo e tangatá mei he angahalá mo e maté. Ka, ko e kiʻi pēpē ko ia naʻe fanauʻi mai ki he māmaní ko Sīsuú naʻe pau ke ne tupu hake ke hoko ko e “toketā” ʻo malava ke ne tokonaki mai ʻa e “faitoʻo” ke faitoʻo ʻaki ʻa e ngaahi mahamahaki ʻo e faʻahinga ʻo e tangatá. Naʻá ne fai ʻeni ʻaki ʻene moʻuiʻaki ha moʻui haohaoa, taʻeangahala. Naʻe ʻikai ke ngata pē ʻi he sio ʻa Sīsū ki he fetoʻeaki ʻa e faʻahinga ʻo e tangatá ʻi he malumalu ʻo e angahalá ka naʻá ne toe hokosia ʻa e ngaahi fakangatangata fakaesino ʻo e hoko ko ha tangatá. Naʻe ʻai ai ʻe he meʻá ni ia ke ne toe hoko ko ha toketā kaungāongoʻi ange. (Hepelu 4:15) Ko e ngaahi fakamoʻui fakaemana naʻá ne fakahoko he lolotonga ʻene ʻi māmaní naʻe fakamoʻoniʻi ai kuó ne maʻu fakatouʻosi ʻa e loto-lelei mo e mālohi ke fakamoʻui ʻa e puké.​—Mātiu 4:23.

ʻI he hili ʻo ha ngāue fakafaifekau taʻu ʻe tolu mo e konga ʻi heni ʻi he māmaní, naʻe tāmateʻi ʻa Sīsū ʻe hono kau fakafepakí. Naʻá ne fakahāhaaʻi ʻe lava ʻe ha tangata haohaoa ʻo talangofua ki he Tokotaha-Fakatupú naʻa mo e hoko ʻa e ngaahi ʻahiʻahi lahi tahá. (1 Pita 2:22) Naʻe hoko ʻene moʻui fakaetangata haohaoa naʻe feilaulauʻí ko e totongi huhuʻi, ʻo malava ai ke toe huhuʻi mai ʻa e faʻahinga ʻo e tangatá mei he angahalá mo e maté. Naʻe pehē ʻe Sīsū Kalaisi: “Talaʻehai ʻoku ai ha ʻofa ʻa ha taha ʻe lahi ʻi he ʻofa ko é, ke ne liʻaki ʻene moʻui koeʻuhi ko hono ngaahi kaumeʻa.” (Sione 15:13) ʻI he ʻaho hono tolu hili ʻene pekiá, naʻe toetuʻu hake ai ʻa Sīsū ki he moʻui fakalaumālie, pea hili ha ngaahi uike mei ai naʻá ne hāʻele hake ki hēvani ke ʻoatu ʻa e totongi huhuʻí kia Sihova ko e ʻOtuá. (1 Kolinito 15:​3, 4; Hepelu 9:​11-14) ʻI hono fai iá, naʻe malava ai ʻa Sīsū ke ne ngāueʻaki ʻa e mahuʻinga ʻo ʻene feilaulau huhuʻí ki he faʻahinga ko ia ʻoku muimui kiate iá.

Te ke loto-lelei ke ke maʻu ha ʻaonga mei he founga fakamoʻui fakalaumālie, fakaeongo, mo e ngaahi mahamahaki fakaesino ko ʻení? Ke pheeé ʻoku fiemaʻu ki ai ʻa e tui kia Sīsū Kalaisi. Ko e hā ʻoku ʻikai te ke haʻu tonu ai ki he Toketaá? ʻE lava ke ke fai ia ʻaki hoʻo ako fekauʻaki mo Sīsū Kalaisi pea mo hono ngafa ʻi hono fakahaofi ʻa e faʻahinga anga-tonu ʻo e tangatá. ʻE fiefia ʻa e Kau Fakamoʻoni ʻa Sihová ke tokoniʻi koe.

[Fakatātā ʻi he peesi 5]

ʻOku maʻu fakatouʻosi ʻe Sīsū ʻa e loto-lelei mo e mālohi ke fakamoʻui ʻa e mahakí

[Fakatātā ʻi he peesi 7]

ʻOku anga-fēfē ʻa e kaunga kiate koe ʻa e pekia ʻa Sīsuú?