Ako ʻa e Founga Lelei Taha ʻo e ʻOfá

Kosovou, Lepanoni, mo ʻAilani. Ko e ngaahi hingoa eni kuo faʻa hā ʻi he ngaahi ongoongó ʻi he ngaahi taʻu ki mui ní. ʻOku nau fakatupu ʻi he ngaahi fakakaukau ʻa e kakaí ʻa e ngaahi ʻata ʻo e lingitoto, ngaahi laku pomu, mo e ngaahi tāmate. Ko e moʻoni, ko e ngaahi vāvākovi fakamālohi naʻe fakatupunga ʻe he ngaahi faikehekehe fakalotu, fakamatakali, fakafaʻahinga, pe ngaahi meʻa kehé ʻoku ʻikai ko ha meʻa foʻou. Ko hono moʻoní, ko e ngaahi peesi ʻo e hisitōliá ʻoku nau fonu ai, pea kuo nau ʻomai ʻa e ngaahi mamahi taʻefaʻalaua ki he faʻahinga ʻo e tangatá.

ʻI HE sio kuo ʻi ai ʻa e ngaahi tau ʻi he kotoa ʻo e hisitōliá, kuo aʻu ai ʻa e tokolahi ki he fakamulituku ko e ngaahi taú ʻe ʻikai moʻoni ke ala kalofi ia pea ʻoku fakaenatula pē ki he tangatá ke nau fetāufehiʻaʻaki. Kae kehe, ko e ngaahi fakakaukau peheé, ʻoku kehe fakaʻaufuli ia mei he ngaahi akonaki ʻa e Folofola ʻa e ʻOtuá, ko e Tohitapú. ʻOku fakahaaʻi mahino ʻe he ngaahi Konga Tohitapú: “Ko ia ʻoku ʻikai te ne ʻofa, kuo ʻikai te ne momoʻi ʻiloʻi ʻa e ʻOtua; he ko e ʻOtua ko e ʻOfa.” (1 Sione 4:8) ʻOku hā mahino ʻoku fiemaʻu ʻe he Tokotaha-Fakatupú ʻa e faʻahinga ʻo e tangatá ke nau feʻofaʻaki.

ʻOku toe fakahaaʻi ʻe he Tohitapú naʻe fakatupu ʻa e tangatá ʻi he ʻīmisi ʻo e ʻOtuá. (Senesi 1:​26, 27) ʻOku ʻuhinga ení kuo tuku ki he faʻahinga ʻo e tangatá ʻa e malava ke nau tapua atu ʻa e ngaahi ʻulungaanga ʻo e ʻOtuá, ʻa ia ko e tuʻu-ki-muʻa taha aí ko e ʻofá. Koeʻuhi ko ʻene peheé, ko e hā kuo mātuʻaki ololalo ai ʻa e taʻemalava ʻa e tangatá ʻi hono fakahāhaaʻi ʻa e feʻofaʻakí ʻi he kotoa ʻo e hisitōliá? ʻOku toe ʻomai ʻe he Tohitapú ʻa e fakamaama. ʻOku tupu iá koeʻuhi ko e ʻuluaki ongo mātuʻá, ʻa ʻĀtama mo ʻIvi, naʻá na angatuʻu ki he ʻOtuá peá na tō ai ki he angahalá. Ko hono nunuʻá, naʻe maʻu tukufakaholo ai ʻe heʻena fānaú ʻa e angahalá mo e taʻehaohaoá. ʻOku fakamatala ʻa e Loma 3:​23: “Kuo fai angahala kotoa pe, pea ʻoku ʻikai te nau aʻusia ʻa e hōifua ʻa e ʻOtua.” Ko ʻetau malava ke ʻofa kuo foaki mai ʻe he ʻOtuá ʻoku fakameleʻi ia ʻe heʻetau maʻu tukufakaholo ʻa e angahalá mo e taʻehaohaoá. ʻOku ʻuhinga ení ʻoku taʻemalava ʻa e faʻahinga ia ʻo e tangatá ke toe feʻofaʻaki? Ko e hā ha ʻamanaki ʻoku ʻi ai ʻe faifai pea tau fiefia ʻi ha vahaʻangatae melino mo anga-ʻofa mo hotau kaungā faʻahinga ʻo e tangatá?

Kuo Pau ke Tau Ako ke ʻOfa ki he ʻOtuá

ʻOku ʻafioʻi ʻe Sihova ko e ʻOtuá neongo ʻa e meʻa kotoa pē, ʻoku kei malava pē ʻa e faʻahinga ʻo e tangatá ke fakahāhā ʻa e ʻofá. Ko e ʻuhinga ia ʻokú ne fiemaʻu ai ʻa e faʻahinga kotoa ʻoku nau loto ke fakahōifuaʻi iá ke nau fakahāhā ʻa e ʻofá ki he lelei taha ʻo ʻenau malavá. Ko e fiemaʻu ko ení naʻe fakamahinoʻi ia ʻe he ʻAlo ʻo e ʻOtuá, ʻa Sīsū Kalaisi, ʻi hono ʻeke ange ke ne fakahaaʻi ʻa e fekau lahi taha ʻi he Laó naʻe foaki ki ʻIsilelí. Naʻá ne pehē: “Te ke ʻofa ki he ʻEiki ko ho ʻOtua, ʻo fai ʻaki ʻa e kotoa ʻo ho loto, mo e kotoa ʻo ho laumalie, mo e kotoa ʻo ho ʻatamai. Ko eni ia ʻa e tuʻutuʻuni ʻoku mamafa taha mo tuʻukimuʻa.” Peá ne tānaki atu leva: “ʻOku faʻahinga mo ia ʻa hono ua, Te ke ʻofa ki ho kaungaʻapi ʻo hange ko hoʻo ʻofa kiate koe. Ko e ongo tuʻutuʻuni ko eni ʻe ua ʻoku tautau ki ai ʻa e Lao kotoa.”​—Mātiu 22:​37-​40.

Kae kehe, ʻoku ongoʻi ʻe he kakai tokolahi, ʻoku faingataʻa ʻaupito ke ʻofa ki ha taha ʻa ia ʻoku ʻikai lava ke nau sio ki ai, pea ko kitautolu faʻahinga ʻo e tangatá ʻoku ʻikai lava ke tau mamata kia Sihova ko e ʻOtuá koeʻuhi ko ha Laumālie ia. (Sione 4:​24) Neongo ia, ʻoku laveʻi kitautolu ʻi he ʻaho kotoa pē ʻe he meʻa ʻoku fai ʻe he ʻOtuá, he ʻoku tau fakafalala kotoa pē ki he ngaahi meʻa lelei lahi naʻá ne fakatupú ke tau maʻu ʻaonga mei aí. Naʻe ʻomai ʻe he ʻapositolo ko Paulá ʻa e moʻoniʻi meʻa ko ení ʻi heʻene pehē: “Talāʻehai naʻa ne [ʻOtua] nofo taʻeha fakaʻilonga; he naʻa ne ngaue ʻaonga, ʻo ne ʻatu kiate kimoutolu mei langi ʻa e ngaahi ʻuha, mo e ngaahi taʻu mahu, ʻo ne ʻai ke fonungutungutu homou loto ʻi he meʻa tokoni mo e fakafiefia.”​—Ngāue 14:17.

Neongo ʻoku maʻu ʻaonga ʻa e tokotaha kotoa mei he ngaahi tokonaki ʻa e Tokotaha-Fakatupú ʻi ha founga, ʻi hono fakahoa atú ko e tokosiʻi pē ʻoku houngaʻia ʻiate iá pe ʻoku ueʻi ke nau fai ha fakamālō kiate iá. Ko ia ai, ʻoku fiemaʻu ke tau fakamahuʻingaʻi ʻa e ngaahi meʻa lelei kotoa pē kuo fai mai ʻe he ʻOtuá maʻatautolú pea ke fakalaulauloto ki he ngaahi ʻulungaanga fakaofo ʻoku hūhū ʻi he meʻa kotoa ʻokú ne faí. Ko e fai iá ʻoku totonu ke ne ʻai ai ke tau malava ʻo ʻilo ʻa e poto mo e mālohi fakaofo ʻa hotau Tokotaha-Fakatupu Maʻongoʻongá. (Aisea 45:18) Sinoemeʻa, ʻoku totonu ke ne tokoniʻi kitautolu ke sio ko ha ʻOtua ʻofa ia, ʻi he ʻikai ngata pē ʻi heʻene foaki mai kiate kitautolu ʻa e moʻuí kae toe ʻai ke tau malava ʻo fiefia ʻi he ngaahi meʻa fakafiefia lahi ʻi he moʻuí.

Ko e fakatātaá, fakakaukau atu ki he kehekehe taʻehanongataʻanga ʻo e ngaahi matalaʻiʻakau fakaʻofoʻofa naʻe fakatupu ʻe he ʻOtuá ʻi he māmaní. He fakaofo ē kiate kitautolu ʻa ʻene toe foaki mai kiate kitautolu ʻa e malava ke sio pea ke maʻu ʻa e fiefia lahi mei he ngaahi meʻa fakaʻofoʻofa ko ení! ʻI he tuʻunga meimei tatau, naʻe tokonaki mai ʻe he ʻOtuá ʻa e faʻahinga kotoa ʻo e meʻakai fakatupu iví ki heʻetau moʻuí. He mohu fakakaukau ē ko ia ʻi heʻene toe fakatupu ʻiate kitautolu ʻa e ongoʻanga ʻo e ʻahiʻahiʻi ha meʻá koeʻuhi ke lava ʻo tau aʻusia ai ʻa e fiefia ko ia ʻi he kaí! ʻIkai ko e ngaahi fakamoʻoni mahino eni ʻoku ʻofa moʻoni ʻa e ʻOtuá ʻiate kitautolu pea ʻokú ne fakakaukau ki he lelei taha maʻa kitautolú?​—Sāme 145:​16, 17; Aisea 42:​5, 8.

Tuku kehe ʻa ʻene fakahā mai ia tonu kiate kitautolu fakafou ʻi he “tohi ʻo natulá,” ko e Tokotaha-Fakatupú fakafou ʻi heʻene Folofolá, ʻa e Tohitapú ʻokú ne fakahaaʻi mai ai kiate kitautolu pe ko e ʻOtua fēfē ia. ʻOku hoko ení koeʻuhi ʻi he Tohitapú ʻoku hiki ai ʻa e ngaahi meʻa anga-ʻofa lahi naʻe fai ʻe Sihova ko e ʻOtuá ʻi he kuohilí pea mo e ngaahi tāpuaki lahi ʻokú ne talaʻofa ke tuku mai ki he faʻahinga ʻo e tangatá ʻi he kahaʻu ofi maí. (Senesi 22:​17, 18; Ekisoto 3:​17; Sāme 72:​6-​16; Fakahā 21:​4, 5) Hiliō ai, ʻoku fakahaaʻi mai ʻe he Tohitapú kiate kitautolu ʻa e fakahāhā lahi taha ʻo e ʻofa ʻa e ʻOtuá ki he faʻahinga ʻo e tangatá​—ʻi hono foaki ʻa hono ʻAlo tofu-pē-taha-ne-fakatupú ke hoko ko hotau Tokotaha-Huhuʻi koeʻuhi ke lava ai ʻo fakatauʻatāinaʻi kitautolu mei he haʻi ʻo e angahalá mo e maté. (Loma 5:8) Ko e moʻoni, ko e lahi ange ʻo e meʻa ʻoku tau ako fekauʻaki mo hotau Tokotaha-Fakatupu ʻofá, ko e lahi ange ai pē ia ʻa hono ueʻi kitautolu ke ʻofa kiate ia mei hotau lotó.

Ko e Ako ke ʻOfa ki Hotau Kaungā Faʻahinga ʻo e Tangatá

Hangē ko ia naʻe fakahaaʻi ʻe Sīsuú, ʻi he tānaki atu ki he ʻofa ki he ʻOtuá ʻaki ʻa e kotoa ʻo hotau lotó, moʻuí, mo e ʻatamaí, ʻoku totonu ke tau ʻofa ki hotau kaungāʻapí ʻo hangē ko ʻetau ʻofa kiate kitautolú. Ko hono moʻoní, ko e ʻofa ki he ʻOtuá ʻokú ne fakafatongiaʻi kitautolu ke ʻofa ki hotau kaungā faʻahinga ʻo e tangatá. Naʻe fakamatala ʻa e ʻapositolo ko Sioné: “Siʻi ʻofaʻanga, kapau leva naʻe pehe ʻa e ʻofa ʻa e ʻOtua kiate kitautolu, pea ko kitautolu foki ʻoku totonu ke tau feʻofaʻaki.” Naʻá ne toe fakamamafaʻi: “Kapau ʻe pehe ʻe ha taha, ʻOku ou ʻofa ki he ʻOtua, ʻosi ʻoku ne fehiʻa ki hono tokoua, ko e loi ia: he ko ia ʻoku ʻikai te ne ʻofa ki hono tokoua, ʻa ia kuo ne mātaʻi, talaʻehai ʻoku ne lava ke ʻofa ki he ʻOtua, ʻa ia kuo teʻeki ke ne mātaʻi? Pea ko eni ia ʻa e tuʻutuʻuni ʻoku tau maʻu mei he ʻEne ʻAfio, Ke ʻilonga ʻa ia ʻoku ʻofa ki he ʻOtua, ke ne ʻofa foki ki hono tokoua.”​—1 Sione 4:​11, 20, 21.

ʻI he ʻahó ni ʻoku tau moʻui ʻi ha māmani ʻa ia ko e tokolahi taha ʻo e kakaí ʻoku nau fakahaaʻi ha fakakaukau muʻomuʻa pē kita, ʻo hoko ai ʻo “ʻofa kiate kinautolu pe,” hangē pē ko ia naʻe tomuʻa tala ʻe he Tohitapú. (2 Timote 3:2) Ko ia ai, kapau ʻoku tau loto ke ako ʻa e founga lelei taha ʻo e ʻofá, kuo pau ke tau fai ʻa e feinga fakamātoato ke fakapapauʻi ʻa hotau ʻatamaí pea faʻifaʻitaki ki hotau Tokotaha-Fakatupu ʻofá, ʻo ʻikai muimui ʻi he ngaahi founga siokita ʻa e kakaí fakalūkufua. (Loma 12:2; Efeso 5:1) ʻOku aʻu ʻa e ʻOtuá ʻo “angalelei ia ki he taʻehounga mo e faikovi,” pea ʻokú ne “fakahopo ʻene laʻā ki he kovi mo e lelei, pea ʻoku ne fakaʻuha ki he faitotonu mo e faihala.” Koeʻuhi ʻoku fokotuʻu mai ʻe heʻetau Tamai fakahēvaní ha faʻifaʻitakiʻanga fisifisimuʻa pehē kiate kitautolu, ʻoku totonu ke tau feinga ke anga-ʻofa mo tokoni ki he tokotaha kotoa. ʻI hono fai iá, ʻe lava ke tau fakamoʻoniʻi ai kitautolu ko e ngaahi ‘foha ʻo ʻetau Tamai Fakalangi ʻofá.’​—Luke 6:​35; Mātiu 5:​45.

ʻI he taimi ʻe niʻihi ko e ngaahi ngāue ʻofa peheé ʻoku iku ia ki hono tokoniʻi ʻa e kakaí ke nau hoko ko e kau lotu ʻa e ʻOtua moʻoní. ʻI he ngaahi taʻu kuo maliu atú ko ha uaifi tauhi-ʻapi ʻa ia ko e taha ʻo e Kau Fakamoʻoni ʻa Sihová naʻá ne feinga ke vahevahe atu ki hono kaungāʻapí ʻa e pōpoaki ʻa e Tohitapú, ka naʻe talitekeʻi mālohi ia. Kae kehe, naʻe ʻikai te ne loto-siʻi ʻi he tali ko iá. ʻI hono kehé, naʻá ne hokohoko atu ʻi hono fakahāhā ʻa e anga-ʻofá pea feinga ke tokoni ki hono kaungāʻapí. ʻI he taimi ʻe taha naʻá ne tokoni ki hono kaungāʻapí ʻi heʻene fetukutuku ki ha fale kehe. ʻI he taimi ʻe taha naʻá ne fokotuʻutuʻu ai ki ha taha ke ʻalu mo e kaungāʻapí ki he malaʻe vakapuná ke feʻiloaki ʻa e kaungāʻapí mo hono kāinga. Ki mui ai, naʻe tali ʻe he kaungāʻapí ha ako Tohitapu pea faifai pē ʻo hoko ko ha Kalisitiane faivelenga neongo ʻa e fakatanga kakaha mei hono husepānití. ʻIo, ko e ngaahi fakahāhā ko ia ʻo e ʻofá naʻá ne fakatoka ha makatuʻunga ki he ngaahi tāpuaki taʻengata.

Kapau ʻoku tau faitotonu fekauʻaki mo ia, te tau fakahaaʻi ai ko e ʻofa ʻa e ʻOtuá kiate kitautolú ʻoku ʻikai ko e ʻuhingá ko haʻatau maʻu ha ngaahi ʻulungaanga fakamānako lahi. ʻI hono kehé, ʻokú ne ʻofa ʻiate kitautolu neongo ʻa e lahi ʻo ʻetau ngaahi fehālaakí mo e tōnounoú. ʻI heʻene peheé, ʻoku totonu ke tau ako tatau ke ʻofa ki hotau kaungā faʻahinga ʻo e tangatá neongo ʻa e lahi ʻo ʻenau fehālaakí. Kapau ʻoku tau akoʻi kitautolu ke ʻiloʻilo mo houngaʻia ʻi he ngaahi ʻulungaanga lelei ʻa e niʻihi kehé ʻo ʻikai sio ki heʻenau ngaahi fehālaakí, te tau ʻilo ai ʻoku faingofua ʻaupito ange ke ongoʻi ʻofa kiate kinautolu. Ko e meʻa ʻoku tau ongoʻi kiate kinautolú ʻe aʻu ʻo fakalaka atu nai ia ʻi he ʻofa ʻoku puleʻi ʻe he tefitoʻi moʻoní pea kau ki ai ʻa e ongoʻi ʻofa māfana mo e saiʻia ʻa ia ʻoku hoko ʻi he vahaʻa ʻo e ngaahi kaungāmeʻa ofí.

Tuku ke Tupu ʻa Hoʻo ʻOfá

ʻOku fiemaʻu ke tauhi mo fakatupulekina ʻa e ʻofá mo e anga-fakakaumeʻá, pea ke ʻi he lotolotonga ʻo e ngaahi meʻa ʻoku fiemaʻu ki he meʻá ni ʻa e loto-moʻoní mo e faitotonú. ʻOku feinga ʻa e niʻihi ke fūfuuʻi ʻenau ngaahi tōnounoú koeʻuhi ke ʻai ke maongo ʻo saiʻia ai ʻa e kakai ʻoku nau loto ke fakakaumeʻa ki aí. Kae kehe, ko ha ʻalunga pehē ʻoku ʻikai faʻa lavameʻa ia, ʻi he faifai atu pē ʻo ʻiloʻi ʻe he niʻihi kehé ʻa e ngaahi foʻi moʻoní pea nau holomui ʻi he taʻefaitotonu peheé. Ko ia ai, ʻoku ʻikai totonu ke tau ilifia ʻi hono fakaʻatā ke ʻiloʻi kitautolu ʻe he niʻihi kehé ʻi hotau tuʻunga totonú​—neongo ʻoku ʻi ai ʻetau ngaahi tōnounou ʻa ia ʻoku tau feinga ke ikuʻi. ʻE tokoni nai ʻa e meʻá ni ke fokotuʻu ai ha kaungāmeʻa mo kinautolu.

Hangē ko ení, ko ha tuofefine taʻumotuʻa ʻi ha fakatahaʻanga ʻi he Hahake Mamaʻó naʻe mātuʻaki siʻisiʻi ʻa hono tuʻunga fakaakó. Ka, ʻoku ʻikai ʻaupito te ne feinga ke fūfuuʻi ʻa e foʻi moʻoni ko iá mei he niʻihi kehé. Ko e fakatātaá, ʻokú ne fakahaaʻi hangatonu, ʻoku ʻikai te ne malava ke fakahāhaaʻi ki he niʻihi kehé ʻa e anga ʻo hono fokotuʻu mei he ngaahi kikite ʻa e Tohitapú pea mo e hisitōliá ko e Kuonga ʻo e Senitailé naʻe ngata ʻi he 1914.a Kae kehe, ʻokú ne fokotuʻu ha faʻifaʻitakiʻanga lelei ʻi he faivelenga ʻi he ngāue fakafaifekaú, pea pehē ʻi he ʻofa mo e nima-homo ki he fanga tokouá, ʻo lave anga-ʻofa ai kiate ia ko ha siueli ia ʻo e fakatahaʻangá.

ʻI he ngaahi anga-fakafonua ʻe niʻihi, ko e fakahāhaaʻi ʻo e ʻofá ʻoku fai ʻa e fehiʻa fakahāhā ki ai; ʻoku akoʻi ʻa e kakaí ke fakahāhā ha tōʻonga anga-fakaʻeiʻeiki ʻi heʻenau feangai mo e niʻihi kehé. Lolotonga ʻoku lelei maʻu pē ke anga-ʻaʻapa mo fakaʻatuʻi, ʻoku ʻikai totonu ke tau fakaʻatā ʻetau anga-fakaʻapaʻapá ke ne fakafaingataʻaʻiaʻi pe fūfuuʻi ʻetau ngaahi ongoʻi ki he niʻihi kehé. Naʻe ʻikai ongoʻi mā ʻa Sihova ke ne fakahaaʻi ʻa ʻene ʻofa ki heʻene kakai filí, ʻa ʻIsileli ʻo onoʻahó, ʻi heʻene pehē kiate kinautolu: “Kuo u ʻofaʻi koe ʻaki ha ʻofa taʻengata.” (Selemaia 31:3) ʻI he tuʻunga meimei tatau, naʻe tala ʻe he ʻapositolo ko Paulá ki hono kaungātui ʻi Tesalonaiká: “ʻI heʻemau ʻofauʻuuʻu kiate kimoutolu naʻa mau fakaʻamu ke ʻatu, ʻo ʻikai ko e Kosipeli pe ʻa e ʻOtua, ka ko siʻemau moʻui foki​—kae fēfē, he ne mou hoko ko homau ʻofaʻanga.” (1 Tesalonaika 2:8) Ko ia, ʻi heʻetau feinga ke fakatupulekina ʻa e ʻofa moʻoni ki he kaungā faʻahinga ʻo e tangatá, ʻoku fehoanaki lahi ia mo e akonaki ʻa e Tohitapú ke ʻai ʻa e ongoʻi peheé, ke fakahaaʻi fakanatula ia kae ʻikai ke lōmia.

Fiemaʻu ʻa e Feinga Hokohoko

Ko e ako ke ongoʻi pea ke fakahāhā ʻa e ʻofa ki he niʻihi kehé ko ha ngāue hokohoko ia. Ko hono fai iá ʻoku fiemaʻu ki ai ʻa e feinga lahi ʻi heʻetau tafaʻakí koeʻuhi he kuo pau ke tau ngāue mālohi ke ikuʻi ʻa ʻetau taʻehaohaoa ʻa kitautolú pea pehē ke talitekeʻi ʻa e tākiekina mālohi ʻa e māmani taʻeʻofa ko ení. Kae kehe, ko e ngaahi pale lahi ʻoku ʻomai ʻe he meʻá ni ʻokú ne ʻai moʻoni ia ke ʻaonga.​—Mātiu 24:12.

Naʻa mo e ʻi he māmani mātuʻaki taʻehaohaoa ko ení, ʻe lava ke tau fiefia ʻi he ngaahi vā lelei mo hotau kaungā faʻahinga ʻo e tangatá, ʻo iku ia ki he fiefia, melino mo e fiemālie lahi kiate kitautolu pea ki he niʻihi kehé. ʻI hono fai ha feinga pehē, ʻe lava ke tau fakamoʻoniʻi ai kitautolu ʻoku tau tuha mo e ʻamanaki fakaofo ʻo e moʻui taʻengata ʻi he māmani foʻou ʻa e ʻOtuá. Sinoemeʻa, ʻi hono ako ʻa e founga lelei taha ʻo e ʻofá, ʻe lava ai ke tau maʻu ʻa e hōifua mo e ngaahi tāpuaki ʻa hotau Tokotaha-Fakatupu ʻofá, fakatouʻosi ʻi he taimí ni pea ki ʻitāniti!

[Fakamatala ʻi lalo]

[Fakatātā ʻi he peesi 10]

ʻOku lava ke fakahāhā ʻa e ʻofa faka-Kalisitiané ʻaki ʻa e ngaahi ngāue anga-ʻofá

[Maʻuʻanga ʻo e Tā ʻi he peesi 8]

UN PHOTO 186226/M. Grafman