Naʻa Nau Fai ʻa e Finangalo ʻo Sihová

Ko ha Foaki Loto-Tauʻatāina ke Laka ki Muʻa ʻa e Lotu Maʻá

KO E kau ʻIsilelí ko e kau sio tonu ia ʻi he mafai faifakahaofi ʻo Sihová. Naʻa nau sio ki he ngaahi vai ʻo e Tahi Kulokulá ʻi hono vaheʻi fakaemaná, ʻo fakaʻatā ai kinautolu ke nau kolosi ʻi he kilisitahi mōmoá ʻo hao ai mei he kau tau ʻIsipité. ʻI he tafaʻaki ʻe tahá, naʻa nau mamata ai mei ha feituʻu malu ʻi he haʻulu hifo ʻa e ngaahi vai tatau ki honau kau tulí. Kuo fakahaofi ʻe Sihova ʻenau moʻuí!​—Ekisoto 14:​21-31.

Kae kehe, ko e meʻa fakamamahí, naʻe fakamaʻamaʻaʻi ʻe he kau ʻIsileli ʻe niʻihi ʻa e meʻa kuo fai ʻe honau ʻOtuá. Lolotonga ʻa e ʻi he Moʻunga Sainaí ʻa Mōsesé, naʻa nau foaki atu ʻa e ngaahi meʻa teuteu koulá kia ʻĒlone pea nau kouna atu ke ne faʻu ha ʻaitoli ke nau lotu ki ai. ʻI heʻene foki maí, naʻe ʻilo ʻe Mōsese ʻa e fuʻu kau angatuʻu ko ení ʻoku nau kai, inu, hula, mo punou ki ha kiʻi pulu koula! ʻI he tataki ʻa Sihová ko e toko 3,000 nai​—ngalingali ko e kau poupou tuʻu-ki-muʻa ʻo e angatuʻú​—naʻe tāmateʻi. ʻI he ʻaho ko iá, naʻe ako ai ʻe he kakai ʻa e ʻOtuá ha lēsoni mahuʻinga fekauʻaki mo e fiemaʻu ke foaki kia Sihova ʻa e anga-līʻoa maʻataʻataá.​—Ekisoto 32:​1-6, 19-29.

ʻI he hili pē ʻa e meʻa ko ení, naʻe teuteu ʻa Mōsese ke fakahoko ʻa e fekau ko ia ʻa e ʻOtuá ke langa ha tāpanekalé, ko ha tēniti fehikitakiholo ki he lotú. Ko e foʻi ngāue langa ko ení naʻe fiemaʻu ki ai ha ngaahi naunau mamafa mo ha kau ngāue pōtoʻi. ʻE hoko mai ʻa e ngaahi meʻá ni mei fē? Pea ko e hā ʻe lava ke tau ako mei he fakamatala ko eni ʻa e Tohitapú?

Meʻaʻofa ʻo e Ngaahi Naunau mo e Ngaahi Pōtoʻi

Fakafou ʻia Mōsese, naʻe fekauʻi ʻe Sihova ʻa e kau ʻIsilelí: “Mou toʻo mai haʻamou meʻaʻofa kia Sihova: ʻilonga ha taha ʻoku loto lelei ki ai, ke ne ʻomi ʻene hapai kia Sihova.” Ko e faʻahinga meʻaʻofa fēfē? ʻOku kau ʻi he ngaahi meʻa naʻe lisi ʻe Mōsesé ʻa e koula, siliva, kopa, filo, tupenu, kiliʻi manu, ʻakau, mo e ngaahi maka mahuʻinga.​—Ekisoto 35:​5-9.

Naʻe hulu ʻānoa ʻa e ngaahi meʻa ke fai mei ai ʻe he kau ʻIsilelí ha foaki meʻaʻofa nima-homo pehē. Manatuʻi, ʻi he taimi naʻa nau mavahe ai mei ʻIsipité, naʻa nau ʻave ʻa e ngaahi naunau koula mo e siliva, fakataha mo e ngaahi teunga lahi. Ko e moʻoni, “naʻa nau matuʻaki vete ʻa e kau Isipite.”a (Ekisoto 12:​35, 36) Ki muʻa atú, naʻe foaki loto-lelei atu ʻe he kau ʻIsilelí ʻenau ngaahi meʻa teuteú ke ngaohiʻaki ha ʻaitoli maʻá e lotu loí. Te nau fakahāhā nai he taimi ko ení ha vēkeveke tatau pehē ke fai ha foaki ke laka ki muʻa ʻa e lotu moʻoní?

Fakatokangaʻi, naʻe ʻikai ke tuʻutuʻuni ʻe Mōsese ha lahi pau ʻoku totonu ke foaki ʻe ha taha, pea hala ke ne ngāueʻaki ha fakahalaia pe fakamāʻanga ke fai ʻaki hono ueʻi ʻo e foakí. Ko hono kehé, naʻá ne kōlenga pē ki ha “taha ʻoku loto lelei ki ai.” ʻOku hā mahino naʻe ongoʻi ʻe Mōsese ʻoku ʻikai fiemaʻu ke fakamālohiʻi ʻa e kakai ʻa e ʻOtuá. Naʻá ne loto-falala ʻe foaki ʻe he tokotaha taki taha ʻa e meʻa kotoa te ne lavá.​—Fakafehoanaki mo 2 Kolinito 8:​10-12.

Kae kehe, ko e ngāue langá ʻe fiemaʻu ʻa e meʻa lahi ange ia ki ai ʻi he foaki pē ʻo e ngaahi naunaú. Naʻe toe tala ʻe Sihova ki he kau ʻIsilelí: “ʻIlonga ha nima meaʻa ʻiate kimoutolu, ke ne hanga ʻo ngaohi ʻa e ngaahi meʻa kuo tuʻutuʻuni ʻe Sihova.” ʻIo, ko e ngāue langa ko ení naʻe fiemaʻu ki ai ʻa e ngāue pōtoʻi. Ko e moʻoni, ko e “gaue fakatufuga kotoabe”​—kau ai ʻa e ngāue papa, ngāue ukamea, mo e ngāue fakasanisani siuelí​—ʻe fiemaʻu ia ke fakakakato ʻa e ngāue ko ení. Ko e moʻoni, ʻe tataki ʻe Sihova ʻa e ngaahi talēniti ʻa e kau ngāué, pea ko e lelei ʻi he lavameʻa ʻa e ngāué ʻe totonu pē ʻene ʻalu kiate iá.​—Ekisoto 35:​10, 30-​35, PM; 36:​1, 2.

Naʻe tali loto-vēkeveke ʻe he kau ʻIsilelí ʻa e fakaafe ko ia ke foaki fakatouʻosi ʻenau ngaahi koloá mo ʻenau ngaahi pōtoʻí. ʻOku pehē ʻe he fakamatala ʻa e Tohitapú: “Naʻa nau haʻu, ʻa kinautolu kotoa pe naʻe oʻi ʻe honau loto, mo kinautolu naʻe fakalotolelei ʻe honau laumalie, ʻo nau ʻomi ʻenau meʻaʻofa kia Sihova ki he ngaue ʻo e Teniti Feʻiloakiʻanga mo hono fatongia kotoa, pea ki he ngaahi kofu tapu. ʻIo naʻa nau omi, ʻa tangata mo fafine fakatouʻosi, ʻakinautolu naʻe loto fie fai.”​—Ekisoto 35:​21, 22.

Lēsoni Kiate Kitautolu

ʻI he ʻahó ni ko e fatongia lahi fakaʻulia ʻo e malangaʻi ʻo e ongoongo lelei ʻo e Puleʻanga ʻo e ʻOtuá, ʻoku fakahoko ia fakafou ʻi he ngaahi foaki loto-tauʻatāina. ʻOku meimei, ko e paʻanga eni. ʻI he ngaahi tuʻunga kehé, ʻoku ngāueʻaki ʻe he fanga tokouá mo e fanga tuofāfine Kalisitiané ʻenau ngaahi taukei lahí ke tokoni ki hono langa ʻa e ngaahi Fale Fakatahaʻanga, ngaahi Holo ʻĀsemipilī, mo e ngaahi ʻōfisi vaʻa. Pea ʻoku ʻi ai mo e ngāue kuo fai ʻi he ngaahi ʻapi Pēteli takatakai ʻi māmani laka hake he teaú, ʻa e ngāue ʻoku fiemaʻu ki ai ʻa e ngaahi pōtoʻi lahi kehekehe. Ko e faʻahinga loto-lelei kotoa pē ʻa ia kuo nau fai ha ngaahi foaki peheé ʻoku lava ke nau fakapapauʻi ʻe ʻikai ngalo ʻia Sihova ʻenau ngāue mālohí!​—Hepelu 6:10.

ʻOku pehē pē ki he ʻinasi ʻoku maʻu ʻe he tokotaha taki taha ʻo kitautolu ʻi he ngāue fakafaifekau faka-Kalisitiané. ʻOku fakaʻaiʻai atu ʻa e tokotaha kotoa pē ke lamalama ha taimi ke kau faivelenga ai ʻi he malangá. (Matiu 24:14; Efeso 5:​15-17) ʻOku fai ʻe he niʻihi ʻa e meʻá ni ʻi heʻenau hoko ko e kau ʻevangeliō, pe kau tāimuʻa taimi-kakato. Koeʻuhi ko e ngaahi tuʻungá, ʻoku ʻikai lava ai ʻe he niʻihi kehé ke fakamoleki ha taimi lahi ʻi he ngāue fakafaifekaú ko ha tāimuʻa. Kae kehe, ʻoku nau fakahōifua mo kinautolu foki kia Sihova. ʻI he hangē ko e ngaahi meʻaʻofa ki he tāpanekalé, ʻoku ʻikai ke fakahā mai ʻe Sihova ia ha lahi pau ʻoku totonu ke foaki ʻe he tokotaha taki taha. Kae kehe, ko e meʻa ia ʻokú ne fiemaʻú, ko e tauhi kiate ia ʻe he tokotaha taki taha ʻo kitautolu ʻaki ʻa e kotoa hotau lotó, moʻuí, ʻatamaí, mo e iví. (Maake 12:30) Kapau ʻoku tau fai ia, ʻe lava ke tau fakapapauʻi te ne fakapaleʻi kitautolu ki he ngaahi tokoni loto-tauʻatāina ʻoku tau fai ke laka ki muʻa ʻa e lotu moʻoní.​—Hepelu 11:6.

[Fakamatala ʻi lalo]