Founga Hono Uesia ʻe he Tuʻunga-Uitoú ha Ongo Fafine

KO SANDRA ko ha uitou ʻoku nofo ʻi ʻAositelēlia. ʻI he taimi ne mate ai hono husepānití ʻi ha ngaahi taʻu he kuohilí, naʻe ʻohovale ʻaupito ʻa Sandra ʻi he taimi pē ko iá. “Ko ʻeku lāuʻilo ko ia kuo mole fakafokifā meiate au ʻa hoku hoá mo hoku kaumeʻa lelei tahá, naʻá ne lōmekina au. ʻOku ʻikai ke u manatuʻi lelei pe naʻe founga fēfē ʻeku aʻu mai mei he falemahakí ki ʻapí pe ko e meʻa naʻá ku fai ʻi he toenga ʻo e ʻaho ko iá. Lolotonga ʻa e ngaahi uike siʻi hono hokó, naʻe hoko ai ʻeku manavaheé ko ha langa fakaesino tuʻumaʻu.”

ʻOku ʻi ai ʻa e kaumeʻa taʻumotuʻa ange ʻo Sandra, ko Elaine, ʻa ia ko ha uitou ʻi ha taʻu nai ʻe ono. Naʻe tauhi ʻe Elaine ʻa hono husepānití, ko David, ʻi he māhina ʻe ono ki muʻa peá ne toki mālōlō ʻi he kanisaá. Naʻe fuʻu lahi fau ʻene loto-mamahí he ʻi he ʻikai fuoloa mei he mate ʻa hono husepānití, naʻá ne hoko ai ʻo kui fakataimi. ʻI ha taʻu ʻe ua ki mui ai naʻá ne tō fakafokifā ʻi ha feituʻu kakai. Naʻe ʻikai maʻu ʻe heʻene toketaá ha fakaʻilonga ʻo ha mahaki fakaesino. Kae kehe, naʻá ne ʻilo naʻe tukulotoʻi ʻe Elaine ʻa ʻene loto-mamahí, ko ia naʻá ne faleʻi ai ke ne foki ki ʻapi pea feinga mālohi ke tangi. “Naʻe fiemaʻu ha taimi ke fekuki ai mo ʻeku loto-mamahí,” ko e lau ia ʻa Elaine, pea ʻokú ne tānaki mai ʻi he taimi ʻoku taʻelata aí, “ʻOku aʻu ʻou faʻa hū ki he loki mohé ʻo pūlou ʻi he vala ʻo David.”

ʻIo, ko e mate ʻa ha hoa ʻofeina ʻoku malava ke ne fakatupunga ha ngaahi ongoʻi kehekehe, he ko e tuʻunga uitoú ʻoku kau ki ai ʻa e meʻa lahi ange ia ʻi he nofo pē ʻo ʻikai ha husepānití. Hangē ko ʻení, naʻe ongoʻi ʻe Sandra ʻi ha taimi kuo mole meiate ia ʻa hono tuʻunga moʻoní. Hangē ko e tokolahi ʻo e kau toki uitou mamahi kehe ki muí ni, naʻá ne toe ongoʻi laveangofua, mo ʻikai malu. ʻOku manatu ʻa Sandra: “ʻI he anga ki hono fai ʻe hoku husepānití ʻa e ngaahi fili aofangatukú, naʻe fakafokifā pē ʻa ʻeku toe tokotaha ke fai ʻa e ngaahi fili ko iá. Naʻe fakahohaʻasi ʻa ʻeku mohé. Naʻá ku helaʻia mo ongosia. Naʻe faingataʻa ke u ʻilo ʻa e meʻa totonu ke faí.”

ʻOku hokosia ʻa e meʻa tatau mo ia naʻe hoko kia Sandra mo Elaine ʻi he ʻaho kotoa pē ʻi he māmaní. Ko e mahamahakí, ngaahi fakatuʻutāmakí, ngaahi taú, fakaʻauhamālie fakafaʻahingá, mo e fakamālohí fakalūkufua ʻoku tānaki atu ia ki he fakautuutu ʻa e tokolahi ʻo e kau uitoú.a Ko e tokolahi ʻo e kau fefine ko ʻení ʻoku nau faingataʻaʻia fakalongolongo pē, ʻo ʻikai ʻilo pe ko e hā ke faí. Ko e hā ʻe malava ke fai ʻe he ngaahi kaumeʻá mo e kāingá ke tokoniʻi ʻaki ʻa e faʻahinga ko ia ʻoku nau aʻusia ʻa e tuʻunga uitoú? Ko e kupu hokó ʻoku ʻi ai ha ngaahi fokotuʻu ai ʻe niʻihi ʻe fakamoʻoniʻi ʻoku ʻaonga nai.

[Fakamatala ʻi lalo]