Ko ha ʻUluʻakau Kuo Nau Kātaki Fuoloa Mai
KO HA LILIFA ʻOKU NGALINGALI HEʻIKAI KO HA FEITUʻU LELEI IA KE LANGA AI HAO ʻAPI, TAUTAUTEFITO KAPAU ʻOKU TUʻU IA ʻI HE NGAAHI TAFAʻAKI MĀʻOLUNGA ʻO E MOʻUNGÁ. KAE KEHE, NEONGO ʻENE HĀ ʻIKAI HANO NGAAHI LELEÍ, KO E ʻULU ʻALAPAINI ʻE NIʻIHI ʻOKU NAU PIKIMAʻU KI HE NGAAHI MAKA LILIFA PEHEÉ, ʻO NAU MATUʻUAKI ʻA E MOMOKO FAKAʻULIA ʻO E FAʻAHITAʻU MOMOKÓ PEA KĀTAKIʻI ʻA E NGAAHI LAʻALAʻĀ ʻO E FAʻAHITAʻU MĀFANÁ.
ʻI HONO anga-mahení, ko e ʻuluʻakau fefeka ko ʻení ʻoku ʻikai ke lalahi ia ʻo hangē ko honau faʻahinga ʻi he feituʻu māʻulaló. Ko honau sinó ʻoku fetungotungaʻi mo femamioʻaki pea ʻoku kihi ʻenau tupú. ʻOku hangē ʻa e niʻihi ko e ponisai fakanatulá—ʻo fakafōtunga mo ʻauhani ʻe ha ʻea mālohi pea mo siʻisiʻi ʻa e kelekele ʻoku nau tupu aí.
ʻI heʻenau kātaki ʻi he taha ʻo e ngaahi ʻātakai faingataʻa taha ʻi he māmaní, te ke pehē nai ko e ʻuluʻakau peheé ʻe moʻui taimi nounou pē. Ka, ko e tafaʻaki ia ʻe tahá ʻoku moʻoní. ʻOku taukaveʻi ʻe he niʻihi ko e Mētuiselá, ko ha paini talatala ia ʻoku tupu ʻi he māʻolunga ko e mita ʻe 3,000 ʻi he White Mountains ʻo Kalefōniá, ko hono motuʻá ko e taʻu ʻe 4,700. ʻOku pehē ʻe he The Guinness Book of Records 1997, ko e faʻahinga ʻakau ko ʻení ko e ʻakau moʻui fuoloa taha ia ʻi he foʻi palanité. Ko Edmund Schulman, ʻa ia naʻá ne ako fekauʻaki mo e ngaahi ʻuluʻakau motuʻa ʻaupito ko ʻení, naʻá ne pehē: “ʻOku ngalingali hao moʻui mai ʻa e paini talatalá . . . koeʻuhi ko ʻene ʻi he faingataʻá. Ko e kotoa ʻo e faʻahinga motuʻa ange [ʻo e ngaahi paini] ʻi he White Mountains ʻoku maʻu ia ʻi he meimei mita ʻe 3,000 ʻi ha toafa pakukā mo makamakaʻia.” Naʻe toe ʻiloʻi ʻe Schulman ko e faʻahinga motuʻa taha ʻo e kalasi paini kehé ʻoku meimei ke tupu mo ia ʻi he ngaahi tuʻunga faingataʻa.
Neongo kuo pau ke nau ikuʻi ʻa e faingataʻá, ko e ngaahi faʻifaʻitakiʻanga ko ʻeni ʻo e kātakí ʻokú ne fakahoko mai ʻa e ongo ʻaonga lahi taha ʻoku nau maʻú. Ko e lōngonoa hono feituʻú, ʻa ia ʻoku tātelau ai ʻa e ʻulufonuá, ʻoku maluʻi ai kinautolu mei he vela ʻa e vaotaá, ʻa e taha ʻo e ngaahi fakatuʻutāmaki lahi taha ʻo e ngaahi ʻuluʻakau matuʻotuʻá. Pea ʻoku fakatuʻumaʻuʻi ʻe honau aká kinautolu ki he funga maká ʻa ia ʻe toki lava pē ke taʻaki kinautolu ʻe ha mofuike.
ʻI he Tohitapú ʻoku fakatatau ai ʻa e kau sevāniti loto-tōnunga ʻa e ʻOtuá ki he ʻakaú. (Sāme 1:1-3; Selemaia 17:7, 8) ʻOku nau toe fehangahangai nai mo e faingataʻa koeʻuhi ko e ngaahi tuʻunga ʻoku nau ʻi aí. ʻE lava ke ʻahiʻahiʻi fefeka ʻenau tuí ʻe he fakatangá, mahamahakí pe masiva ʻangoʻangó, tautautefito ʻi he taimi ʻoku hokohoko ai ʻa e ngaahi ʻahiʻahí ʻi he taʻu ki he taʻu. Ka neongo ia, ko honau Tokotaha-Fakatupú, ʻa ia naʻá ne faʻu ʻa e ʻuluʻakaú ke ne matuʻuaki lelei ʻa e faingataʻá, ʻokú ne fakapapauʻi mai ki heʻene kau lotú te ne poupouʻi kinautolu. ʻOku talaʻofa ʻe he Tohitapú ki he faʻahinga ʻoku nau tuʻumaʻú: “Te ne poupou, te ne fakakaukaua.”—1 Pita 5:9, 10.
‘Ko e tuʻu maʻu, mo e tuʻu maʻumaʻuluta ʻa ha taha, pe kītakí’ ko e fakakaukau ia ʻoku tuʻu mei mui ʻi he foʻi veape faka-Kalisi ʻoku faʻa liliu ko e “kātaki” ʻi he Tohitapú. Hangē ko e ʻulu ʻalapainí, ko e kī ki he kātakí ko ha aka lelei. ʻI he tuʻunga ʻo e kau Kalisitiané, ʻoku fiemaʻu ke nau faiaka mālohi ʻia Sīsū Kalaisi koeʻuhí ka nau tuʻu maʻu. “Ko e meʻa ʻi hoʻomou maʻu ʻa Kalaisi Sisu ko e ʻEiki,” ko e tohi ia ʻa Paulá, “pea mou fou ʻiate ia pe: ko e kakai kuo aka ʻiate ia, pea ʻoku langa hake ʻiate ia, pea ʻoku fakaʻaʻau ke kaukaua ʻi he lotu, ʻi hono anga naʻe akonekina ai kimoutolu, ʻo mou tupulekina ai, pea ō mo ia ʻa e faʻa fakafetaʻi.”—Kolose 2:6, 7.
Naʻe mahinoʻi ʻe Paula ʻa e fiemaʻu ʻo ha ngaahi aka fakalaumālie mālohí. Ko ia tonu naʻá ne fekuki “mo ha tolounua ʻi he kakanó,” pea naʻá ne kātakiʻi ʻa e fakafepaki kakahá ʻi he kotoa ʻo ʻene ngāue fakafaifekaú. (2 Kolinito 11:23-27; 12:7, NW) Ka, naʻá ne ʻiloʻi ʻoku ʻi he mālohi ʻo e ʻOtuá ʻa ʻene malava ke hokohoko atú. Naʻá ne pehē: “ʻOku ou mafeia ʻa e meʻa kotoa pe ʻiate ia ʻoku ne fakakaukaua au.”—Filipai 4:13.
Hangē ko ia ʻoku fakahaaʻi mai ʻe he faʻifaʻitakiʻanga ʻa Paulá, ko e kātaki lavameʻa ʻa e Kalisitiané ʻoku ʻikai ke fakatuʻunga ia ʻi ha ngaahi tuʻunga lelei. Hangē ko e ʻulu ʻalapaini ʻa ē ʻokú ne matuʻuekina ʻa e ngaahi afaá ʻi he laui senitulí, ʻe lava ke tuʻumaʻu ʻetau tuí kapau te tau faiaka ʻia Kalaisi pea falala ki he mālohi ʻoku ʻomai ʻe he ʻOtuá. Pehē foki, kapau te tau kātaki ʻo aʻu ki he ngataʻangá, te tau maʻu ʻa e ʻamanaki ko ʻetau hokosia ʻa e talaʻofa fakaʻotua ʻe taha ʻoku pehē: “Hange ko e fuoloa ʻo ha ʻakau ʻe pehe ʻa e fuoloa ʻa hoku kakai.”—Aisea 65:22; Mātiu 24:13.