Tefitoʻi Moʻoni Fakaʻotuá ʻE Lava ke ʻAonga Kiate Koe
ʻOKU ʻikai toe veiveiua ʻa hoʻo lāuʻilo ko e fanga monumanú ʻoku puleʻi kinautolu ʻe he ongoʻi fakaenatulá. Ko e ngaahi mīsini lahi ʻoku faʻu kinautolu ke muimui ki ha ngaahi fakahinohino. Ka naʻe fakatupu ʻa e tangatá ia ke tataki ʻe ha ngaahi tefitoʻi moʻoni. ʻE lava fēfē ke ke fakapapauʻi ia? Sai, ko Sihova ko e Tupuʻanga ʻo e ngaahi tefitoʻi moʻoni totonu kotoa pē, naʻá ne fanongonongo ʻi heʻene fakatupu ʻa e ʻuluaki tangatá: “Ta ngaohi tangata ʻi hota ʻīmisí, ʻo fakatatau ki hota tataú.” Ko e Tokotaha-Fakatupú ko e laumālie ia; ʻoku ʻikai te ne maʻu ha sino fakakakano ʻo hangē ko kitautolú, ko ia ʻoku tau ʻi hono “ʻīmisí” ʻi he ʻuhinga, ʻe malava ke tau tapua atu hono ʻulungāngá, ʻo fakahāhā ʻi ha tuʻunga ʻa hono ngaahi ʻulungaanga leleí. ʻOku maʻu ʻe he tangatá ʻa e malava ke tataki ʻenau moʻuí ʻo fakatatau ki ha ngaahi tefitoʻi moʻoni, ʻa ia ʻo fakatatau ki he meʻa ʻoku nau tui ko ha lao ki he tōʻonga totonú. Kuo ʻai ʻe Sihova ke hiki ʻa e lahi taha ʻo e ngaahi tefitoʻi moʻoni ko ení ʻi heʻene Folofolá.—Senesi 1:26, NW; Sione 4:24; 17:17.
‘Ka ʻoku laui teau ʻa e ngaahi tefitoʻi moʻoni ʻi he Tohitapú,’ ko e lau nai ia ʻa ha taha. ‘ʻOku ʻikai malava ke u ʻiloʻi kotoa ia.’ Moʻoni ia. Kae fakakaukau angé ki he moʻoniʻi meʻa ko ení: Lolotonga ʻoku ʻaonga ʻa e ngaahi tefitoʻi moʻoni fakaʻotuá kotoa, ʻoku mahuʻinga ange ʻa e niʻihi ʻi he niʻihi. ʻE lava ke ke ʻilo ʻa e meʻá ni mei he Mātiu 22:37-39, ʻa ia naʻe fakahaaʻi ai ʻe Sīsū, ʻi he lotolotonga ʻo e ngaahi fekau mo e ngaahi tefitoʻi moʻoni hoatatau ʻi he Lao ʻa Mōsesé, ko e niʻihi ai naʻe mahuʻinga lahi ange ia ʻi he niʻihi.
Ko fē ʻa e ngaahi tefitoʻi moʻoni ʻoku mahuʻinga angé? Ko e ngaahi tefitoʻi moʻoni tefito ʻa e Tohitapú ko e niʻihi ko ia ʻoku ʻi ai ʻene kaunga fakahangatonu ki hotau vahaʻangatae mo Sihová. Kapau te tau tokanga ki he ngaahi meʻá ni, ʻe hoko ai ʻa e Tokotaha-Fakatupú ko e tākiekina tefito ia ʻi heʻetau kāpasa fakaeʻulungāngá. Tānaki atu ki ai, ʻoku ʻi ai mo e ngaahi tefitoʻi moʻoni ʻoku kaunga ki hotau vahaʻangatae mo e kakai kehé. Ko hono ngāueʻaki ení ʻe tokoni ia kiate kitautolu ke tau matuʻuaki ʻa e ko-kitá, neongo pe ko e hā ʻoku uiʻakí.
Tau kamata angé ʻaki ha taha ʻo e ngaahi moʻoni mahuʻinga taha ʻi he Tohitapú. Ko e hā ʻa e moʻoni ko iá, pea ʻoku anga-fēfē ʻene kaunga kiate kitautolú?
“Ko e Fungani Māʻolunga ʻi Māmani Kotoa Pē”
ʻOku fakahā mahino ʻe he Ngaahi Konga Tohitapu Māʻoniʻoní ko Sihova ʻa hotau Tokotaha-Fakatupu Maʻongoʻongá, ko e ʻOtua Māfimafi-Aoniú. ʻE ʻikai ʻaupito lava ke fakatataua pe fetongi ia. Ko ha moʻoni tefito eni ʻoku hiki ʻi he Tohitapú.—Senesi 17:1; Koheleti 12:1.
Ko e taha ʻo e kau hiki ʻo e tohi ʻa Sāmé naʻá ne lave fekauʻaki mo Sihova: “Ko koe pē ko e Fungani Māʻolunga ʻi māmani kotoa pē.” Naʻe pehē ʻe Tuʻi Tēvita ʻo e kuonga muʻá: “Oku oou ae buleaga, E Jihova, bea oku hiki hake koe koe ulu ki he mea kotoabe.” Pea ko e palōfita ʻiloa ko Selemaiá naʻe ueʻi ia ke ne hiki: “Hono kakunga ha taha ke tatau mo koe, ʻe Sihova? ko e lahi koe, pea ʻoku lahi ʻa e ngu ʻo ho huafa.”—Sāme 83:18, NW; 1 Kalonikali 29:11, PM; Selemaia 10:6.
ʻOku totonu ke fēfē ʻetau ngāueʻaki ʻa e ngaahi moʻoni ko ia fekauʻaki mo e ʻOtuá ʻi he moʻui fakaʻahó?
ʻOku hā mahino ʻa e tokotaha ʻoku totonu ke tuʻu-ki-muʻa taha ʻi heʻetau moʻuí—ko hotau Tokotaha-Fakatupu mo Foaki-Moʻuí. ʻIkai ʻe feʻungamālie ai ke tekeʻi ha faʻahinga hehema pē ke fakahanga ʻa e tokangá kiate kitautolu tonu—ko ha hehema ʻe mālohi ange nai ʻi ha niʻihi? Ko ha tefitoʻi moʻoni fakaetataki fakapotopoto ke “fai kotoa pe ke ongoongolelei ai ʻa e ʻOtua.” (1 Kolinito 10:31) Naʻe fokotuʻu ʻe he palōfita ko Tanielá ha faʻifaʻitakiʻanga lelei ʻi he meʻá ni.
ʻOku fakahā mai kiate kitautolu ʻe he lēkooti fakahisitōliá naʻe hohaʻa tuʻu ʻi ha taimi ʻa Tuʻi Nepukanesa ʻo Pāpiloné ʻi ha misi pea kounaʻi ke ʻilo hono ʻuhingá. ʻI he puputuʻu ʻa e tokotaha kotoa, naʻe tala totonu ʻe Taniela ki he tuʻí ʻa e meʻa naʻá ne fiemaʻu ke ʻiló. Naʻe taku ʻe Taniela ia ki he meʻá ni? ʻIkai, naʻá ne tuku ʻa e fakalāngilangí ki he “ʻOtua ʻi langi ʻoku ne tatala ʻa e ngaahi meʻa ʻoku fufū.” Naʻe hoko atu ʻe Taniela: “Naʻe ʻikai koeʻuhi ko ha poto ʻoku ou maʻu ʻo hulu atu ʻi ha niʻihi kehe ʻoku moʻui, ʻa ia naʻe fakaha ai ʻa e misiteli kiate au.” Ko Tanielá ko ha tangata ia ʻo e tefitoʻi moʻoni. ʻOku ʻikai ha ofo he ʻi he tohi ʻa Tanielá, ʻoku fakamatalaʻi tuʻo tolu ai ʻa ʻene hoko ʻo “ʻofeina lahi” ʻi he ʻao ʻo e ʻOtuá.—Taniela 2:28, 30; 9:23; 10:11, 19.
Te ke maʻu ʻa e ʻaonga ʻi hoʻo faʻifaʻitaki kia Tanielá. ʻI he muimui ki he faʻifaʻitakiʻanga ʻa Tanielá, ʻoku fakaueʻiloto ʻa e fakapapauʻiʻangá. Ko hai ʻoku totonu ke ne maʻu ʻa e lāngilangi ki he meʻa ʻokú ke faí? Neongo pe ko e hā ho tuʻungá, ʻokú ke maʻu ʻa e malava ke fai ʻo fakatatau mo e tefitoʻi moʻoni mātuʻaki mahuʻinga faka-Tohitapu ko eni—ko Sihova ʻa e ʻEiki Haú. Ko hoʻo fai peheé te ne ʻai koe ke ke hoko ʻo “ʻofeina lahi” ʻi hono ʻaó.
Tau vakai angé he taimí ni ki he ongo tefitoʻi moʻoni tefito ʻe ua ʻe lava ke ne tataki kitautolu ʻi he tafaʻaki ʻo e ngaahi vā fakaetangatá. Neongo ʻa e fakamamafa kiate kita ʻoku mafolalahiá, ko e tafaʻaki ko eni ʻo e moʻuí ʻoku hoko tefito ia ko e pole.
“ʻI he Loto Anga-Vaivai”
Ko e faʻahinga ko ia ʻoku nau fakamuʻomuʻa kinautolú ʻoku tātātaha ke nau fiemālie. ʻOku fiemaʻu ʻe he tokolahi tahá ha moʻui lelei ange ʻaupito, pea ʻoku nau fiemaʻu ia he taimí ni. Kiate kinautolu, ko e fakanānaá ko ha faʻahinga vaivaiʻanga ia. ʻOku nau vakai ki he kātakí ko e meʻa pē ke fakahāhā ʻe he niʻihi kehé. ʻI heʻene hoko mai ki heʻenau feinga ki he tuʻu-ki-muʻá, ʻoku ʻatā ha faʻahinga meʻa pē. ʻOkú ke fakakaukau ʻokú ke maʻu ha faʻahinga fili kehe mei he fai ʻo hangē ko kinautolú?
Ko e kau sevāniti ʻa e ʻOtuá ʻoku nau fetaulaki fakaʻaho mo e fakakaukau ko iá, ka ʻoku ʻikai totonu ke ne uesia kinautolu. ʻOku tali ʻe he kau Kalisitiane matuʻotuʻá ʻa e tefitoʻi moʻoni ko ia, ʻoku “ikai ko ia oku ne fakaogolelei ia [ʻa ia] e fakamalo ki ai, ka ko ia oku fakaogolelei ia e he Eiki.”—2 Kolinito 10:18, PM.
Ko hono ngāueʻaki ʻa e tefitoʻi moʻoni ʻi he Filipai 2:3, 4 (NW) ʻe tokoni ia. ʻOku fakalototoʻaʻi ai koe ʻe he potutohi ko iá ke ʻoua naʻá ke fai “ha meʻa ʻe taha ʻi he fakakikihi pe ʻi he loto-mahikihiki, ka ʻi he loto anga-vaivai [ʻo lau] ʻoku lelei hake ʻa e niʻihi kehé ʻiate kita.” Ko ia, te ke “tokanga [ai], ʻo ʻikai ʻi he mahuʻingaʻia fakafoʻituitui ʻi he ngaahi meʻa pē ʻaʻaú, ka ʻi he mahuʻingaʻia fakafoʻituitui foki ʻi he ngaahi meʻa ʻa e niʻihi kehé.”
Ko e tokotaha naʻá ne maʻu ha fakakaukau totonu fekauʻaki mo ia pea naʻá ne fai ha fakafuofua lelei ki hono mahuʻingá tonu, ko Kitione, ko ha fakamaau ʻi he kau Hepelū ʻo e kuonga muʻá. Naʻe ʻikai te ne feinga ke hoko ko e taki ʻo ʻIsileli. Kae kehe, ʻi hono fakanofo ia ki he ngafa ko iá, naʻe lave ʻa Kitione ki heʻene taʻefeʻungá. “Ko e kogakau ʻoku ou kau ki ai ko e vaivai taha ia ʻia Manase, pea ko e siʻi taha au ʻi he fale o ʻeku tamai,” ko ʻene fakamatalá ia.—Fakamaau 6:12-16.
ʻIkai ngata aí, ʻi he hili hono tuku ʻe Sihova ha ikuna kia Kitioné, naʻe fakalanga ʻe he kau tangata ʻIfalemí ha fakakikihi mo ia. Naʻe anga-fēfē ʻa e fakafeangai ʻa Kitioné? Naʻe hiki hake ʻa hono mahuʻingá tonu ʻi heʻene ikuná? ʻIkai. Naʻá ne kalofi ʻa e fakatamakí ʻaki ʻene fai ha tali anga-vaivai. “Koeha ia teu mafai e au, ke fakatatau mo kimoutolu?” Naʻe loto anga-vaivai ʻa Kitione.—Fakamaau 8:1-3, PM.
ʻOku moʻoni, ko e meʻa fekauʻaki mo Kitioné naʻe hoko ia ʻi ha taimi fuoloa he kuohilí. Neongo ia, ʻoku ʻi ai ʻa e mahuʻinga ʻo hono vakaiʻi ʻa e fakamatala ko iá. ʻOku malava ke ke sio ai naʻe maʻu ʻe Kitione ha fakakaukau mātuʻaki kehe mo ia ʻoku fuʻu mafolalahia he ʻaho ní, pea naʻá ne moʻui ʻo fakatatau ki ai, maʻa ʻene leleí.
Ko e fakakaukau mālohi ʻa ē ʻoku tokanga taha pē ai kiate kitá ʻe lava ke ne mioʻi ʻetau vakai ki hotau mahuʻingá. ʻOku fakatonutonu ʻe he ngaahi tefitoʻi moʻoni faka-Tohitapú ʻa e mioʻi ko iá, ʻo akoʻi kitautolu ki hotau mahuʻinga moʻoni ʻi he felāveʻi mo e Tokotaha-Fakatupú pea mo e niʻihi kehé.
ʻI he tokanga ki he ngaahi tefitoʻi moʻoni faka-Tohitapú, ʻoku tau ikuʻi ai ʻa e faʻahinga anga ko eni ʻo e ʻahó. ʻOku ʻikai te tau kei hoko ai ʻo ofeʻi ʻe he ngaahi ongó pe angaʻitangatá. Ko e lahi ange ʻetau ako fekauʻaki mo e ngaahi tefitoʻi moʻoni totonú, ko ʻetau maheni lelei ange ia mo honau Tupuʻangá. ʻIo, ko e tokanga makehe ki he ngaahi tefitoʻi moʻoni fakaʻotuá ʻi hono lau ʻa e Tohitapú ʻoku tuha moʻoni ia mo e feinga ʻoku faí.—Sio ki he puhá.
Kuo ngaohi ʻe Sihova ʻa e tangatá ke māʻolunga hake he fanga monumanú, ʻa ia ʻoku ueʻi tefito pē kinautolu ʻe he ongoʻi fakaenatulá. Ko e muimui ki he finangalo ʻo e ʻOtuá ʻoku kau ki ai ʻa hono ngāueʻaki ʻo e ngaahi tefitoʻi moʻoni fakaʻotuá. ʻE malava ai ke tau kei tauhi ʻetau kāpasa fakaeʻulungāngá ke ngāue lelei, ko ha kāpasa te ne taki kitautolu ki ha fokotuʻutuʻu foʻou ko e faʻu ʻe he ʻOtuá. ʻOku ʻomai ʻe he Tohitapú ha ʻuhinga ke tau ʻamanekina vave ai ha fokotuʻutuʻu foʻou fakaemāmani lahi ʻa ia ʻe “nofo ai ae maonioni.”—2 Pita 3:13, PM.
[Puha/Fakatātā ʻi he peesi 6]
Tefitoʻi Moʻoni Faka-Tohitapu ʻAonga
ʻI he lotoʻi fāmilí:
“Ke ʻoua naʻa kumi ʻe ha taha ʻene lelei aʻana, ka ko e lelei ʻa e taha.”—1 Kolinito 10:24.
“Ko ʻofa . . . ʻoku ʻikai te ne kumi ʻene lelei aʻana.”—1 Kolinito 13:4, 5.
“Ko kimoutolu . . . fakafoitangata—ʻe, ke taki taha ʻofa ki siʻono uaifi ʻo hange ko ʻene ʻofa kiate ia.”—Efeso 5:33.
“ʻA e kau fefine, mou anganofo ki homou ngaahi husepaniti.”—Kolose 3:18.
“Tokanga ki hoʻo tamai, he ko eni ia naʻe fakatupu koe, pea ʻoua te ke taʻetokaʻi ʻoka motuʻa hoʻo faʻe.”—Palovepi 23:22.
ʻI ʻapiako, ʻi he ngāueʻangá pe ʻi he pisinisí:
“Ko e meʻafua kākā [“ko e meʻa fakalielia ia,” NW] . . . Ko e angahala ʻoku ne maʻu ʻi heʻene ngaue ha ʻataʻi totongi.”—Palovepi 11:1, 18.
“Ke ʻoua naʻa kei kaihaʻa ʻe he kaihaʻa: ka ne fakafitefitaʻa muʻa.”—Efeso 4:28.
“Ka ʻikai fie ngaue ha taha, pea ʻoua foki naʻa ne kai.”—2 Tesalonaika 3:10.
“Ko e hā pē ha meʻa te mou fai, ngāue loto-ʻaufuatō ki ai he ko e ngāue kia Sihova.”—Kolose 3:23, NW.
“Oku mau loto ke moui agatonu i he mea kotoabe.”—Hepelu 13:18, PM.
ʻI he fakakaukau ki he koloá:
“Ko ia ʻoku fakavave ke koloaʻia, ʻe ʻikai ʻalu taʻetautea.”—Palovepi 28:20.
“Ko ia oku manako ki he siliva e ikai ke ne fiemalie i he siliva.”—Koheleti 5:10, PM.
ʻI hono fakafuofuaʻi ʻa e mahuʻinga tonu ʻo ha taha:
“Koe kumi e he kakai ho nau ogoogolelei onautolu be oku ikai koe ogoogolelei ia.”—Palovepi 25:27, PM.
“Tuku ke viki koe ʻe ha taha kehe, ʻo ʻikai ko ho ngutu oʻou.”—Palovepi 27:2.
“Ko ʻeku lea ʻeni kiate kimoutolu tāutaha . . . ke ʻoua naʻa hulu atu ʻene fakakaukau kiate ia ʻi he meʻa ʻoku totonu.”—Loma 12:3.
“Kapau ʻoku ʻafungi ʻe ha taha ko ha meʻa ia, ʻosi ʻoku ʻikai ko ha momoʻi meʻa ia, ʻoku fakahalaʻi ia ʻe hono loto.”—Kaletia 6:3.
[Fakatātā ʻi he peesi 5]
Naʻe tuku ʻe Taniela ʻa e fakalāngilangi totonú ki he ʻOtuá
[Fakatātā ʻi he peesi 7]
Ko e feangai mo e niʻihi kehé ʻo fakatatau mo e ngaahi tefitoʻi moʻoni fakaʻotuá ʻoku tokoni ia ki ha ngaahi vahaʻangatae lelei mo e fiefiá
[Maʻuʻanga ʻo e Tā ʻi he peesi 7]
U.S. Fish & Wildlife Service, Washington, D.C./Robert Bridges