Ngaahi Fakatātā Fakalotú—Ko Honau Tupuʻanga Motuʻá
“Ko e ngaahi fakatātā fakalotú ko ha founga ia ki hono fakakau atu kitautolu ki he tuʻunga lelei mo e tuʻunga māʻoniʻoni ʻo e ʻOtuá mo ʻEne Kau Sangató.”—TAIOSISI ʻOFOTOKISĪ KALISI FAKAEPĪSOPE PULE ʻO ʻAOSITELĒLIÁ
ʻI HE ʻaho vela ʻaʻafu ko eni ʻo ʻAokosí, ʻoku ulo kakaha hifo ai ʻa e huelo ʻo e laʻaá ki he ngaahi sitepu sima ʻoku ʻalu atu ai ki he monasiteliō ʻo e “Faʻē Māʻoniʻoni Taupotu ʻa e ʻOtuá,” ʻi he motu ko Tínos, ʻi he Tahi ʻĪsiní. ʻOku ʻikai fakavaivaiʻi ʻe he vela fakaʻuliá ʻa e fakapapau ʻa e toko 25,000 tupu ʻo e kau pilikimi ʻOfotokisī Kalisi līʻoá ʻa ia ʻoku nau ngaʻunu māmālie atu ʻi he feinga ke aʻu ki he fakatātā fakalotu kuo teuteuʻi lahi ʻo e faʻē ʻa Sīsuú.
Ko ha kiʻi taʻahine mamatea, ʻoku hā mahino ʻene ʻi he mamahí fakataha mo ha siva ʻa e ʻamanakí ʻoku hā ʻi hono matá, ʻokú ne totolo ʻaki hono ongo tui kuo fetotoʻi lahi. ʻIkai mamaʻo meiate ia, ʻoku fāinga ai ha fineʻeiki ongosia ʻa ia kuó ne fononga mei he ngataʻanga ʻe taha ʻo e fonuá, ke hokohoko atu ʻa e luelué. Ko ha tangata fatutangata loto-vēkeveke ʻokú ne tautaʻa lahi ʻi he feinga loto-moʻua ke hao atu ʻi he fuʻu kakai feteketekeʻí. Ko ʻenau taumuʻá ke ʻuma ki ha fakatātā fakalotu ʻo Mele pea fakatōmapeʻe ʻi muʻa ai.
Ko e kakai mātuʻaki lotu ko ení ʻoku ʻikai ha veiveiua ʻoku nau loto-moʻoni ʻi heʻenau holi ke lotu ki he ʻOtuá. Neongo ia, ko e toko fiha ʻoku nau ʻiloʻi ko e līʻoa pehē ki he ngaahi fakatātā fakalotú ko e tupu ia mei he ngaahi tōʻonga ʻi he laui senituli ki muʻa ʻi he lotu faka-Kalisitiané?
Ko e Mafolalahia ʻa e Ngaahi Fakatātā Fakalotú
ʻI he māmani ʻOfotokisií, ʻoku ʻi ai ʻa e ngaahi fakatātā fakalotu ʻi he feituʻu kotoa pē. ʻI he ngaahi fale lotú, ʻoku tuku ai ʻi ha feituʻu tefito ʻa e ngaahi fakatātā fakalotu ʻo Sīsū, Mele, mo e kau “sangato” tokolahi. ʻOku faʻa fakalāngilangiʻi ʻe he kau tuí ʻa e ngaahi fakatātā fakalotu ko ení ʻaki ʻa e ngaahi ʻuma, ʻinisēnisi, mo e ngaahi teʻelango ʻoku tutu. Tānaki atu ki ai, ko e meimei ʻapi ʻOfotokisī kotoa pē ʻoku ʻi ai ʻenau fakatātā fakalotu ʻi ha tuliki, ʻa ia ʻoku fai ki ai ʻa e ngaahi lotu. ʻOku anga-maheni ʻaki ki he kau Kalisitiane ʻOfotokisií ke nau leaʻaki ko e taimi ko ia ʻoku nau lotu ai ki ha fakatātā fakalotú ʻoku nau fetuʻutaki ai mo e ʻOtuá. ʻOku tui ʻa e tokolahi ʻoku fonu ʻi he ngaahi fakatātā fakalotú ʻa e kelesi fakaʻotuá pea mo e ngaahi mafai fakaemana.
Ko e kau tui ko iá ngalingali te nau ʻohovale ke ʻiloʻi naʻe ʻikai leleiʻia ʻa e kau Kalisitiane ʻi he ʻuluaki senitulí ʻi hono ngāueʻaki ʻi he lotú ʻa e ngaahi fakatātā fakalotú. Ko e tohi Byzantium ʻoku pehē ai: “Ko e muʻaki kau Kalisitiané, naʻa nau maʻu tukufakaholo mei he lotu faka-Siú ha fakaliliʻa ki he tauhi ʻaitolí, ʻo taʻeloto ki hano fakalāngilangiʻi pē ʻo e ngaahi fakatātā ʻo e faʻahinga māʻoniʻoní.” ʻOku pehē ʻe he tohi tatau: “Mei he Senituli Hono Nimá ʻo faai mai ai, ko e ngaahi fakatātā fakalotú pe ngaahi ʻīmisí . . . naʻe hoko ai ʻo fakautuutu ʻene mafolalahiá ʻi he lotu fakapuleʻangá mo e lotu fakatāutahá.” Kapau ne ʻikai tupu mei he lotu faka-Kalisitiane ʻi he ʻuluaki senitulí, naʻe tupu mei fē ʻa hono ngāueʻaki ʻo e ngaahi fakatātā fakalotú?
Fakatotoloʻi ʻa Honau Ngaahi Tupuʻangá
Ko e tokotaha fakatotolo ko Vitalij Ivanovich Petrenko naʻá ne tohi: “Ko e ngāueʻaki ʻo e ngaahi ʻīmisí mo hono talatukufakaholó ko e haʻu ia ʻi he taimi fuoloa ki muʻa ʻi he kuonga ʻo e Kalisitiané pea naʻe ʻi ai hono ‘laine hohoko ʻi he lotu fakapanganí.’” ʻOku loto-tatau ki ai ʻa e kau faihisitōlia tokolahi, ʻo nau pehē ko e ngaahi tupuʻanga ʻo e lotu ki he fakatātā fakalotú ʻoku maʻu ia ʻi he ngaahi lotu ʻa Pāpilone, ʻIsipite mo Kalisi ʻi he kuonga muʻá. Ko e fakatātaá, ʻi Kalisi ʻo e kuonga muʻá, ko e ngaahi ʻīmisi fakalotú naʻe ʻi he faʻunga ia ʻo e ngaahi maka fakamanatu. Naʻe ʻi ai ʻa e tui ko e ngaahi ʻīmisí ni naʻe faʻu kinautolu ʻi he ngaahi mālohi fakaʻotuá. Naʻe fakakaukau ʻa e kakaí ko e niʻihi ʻo e ngaahi ʻīmisí ni naʻe ʻikai ke ngaohi ia ʻe ha ngaahi nima ka naʻa nau tō mai mei hēvani. Lolotonga ʻa e ngaahi kātoanga makehé, ko e ngaahi ʻīmisi lotu fakaeouau peheé naʻe ʻave ia ʻi ha laka takatakai ʻi he koló, pea naʻe fai ki ai ʻa e ngaahi feilaulau. “Ko e ʻīmisi lotu fakaeouaú naʻe vakai ki ai ʻi he līʻoa fakalotú ko ha ʻotua tonu ia, neongo kuo fai ʻa e ngaahi feinga . . . ke fakafaikehekeheʻi ʻa e vahaʻa ʻo e ʻotuá mo hono ʻīmisí,” ko e lau ia ʻa Petrenko.
Naʻe anga-fēfē ʻa e tafe mai ʻa e ngaahi fakakaukau mo e tōʻonga peheé ki he lotu faka-Kalisitiané? ʻOku pehē ʻe he tokotaha fakatotolo tatau, ʻi he ngaahi senituli hili ʻa e mate ʻa e kau ʻapositolo ʻa Kalaisí, tautefito ʻi ʻIsipite, “naʻe fakafepakiʻi ai ʻa e ngaahi tui faka-Kalisitiané ʻe he ‘tuifio ʻo e ngaahi tui fakapangani’—naʻe tupu mei he ngaahi tōʻonga mo e ngaahi tui faka-ʻIsipite, faka-Kalisi, faka-Siu, faka-Hahake mo e faka-Loma ʻa ia naʻe fai fakataha mo e ngaahi tōʻonga faka-Kalisitiané.” Ko e ikuʻangá, “naʻe ʻai ʻe he kau tufunga Kalisitiané ha founga [lotu tuifio] pea ngāueʻaki ʻa e ngaahi fakaʻilonga fakapanganí, ʻo fakatahaʻi ia ʻi ha ngaahi fakaʻilonga foʻou, ʻo ʻikai fakaʻatā fakaʻaufuli kinautolu mei hono ʻuliʻi ʻe he tākiekina fakapanganí.”
Naʻe vave ʻa e hoko ai ʻa e ngaahi fakatātā fakalotú ko e meʻa ia naʻe fakamamafaʻi fakatouʻosi ʻi he moʻui fakalotu fakatāutahá mo e fakapuleʻangá. ʻI he tohi The Age of Faith, ʻoku fakamatala ai ʻa e faihisitōlia ko Will Durant ki he anga ʻo e hoko ʻa e meʻá ni, ʻi heʻene pehē: “ʻI he fakautuutu ʻa e tokolahi ʻo e kau sangato ʻoku fai ki ai ʻa e lotú, naʻe malanga hake ai ʻa e fiemaʻu ke ʻiloʻi mo manatuʻi kinautolu; naʻe faʻu ʻo lahi ʻaupito ʻa honau ngaahi fakatātā pea pehē kia Mele; pea ʻi he tuʻunga ʻo Kalaisí ʻoku hoko ʻo ʻikai ngata pē ʻi hono fōtunga ʻoku fakaʻuta atu ki aí ka ko Hono kolosí naʻe hoko ia ko ha ngaahi meʻa ia ke fakalāngilangiʻi—naʻa mo e ngaahi ʻatamai tuingofuá, ʻoku nau hoko ko e ngaahi meʻa ʻomi monū. Ko ha malava fakanatula ke fakakaukauloto ʻi he lotolotonga ʻo e kakaí ʻoku nau liliu ai ʻa e ngaahi meʻa tauhi fakamanatu māʻoniʻoní, ngaahi fakatātaá, mo e ngaahi maka fakamanatú ki ha ngaahi meʻa ke lotu ki ai; ʻoku fakatōmapeʻe ki ai ʻa e kakaí, ʻuma ki ai, tutu ʻa e ngaahi teʻelango ʻi honau ʻaó, fakakalauni kinautolu ʻaki ʻa e ngaahi matalaʻiʻakau, pea kumi ki ha ngaahi mana mei heʻenau tākiekina fakamisitelí. . . . Naʻe toutou fakamatalaʻi ʻe he ngaahi Tamai pea mo e ngaahi kosilio ʻo e Siasí ko e ngaahi ʻīmisí ʻoku ʻikai ko e ngaahi ʻotua, ka ko e ngaahi fakamanatu pē ia ʻo e meʻa ko iá; naʻe ʻikai fiemaʻu ʻe he kakaí ke fai ʻa e ngaahi fakafaikehekehe ko iá.”
ʻI he ʻahó ni, ko e tokolahi ʻoku nau ngāueʻaki ʻa e ngaahi fakatātā fakalotú te nau fakakikihi meimei tatau ko e ngaahi ʻīmisí ko e ngaahi meʻa pē ia ke ʻapasiaʻi—ʻo ʻikai lotu ki ai. Te nau taukaveʻi nai ko e ngaahi tā valivali fakalotú ʻoku fakalao—naʻa mo hono fiemaʻu fakaʻaufuli—ko e ngaahi tokoni ʻi he lotu ki he ʻOtuá. Mahalo pē ʻokú ke ongoʻi ʻa e meʻa tatau. Ka ko e fehuʻí, ʻOku anga-fēfē ʻa e ongoʻi ʻa e ʻOtuá fekauʻaki mo e meʻá ni? ʻE lava ke pehē ko e fakalāngilangiʻi ʻo ha fakatātā fakalotú ʻoku tatau pē ia mo e lotu ki aí? ʻE lava ke ʻomai moʻoni ʻe he ngaahi tōʻonga peheé ha ngaahi fakatuʻutāmaki fakapulipuli?
[Puha/Fakatātā ʻi he peesi 4]
Ko e Hā ʻa e Fakatātā Fakalotú?
ʻI he ʻikai hangē ko e ngaahi maka fakamanatu ʻoku ngāueʻaki lahi ʻi he lotu ʻa e Katolika Lomá, ko e ngaahi fakatātā fakalotú ko e ngaahi ʻīmisi fua tafaʻaki ua ia ʻo Kalaisi, Mele, “ngaahi sangató,” kau ʻāngelo, kakai mo e ngaahi meʻa naʻe hoko ʻi he Tohitapú, pe ko e ngaahi meʻa ʻi he hisitōlia ʻo e Siasi ʻOfotokisií. ʻOku faʻa tā valivali kinautolu ʻi he ngaahi lauʻipapa ʻoku lava ke ʻave holo.
Fakatatau ki he Siasi ʻOfotokisií, “ʻi he ngaahi Fakatātā Fakalotu ʻo e kau Sangató, ko e ngaahi fakatātaá ʻoku ʻikai ke hā ia ʻo hangē ko e ngaahi fakatātā ʻo e kakano mo e toto anga-mahení.” Pehē foki, ʻi he ngaahi fakatātā fakalotú “ʻoku hā fālahi ange ʻa e ngaahi fakatātaá ki he tafaʻaki ʻi muí”—ʻoku ʻikai ke fāsiʻi ange ʻa e fakatātaá ʻi heʻene ʻalu ki he tafaʻaki mamaʻó. ʻOku faʻa “ʻikai ha ngaahi ʻata, pe ngaahi founga ke fakahaaʻi ai ʻa e ʻahó mo e poʻulí.” ʻOku toe ʻi ai ʻa e tui ʻo pehē ko e papa mo e tāvalivali ʻo ha fakatātā fakalotu ʻoku lava ke “hoko ʻo fonu ia ʻi he ʻi ai ʻa e ʻOtuá.”
[Fakatātā ʻi he peesi 4]
Ko e ngāueʻaki ʻo e ngaahi ʻīmisí ʻoku lava ke pehē ko e tupu ia mei he ngaahi tōʻonga fakapanganí
[Maʻuʻanga ʻo e Tā ʻi he peesi 3]
© AFP/CORBIS