Ngaahi Fehuʻi mei he Kau Lautohí

ʻOku ala tali Fakatohitapu ki ha Kalisitiane ke ne hili hono nimá ʻi he Tohitapú pea fuakava ke tala ʻa e moʻoni fakaʻaufuli ʻi he fakamaauʻangá?

Ko e tokotaha taki taha kuo pau ke ne fai ha fili fakafoʻituitui fekauʻaki mo e meʻá ni. (Kaletia 6:5) Kae kehe, ʻoku ʻikai ha tapui faka-Tohitapu ki hono fai ha fuakava ke tala ʻa e moʻoní ʻi he fakamaauʻangá.

Ko hono fai ʻa e fuakavá kuo fuoloa ʻene hoko ko ha tōʻonga failahia. Hangē ko ení, ʻi he kuonga muʻá, naʻe hiki ʻe he kau Kalisí ha nima ki he langí pe ala ki ha ʻōlita lolotonga ʻenau fai ʻa e fuakavá. ʻI he taimi naʻe fai ai ha fuakava ʻe ha tokotaha sula Lomá, naʻá ne puke ha foʻi maka ʻi hono nimá pea fuakava: “Kapau ʻoku ou kākā ʻiloʻilo pau, lolotonga ia ʻene fakahaofi ʻa e koló mo e kolotaú, ʻofa ke hanga [ʻe he ʻOtua] ko Siupitá ʻo toʻo meiate au ʻa e meʻa kotoa pē ʻoku leleí, ʻi heʻeku tolongi ʻa e foʻi maka ko ení.”​—Cyclopedia of Biblical, Theological, and Ecclesiastical Literature, ʻa John McClintock mo James Strong, Voliume VII, peesi 260.

Ko e ngaahi tōʻonga peheé ko e ngaahi fakaʻilonga ia ʻo e hehema ʻa e faʻahinga ʻo e tangatá ke ʻiloʻi ʻa e ʻi ai ʻa ha mafai fakaʻotua ʻoku malava ke ne vakai mai ki he tangatá pea mo ia ʻoku nau fai fakamatala ki aí. Mei he kuonga muʻá, naʻe ʻiloʻi ʻe he kau lotu moʻoni ʻa Sihová ʻokú ne ʻafioʻi ʻa e meʻa naʻa nau leaʻakí mo faí. (Palovepi 5:​21; 15:3) Naʻa nau fuakava ʻi he ʻao ʻo e ʻOtuá, hangē ko e laú, pe ko ia ʻa e tokotaha fakamoʻoní. Ko e fakatātaá, naʻe fai eni ʻe Pōasi, Tēvita, Solomone, mo Setekaia. (Lute 3:​13; 2 Samiuela 3:​35; 1 Tuʻi 2:​23, 24; Selemaia 38:16) Ko e kau lotu ʻa e ʻOtua moʻoní naʻa nau toe fakaʻatā ʻa e niʻihi kehé ke nau fai ha fuakava. Ko e meʻa ia naʻe hoko ʻi he tuʻunga ʻo ʻĒpalahame pea mo Sīsū Kalaisí.​—Senesi 21:​22-​24; Mātiu 26:​63, 64.

Ko ha tokotaha ʻokú ne fai ha fuakava ʻi he ʻao ʻo Sihová ʻokú ne fai ʻi he taimi ʻe niʻihi ha ngaue hono sinó ʻo ʻalu fakataha mo ia. Ko ʻEpalame (ʻĒpalahame) naʻá ne tala ange ki he tuʻi ʻo Sōtomá: “Naʻaku hiki hoku nima [ʻi ha fuakava] kia Sihova ko [e] ʻOtua-Taupotu, ʻa ia ko ʻene meʻa ʻa Langi mo Mamani.” (Senesi 14:22) Ko ha ʻāngelo naʻe lea ki he palōfita ko Tanielá naʻá ne “hiki hono nima toʻomataʻu mo toʻohema ki langi, mo fuakava ʻi he ʻAfio ʻoku moʻui ʻo taʻengata.” (Taniela 12:7) Naʻa mo e ʻOtuá ʻoku lave ki ai ʻokú ne hiki fakaefakatātā ʻa hono nimá ʻi ha fuakava.​—Teutalonome 32:40; Aisea 62:8.

ʻOku ʻikai ha fakafepaki Fakatohitapu ki hono fai ʻo ha fuakavá. Kae kehe, ʻoku ʻikai pau ki ha Kalisitiane ke ne fai ha fuakava koeʻuhi ke fakamoʻoniʻiʻaki ʻa e fakamatala kotoa ʻokú ne faí. Naʻe pehē ʻe Sīsū: “Ke pehe ni hoʻomou lea, ʻIo, ʻIo, ʻIkai, ʻIkai.” (Mātiu 5:​33-37, fakaʻītali ʻamautolu.) Naʻe fai ʻe he ākonga ko Sēmisí ʻa e fakamatala meimei tatau. ʻI heʻene pehē “oua e fuakava,” ko ʻene fakatokanga ia ki he fuakava ʻi he fanga kiʻi meʻa noaʻiá. (Semisi 5:​12, PM) Naʻe ʻikai pehē ʻe Sīsū pe ko Sēmisi ʻoku hala ke fai ha fuakava ke tala ʻa e moʻoní ʻi he fakamaauʻangá.

Fēfē leva kapau ʻoku kole ki ha Kalisitiane ʻi he fakamaauʻangá ke ne fuakava ʻoku moʻoni ʻa ʻene fakamoʻoní? Te ne ongoʻi nai ʻe lava ke ne fai ha fuakava pehē. Ka ʻikai, ʻe fakangofua nai ia ke ne fai hano fakahaaʻi fakapapau ʻoku ʻikai te ne loi.​—Kaletia 1:​20.

ʻI he kau ki he founga ʻi he loki fakamaauʻangá ha hiki ʻo e nimá pe ko hono hili ʻi he Tohitapú ʻi he fuakavá, ʻe fili nai ha Kalisitiane ke fai ki ai. ʻOku ʻi heʻene fakakaukaú nai ʻa e ngaahi fakatātā Fakatohitapu ʻoku ʻalu fakataha ʻa e fuakavá mo ha ngaue ʻa e sinó. Ki ha Kalisitiane, ko e meʻa ʻoku mahuʻinga ange ʻi hono fai ʻe ha tokotaha ha ngaue pau ʻo e sinó ʻi heʻene fai ha fuakavá ke ne manatuʻi ʻokú ne fuakava ʻi he ʻao ʻo e ʻOtuá ke ne tala ʻa e moʻoní. Ko ha fuakava pehē ko ha meʻa mafatukituki ia. Kapau ʻoku ongoʻi ʻe ha Kalisitiane ʻe lava pea ʻoku totonu ke ne tali ha fehuʻi ʻoku ʻeke kiate ia ʻi he ngaahi tuʻunga peheé, ʻoku totonu leva ke ne manatuʻi ʻokú ne ʻi he malumalu ʻo ha fuakava ke tala ʻa e moʻoní, ʻa ia ko e moʻoni, ko e meʻa ia ʻoku loto ha Kalisitiane ke leaʻaki ʻi he taimi kotoa pē.