Ko e ʻAho ke Manatua

KO E ʻaho ia naʻá ne liliuʻi fakaʻaufuli ʻa e ʻalunga ʻo e faʻahinga ʻo e tangatá ki heʻene lelei taʻengatá. ʻOku ʻikai ha toe ʻaho ʻi he hisitōliá kuó ne uesia pehē ʻa e kahaʻu ʻo e faʻahinga ʻo e tangatá. Ko e ʻaho ia naʻe fakakakato ai ʻe Sīsū ʻa e meʻa kotoa naʻá ne haʻu ki he māmaní ke faí. ʻI hono tuki faʻo ki ha ʻakau fakamamahí, naʻá ne fakatau ʻene mānava fakaʻosí peá ne kalanga: “Kuo ʻosi!” (Sione 19:30) Ko e hā ʻa e taumuʻa naʻe haʻu ai ʻa Sīsuú?

“Ko e Fanautama ʻa Tangata naʻe ʻikai te ne haʻu,” ko e lau ia ʻa e Tohitapú, “ke maʻu sevaniti, ka ke sevaniti pe ʻe ia, pea ke tuku ʻene moʻui ke huhuʻiʻaki ha tokolahi, heʻene fetongi kinautolu.” (Mātiu 20:28) Naʻe foaki ʻe Sīsū ʻa hono soulú, pe moʻuí, koeʻuhí ke lava ʻo fakahaofi ai ʻa e faʻahinga ʻo e tangatá mei he angahala mo e mate tukufakaholó. ʻIo, “naʻe ʻofa pehe ʻa e ʻOtua ki mamani, ko ia naʻa ne foaki hono ʻAlo tofu-pe-taha-ne-fakatupu, koeʻuhi ko ia kotoa pe ʻoku tui pikitai kiate ia ke ʻoua naʻa ʻauha, kae maʻu ʻa e moʻui taʻengata.” (Sione 3:16) Ko ha tokonaki mahuʻinga moʻoni ē ko e feilaulau ʻa Sīsuú!

Ko e ʻaho ʻo e pekia ʻa Sīsuú ko e ʻaho ia ke manatua ʻi ha toe ʻuhinga ʻe taha. ʻI he ʻaho ko iá naʻe akoʻi ai ʻe he ʻAlo ʻo e ʻOtuá ki heʻene kau ʻapositoló ʻa e ngaahi lēsoni mahuʻinga ʻa ia ʻe tokoniʻi ai kinautolu ke nau faitōnunga ai pē. He maongo moʻoni ē kuo pau naʻe fai ʻe heʻene ngaahi lea fakaʻosí ki he loto ʻo e kau ākonga ko iá! Ko e hā ʻene ngaahi akonakí? ʻE lava fēfē ke tau maʻu ʻaonga mei he meʻa naʻe akoʻi ʻe Sīsū kia kinautolú? Ko e ongo fehuʻí ni ʻe fai ʻa e lāulea ki ai ʻi he kupu hoko maí.