Ngaahi Fehuʻi mei he Kau Lautohí

Naʻe fakaʻatā ʻe Sihova ʻa e mali tokolahí ʻi he lotolotonga ʻo ʻene kau sevāniti he kuonga muʻá, ʻa e kau ʻIsilelí, ka ʻoku ʻikai te ne fakaʻatā ia ʻi he taimí ni. ʻOku ala liliu ʻa ʻene tuʻungá?

Kuo ʻikai liliu ʻe Sihova ʻa ʻene vakai ki he mali tokolahí. (Sāme 19:7; Malakai 3:6) Naʻe ʻikai ko e konga ia ʻo ʻene fokotuʻutuʻu ki he tangatá mei he kamataʻangá, pea ʻoku ʻikai ko ʻene fokotuʻutuʻu ia he taimi ní. ʻI he taimi naʻá ne fakatupu ai ʻa ʻIvi ke hoko ko ha uaifi kia ʻĀtamá, naʻe fakamatalaʻi ai ʻe Sihova ko e tuʻunga fakaʻotuá ko e uaifi ʻe taha ki he husepāniti ʻe taha. “Ko ia ʻe tukuange ʻe he tangata ʻene tamai mo ʻene faʻe, kae pikitai ki hono uaifi: pea te na hoko ko e kakano pe taha.”—Senesi 2:24.

ʻI he taimi naʻe ʻi he māmaní ai ʻa Sīsū Kalaisí, naʻá ne toe fakamatalaʻi ʻa e tuʻunga ko ení ʻi he tali ki he faʻahinga naʻa nau fehuʻi ʻo fekauʻaki mo e veté pea toe malí. Naʻá ne pehē: “Ne ʻikai te mou lau koā, Ko ia naʻa ne ngaohi ʻa e kakai ʻi he kamataʻanga naʻa ne ngaohi tangata mo fefine kinautolu; mo ne folofola, Ko e meʻa ko ia ʻe tuku ai ʻe ha tangata ʻene tamai mo ʻene faʻe, ka ne pikitai ki hono uaifi: pea ʻe hoko ʻa e toko ua ko e kakano pe taha? Ta ʻoku ʻikai te na kei ua, ka ko e kakano pe taha.” Naʻe tānaki atu ki ai ʻe Sīsū: “Ka ai ha taha te ne liʻaki hono uaifi, ʻo ʻikai ʻi haʻane feʻauaki, pea ne toki mali mo ha fefine kehe, ʻoku ne feʻauaki [“tono,” NW].” (Mātiu 19:​4-6, 9) Mei he meʻá ni, ʻoku hā mahino ai ko hono toe ʻai ha uaifi ʻe taha pe lahi angé ko e tono foki mo ia.

Ko e hā leva naʻe fakaʻatā ai ʻa e mali tokolahí ʻi he kuonga muʻá? Manatuʻi naʻe ʻikai kamata ʻe Sihova ʻa e tōʻonga ko iá. Ko e ʻuluaki tokotaha ʻoku lave ki ai ʻi he Tohitapú naʻá ne maʻu ʻo laka hake he uaifi ʻe tahá ko Lēmeki, ko ha hako ʻo Keini. (Senesi 4:​19-​24) ʻI hono ʻomai ʻe Sihova ʻa e Lōmaki ʻi he ʻaho ʻo Noá, ko Noa mo hono foha ʻe toko tolú naʻa nau taki taha maʻu ʻa e uaifi pē ʻe taha. Naʻe fakaʻauha ʻa e kau mali tokolahi kotoa pē ʻi he Lōmakí.

ʻI he laui senituli ki muí, ʻi hono fili ʻe Sihova ʻa e kau ʻIsilelí ke hoko ko hono kakaí, naʻe ʻosi ʻi ai ʻi honau lotolotongá ʻa e mali tokolahí, neongo naʻe hā mahino ʻa hono angaʻaki lahi ke maʻu ʻa e uaifi pē ʻe tahá. Naʻe ʻikai fiemaʻu ʻe he ʻOtuá ʻa e ngaahi fāmilí ke nau movetevete ʻi he ʻi ai he fāmilí ʻo lahi hake ʻi he uaifi ʻe tahá. ʻI hono kehé, naʻá ne tuʻutuʻuniʻi fefeka ʻa e tōʻongá ni.​—Ekisoto 21:​10, 11; Teutalonome 21:​15-​17.

ʻOku lava ke sio ko e kātakiʻi ko eni ʻo e mali tokolahí naʻe fakataimi peé ʻo ʻikai ʻi he meʻa pē naʻe fakamatalaʻi ʻe Sīsū ʻo fekauʻaki mo e muʻaki tuʻunga ʻa Sihova ki he nofo malí kae toe pehē foki ki he meʻa naʻe tohi ʻe he ʻapositolo ko Paulá ʻi he malumalu ʻo hono fakamānavaʻi ʻe he laumālie māʻoniʻoni ʻo e ʻOtuá. Naʻá ne pehē: “Ke taki taha maʻu hano uaifi oʻona, pea maʻu taki taha foki ʻe he fefine hono husepaniti totonu.” (1 Kolinito 7:2) Naʻe toe fakamānavaʻi ʻa Paula ke ne tohi ko ha tangata pē kuo fakanofo ko ha ʻovasia pe ko ha sevāniti fakafaifekau ʻi he fakatahaʻanga Kalisitiané kuo pau ke ne hoko “ko e husepaniti ʻo ha fefine pe taha.”—1 Timote 3:​2, 12; Taitusi 1:6.

Ko ia ai, ko e kātakiʻi ʻe Sihova ʻa e mali tokolahí naʻe hoko ʻo ngata ia ʻi he fokotuʻu ʻa e fakatahaʻanga Kalisitiané ʻi he taʻu nai ʻe 2,000 kuo maliu atú. ʻI he taimi ko iá, ko e tuʻunga ki he nofo malí naʻe toe foki ia ki he tuʻunga naʻe ʻi ai ʻi he kamataʻanga ʻo e fakatupu ʻe he ʻOtuá ʻa e tangatá mo e fefiné: husepāniti ʻe taha, uaifi ʻe taha. Ko e tuʻunga ia ʻi he ʻahó ni he lotolotonga ʻo e kakai ʻa e ʻOtuá ʻi he māmaní fakakātoa.​—Maake 10:​11, 12; 1 Kolinito 6:​9, 10.