Ko Hono Fai ha Fili—Ko ha Pole Taʻealakalofi

“ʻOKU ʻikai ha meʻa ʻe faingataʻa ange, pea ko ia ai, ʻe toe mahuʻinga ange ka ko e malava ke fai ha filí,” ko e lea ia ʻi he taimi ʻe taha ʻa Napoleone Ponapate, ko e ʻemipola ʻo Falanisē ʻi he senituli hono 19. Te ke loto-tatau nai mo e ongo tafaʻakí fakatouʻosi, koeʻuhi ʻoku faʻa fakamahuʻingaʻi ʻe he kakaí ʻa e hoko ʻo mapuleʻi ʻa ʻenau moʻuí tonu. ʻI he taimi tatau, kuo nau ʻiloʻi ko hono fai ʻa e ngaahi filí ʻoku faʻa mātuʻaki faingataʻa.

Pe ʻoku faingofua pe faingataʻa, ko hono fai ʻa e ngaahi filí ʻoku taʻealakalofi ia. ʻOku tau fehangahangai fakaʻaho mo e ngāue ko iá. Hili e tuʻu hake he pongipongí, kuo pau ke tau fili ʻa e meʻa ke tuí, meʻa ke kai ʻi he kai pongipongí, mo e founga ke fakahoko ai ʻa e ngaahi meʻa kehe lahi ʻi he lolotonga ʻa e ʻahó. Ko e lahi taha ʻo e ngaahi fili ko ení ʻoku nau mahuʻinga siʻisiʻi pē. ʻOku tātātaha ke tau toe fai ha fakakaukau ki ai. ʻOku tātātaha ke tau taʻemamohe ʻi ha hohaʻa pe naʻe fakapotopoto pe taʻefakapotopoto.

ʻI he tafaʻaki ʻe tahá, ko e ngaahi fili ʻe niʻihi ʻoku ʻi ai hono kaunga lahi ange. Ko e toʻutupu tokolahi ʻi he māmani ʻo e ʻaho ní kuo pau ke nau fili ʻa e ngaahi taumuʻa ke tuli ki aí. Kuo pau nai ke nau fili ʻa e faʻahinga ako ʻoku nau fiemaʻú pea mo hono lahi ʻo e akó. ʻE faifai atu pē ko e tokolahi taha ʻo kinautolú te nau fili pe te nau mali pe hokohoko taʻehoa atu. Ko e faʻahinga ko ia ʻoku nau fai ha fili ki he nofo malí kuo pau ke nau fakapapauʻi: ‘ʻOku ou taʻumotuʻa mo matuʻotuʻa feʻunga ke mali? Ko e faʻahinga hoa fēfē ʻoku ou loto ki aí, pe toe mahuʻinga angé, ko e faʻahinga hoa fēfē ʻoku ou fiemaʻú?’ Ko ʻetau fili ʻo e hoa malí ʻokú ne tākiekina lahi ʻaupito ʻetau moʻuí ʻo lahi ange ʻi ha ngaahi fili kehe lahi.

ʻI he ngaahi meʻa ʻoku mahuʻinga lahí, ʻoku mātuʻaki mahuʻinga ke fai ha ngaahi fili fakapotopoto, koeʻuhi ko e fiefiá ʻoku fakatuʻunga lahi ia ʻi heʻetau fai iá. ʻE ongoʻi nai ʻe he kakai ʻe niʻihi ʻoku nau mātuʻaki malava ke fai ha ngaahi fili pehē pea te nau siʻaki nai ʻa e tokoní ʻi he taimi ʻoku fai aí. ʻOku fakapotopoto ia? Tau sio angé.

[Maʻuʻanga ʻo e tā ʻi he peesi 3]

Napoleone: From the book The Pictorial History of the World