Fakafiemālie ki he Faingataʻaʻiá

ʻI HE taimi naʻe tofanga ai ʻa e kau tangata mo e kau fefine faitōnunga ʻi he kuohilí ʻi he faingataʻá, naʻa nau lotu fakamātoato ki he ʻOtuá ki ha tataki. Neongo ia, naʻa nau toe tamuʻomuʻa ke fakasiʻisiʻi ʻa e faingataʻá, hangē ko ia ko hono ngāueʻaki ʻa e pōtoʻí ke hao mei he kau fakafeʻātungiá. Ko e fakatātaá, ko e falala kia Sihova fakataha mo e feinga fakafoʻituituí naʻá ne ʻai ke malava ai ʻa Tēvita ʻo kātakiʻi ʻa hono tuʻunga faingataʻaʻiá. Fēfē kitautolu he ʻaho ní?

ʻI he hokosia ʻa e faingataʻá, ngalingali ʻokú ke tamuʻomuʻa ke solova ʻa hoʻo palopalemá. Hangē ko ení, kapau ʻokú ke taʻemaʻungāue, ʻikai ʻokú ke feinga ke maʻu ha ngāue feʻungamālie ʻa ia te ne tokoniʻi koe mo ho fāmilí? (1 Timote 5:8) Pe kapau ʻokú ke faingataʻaʻia ʻi ha puke fakaesino, ʻikai ʻokú ke kumi ki ha tokoni fakafaitoʻo feʻunga? ʻOku mahuʻinga ʻa hono fakahaaʻi ʻe Sīsū, ʻa ia naʻá ne maʻu ʻa e mālohi mei he ʻOtuá ke fakamoʻui ʻa e faʻahinga mahaki kotoa pē, ‘ko e tangata faitoʻó ʻoku maʻa e mahakí.’ (Mātiu 9:12) Kae kehe, ko ho ngaahi faingataʻaʻiá ʻe ʻikai nai ke toʻo maʻu pē ia; ʻe pau nai ke ke hokohoko atu ʻi ha tuʻunga ʻa hono kātakiʻi iá.

Ko e hā ʻoku ʻikai te ke ʻave ai ʻa e meʻá kia Sihova ko e ʻOtuá ʻi he lotú? Hangē ko ení, ʻi he kumi ki ha ngāué, ko e falala faʻa lotu ki he ʻOtuá ʻe tokoniʻi ai kitautolu ke talitekeʻi ha fakatauele pē ke tali ʻa e ngāue ʻa ia ʻoku fepaki mo e ngaahi tefitoʻi moʻoni ʻi he Tohi Tapú. Te tau toe fakaʻehiʻehi foki mei he hoko ʻo “he mei he tui” ʻi he mānumanú pe ko e ʻofa ki he paʻangá. (1 Timote 6:​10, PM) Ko e moʻoni, ʻi hono fai ʻa e ngaahi fili mahuʻinga fekauʻaki mo e ngāué pe ko e fāmilí pe ko e ngaahi tuʻunga moʻui leleí, ʻe lava ke tau muimui ʻi he ekinaki ʻa Tēvitá: “Li hoʻo kavenga kia Sihova, he te ne poupou koe ʻe ia: ʻe ʻikai te ne tuku ʻa e maʻoniʻoni ke ueʻia ʻo taʻengata.”—Sāme 55:22.

Ko e lotu fakamātoató te ne toe tokoniʻi kitautolu ke tauhi maʻu ʻetau mafamafatatau fakaeʻatamaí koeʻuhi ke ʻoua ʻe lōmekina kitautolu ʻe heʻetau faingataʻaʻiá. ʻI he tuʻunga ko ha Kalisitiane moʻoní, naʻe tohi ʻe he ʻapositolo ko Paulá: “ʻI he meʻa kotoa pe tuku ke ha ki he ʻOtua hoʻomou ngaahi kole, ʻi he lotu mo e hufia, pea fai mo e fakafetaʻi.” ʻI he founga fē ʻe lava ai ʻe he lotu fakamātoató ʻo fakafiemālieʻi kitautolú? “Ko e nonga ʻa e ʻOtua, ʻa ia ʻoku mamaʻo ʻi he tatae ʻa e ʻatamai kotoa pe, te ne maluʻi homou loto mo hoʻomou ngaahi fakakaukau ʻia Kalaisi Sisu.” (Filipai 4:​6, 7) Ko e nonga ʻa e ʻOtuá ʻoku “mamaʻo ʻi he tatae ʻa e ʻatamai kotoa pe.” Ko ia ai, ʻe lava ke ne fakatuʻumaʻu kitautolu ʻi he taimi ʻoku tau kavengaʻia ai ʻi he ngaahi ongo fakalotomafasiá. Te ne ‘maluʻi hotau lotó mo ʻetau ngaahi fakakaukaú,’ ʻo tokoniʻi ai kitautolu ke fakaʻehiʻehi mei he ngāue fakavave mo taʻefakapotopotó, ʻa ia ʻe lava ke fakalahi ai ʻa ʻetau faingataʻaʻiá.

ʻOku aʻu ʻo lava ke ʻai ʻe he lotú ke ʻi ai ha faikehekehe ʻi ha tuʻunga. ʻI he taimi naʻe hoko ai ʻa e ʻapositolo ko Paulá ko ha pōpula ʻi Lomá, naʻá ne kole anga-fakatōkilalo ki he kaungā Kalisitiané ke nau lotu ange maʻana. Ko e hā naʻe fai ai ʻe Paula ʻa e kole ko ení? “ʻOku ʻasili ʻeku kole ke mou fai pehe,” ko ʻene tohi ia kia kinautolú, “koeʻuhi ke vave hoku fakafoki atu kiate kimoutolu.” (Hepelu 13:19) ʻI hono toe fakalea ʻe tahá, naʻe ʻiloʻi ʻe Paula ko e fanongo ʻa Sihova ki he lotu kīvoi ʻa hono ngaahi kaungātuí te ne ʻai nai ke ʻi ai ha faikehekehe ʻi he taimi ʻe tukuange ai iá.​—Filimone 22.

ʻE hanga ʻe he lotú ʻo liliu ʻa e tuʻunga ʻe hoko ki hotau faingataʻaʻiá? ʻE malava. Neongo ia, ʻoku totonu ke tau ʻiloʻi ʻe ʻikai nai tali ʻe Sihova ko e ʻOtuá ʻetau ngaahi lotú ʻi ha founga te tau saiʻia aí. Naʻe lotu ʻa Paula ʻi he taimi lahi fekauʻaki mo hono “tolounua i he kakano,” mahalo pē ko ha palopalema fakaesino. Kae kehe, ʻi he ʻikai toʻo ʻa e faingataʻá, naʻe tala ʻe he ʻOtuá kia Paula: “Ko eku tokoni e lahi maau: he kuo fakakakato eku malohi i hoo vaivai.”—2 Kolinito 12:​7-9, PM.

Ko ia ai, ko ʻetau faingataʻaʻiá ʻe ʻikai nai ke mole vave. Kae kehe, te tau maʻu ai ʻa e faingamālie ke fakamoʻoniʻi ʻetau falala ki heʻetau Tamai fakahēvaní. (Semisi 1:​2-4) Fakapapauʻi neongo kapau ʻe ʻikai ke toʻo ʻe Sihova ko e ʻOtuá ʻa e faingataʻaʻiá, ʻe lava ke ne “ngaohi fakataha mo e ʻahiʻahi hono haoʻanga foki mei ai, koeʻuhi ke [tau] lava hono katakiʻi.” (1 Kolinito 10:13) ʻOku taau ke fakatokangaʻi ʻa hono ui ʻa Sihova ko e ‘Otua oe fiemalie kotoabe; Aia okú ne fakafiemalieʻi akitautolu i he e tau mamahi kotoabe.’ (2 Kolinito 1:​3, 4, PM) ʻE lava ke ʻomai ʻe he ʻOtuá kia kitautolu ʻa e meʻa ʻoku tau fiemaʻú ke kātaki ai, pea ʻoku tau maʻu ai ʻa e ʻamanaki ʻo e moʻui taʻengatá.

Ko e Folofola ʻa e ʻOtuá, ʻa e Tohi Tapú, ʻoku talaʻofa mai ai ko Sihová “te ne holoholo ʻa e loʻimata kotoa pe mei honau mata; pea ʻe ʻikai toe ai ha mate, pea ʻe ʻikai toe ai ha mamahi, pe ha tangi, pe ha ongosia.” (Fakahā 21:​3, 4) ʻOku ongo faingataʻa ke tui ʻe ʻi ai ha māmani ʻikai ha faingataʻaʻia? ʻE ongo pehē kapau kuó ke anga ki he moʻui fakataha mo e faingataʻá. Neongo ia, ko e tauʻatāina mei he manavaheé mo e fakatamakí ʻa e meʻa kuo talaʻofa mai ʻe he ʻOtuá, pea ko ʻene taumuʻá ʻe lavameʻa moʻoni.​—Aisea 55:​10, 11.

[Fakatātā ʻi he peesi 9]

Mei he siva ʻa e ʻamanakí ki he nonga