“Tau ʻa e Tau Lelei ʻo e Tui”

ʻE LAVA ke ke fakaʻuta atu ki ha sōtia ʻi he taimi taú ʻa ia ʻe ʻikai fiefia ia ke fakahaaʻi ange: “Te ke foki ki ʻapi ʻo fakamoleki ha taimi mo ho uaifí mo e fāmilí”?

Ko ha sōtia ʻi he taimi ʻo Tuʻi Tēvita ʻo ʻIsilelí naʻá ne maʻu ha fakahinohino pehē. Ko ʻUlaia ko e Hetí naʻe fekauʻi mai ia ʻe he tuʻí tonu ʻo fakaʻaiʻai ke ne foki ki ʻapi. Neongo ia, naʻe fakafisi ʻa ʻUlaia ke ʻalu ki hono falé. ʻI hono ʻeke ange fekauʻaki mo ʻene tōʻonga anga-kehé, naʻe tali ange ʻe ʻUlaia ko e puha ʻo e fuakavá, ʻa ia ʻokú ne fakatātaaʻi ʻa e ʻi ai ʻa e ʻOtuá, pea mo e kau tau ʻIsileli naʻa nau ʻi he malaʻe taú. “Pea,” ko ʻene ʻeké ange ia, “te u hu koā au ki hoku fale, ke kai mo inu, mo mohe mo hoku finemotuʻa?” Kia ʻUlaia, naʻe taʻetotonu eni ʻi ha taimi faingataʻa pehē.—2 Samiuela 11:​8-11.

Ko e ʻulungāanga ʻo ʻUlaiá ʻoku langaʻi hake ai ha ngaahi fehuʻi mahuʻinga, he ko kitautolú foki ʻoku tau moʻui ʻi ha taimi ʻo e tau. ʻOku lolotonga lahi fakaʻulia ha tau ʻo ʻikai tatau mo ha tau pē kuo fai ʻe he ngaahi puleʻanga ʻo e māmaní. ʻOkú ne ʻai ʻa e ongo tau ʻe ua ʻa e māmaní ke hā taʻemahuʻinga ʻi hono fakahoa ki aí, pea ʻokú ke kau ʻi he tau ko ení. Ko e ngaahi tuʻunga fakatuʻutāmakí ʻoku lahi, ʻoku ikuʻingataʻa ʻa e filí. ʻI he taú ni, ʻoku ʻikai fai ai ha ngaahi fana, ʻikai fakatooki ha ngaahi pomu, ka ʻoku ʻikai ke siʻi ai e lahi ia ʻa e palani taú.

Ki muʻa ke toʻo meʻataú, kuo pau ke ke ʻiloʻi pe ʻoku totonu fakaeʻulungāanga ia pea ko e hā ʻa e meʻa ʻokú ke faitau ki aí. ʻOku tuha ʻa e taú mo e palé? Ko e taumuʻa ʻo e tau makehe ko ení ʻoku fakamahinoʻi ia ʻe he ʻapositolo ko Paulá ʻi heʻene tohi kia Tīmote: “Tau ʻa e tau lelei ʻo e tui.” ʻIo, ʻi he taú ni kuo pau ke ke maluʻi, ʻo ʻikai ko ha kolotau, ka ko e “tui”—ʻa e fakakātoa ʻo e moʻoni faka-Kalisitiané ʻo hangē ko ia ʻoku fakahaaʻi ʻi he Tohi Tapú. ʻOku hā mahino, kuo pau ke ke tui kakato ki he “tui” ke faitau ki ai pea ikuna.—1 Timote 6:12.

Ko ha toko taha pāteʻi tau fakapotopoto ʻoku feinga mālohi ia ke ne ʻiloʻi ʻa hono filí. ʻI he taú ni, ko e filí ʻokú ne maʻu ha ngaahi taʻu ʻo e taukei ʻi he palani taú, fakataha mo e ngaahi koloa mo e meʻatau lahi fakaʻulia ke ne tukuange mai. ʻOkú ne toe mahulu hake ʻi he tangatá. ʻOkú ne fulikivanu, fakamālohi mo fakamaveuveu; ko Sētane ia. (1 Pita 5:8) Ko e ngaahi meʻatau fakakakanó pea pehē ki he kākā mo e olo fakaetangatá ʻoku taʻeʻaonga ia ki he fili ko ení. (2 Kolinito 10:4) Ko e hā ʻe lava ke ke ngāueʻaki ke kau ai he tau ko ení?

Ko e meʻatau tefitó ko e “heletā ʻa e Laumalie, ʻa ia ko e Folofola ʻa e ʻOtua.” (Efeso 6:17) ʻOku fakahaaʻi ʻe he ʻapositolo ko Paulá ʻa ʻene ʻaongá: “Ko e folofola ʻa e ʻOtua, ko e koto moʻui mo e koto malohi, pea masila ange ʻi he heleta fakatoumata fuape; ʻo ne ʻasi atu ʻo maioioʻi ʻa e loto mo e laumalie, ʻio, hono ngaahi hokonga mo e uho; pea ʻoku ne vavangaʻi ʻa e ngaahi holi mo e fakakaukau ʻo e loto.” (Hepelu 4:​12) Ko ha meʻatau mātuʻaki māsila, mātuʻaki tonu, ʻa ia ʻe lava ke hūhū atu ki he ngaahi fakakaukau ʻi loto pea mo e ngaahi taumuʻa ʻa ha tahá kuo pau ke ngāueʻaki ia ʻaki ʻa e pōtoʻi mo e tokanga.

Ngalingali ʻokú ke ʻiloʻi ʻoku maʻu nai ʻe ha kau tau ʻa e ngaahi meʻatau fakaeonopooni tahá, ka ko e ngaahi meʻatau ko iá ʻoku taʻeʻaonga ia kapau ʻoku ʻikai maʻu ʻe heʻene kau sōtiá ʻa e pōtoʻi ke ngāueʻaki kinautolú. ʻOku fiemaʻu tatau kia koe ʻa e fakahinohino ke ngāueleleiʻaki ʻa hoʻo heletaá. Ko e meʻa fakafiefiá, he ʻoku ʻi ai ʻa e faingamālie ke akoʻi koe ʻe he faʻahinga taukei taha ʻi he taú. ʻOku ui ʻe Sīsū ʻa e kau faiako tau ko ení ko ha “tamaioeiki agatonu mo boto,” ʻa ia kuo tuku ki ai ʻa e fatongia ko hono tokonaki mai ʻa e meʻakai fakalaumālie, pe fakahinohino taimi totonu, ki hono kau muimuí. (Mātiu 24:​45, PM) ʻE lava ke ke ʻiloʻi ʻa e tamaioʻeiki fakakātoa ko ení ʻaki hono sivisiviʻi ʻa ʻene akonaki tōtōiví pea mo e ngaahi fakatokanga taimi totonu fekauʻaki mo e ngaahi founga ʻa e filí. ʻOku fakahaaʻi ʻe he fakamoʻoní ko e kau mēmipa pani ia ʻe he laumālié ʻo e fakatahaʻanga Kalisitiane ʻa e Kau Fakamoʻoni ʻa Sihová.​—Fakahā 14:1.

Ko e tamaioʻeiki faʻu fetuiaki ko ení kuó ne fai ʻa e meʻa lahi ange ia ʻi he fakahinohinó. Kuó ne fakahaaʻi ʻa e laumālie ʻo e ʻapositolo ko Paulá, ʻa ia naʻá ne tohi ki he fakatahaʻanga ʻi Tesalonaiká: “Naʻa mau ʻi homou lotolotonga ʻo angalelei pe; hange tofu pe ha fefine toutama ʻa ia ʻoku ne tauhi siʻene fanau aʻana, pehe ʻi heʻemau ʻofauʻuuʻu kiate kimoutolu naʻa mau fakaʻamu ke ʻatu, ʻo ʻikai ko e Kosipeli pe ʻa e ʻOtua, ka ko siʻemau moʻui foki—kae fēfē, he ne mou hoko ko homau ʻofaʻanga.” (1 Tesalonaika 2:​7, 8) Ko e fatongia ia ʻo e sōtia Kalisitiane taki taha ke ne ngāueʻaki ʻa e akoʻi anga-ʻofa kuo tokonaki maí.

Ko e Teunga Tau Kakato

Ko ha teunga tau kakato fakaefakatātā ʻoku ʻomai ia ki ho maluʻí. ʻE lava ke ke maʻu ha lisi ʻo e teunga tau ko ení ʻi he Efeso 6:​13-​18. Ko ha sōtia tokanga ʻe ʻikai te ne fakatoʻotoʻa ke tau kapau ʻoku ʻikai ʻi ai ha konga ʻo hono teunga tau fakalaumālié pe ʻoku fiemaʻu ke fakaleleiʻi.

ʻOku fiemaʻu ʻe ha Kalisitiane ʻa e kotoa ʻo hono teunga tau maluʻí, ka ko e fuʻu pā lahi ʻo e tuí ʻoku tautefito ʻa ʻene mahuʻingá. Ko e ʻuhinga ia naʻe tohi ai ʻe Paula: “Kaeʻumaʻā kuo mou toʻo ʻa e pa [lahi] ko e tui, ʻa ia te mou lava ʻaki ke tamateʻi ʻa e ngaahi ngahau vela kotoa pe ʻa e Fili.”—Efeso 6:16.

Ko e fuʻu pā lahí, ʻa ia ʻe lava ke ne ʻufiʻufi ʻa e sinó kotoa, ʻokú ne fakatātaaʻi ʻa e tuʻunga ʻo e tuí. Kuo pau ke ke maʻu ʻa e tui mālohi ki he tataki ʻa Sihová, tali ia ʻo ʻikai ha veiveiua ʻe hoko ʻene talaʻofá kotoa. ʻOku totonu ke ke ongoʻi ʻo hangē kuo ʻosi fakahoko ʻa e ngaahi talaʻofa ko iá. ʻOua ʻe veiveiua ʻi ha mōmeniti, he ʻe vavé ni ke fakaʻauha ʻa e fokotuʻutuʻu fakaemāmani kotoa ʻa Sētané, ʻe liliu ʻa e foʻi māmaní ki ha palataisi, pea ko e kakai mateaki ki he ʻOtuá ʻe toe fakafoki ki he haohaoá.​—Aisea 33:24; 35:​1, 2; Fakahā 19:​17-​21.

Kae kehe, ʻi he tau anga kehe lolotongá, ʻokú ke fiemaʻu ʻa e meʻa lahi ange—ko ha kaumeʻa. ʻI he taimi taú, ko e ngaahi haʻi vāofi ʻo e kaumeʻá ʻoku faʻu ia ʻi he fai ʻe he kaungā taú ʻa e fakalototoʻa mo e maluʻi fakatouʻosi, pea aʻu ʻo fefakahaofiʻaki he taimi ʻe niʻihi mei he maté. Lolotonga ʻoku fakamahuʻingaʻi ʻa e feohí, ke hao ʻi he taú ni, ʻokú ke fiemaʻu ʻa e kaumeʻa ʻo ʻikai mo ha toe taha kehe ka ko Sihova tonu. Ko e ʻuhinga ia ʻoku fakaʻosiʻaki ai ʻe Paula ʻa ʻene lisi ʻo e meʻa ʻoku faʻuʻaki ʻa e teunga taú ʻa e ngaahi leá ni: “ʻI he faingamalie kotoa pe mou fai hoʻomou lotu ʻi he Laumalie.”—Efeso 6:18.

ʻOku tau saiʻia ke feohi mo ha kaumeʻa ofi. ʻOku tau kumi ʻa e taimi ke feohi ai mo ia. ʻI he talanoa tuʻumaʻu kia Sihova ʻi he lotú, ʻokú ne hoko ai ʻo moʻoni kia kitautolu, ko ha kaumeʻa falalaʻanga. ʻOku fakalototoʻaʻi kitautolu ʻe he ākonga ko Sēmisí: “ʻUnuʻunu atu ki he ʻOtua, pea ʻe ʻunuʻunu mai ia kiate kimoutolu.”—Semisi 4:8.

Ngaahi Founga ʻa e Filí

Ko e fāinga mo e māmani ko ení ʻe lava ʻi he taimi ʻe niʻihi ke hangē ia ko e luelue ʻo fou atu ʻi ha loto ʻataʻatā ʻoku tanu ai ha ngaahi maina ʻuta. ʻOku lava ke fai mai ʻa e ʻohofi mei ha tafaʻaki pē, pea ʻoku feinga ʻa e filí ke ne maʻu fakaʻohovaleʻi koe. Neongo ia, fiemālie pē he kuo tokonaki mai ʻe Sihova ʻa e maluʻi kotoa ʻokú ke fiemaʻú.​—1 Kolinito 10:13.

ʻE fai ʻe he filí ʻene fakaʻauhá ʻaki ʻene ʻohofi ʻa e ngaahi moʻoni faka-Tohitapu ʻa ia ʻoku tupu tefito ai hoʻo tuí. ʻE ngāueʻaki nai ʻe he kau tafoki mei he moʻoní ʻa e ngaahi lea momoleʻolunga, fakahekeheke, mo e fakaʻuhinga mioʻi ʻi he feinga ke ikunaʻi koé. Ka ʻoku ʻikai tokanga mai ʻa e tafoki mei he moʻoní ia ki hoʻo leleí. ʻOku pehē ʻe he Palovepi 11:9: “Ko e momoleʻolunga [tokotaha tafoki mei he moʻoní] ʻoku ne teu ʻaki hono ngutu ha luo ki hono kaungaʻapi: ka ko e ʻiloʻilo ʻa e faitotonu ʻoku ne hao ai.”

Ko ha fehālaaki ia ke fakakaukau ʻoku fiemaʻu ke ke fanongo ki he kau tafoki mei he moʻoní pe ke lau ʻenau ngaahi tohí ke fakahalaʻi ʻaki ʻenau ngaahi fakaʻuhingá. Ko ʻenau fakaʻuhinga mioʻi mo koná ʻe lava ke ne fakatupunga ha maumau fakalaumālie pea ʻe lava ke ne ʻuliʻi hoʻo tuí ʻo hangē ha kakano mate ʻoku totolo ʻo mafola vavé. (2 Timote 2:​16, 17) ʻI hono kehé, faʻifaʻitaki ki he tali ʻa e ʻOtuá ki he kau tafoki mei he moʻoní. Naʻe pehē ʻe Siope fekauʻaki mo Sihova: “Talaʻehai ʻe fie aʻu ki he ʻao ʻo e ʻAfiona ha malualoi [pe tafoki mei he moʻoní].”—Siope 13:16.

ʻE ʻahiʻahiʻi nai ʻe he filí ha founga kehe, ko ha founga kuo ʻi ai hano tuʻunga lavameʻa. Kapau ʻe lava ke tauheleʻi ha kau tau ʻoku laka ke mavahe mei he laine ʻo e laká ke tuli ki he ʻulungāanga taʻetaau taʻemataʻofí, ʻe lava ke fakatupunga ʻe he meʻá ni ʻa e maveuveu.

Ko e fakafiefia fakamāmaní, hangē ko e ngaahi filimi mo e ngaahi faiva televīsone taʻetāú mo e fasi ngatūtuú, ko ha mounu ola lelei ia. ʻOku taukaveʻi ʻe he niʻihi ʻoku lava ke nau sio ʻi he ngaahi konga taʻetāú pe lau ha tohi taʻetaau ʻo ʻikai ke uesia ai kinautolu. Ka ko ha toko taha ʻa ia naʻá ne toutou siofi ʻa e ngaahi filimi fehokotaki fakasino taʻetoefehuʻiá naʻá ne fakahaaʻi hangatonu: “ʻOku ʻikai ʻaupito ngalo ʻia koe ʻa e ngaahi konga ko iá, ko e lahi ange ʻa hoʻo fakakaukau fekauʻaki mo iá ko e lahi ange ia hoʻo ʻiloʻi ʻokú ke loto ke fai ʻa e meʻa kuó ke mamata ki aí . . . ʻOku ʻai koe ʻe he faivá ke ke fakakaukau ʻokú ke tō moʻoni mei ha meʻa.” ʻOku taau ke tau hoko ki ha fakatuʻutāmaki ʻo e hoko ʻo fakalaveaʻi ʻe he ʻohofi olopoto ko ení?

Ko e ngahau ʻe taha ʻi he tukuʻanga mahafu ʻa e filí ko e tauhele ʻo e tuli ki he meʻa fakamatelié. Ko e fakatuʻutāmakí ʻoku lava ke hoko ia ʻo faingataʻa ke ʻiloʻi koeʻuhí ʻoku tau maʻu kotoa ʻa e ngaahi fiemaʻu fakamatelie. ʻOku tau fiemaʻu ha ʻapi, meʻakai, mo e vala, pea ʻoku ʻikai hala ke maʻu ha ngaahi meʻa lelei. Ko e fakatuʻutāmakí ʻoku ʻi he anga ia ʻo ʻete fakakaukaú. ʻE lava ke hoko ʻa e paʻangá ʻo mahuʻinga ange ʻi he ngaahi meʻa fakalaumālié. ʻE lava ke tau hoko ko e kau ʻofa ki he paʻangá. ʻOku lelei ke fakamanatu kia kitautolu fekauʻaki mo e ngaahi ngataʻanga ʻo e koloá. ʻOku molengofua ia, lolotonga ia ko e koloa fakalaumālié ʻoku tuʻu ia ʻo taʻengata.​—Mātiu 6:​19, 20.

Kapau ʻoku māʻulalo ʻa e tuʻunga fakaeʻulungāanga ʻo ha kau tau, ʻoku hōloa ai ʻa e ngaahi faingamālie ke ikuná. “Naʻa ke vaivai [pe loto-siʻi] koā ʻi he ʻaho ʻo e faingataʻa, ta ʻoku fakangatangata pe ho ivi.” (Palovepi 24:10) Ko e loto-siʻí ko ha meʻatau ia ʻoku ngāueʻaki ola lelei ʻe Sētane. Ko hono tui ʻo “tatā aki ae amanaki lelei ki he fakamoui” ʻe tokoniʻi ai koe ke ke tauʻi ʻa e loto-siʻí. (1 Tesalonaika 5:​8, PM) Feinga ke tauhi ʻa hoʻo ʻamanakí ke mālohi ʻo hangē ko e ʻamanaki ko ia ʻa ʻĒpalahamé. ʻI hono kole ange ke ne foaki ʻa hono foha pē tahá, ʻa ʻAisake ʻi he feilaulaú, naʻe ʻikai toumoua ʻa ʻĒpalahame. Naʻá ne tui ʻe fakahoko ʻe he ʻOtuá ʻa ʻEne talaʻofa ke tāpuakiʻi ʻa e puleʻanga kotoa fakafou ʻi hono hakó pea ʻe lava ke fokotuʻu hake ʻe he ʻOtuá ʻa ʻAisake mei he maté kapau ʻe fiemaʻu koeʻuhi ke fakahoko ʻa e talaʻofa ko iá.​—Hepelu 11:​17-​19.

ʻOua ʻe Foʻi ʻi he Faitaú

Ko e faʻahinga kuo nau faitau mālohi ʻi ha taimi lōloá te nau hoko nai ʻo ongosia pea ko ia ai ʻoku ʻikai te nau faitau ʻaki ʻa e tokanga tatau. Ko e faʻifaʻitakiʻanga ʻa ʻUlaiá, ʻa ia naʻe lave ki ai ʻi he kamata ʻo e kupú ni, ʻe lava ke ne tokoniʻi ʻa e faʻahinga kotoa ʻoku kau ʻi he taú ke nau tauhi maʻu ʻa e vakai totonú. Ko e tokolahi ʻo hotau kaungā pāteʻi tau Kalisitiané kuo pau ke nau kātakiʻi ʻa e ngaahi faingataʻá, ʻoku fakaeʻa atu ki he ngaahi fakatuʻutāmakí, pe faingataʻaʻia ʻi he mokosiá mo e fiekaiá. ʻI he hangē ko ʻUlaiá, ʻoku ʻikai te tau loto ke fakakaukau fekauʻaki mo e fiemālie kotoa pē te tau fiefia nai ai he taimi ní pe ʻunua ki ha holi ke tataki ha moʻui fiemālie. ʻOku tau loto ke nofo ai pē ʻi he kau tau ʻa Sihova ʻi māmani lahi ʻo e kau faitau mateakí pea hokohoko atu ai pē ʻa e faitaú kae ʻoua ke tau toki lava ʻo maʻu ʻa e ngaahi tāpuaki fakaofo ʻoku tuku tauhi mai maʻa kitautolú.​—Hepelu 10:​32-​34.

ʻE fakatuʻutāmaki ke tuku ʻetau tokangá, ʻo fakakaukau nai ko e ʻohofi fakaʻosí ʻoku kei mamaʻo ia ʻi he kahaʻú. Ko e fakatātā fekauʻaki mo Tuʻi Tēvitá ʻoku fakaeʻa ai ʻa e fakatuʻutāmakí. ʻI ha ʻuhinga, naʻe ʻikai te ne ʻi heʻene kongakaú ai ʻi he taú. Ko hono olá, naʻe fakahoko ai ʻe Tēvita ʻa e angahala mamafa ʻa ia naʻe fakatupunga ai ia ke ne mamahi mo faingataʻaʻia ʻi he toenga ʻo ʻene moʻuí.​—2 Samiuela 12:​10-​14.

ʻOku taau ke kau ʻi he faitaú ni, fehangahangai mo e faingataʻa ʻo e taú, kātakiʻi ʻa e manukí, pea liʻaki ʻa e ngaahi mālie fakamāmani ʻoku ala fehuʻiá? Ko e faʻahinga ʻoku nau fakahoko lavameʻa ʻa e taú ʻoku nau loto-tatau ko e meʻa ʻoku tuʻuaki mai ʻe he māmaní ʻoku lava ke hā manakoa, hangē ha konga mētale fetapakí, ka ʻi hono sivisiviʻi ofí, ʻoku siʻi ʻa hono mahuʻingá. (Filipai 3:8) ʻIkai ngata aí, ʻoku faʻa iku ʻa e ngaahi mālie ko iá ʻo fakatupunga mamahi mo e ʻamanaki-tōnoa.

Ko e Kalisitiane ʻi he tau fakalaumālie ko ení ʻoku nau fiefia ʻi he feohi vāofi mo e ngaahi kaumeʻa moʻoní, ko ha konisēnisi maʻa, pea mo ha ʻamanaki fakaofo. Ko e kau Kalisitiane pani ʻe he laumālié ʻoku nau fakatuʻotuʻa atu ki he moʻui fakahēvani taʻefaʻamate fakataha mo Kalaisi Sīsū. (1 Kolinito 15:54) Ko e tokolahi taha ʻo e kau tau Kalisitiané ʻoku nau ʻamanaki ki he moʻui fakaetangata haohaoa ʻi ha palataisi fakaemāmani. Ko e moʻoni ko e ngaahi pale ko iá ʻoku tuha ia mo ha feilaulau pē. Pea ʻi he ʻikai tatau mo e ngaahi tau fakamāmaní, ko e ikuʻanga kia kitautolú ʻi he taú ni ʻoku papau ia kehe pē ʻoku tau faitōnunga ai pē. (Hepelu 11:1) Kae kehe, ko e ikuʻanga ki he fokotuʻutuʻu ko eni ʻi he malumalu ʻo e pule ʻa Sētané, ko e fakaʻauha fakaʻaufuli.​—2 Pita 3:​10.

ʻI hoʻo hokohoko atu ʻi he faitaú ni, manatuʻi ʻa e ngaahi lea ʻa Sīsuú: “Mou loto toʻa pe; kuo u ikuna ʻa mamani ʻe au.” (Sione 16:33) Naʻá ne ikuna ʻaki ʻene tokanga ai pē mo tauhi anga-tonu ʻi he malumalu ʻo e ʻahiʻahí. ʻE lava ke tau fai ʻa e meʻa tatau.

[Fakamatala ʻi he peesi 27]

ʻIkai fai ha ngaahi fana, ʻikai ha ngaahi fakatō pomu, ka ʻoku ʻikai siʻi ai ʻa e lahi ʻo e palani taú

[Fakamatala ʻi he peesi 30]

Ko e ikuʻanga kia kitautolú ʻi he taú ni ʻoku papau ia kehe pē ʻoku tau faitōnunga ai pē

[Fakatātā ʻi he peesi 26]

Ko e tatā ʻo e fakamoʻuí te ne tokoniʻi kitautolu ke tauʻi ʻa e loto-siʻí

Ngāueʻaki ʻa e fuʻu pā lahi ʻo e tuí ke paleʻi ʻaki ʻa e “ngaahi ngahau vela” ʻa Sētané

[Fakatātā ʻi he peesi 28]

“ʻUnuʻunu atu ki he ʻOtua, pea ʻe ʻunuʻunu mai ia kiate kimoutolu”

[Fakatātā ʻi he peesi 29]

ʻOku totonu ke tau maʻu ʻa e tui ki he fakahoko ʻo e ngaahi talaʻofa ʻa e ʻOtuá