“Fai ae Gaue oe Evagelio”
“Ke leo be akoe i he mea kotoabe, . . . fai ae gaue oe evagelio.”—2 TIMOTE 4:5, PM.
1. Ko e hā ʻa e fekau naʻe ʻoange ʻe Sīsū ki hono kau muimuí?
KO E huafa ʻo Sihová mo ʻene ngaahi taumuʻá ʻoku talaki ia ʻi he māmaní kotoa. ʻOku peheé koeʻuhi ʻoku tokanga fakamātoato ʻa e kakai fakatapui ʻa e ʻOtuá ki he fekau naʻe ʻoange ʻe Sīsū Kalaisi ki hono kau muimuí ʻi heʻene pehē: “Ke mou ō, ʻo ngaohi ʻa e ngāhi kakai kotoa pe ko ʻeku kau ako, ʻi he papitaiso kinautolu ki he Huafa ʻo e Tamai mo e ʻAlo mo e Laumalie Maʻoniʻoni, mo e akoʻi kinautolu ke tauhi ʻa e ngāhi meʻa kotoa pe kuo u tuʻutuʻuni atu.”—Mātiu 28:19, 20.
2. Ko e hā ʻa e fakahinohino naʻe maʻu ʻe he ʻovasia ko Tīmoté, pea ko e hā ʻa e founga ʻe taha ki he kau ʻovasia Kalisitiané ke fakahoko ai ʻenau ngāue fakafaifekaú?
2 Naʻe tokanga fakamātoato ʻa e kau ākonga ʻa Sīsū ʻi he ʻuluaki senitulí ki he fekau ko iá. Hangē ko ení, naʻe ekinaki ʻa e ʻapositolo ko Paulá ki hono kaungā ʻovasia Kalisitiane ko Tīmoté: “Fai ae gaue oe evagelio, fai ke kakato hoo gaue fakafaifekau.” (2 Timote 4:5, PM) ʻI he ʻahó ni, ko e founga ʻe taha ʻoku fakahoko ai ʻe ha ʻovasia ʻa ʻene ngāue fakafaifekaú ko e hoko ko ha toko taha fanongonongo faivelenga ʻo e Puleʻangá, ko e toko taha ʻa ia ʻoku kau tuʻumaʻu ʻi he malaʻe fakafaifekaú. Ko e fakatātaá, ʻoku maʻu ʻe he ʻovasia Ako Tohi ʻa e Fakatahaʻangá ʻa e monū fakafiemālie ko e takimuʻa ʻi he ngāue fakamalangá mo hono akoʻi ʻa e niʻihi kehé. Naʻe fakahoko ʻe Paula ʻa hono fatongia fakafoʻituitui ke talaki ʻa e ongoongo leleí, pea naʻá ne tokoni ke akoʻi ʻa e niʻihi kehé ki he ngāue fakafaifekaú.—Ngāue 20:20; 1 Kolinito 9:16, 17.
Kau ʻEvangeliō Faivelenga ʻo e Kuohilí
3, 4. Ko e hā ʻa e ngaahi meʻa naʻe hokosia ʻe Filipe ʻi hono tuʻunga ko ha ʻevangelioó?
3 Naʻe ʻiloa ʻa e muʻaki kau Kalisitiané ko e kau ʻevangeliō faivelenga. Vakai angé ki he toko taha ʻevangeliō ko Filipé. Ko e taha ia ʻo e “toko fitu . . . mātuʻaki fakalaumālie mo poto” naʻe fili ke ne fakahoko ʻa hono tufaki fakaʻaho taʻefilifilimānako ʻo e meʻakaí ʻi he lotolotonga ʻo e kau uitou Kalisitiane lea faka-Kalisi mo e kau lea faka-Hepelū ʻi Selusalemá. (Ngāue 6:1-6) Hili ʻa e ngata ʻa e ngāue makehe ko iá pea fakamovete holo ʻe he fakatangá ʻa e toko taha kotoa tuku kehe ʻa e kau ʻapositoló, naʻe ʻalu ai ʻa Filipe ki Samēlia. Naʻá ne talaki ai ʻa e ongoongo leleí pea naʻe fakamafeia ia ʻe he laumālie māʻoniʻoní ke ne kapusi ʻa e kau tēmenioó pea fakamoʻui ʻa e faʻahinga heké mo e mamateá. Naʻe tali ʻe he kau Samēlia tokolahi ʻa e pōpoaki ʻo e Puleʻangá pea nau papitaiso. ʻI he fanongo fekauʻaki mo ení, naʻe fekauʻi atu ai ʻe he kau ʻapositolo ʻi Selusalemá ʻa e ongo ʻapositolo ko Pita mo Sioné ki Samēlia koeʻuhi ke lava ʻo maʻu ai ʻe he kau tui toki papitaiso foʻoú ʻa e laumālie māʻoniʻoní.—Ngāue 8:4-17.
4 Naʻe hoko atu ai ʻa hono taki ʻe he laumālie ʻo e ʻOtuá ʻa Filipe ke fetaulaki mo e ʻiunoke ʻItiopeá ʻi he hala ki Kesá. Hili hono fakamatalaʻi mahino ʻe Filipe ʻa e kikite ʻa ʻAiseá, ko e tangatá ni ko e “minisitā ʻa Kanetake ko e kuini ʻo e kakai ʻItiopea” naʻá ne tui kia Sīsū Kalaisi peá ne papitaiso. (Ngāue 8:26-38) Hili iá naʻe ʻalu ʻa Filipe ki ʻAsitoti pea hoko atu leva ai ki Sesalia, ʻo “malangaʻaki ʻa e Kosipeli ʻi he ngaahi kolo ko ia kotoa” ʻi heʻene fonongá. (Ngāue 8:39, 40) Naʻá ne fokotuʻu moʻoni ai ha faʻifaʻitakiʻanga lelei ʻi hono fai ʻa e ngāue ʻa ha ʻevangeliō!
5. Ko e hā naʻe tautefito ʻa e ʻiloa ai ʻa e ngaahi ʻofefine ʻe toko fā ʻo Filipé?
5 Naʻe kei longomoʻui pē ʻa Filipe ʻi he ngāue fakafaifekaú ʻi Sesalia ʻi he taʻu nai ʻe 20 ki mui ai. ʻI he taimi naʻe nofo ai ʻa Paula mo Luke ʻi hono ʻapí, naʻe “ʻi ai hono ʻofefine ʻe toko fa, ko e kau taʻahine naʻe faʻa palofisai.” (Ngāue 21:8-10) ʻOku hā mahino naʻe akoʻi lelei fakalaumālie kinautolu, naʻa nau faivelenga ʻi he ngāue fakafaifekaú, pea aʻu ʻo nau maʻu ʻa e monū ke kau ʻi he lea palofisaí. Ko e faivelenga fakaemātuʻa ki he ngāue fakafaifekaú ʻe lava ke ʻi ai hono ola lelei ki he ngaahi foha mo e ngaahi ʻofefine he ʻaho ní, ʻi hono ueʻi kinautolu ke nau ʻai ʻa e ngāue fakaʻevangeliō faivelengá ko ʻenau ngāue ia ʻi he kotoa ʻo ʻenau moʻuí.
Kau ʻEvangeliō Faivelenga he ʻAho Ní
6. Ko e hā ʻa e lavameʻa naʻe maʻu ʻe he kau ʻevangeliō ʻi he ʻuluaki senitulí?
6 ʻI heʻene kikite lahi ʻo tuhu ki hotau ʻahó mo e taimi ʻo e ngataʻangá, naʻe talaki ai ʻe Sīsū Kalaisi: “Kuo pau ke tomuʻa fanongonongo ʻa e ongoongolelei ki he ngaahi kakai kotoa pe.” (Maake 13:10) ʻE hoko mai ʻa e ngataʻangá hili hono malangaʻi ʻa e ongoongo leleí “ki mamani katoa.” (Mātiu 24:14) ʻI hono fanongonongo ʻe Paula mo e kau ʻevangeliō kehe ʻi he ʻuluaki senitulí ʻa e ongoongo leleí, naʻe hoko ai ʻa e tokolahi ko e kau tui, pea naʻe fokotuʻu ʻa e ngaahi fakatahaʻanga ʻi he feituʻu ki he feituʻu ʻi he kotoa ʻo e ʻEmipaea Lomá. Ko e kau mātuʻa naʻe fakanofo ke nau ngāue ʻi he ngaahi fakatahaʻangá ni naʻa nau kau fakataha mo honau fanga tokouá mo e fanga tuofāfiné ʻi he ngāue fakaʻevangelioó ʻo fakalahi atu ʻa e ngāue fakamalangá ki he mamaʻó. Naʻe hokohoko atu ʻa e tupu mo e mālohi ʻa e folofola ʻa Sihová ʻi he ngaahi ʻaho ko iá, ʻo hangē tofu pē ko ia ʻi he ʻaho ní koeʻuhi ko hono fai ʻe he laui miliona ʻo e Kau Fakamoʻoni ʻa Sihová ʻa e ngāue ʻa e kau ʻevangelioó. (Ngāue 19:20) Kuó ke tuʻu ko e taha ʻo e kau fakahīkihiki fiefia ko ia ʻo Sihová?
7. Ko e hā ʻoku fai he ʻahó ni ʻe he kau fanongonongo ʻo e Puleʻangá?
7 Ko e kau fanongonongo tokolahi ʻo e Puleʻangá he ʻaho ní ʻoku nau ngāueʻaongaʻaki ʻa e ngaahi faingamālié ke fakalahi ʻenau kau ʻi he ngāue fakaʻevangelioó. Kuo hū ʻa e laui afe ki he malaʻe fakamisinalé, pea ʻoku kau ʻa e laui kilu ʻi he ngāue fakaʻevangeliō taimi-kakató ʻi he tuʻunga ko e kau tāimuʻa tuʻumaʻu mo e kau tāimuʻa tokoni. Pea ko ha ngāue lelei ē ʻoku fai ʻe he kakai tangata, kakai fefine mo e fānau ʻa ia ʻoku nau ngāue ko e kau malanga faivelenga ʻo e Puleʻangá! Ko e moʻoni, ko e kotoa ʻo e kakai ʻa Sihová ʻoku nau maʻu ʻene tāpuaki lahí ʻi heʻenau ngāue uma ki he uma kiate ia ʻi he tuʻunga ko e kau ʻevangeliō Kalisitiané.—Sefanaia 3:9.
8. Ko e hā ʻa e ngāue fakaefakaʻilonga ʻoku fai he taimi ní, pea ʻoku faí ʻe hai?
8 Kuo ʻomai ʻe he ʻOtuá ki he kau muimui pani ʻo Sīsuú ʻa e fatongia ke fanongonongo ʻa e ongoongo leleí ʻi he kotoa ʻo e māmaní. ʻOku ʻi heʻenau faʻahí ʻi he ngāue fakaʻevangeliō ko ení ʻa e tokolahi fakautuutu ʻo e “fanga sipi kehe” ʻa Kalaisí. (Sione 10:16) ʻI he fakaekikité, ʻoku fakatatau ai ʻa e ngāue fakahaofi-moʻui ko ení ki hono fakaʻilongaʻi ʻa e laʻe ʻo e faʻahinga ʻoku māpuhoi mo toʻe ʻi he ngaahi meʻa fakalielia ʻoku lolotonga hokó. Kuo vavé ni ke fakaʻauha ʻa e fulikivanú. Lolotonga iá, ko ha monū ē ko ia ke ʻave ʻa e ngaahi moʻoni fakahaofi-moʻuí ki he kau nofo ʻi he māmaní!—Isikeli 9:4-6, 11.
9. ʻE lava fēfē ke tokoniʻi ʻa e faʻahinga foʻoú ʻi he ngāue fakafaifekaú?
9 Kapau kuo tau kau ʻi he ngāue fakaʻevangelioó ʻi ha taimi, ʻoku mātuʻaki ngalingali ʻe lava ke tau fai ha meʻa ke tokoniʻi ʻa e faʻahinga foʻou ʻi he fakatahaʻangá. ʻI he taimi ʻe niʻihi, te tau malava nai ai ke ʻai kinautolu ke nau ō fakataha mo kitautolu ʻi he ngāue fakafaifekaú. Ko e faʻahinga ʻoku ngāue ko e kau mātuʻá te nau loto ke fai ʻa e meʻa kotoa te nau malavá ke langa hake fakalaumālie ai ʻa e ngaahi kaungātuí. Ko e ngaahi feinga lelei ʻa e kau ʻovasia anga-fakatōkilaló ʻoku lava ke ne fai ʻa e meʻa lahi ke tokoniʻi ʻa e niʻihi kehé ke nau hoko ko e kau ʻevangeliō faivelenga mo fua lahi.—2 Pita 1:5-8.
Faifakamoʻoni mei he Fale-ki-he-Fale
10. Ko e hā ʻa e faʻifaʻitakiʻanga naʻe fokotuʻu ʻe Kalaisi mo hono muʻaki kau muimuí ʻi he ngāue fakafaifekaú?
10 Naʻe fokotuʻu ʻe Sīsū Kalaisi ki hono kau muimuí ha faʻifaʻitakiʻanga lelei ʻaupito ʻi he tuʻunga ko ha ʻevangelioó. ʻI he fekauʻaki mo e ngāue fakafaifekau ʻa Kalaisi mo ʻene kau ʻapositoló, ʻoku fakamatala ʻa e Folofola ʻa e ʻOtuá: “Naa ne alu i he kolo moe botu kakai kotoabe, o malaga mo fakaha ae ogoogolelei oe Otua: bea nae iate ia ae toko hogofulu ma toko ua.” (Luke 8:1, PM) Fēfē ʻa e kau ʻapositoló tonu? Hili hono huaʻi hifo a e laumālie māʻoniʻoní ʻi he Penitekosi ʻo e 33 T.S., “ko e ʻaho kotoa pe, ʻi he Temipale pea ʻi ʻapi, naʻe ʻikai tuku ʻenau ako mo malangaʻaki ʻa Sisu, ko e Misaia ia.”—Ngāue 5:42.
11. Fakatatau ki he Ngāue 20:20, 21, ko e hā naʻe fai ʻe he ʻapositolo ko Paulá ʻi heʻene ngāue fakafaifekaú?
11 Koeʻuhi ko ʻene ngāue fakaʻevangeliō faivelengá, naʻe lava ai ke tala ʻe he ʻapositolo ko Paulá ki he kau mātuʻa Kalisitiane mei ʻEfesoó: “Naʻe ʻikai te u taetae ha meʻa, kau fakahā pe mo akoʻaki kiate kimoutolu ʻi he ʻao ʻo e kakai, pea ʻi he fale taki taha.” ʻI he taimi naʻe ‘akoʻaki ʻi he fale taki taha’ ʻe Paulá, naʻá ne ʻaʻahi ki he ngaahi ʻapi ʻo e ngaahi kaungālotu ʻa Sihová, ʻo fai ha ngaahi ʻaʻahi fakatauhisipi ki he kau tuí? ʻIkai, he ʻokú ne hoko atu ʻo fakamatala: “ʻO u talatalatonu ki he Siu mo e Kalisi fakatouʻosi ʻa e fakatomala ʻo tafoki ki he ʻOtua, mo e tui pikitai ki hotau ʻEiki ko Sīsū.” (Ngāue 20:20, 21) ʻI hono fakalūkufuá, ko e faʻahinga ne ʻosi fakatapui kia Sihová ʻe ʻikai te nau fiemaʻu ha fakahinohino fekauʻaki mo e “fakatomala ʻo tafoki ki he ʻOtua, mo e tui pikitai ki hotau ʻEiki ko Sīsū.” Naʻe akoʻi ʻe Paula ʻa e kau mātuʻa Kalisitiane ʻo ʻEfesoó ʻi he ngāue fakafaifekau fale-ki-he-falé lolotonga ia ʻene akoʻi ʻa e kau taʻetuí fekauʻaki mo e fakatomalá pea mo e tuí. ʻI hono fai ení naʻe faʻifaʻitaki ai ʻa Paula ki he founga naʻe fokotuʻu ʻe Sīsuú.
12, 13. ʻI he fehoanaki mo e Filipai 1:7, ko e hā kuo fai ʻe he kakai ʻa Sihová fekauʻaki mo ʻenau totonu ke malangá?
12 Ko e ngāue fakafaifekau fale-ki-he-falé ʻe lava ke hoko ia ʻo faingataʻa. Ko e fakatātaá, ʻoku ʻita ʻa e niʻihi ʻi he taimi ʻoku tau ʻalu atu ai ki honau matapaá mo e pōpoaki ʻo e Tohi Tapú. ʻOku ʻikai ko ʻetau holí ia ke fakaʻitaʻi ʻa e kakaí. Neongo ia, ko e ngāue fakafaifekau fale-ki-he-falé ʻoku Fakatohitapu, pea ko e ʻofa ki he ʻOtuá mo e kaungāʻapí ʻokú ne ueʻi kitautolu ke faifakamoʻoni ai ʻi he foungá ni. (Maake 12:28-31) Ke “taukapoʻi mo fokotuʻu fakalao” ʻetau totonu ke malanga mei he fale ki he falé, kuo tau ʻoatu ai ʻa e ngaahi keisi ki he ʻao ʻo e ngaahi fakamaauʻangá, ʻo kau ai ʻa e Fakamaauʻanga Māʻolunga ʻo e ʻIunaite Seteté. (Filipai 1:7, NW) Kuo meimei hokohoko ʻa e tala tuʻutuʻuni ʻa e fakamaauʻanga ko iá ʻo lelei kia kitautolu. ʻOku anga-maheni ʻaki ʻa e tuʻutuʻuni ko ení:
13 “Ko e tufaki nima ʻo e ngaahi tuleki fakalotú ko ha founga motuʻa ia ʻo e ngāue fakaʻevangeliō fakamisinalé—ʻo motuʻa tatau mo e hisitōlia ʻo e ngaahi mīsini pākí. Kuo hoko ia ko ha mafai mālohi ʻi he ngaahi ngaʻunu fakalotu kehekehe ʻi he kotoa ʻo e ngaahi taʻú. Ko e founga ko eni ʻo e ngāue fakaʻevangelioó ʻoku ngāueʻaki ia he ʻahó ni, ʻe he ngaahi lotu mavahe kehekehe ʻi ha tuʻunga lahi ʻa ia ko hono kau tuʻuakí ʻoku nau ʻave ʻa e Kōsipelí ki he ngaahi ʻapi ʻe laui afe pea kumi fakafou ʻi he ngaahi ʻaʻahi fakafoʻituitui ke ikunaʻi mai ai ha kau muimui ki heʻenau tuí. . . . Ko e founga ko eni ʻo e ngāue fakalotú ʻoku fakahoko ai ʻa e tuʻunga māʻolunga tatau ʻi he malumalu ʻo e ʻUluaki Fakatonutonu [ki he Konisitūtone ʻa e ʻIunaite Seteté] ʻo hangē ko ia ʻoku fai ʻi he lotú ʻi he ngaahi siasí pea mo e malanga mei he ngaahi tuʻunga malangá.”—Murdock v. Pennsylvania, 1943.
Ko e Hā ke Hokohoko Atu Ai ʻa e Malangá?
14. Ko e hā ʻe lava ke hoko ko e ola mālohi ange ʻo ʻetau ngāue fakafaifekaú?
14 ʻOku lahi ʻaupito ʻa e ngaahi ʻuhinga ke faifakamoʻoni ai mei he fale ki he falé. Ko e taimi taki taha ʻoku tau ʻaʻahi ai ki ha tokotaha-ʻapí, ʻoku tau feinga ai ke tō ha tenga ʻo e moʻoni Fakatohitapú. ʻI hono fai ʻo e ngaahi toe ʻaʻahí, ʻoku tau kumi ke fakaviviku ia. Pea ʻe lava ke hoko ai ha ola mālohi ange, he naʻe tohi ʻe Paula: “Naʻe aʻaku ʻa e to, naʻe ʻa Apolosi ʻa e fakaviviku; kae ʻa e ʻOtua ai pe ʻa e fakatupu.” (1 Kolinito 3:6) Ko ia, tau hokohoko atu ʻa e ‘toó mo e fakavivikú,’ ʻo falala ʻe hanga ʻe Sihova ʻo ‘ʻai ia ke tupu.’
15, 16. Ko e hā ʻoku tau toutou ʻaʻahi ai ki he ngaahi ʻapi ʻo e kakaí?
15 ʻOku tau fai ʻa e ngāue ʻi he tuʻunga ko e kau ʻevangelioó koeʻuhi ʻoku ʻi he tuʻunga fakatuʻutāmaki ʻetau moʻuí. ʻI he malangá ʻe lava ke tau fakahaofi ai kitautolu tonu mo e faʻahinga ʻoku fanongo mai kia kitautolú. (1 Timote 4:16) Kapau naʻa tau ʻiloʻi naʻe fakamanamanaʻi ʻa e moʻui ʻa ha toko taha, te tau fai ha kiʻi feinga ngāvaivai pē ʻe taha ke tokoniʻi ia? ʻIkai ʻaupito! Koeʻuhi ʻoku kau ki ai ʻa e fakamoʻuí, ʻoku tau fai ʻa e toutou ʻaʻahi ki he ngaahi ʻapi ʻo e kakaí. ʻOku hanganaki feliliuaki ʻa e ngaahi tuʻungá. Ko ha taha ʻoku fuʻu femoʻuekina ke fanongo ʻi he taimi ʻe tahá ʻe loto-lelei nai ia ke fanongo ki he pōpoaki ʻa e Tohi Tapú ʻi ha toe taimi ʻe taha. Ko ha mēmipa kehe ʻo e fāmilí te ne tali nai ʻa e ʻaʻahí ʻi he matapaá, pea ʻe lava ke tataki atu ia ki ha fetalanoaʻaki Fakatohitapu.
16 ʻOku ʻikai ngata pē ʻi honau ngaahi tuʻungá ka ʻoku toe lava foki ke liliu ʻa e fakakaukau ʻa e faʻahinga ʻi he ʻapí. Hangē ko ení, ko e mole fakamamahi ʻa ha taha ʻofeina ʻi he maté ʻe ueʻi nai ai ha toko taha ke fanongo ki he pōpoaki ʻo e Puleʻangá. ʻOku tau ʻamanaki ke fakafiemālieʻi ʻa e toko tahá, ʻo ʻai ia ke ne lāuʻilo ki heʻene fiemaʻu fakalaumālié, pea fakahaaʻi ʻa e founga ʻe lava ke fakalato aí.—Mātiu 5:3, 4.
17. Ko e hā ʻa e ʻuhinga tuʻu-ki-muʻa ki heʻetau ngāue fakamalangá?
17 Ko e tuʻu-ki-muʻa ʻi he lotolotonga ʻo ʻetau ngaahi ʻuhinga ki he faifakamoʻoni mei he fale ki he falé pe kau ʻi he ngaahi founga kehe ʻo e ngāue fakafaifekau faka-Kalisitiané ko e holi ke kau ʻi hono ʻai ke ʻiloa ʻa e huafa ʻo Sihová. (Ekisoto 9:16; Sāme 83:18) He fakafiemālie ē ko ia ʻi he taimi ʻoku tokoniʻi ai ʻe heʻetau ngāue fakaʻevangelioó ʻa e kau ʻofa ki he moʻoní mo e māʻoniʻoní ke nau hoko ko e kau fakahīkihiki ʻo Sihová! “ʻA e kau talavou, mo e finemui foki; ʻa e matuʻa fakataha mo e tamaiki,” ko e hiva ia ʻa e tokotaha-tohi-sāmé. “Ke nau fakamaloʻia ʻa e huafa ʻo e ʻEiki; he ko hono huafa pe ʻoku hakeakiʻi: ko hoʻóna langilangi pe ʻoku fotu ʻi he fonua mo e langi.”—Sāme 148:12, 13.
ʻAonga Fakafoʻituitui kia Kitautolu ʻa e Ngāue Fakaʻevangelioó
18. ʻOku anga-fēfē ʻetau maʻu ʻaonga mei hono fai ʻa e ngāue fakaʻevangelioó?
18 Ko hono fai ʻo e ngāue ʻa ha ʻevangelioó ʻoku ʻaonga fakafoʻituitui ia kia kitautolu ʻi he ngaahi founga kehekehe. ʻI he ʻalu mei he fale ki he fale mo e ongoongo leleí ʻoku tokoniʻi ai kitautolu ke fakatupulekina ʻa e anga-fakatōkilaló, tautefito ʻi he taimi ʻoku ʻikai ke talitali ai kitautolu ʻi ha founga anga-ʻofá. Ke hoko ko e kau ʻevangeliō ola lelei, ʻoku fiemaʻu ke tau hoko ʻo hangē ko Paulá, ʻa ia naʻá ne ‘hoko ko e meʻa kehekehe ki he kakai kehekehe, kehe ke ne fakamoʻui hanau niʻihi.’ (1 Kolinito 9:19-23) Ko e taukei ʻi he ngāue fakafaifekaú ʻokú ne tokoniʻi kitautolu ke tau hoko ʻo fakapotopoto. ʻI he falala kia Sihova pea filifili lelei ʻetau ngaahi leá, ʻe lava ke tau ngāueʻaki ai ʻa e akonaki ʻa Paulá: “Ke kelesiʻia ai pe hoʻomou lea ki ai, mo fakaifo ʻaki ha masima, ʻo mou ʻilo ʻa e anga ʻo e tali ʻoku totonu ke fai kiate kinautolu taki taha.”—Kolose 4:6.
19. ʻOku anga-fēfē hono tokoniʻi ʻa e kau ʻevangelioó ʻe he laumālie māʻoniʻoní?
19 ʻOku toe ueʻi kitautolu ʻe he ngāue fakaʻevangelioó ke falala ki he laumālie māʻoniʻoni ʻo e ʻOtuá. (Sakalaia 4:6) Ko ia ai, ʻoku hoko ai ʻa hono fuá—“ko e ʻofa, fiefia, melino, kātaki-fuoloa, anga-lelei, lelei, tui, anga-malū, mapuleʻi-kita”—ʻo hā mahino ʻi heʻetau ngāue fakafaifekaú. (Kaletia 5:22, 23, NW) ʻOkú ne laveʻi ʻetau ngaahi feangainga mo e kakaí, he ko e ʻulutukua ki he tataki ʻa e laumālié ʻoku tokoniʻi ai kitautolu ke ngāueʻi ʻa e ʻofá, ke hoko ʻo fiefia mo fakamelino, ke hoko ʻo kātaki fuoloa mo anga-lelei, ke fakahāhā ʻa e leleí mo e tuí, pea ke fakahāhā ʻa e anga-malū mo e mapuleʻi-kita lolotonga ʻa hono talaki ʻo e ongoongo leleí.
20, 21. Ko e hā ʻa e ngaahi tāpuaki mo e ngaahi ʻaonga ʻe niʻihi ʻo e hanganaki femoʻuekina ʻi he tuʻunga ko e kau ʻevangelioó?
20 Ko e toe tāpuaki ʻe taha ʻoku hoko mai kia kitautolu ʻi he tuʻunga ko e kau ʻevangelioó ko ʻetau hoko ʻo kaungāongoʻi lahi ange. ʻI he lave ʻa e kakaí ki heʻenau ngaahi palopalemá—ʻa e puké, taʻemaʻungāué, ngaahi ʻahiʻahi ʻi he fāmilí—ʻoku ʻikai te tau ngāue ai ko e kau faleʻi, ka ʻoku tau vahevahe atu ʻa e ngaahi konga Tohi Tapu fakalototoʻa mo fakafiemālie kia kinautolu. ʻOku tau tokanga fekauʻaki mo e kakai kuo fakakuihi fakalaumālie ka ʻoku hā ʻoku nau maʻu ha ʻofa ki he māʻoniʻoní. (2 Kolinito 4:4) Pea ko ha tāpuaki ē ke fai ʻa e tokoni fakalaumālie ki he faʻahinga ʻoku “hehema totonu ki he moʻui taʻengatá”!—Ngāue 13:48, NW.
21 Ko e kau tuʻumaʻu ʻi he ngāue fakaʻevangelioó ʻoku tokoniʻi ai kitautolu ke hanganaki tokangataha ʻetau fakakaukaú ki he ngaahi meʻa fakalaumālié. (Luke 11:34) ʻOku ʻaonga moʻoni ia, koeʻuhi ka ʻikai ia te tau ʻulutukua nai ki he ngaahi ʻahiʻahi ʻo e tuli ki he meʻa fakamatelié ʻa ia ʻoku mātuʻaki failahia ʻi he māmani ko ení. Naʻe ekinaki ʻa e ʻapositolo ko Sioné ki he kau Kalisitiané: “ʻOua te mou ʻofa ki mamani, ʻumaʻā ʻa e ngaahi meʻa ʻoku ʻi he mamani. Ka ʻofa ʻe ha taha ki mamani ʻoku ʻikai ʻiate ia ʻa e ʻofa ki he Tamai. He ko e meʻa katoa ʻoku ʻi mamani, ʻa e holi ʻo e kakano, mo e holi ʻo e mata, mo e ʻafungi ʻo e moʻui, ʻoku ʻikai mei he Tamai ia, ka ʻoku mei mamani. Pea ʻoku fakaʻaʻau ke mole ʻa mamani mo ʻene holi aʻana: ka ko ia ʻoku ne fai ʻa e finangalo ʻo e ʻOtua, ʻoku ne nofo maʻu ʻo taʻengata.” (1 Sione 2:15-17) Ko e hanganaki femoʻuekina ʻi he tuʻunga ko e kau ʻevangelioó fakataha mo e lahi ʻa e meʻa ke fai ʻi he ngāue ʻa e ʻEikí ʻoku tokoniʻi ai kitautolu ke ʻoua ʻe ʻofa ki he māmaní.—1 Kolinito 15:58.
Faʻoaki Koloa Fakahēvani
22, 23. (a) Ko e hā ʻa e ngaahi koloa ʻoku faʻoaki ʻe he kau ʻevangeliō Kalisitiané? (e) ʻE anga-fēfē hono tokoniʻi kitautolu ʻe he kupu hoko maí?
22 Ko e ngāue malangaʻi faivelenga ʻo e Puleʻangá ʻoku ʻomai ai ʻa e ngaahi ʻaonga tuʻuloa. Naʻe fakahaaʻi eni ʻe Sīsū ʻi heʻene pehē: “ʻOua naʻa faʻoaki koloa maʻamoutolu ʻi mamani; he ko e potu ia ʻoku keina ai ʻe he ane mo e ʻumeʻumea, pea haea ʻe he kau kaihaʻa ʻo nau kaihaʻasi: kae faʻoaki koloa maʻamoutolu ʻi langi, he ko e potu ia ʻoku ʻikai keina ai ʻe he ane mo e ʻumeʻumea, pea ʻoku ʻikai haea ʻe he kau kaihaʻa ʻo kaihaʻasi: he ko e potu ʻoku ʻi ai hoʻo koloa, ʻe ʻi ai foki mo ho loto.”—Mātiu 6:19-21.
23 ʻOfa ke tau hanganaki faʻoaki koloa ʻi hēvani, ʻo lāuʻilo ʻe ʻikai lava ke tau maʻu ha monū ʻe toe lahi ange ʻi hono fakafofongaʻi ko ia ʻa e ʻEiki Hau ko Sihová ʻi he tuʻunga ko ʻene Kau Fakamoʻoní. (Aisea 43:10-12) ʻI heʻetau fakahoko ʻetau fekau ʻi he tuʻunga ko e kau faifekau ʻa e ʻOtuá, ngalingali te tau ongoʻi ai ʻo hangē ko ha fefine Kalisitiane ʻi hono taʻu 90 tupú ʻa ia naʻá ne leaʻaki eni fekauʻaki mo ʻene moʻui fuoloa ʻi he ngāue ki he ʻOtuá: “ʻI he meʻa kotoa ko iá ʻoku ou fakamālō kia Sihova ʻi heʻene kātakiʻi au ʻi he ngaahi taʻu kotoa ko ení, pea ʻoku ou lotu tōtōivi ke ne hoko ko ʻeku Tamai ʻofá ia ʻo taʻengata.” Kapau ʻoku tau koloaʻaki tatau hotau vahaʻangatae mo e ʻOtuá, ko e moʻoni ʻoku tau loto ke fai ʻa e ngāue ʻa ha ʻevangeliō ʻi ha founga kakato. ʻE tokoniʻi kitautolu ʻe he kupu hoko maí ke tau sio ai ki he founga ʻe lava ke tau fakahoko kakato ai ʻetau ngāue fakafaifekaú.
ʻE Fēfē Haʻo Tali?
• Ko e hā ʻoku totonu ai ke tau fai ʻa e ngāue ʻa ha ʻevangelioó?
• Ko e hā ʻe lava ke ke leaʻaki fekauʻaki mo e ngāue ʻa e kau ʻevangeliō ʻi he kuohilí mo e lolotonga ní?
• Ko e hā ʻoku tau faifakamoʻoni ai mei he fale ki he falé?
• ʻOku anga-fēfē hoʻo maʻu ʻaonga fakafoʻituitui mei hono fai ʻa e ngāue ʻa ha ʻevangelioó?
[Fakatātā ʻi he peesi 10]
Ko e kau ʻevangeliō hangē ko Filipe mo hono ngaahi ʻofefiné ʻoku ʻi ai honau ngaahi hoatatau fakafiefia ʻi onopooni
[Fakatātā ʻi he peesi 14]
ʻOku anga-fēfē hoʻo maʻu ʻaonga fakafoʻituitui ʻi hoʻo vahevahe atu ʻa e ongoongo leleí ki he niʻihi kehé?