Ngaahi Fehuʻi mei he Kau Lautohí
Ko e hā naʻe hoko lolotonga ʻa e meʻa ʻoku lēkooti ʻi he Ekisoto 4:24-26, pea ko e moʻui ʻa hai naʻe ʻi he tuʻunga fakatuʻutāmakí?
Naʻe fononga ʻa Mōsese ki ʻIsipite mo hono uaifí, ʻa Sīpola mo hono ongo fohá, ʻa Kēsomi mo ʻEliesa, ʻi he taimi naʻe hoko ai ʻa e meʻa ko ení: “Pea ʻi he lolotonga ʻene fononga naʻe fakafetaulaki kiate ia ʻe Sihova ʻi he malōlōʻanga, ʻo ne fai ke tamateʻi ia. Pea toʻo ʻe Sipola ha hele maka, ʻo ne kamu ʻene tama, ʻo ne si atu ia ki hono vaʻe, ʻo ne pehe, He ko e husepaniti fakatoto koe kiate au. Pea ne tukuange ia, pea toki pehe ʻe he fefine, Ko e husepaniti fakatoto!—ko ʻene lau ki he kamu.” (Ekisoto 4:20, 24-26) Neongo ʻoku ʻuliʻulilātai ʻa e kupú ni pea ʻoku ʻikai malava ke fakapapauʻi ʻa hono ʻuhingá, ʻoku ʻomai ʻe he ngaahi Konga Tohi Tapú ha fakamaama ki he ngaahi vēsí ni.
ʻOku ʻikai ke fakahaaʻi hangatonu ʻe he fakamatalá pe ko e moʻui ʻa hai naʻe ʻi he tuʻunga fakatuʻutāmakí. Kae kehe, ʻoku lava ke tau fakamulituku totonu naʻe ʻikai ko e moʻui ia ʻa Mōsesé, he ko e toki ʻosi pē ia ʻene maʻu ha fekau fakaʻotua ke taki ʻa e kau ʻIsilelí ki tuʻa mei ʻIsipite. (Ekisoto 3:10) ʻOku hā taʻengali ke pehē ʻi heʻene fononga ke fakahoko ʻa e ngāue ko iá, naʻe fakamanamanaʻi ai ʻa e moʻui ʻa Mōsesé ʻe ha ʻāngelo ʻa e ʻOtuá. Ko ia ai, ko e moʻui ia ʻa e taha ʻo hono ongo fohá. Ko e lao naʻe ʻoange ki muʻa ai kia ʻĒpalahame fekauʻaki mo e kamú naʻe fakahaaʻi ai: “Ko e tama tangata, ʻa ia ne ʻikai kamu ʻa e kili ʻo hono ʻao, ʻio, ʻe motuhi ʻa e tokotaha ko ia mei hono kakai; kuo ne maumau ʻa e fuakava mo au.” (Senesi 17:14) ʻOku hā mai naʻe ʻikai tokanga ʻa Mōsese ke kamu ʻa hono fohá, pea ko ia ai naʻe fakamanamanaʻi ʻa e moʻui ʻa e tamasiʻí ʻe ha ʻāngelo ʻa Sihova.
Ko e vaʻe ʻo hai naʻe pā ki ai ʻi he taimi naʻe tuʻusi ai ʻe Sīpola ʻa e kili ʻo e ʻao ʻo hono fohá ʻi ha feinga ke fakatonutonu ʻa e ngaahi meʻá? Ko e ʻāngelo ia ʻa Sihova ʻa ia naʻá ne maʻu ʻa e mafai ke fakapoongi ʻa e foha taʻekamú. ʻOku ʻuhinga lelei leva, naʻe ʻai ʻe Sīpola ʻa e kili ʻo e ʻaó ke pā ki he vaʻe ʻo e ʻāngeló, ʻi hono ʻoatu ia kiate ia ko e fakamoʻoni kuó ne fai ki he fuakavá.
Ko e lea ʻa Sīpola “ko e husepaniti fakatoto koe kiate au” ko ha kupuʻi lea ngalikehe ia. Ko e hā ʻoku fakahaaʻi ʻe he leá ni fekauʻaki mo iá? ʻI heʻene fai ki he ngaahi fiemaʻu ʻo e fuakava kamú, naʻe fakahaaʻi ai ʻe Sīpola ha vahaʻangatae fakaefuakava mo Sihova. Ko e fuakava Lao naʻe fai ki mui mo e kau ʻIsilelí naʻe fakahaaʻi ai ʻi ha tuʻunga ʻo e vahaʻangatae fakaefuakavá, naʻe lava ke vakai kia Sihova ko ha husepāniti pea ko e faʻahi ʻe tahá ko ha uaifi. (Selemaia 31:32) Ko ia ai, ʻi he lea kia Sihova (fakafou ʻi heʻene fakafofonga fakaeʻāngeló) ko ha “husepaniti fakatoto,” ʻoku hā ngali naʻe fakahaaʻi ai ʻe Sīpola ʻa ʻene fakamoʻulaloa ki he ngaahi tuʻunga ʻo e fuakava ko iá. Naʻe hangē ia kuó ne tali ha tuʻunga fakaeuaifi ʻi he fuakava kamú, pea ko Sihova ko e ʻOtuá ko e husepānití. Kae kehe, koeʻuhi ko ʻene tōʻonga ʻo e talangofua taʻetoefehuʻia ki he fiemaʻu ʻa e ʻOtuá, naʻe ʻikai ke kei ʻi ha tuʻunga fakatuʻutāmaki ai ʻa e moʻui ʻa hono fohá.