Ngaahi Fehuʻi mei he Kau Lautohí

Ko e hā ʻoku pehē ai ʻe he Kau Fakamoʻoni ʻa Sihová ko e fika 144,000 naʻe lave ki ai ʻi he tohi Fakahaá ko e fika moʻoni ʻo ʻikai ke fakaefakatātaá?

Naʻe tohi ʻe he ʻapositolo ko Sioné: “Pea u fanongo ki he lau ʻo e kakai naʻe silaʻi, ko e toko taha kilu ma toko fa mano ma toko fa afe.” (Fakahā 7:4) ʻI he Tohi Tapú, ko e kupuʻi lea “kakai naʻe silaʻi” ʻoku ʻuhinga ia ki ha kulupu ʻo e faʻahinga tāutaha ʻa ia ʻoku fili mei he lotolotonga ʻo e faʻahinga ʻo e tangatá ke nau pule fakataha mo Kalaisi ʻi hēvani ki he māmani Palataisi ka hoko maí. (2 Kolinito 1:​21, 22; Fakahā 5:​9, 10; 20:6) Ko honau tokolahí, ʻa e 144,000, ʻoku mahinoʻi ia ko e fika moʻoni ʻi he ngaahi ʻuhinga ʻe niʻihi. ʻOku maʻu ʻa e ʻuhinga ʻe taha ʻi he potutohi tonu ʻo e Fakahā 7:4.

Hili hono tala ki he ʻapositolo ko Sioné ʻi he vīsone fekauʻaki mo e kulupu ʻo e faʻahinga tāutaha ʻe toko 144,000, naʻe fakahaaʻi ange ai kiate ia ha toe kulupu ʻe taha. ʻOku fakamatalaʻi ʻe Sione ʻa e kulupu hono ua ko ení ko e “fuʻu kakai lahi, ʻa ia ʻe ʻikai lava ʻe ha taha hono lau, ko ha kakai mei he puleʻanga kotoa pē, mo e ngaahi matakali, mo e ngaahi faʻahinga, mo e ngaahi lea.” Ko e fuʻu kakai lahi ko ení ʻoku ʻuhinga ia ki he faʻahinga te nau hao ʻi he “mamahi lahi” ka hoko maí, ʻa ia te ne fakaʻauha ʻa e māmani fulikivanu lolotongá.—Fakaʻītali ʻamautolu; Fakahā 7:​9, 14.

Kae kehe, fakatokangaʻi ange ʻa e faikehekehe ʻoku ʻohake ʻe Sione ʻi he vahaʻa ʻo e veesi 4 mo e 9 ʻo e Fakahā vahe 7. ʻOkú ne fakamatala ai ko e ʻuluaki kulupú, ʻa e “kakai naʻe silaʻi,” ʻoku ʻi ai honau fika pau. Kae kehe, ko e kulupu hono uá, ʻa e “fuʻu kakai lahi,” ʻoku ʻikai hanau fika pau. ʻI he fakakaukau ki aí, ʻoku ʻuhinga lelei ke vakai ai ki he fika 144,000 ko e fika moʻoni. Kapau ko e fika 144,000 naʻe fakaefakatātā pea naʻe ʻuhinga ia ki ha kulupu ʻa ia ʻoku ʻikai moʻoni hano fika pau, ʻe mole ai ʻa e mālohinga ʻo e faikehekehe ʻi he vahaʻa ʻo e ongo veesi ko iá. Ko ia ai, ʻoku fakahaaʻi mālohi ʻe he potutohí ko e fika 144,000 kuo pau ke vakai ki ai ko e fika moʻoni.

Ko e kau mataotao Tohi Tapu kehekehe, ʻi he kuohilí mo e lolotongá, naʻa nau aʻu ki he fakamulituku tatau—ʻa ia ko e fiká ʻoku moʻoni. Hangē ko ení, ʻi he fakamatala ki he Fakahā 7:​4, 9, naʻe fakamatala ʻa e faʻu tikisinale Pilitānia ko Dr. Ethelbert W. Bullinger ʻi he taʻu nai ʻe 100 kuohilí: “Ko e fakahaaʻi faingofua ia ʻo e foʻi moʻoni: ko ha fika pau ʻi he faikehekehe mei he fika taʻepau ʻi he vahe tonu pē ko iá.” (The Apocalypse or “The Day of the Lord,” peesi 282) Ki muí ni mai, ko Robert L. Thomas, Jr., ko ha palōfesa ʻo e Fuakava Foʻoú ʻi he Seminālio Master ʻi he ʻIunaite Seteté, naʻá ne tohi: “Ko e tuʻunga ki he tuʻu fakaefakatātaá ʻoku vaivai ʻa hono fakamatalaʻí.” Naʻá ne tānaki mai: “Ko ha fika pau ia [ʻi he 7:4] ʻo faikehekehe mei he fika taʻepau ʻo e 7:9. Kapau ʻoku vakai ki ai ko ha tuʻu fakaefakatātā, ʻe ʻikai ha mataʻifika ʻi he tohí ʻe lava ke vakai ki ai ʻoku fakahangatonu.”​—Revelation: An Exegetical Commentary, Voliume 1, peesi 474.

ʻOku fakakikihi ʻa e niʻihi ʻo pehē koeʻuhi ʻoku ʻi he Fakahaá ʻa e lea mātuʻaki fakaefakatātā, ko e ngaahi fika kotoa ʻoku maʻu ʻi he tohí ni, ʻo kau ai ʻa e fika 144,000, ʻoku pau pē ʻoku fakaefakatātā. (Fakahā 1:​1, 4; 2:​10) Neongo ia, ko e fakamulituku ko iá, ʻoku hā mahino ʻoku ʻikai ke tonu. Ko hono moʻoní, ʻoku ʻi he Fakahaá ʻa e ngaahi fika fakaefakatātā lahi, ka ʻoku toe kau ki ai mo e ngaahi mataʻifika moʻoni. Hangē ko ení, ʻoku lau ʻa Sione fekauʻaki mo e “hingoa ʻe hongofulu ma ua ʻo e kau Aposetolo ʻe hongofulu ma ua ʻa e Lami.” (Fakahā 21:14) ʻOku hā mahino, ko e fika 12 ʻoku lave ki ai ʻi he veesi ko ení ʻoku fakahangatonu, ʻo ʻikai fakaefakatātā. ʻIkai ko ia pē, ʻoku tohi ʻa e ʻapositolo ko Sioné ʻo fekauʻaki mo e “taʻu ʻe taha afe” ʻo e pule ʻa Kalaisí. Ko e fika ko iá ʻoku toe vakai moʻoni ki ai hangē ko ia ʻoku fakahaaʻi ʻi hono vakaiʻi lelei ʻa e Tohi Tapú.a (Fakahā 20:​3, 5-7) Ko ia ai, ke vakai moʻoni pe fakaefakatātā ki ha fika ʻi he Fakahaá ʻoku fakatuʻunga ia ʻi hono puipuituʻá mo e potutohí.

Ko e fakamulituku ko ia ko e fika 144,000 ʻoku moʻoni pea ʻoku ʻuhinga ia ki ha fika ʻo e faʻahinga tāutaha fakangatangatá, ko ha kiʻi kulupu tokosiʻi ʻi hono fakahoa mo e “fuʻu kakai lahi,” ʻoku toe fehoanakimālie ia mo e ngaahi kupu kehe ʻi he Tohi Tapú. Hangē ko ení, ki mui ʻi he vīsone naʻe maʻu ʻe he ʻapositolo ko Sioné, ʻoku fakamatalaʻi ai ʻa e toko 144,000 ko e faʻahinga “naʻe fakatau mei he kakai, ko e fuatapu.” (Fakaʻītali ʻamautolu; Fakahā 14:​1, 4) Ko e kupuʻi lea “fuatapu” ʻoku ʻuhinga iá ki ha kau fakafofonga tokosiʻi kuo fili. Pehē foki, lolotonga ʻa e ʻi māmani ʻa Sīsuú, naʻá ne lea ai fekauʻaki mo e faʻahinga ʻa ia te nau pule fakataha mo ia ʻi hono Puleʻanga fakahēvaní pea ui kinautolu ko ha “fanga sipi toko siʻi.” (Fakaʻītali ʻamautolu; Luke 12:32; 22:29) Ko e moʻoni, ko e faʻahinga mei he haʻohaʻonga ʻo e faʻahinga ʻo e tangatá ʻa ia te nau pule ʻi hēvaní ʻoku tokosiʻi ʻi hono fakahoa ki he faʻahinga ko ia ʻo e tangatá ʻa ia te nau nofoʻi ʻa e māmani Palataisi ka hoko maí.

Ko ia ai, ko e potutohi ʻo e Fakahā 7:4 mo e ngaahi fakamatala felāveʻi mo ia ʻoku maʻu ʻi ha feituʻu pē ʻi he Tohi Tapú ʻoku fakapapauʻi ai ko e fika 144,000 ʻoku ʻuhingá ko e fika moʻoni. ʻOku ʻuhinga ia ki he faʻahinga te nau pule ʻi hēvani fakataha mo Kalaisi ki ha māmani palataisi, ʻa ia ʻe fakafonu ʻaki ha fuʻu kakai fiefia ʻoku ʻikai fakapapauʻi honau tokolahí ʻa ia ʻoku nau lotu kia Sihova ko e ʻOtuá.​—Sāme 37:29.

[Fakamatala ʻi lalo]

[Fakamatala ʻi he peesi 31]

Ko e fika ʻo e kau ʻea fakahēvaní ʻoku fakangatangata ia ki he toko 144,000

[Fakatātā ʻi he peesi 31]

Ko e “fuʻu kakai lahi” ʻoku taʻefakangatangata

[Maʻuʻanga ʻo e Tā ʻi he peesi 31]

Ngaahi fetuʻu: Courtesy of Anglo-Australian Observatory, photograph by David Malin