‘Ko Ia ko Haʻamoutolú Lotu ke Pehe Ni’
ʻOkú Ke ʻiloʻi ʻa e ngaahi lea ʻo e Lotu ʻa e ʻEikí? Ko ha sīpinga lotu ia naʻe akoʻi ʻe Sīsū Kalaisi. Lolotonga ʻene Malanga ʻiloa he Moʻungá, naʻe pehē ai ʻe Sīsū: “Ko ia ke pehe ni haʻamoutolu lotu.” (Mātiu 6:9) Koeʻuhi naʻe fakafeʻiloaki mai ia ʻe Sīsū, ʻoku faʻa ui ia ko e Lotu ʻa e ʻEikí, ʻo toe ʻiloa foki ko e lotu, Ko ʻEmau Tamai.—Faka-Latina, Paternoster.
Kuo maʻuloto ʻe he laui miliona takatakai ʻi he māmaní ʻa e Lotu ʻa e ʻEikí pea toutou leaʻaki ia, ʻo fai fakaʻaho nai. ʻI he ngaahi taʻu ki mui ní, kuo lau maʻuloto ai ʻe he tokolahi ʻa e lotu ko ení ʻi he ngaahi ʻapiakó pea ʻi he ngaahi meʻa fakapuleʻangá. Ko e hā ʻoku hiki hake ai ʻo fakamāʻolungaʻi pehē ʻa e Lotu ʻa e ʻEikí?
Naʻe tohi ʻe ha teolosia Sipiliane ʻi he senituli hono tolú: “Ko e hā ʻe lava ke hoko ko ha lotu ʻe toe fakalaumālie ange ʻi he lotu ko ia naʻe ʻomai ʻe Kalaisi kia kitautolú . . . ? Ko e hā ha lotu ki he Tamaí ʻe lava ke toe moʻoni ange ʻi he lotu ko ia naʻe ʻomai kia kitautolu ʻe he ʻAló ʻa ia ko ia ʻa e Moʻoní?”—Sione 14:6.
ʻI heʻene fehuʻi mo e talí, ʻoku lāulea ai ʻa e Siasi Katolika Lomá ki he Ko ʻEmau Tamaí ko e “lotu tefito ia ʻa e Kalisitiané.” ʻOku fakahaaʻi ʻe he World Book Encyclopedia ʻa e tuʻunga mahuʻinga ʻo e lotú ni ʻi he ngaahi lotu kotoa ʻa e Puleʻanga-Haʻa-Kalisitiané, ʻo ui ia ko e taha ʻo e “ngaahi fakamatala tefito ʻa e tui faka-Kalisitiané.”
Kae kehe, kuo pau ke ʻiloʻi, ko e tokolahi ʻoku nau lau maʻuloto ʻa e Lotu ʻa e ʻEikí ʻoku ʻikai te nau mahinoʻi kakato ia. “Kapau ʻoku ʻi ai hao faʻahinga puipuituʻa faka-Kalisitiane ʻoku ngalingali ʻe malava ke ke lau vave ʻa e Lotu ʻa e ʻEikí ʻo ʻikai ha kiʻi mālōlō ke mānava,” ko e lau ia ʻa e nusipepa Kānata ko e Ottawa Citizen, “ka te ke faingataʻaʻia nai ʻi hano lau māmālie mo mahinoʻi iá.”
ʻOku mahuʻinga moʻoni ke mahinoʻi ʻetau ngaahi lotu ki he ʻOtuá? Ko e hā naʻe ʻomai ai ʻe Sīsū kia kitautolu ʻa e Lotu ʻa e ʻEikí? Ko e hā ʻene ʻuhinga kiate koé? Tau fakahanga ʻa e tokangá he taimí ni ki he ngaahi fehuʻi ko ení.