Ko e Ngaahi Lelei ʻo e Fakatupu ʻa Sihová
“E Jihova, Hono Ikai Lahi a Hoo Gaahi Gaue!”
PE ʻOKU TAU nofo ʻi he kolo ʻutá pe ʻi ha kolo lahi, ʻi ʻolunga ʻi he ngaahi moʻungá pe ʻi lalo ofi ki tahi, ʻoku takatakaiʻi kitautolu ʻe he ngaahi lelei fakaofo ʻo e fakatupú. ʻOku feʻungamālie ai, hono fakaeʻa ʻi he 2004 Calendar of Jehovah’s Witnesses ha holongā fakatātā ʻi he ʻatamaí ʻo e ngāue fakaofo ʻa Sihova ko e ʻOtuá.
Kuo tokanga maʻu pē ʻa e faʻahinga houngaʻia ʻo e tangatá ki he ngaahi ngāue ʻa e ʻOtuá. Ko e fakatātaá, fakakaukau atu kia Solomone, ʻa ia ko hono potó ‘naʻe hulu ʻi he poto ʻo haʻa Hahaké katoa.’ ʻOku pehē ʻe he Tohi Tapú: “Pea ne fakamatala ʻakau, ʻo fai mei he sita ʻoku ʻi Lepanoni, ʻo aʻu ki he isope ʻoku tuʻu ʻi he ʻa: naʻa ne fakamatala foki ʻa e fanga manu, mo e manupuna, mo e manu totolo, mo e ika.” (1 Tuʻi 4:30, 33) Ko e tamai ʻa Solomoné, ʻa Tuʻi Tēvita, naʻá ne faʻa fakalaulauloto ki he ngaahi ngāue mataotao ʻa e ʻOtuá. Naʻe ueʻi ia ke ne kalanga ki hono Tokotaha-Ngaohí: “E Jihova, hono ikai lahi a hoo gaahi gaue! kuo ke gaohi kotoabe ia i he boto: oku fonu a mamani i hoo koloa.”—Sāme 104:24, PM.a
ʻOku lelei kia kitautolu foki ke tau siofi mo ako ʻa e fakatupú. Hangē ko ení, ʻe lelei nai ke tau “tangaki ki ʻolunga [hotau] mata” ʻo ʻeke: “Ko hai kuo ne fakatupu ʻa e ngaahi meʻa ko é?” ʻĀua, ko Sihova ko e ʻOtuá ia, ʻa ia ʻokú ne maʻu ʻo “lahi hono ngaahi ivi” pea ko ia moʻoni ʻoku “tuʻu kaukaua hono ngu”!—Aisea 40:26.
ʻOku totonu ke fēfē ʻa e kaunga kia kitautolu ʻa e fakalaulauloto ki he ngaahi ngāue fakaefakatupu ʻa Sihová? ʻIkai siʻi hifo ʻi he founga ʻe tolu. ʻE lava ke ne (1) fakamanatu kia kitautolu ke koloaʻaki ʻetau moʻuí, (2) ueʻi kitautolu ke tokoniʻi ʻa e niʻihi kehé ke nau ako mei he fakatupú, pea (3) ueʻi kitautolu ke hoko ʻo ʻiloʻi mo houngaʻia kakato ange ʻi hotau Tokotaha-Fakatupú.
Ko ʻetau moʻui ʻi he tuʻunga ko e tangatá, ʻoku māʻolunga mamaʻo ange ia ʻi he “fanga manu taeʻatamai,” ʻo ne ʻai ai ke tau malava ʻo siofi pea fakamahuʻingaʻi ʻa e fakaofo ʻo e fakatupú. (2 Pita 2:12) ʻOku lava ke sio hotau matá ki he funga fonua fakaʻofoʻofá. ʻOku lava ke fanongo ʻa hotau telingá ki he ngaahi hiva mālie ʻa e fanga manupuná. Pea ko ʻetau ʻiloʻi ʻa e taimí mo e feituʻú ʻoku ʻomai ai kia kitautolu ʻa e ngaahi fakamanatu ʻa ia ʻoku hoko ko e ngaahi manatu ʻofa. Neongo ko ʻetau moʻui lolotongá ʻoku ʻikai ke haohaoa, ʻoku mahuʻinga papau ʻa e moʻuí!
ʻE lava ke fiefia ʻa e ngaahi mātuʻá ʻi he toʻoa-loto fakanatula ʻenau fānaú ʻi he fakatupú. He manako ē ko e fānaú ke maʻu ha ngaahi ngeʻesi fingota ʻi he matātahí, ke pusiakiʻi ha monumanu, ke kaka ʻi ha fuʻu ʻakau! ʻE loto ʻa e ngaahi mātuʻá ke tokoniʻi ʻenau fānaú ke nau sio ki he fehokotaki ʻi he vahaʻa ʻo e fakatupú mo e Tokotaha-Fakatupú. Ko e māluʻia mo e ʻapasia ʻoku fakatupulekina ʻe he fānaú ki he fakatupu ʻa Sihová ʻe lava ke nōfoʻi ia ʻia kinautolu ʻi he kotoa ʻo e moʻuí.—Sāme 111:2, 10.
Te tau sio nounou ʻaupito kapau naʻa tau ofo ʻi he fakatupú kae ʻikai ke houngaʻia ʻi he Tokotaha-Fakatupú. ʻOku tokoniʻi kitautolu ʻe he kikite ʻa ʻAiseá ke fakakaukauloto tautefito ki he poini tonu ko ení ʻi heʻene pehē: “ʻIkai kuo ke ʻilo? kehe, ʻikai kuo ke fanongo? ko e ʻOtua taʻengata ʻa Sihova, ʻa e Fakatupu ʻo e ngaahi ngataʻanga ʻo mamani; ʻoku ʻikai ke vaivai ia, pea ʻoku ʻikai ke ongosia, ʻoku taʻemahakulea ʻene fakakaukau.”—Aisea 40:28.
ʻIo, ʻoku ʻomai ʻi he ngaahi ngāue ʻa Sihová ʻa e fakamoʻoni ʻo hono poto taʻefakatatauá, ko hono mālohi taʻehanotataú mo ʻene ʻofa loloto kia kitautolú. ʻI heʻetau sio ki he fakaʻofoʻofa takatakai ʻia kitautolú pea ʻilo ʻa e ngaahi ʻulungāanga ʻo e Tokotaha ʻa ia naʻá ne ngaohi kotoa iá, ʻofa ke ueʻi kitautolu ke tau fakaongo atu ʻa e ngaahi lea ʻa Tēvitá: “ʻOku ʻikai ha taha ʻi haʻa ʻOtua ʻoku tatau, Atonai, mo Koe; pea ʻoku ʻikai ha ngaue ʻe tatau mo hoʻo ngaue.”—Sāme 86:8.
ʻE lava ke tau fakapapauʻi ʻe hokohoko atu ʻa e faʻahinga talangofua ʻo e tangatá ke toʻoa-loto ʻi he ngaahi ngāue fakaefakatupu ʻa Sihová. ʻI he kotoa ʻo ʻitānití, te tau maʻu ai ʻa e ngaahi faingamālie taʻehanongataʻanga ke ako lahi ange ʻo fekauʻaki mo Sihova. (Koheleti 3:11) Pea ko e lahi ange ʻetau ako fekauʻaki mo iá, ko e lahi ange ia ʻetau hoko ʻo ʻofa ki hotau Tokotaha-Fakatupú.
[Fakamatala ʻi lalo]
a Sio ki he 2004 Calendar of Jehovah’s Witnesses, Nōvema/Tīsema.
[Puha ʻi he peesi 9]
Fakahīkihiki ki he Tokotaha-Fakatupú
Ko e kau saienisi loto-houngaʻia tokolahi ʻoku nau sio ki he toʻukupu ʻo e ʻOtuá ʻi he fakatupú. ʻOku hoko hake heni ha ngaahi fakatātā:
“Ko e mahuʻinga mo e fiefia ʻi hoku tafaʻaki saienisí ʻoku hoko mai ia ʻi he ngaahi mōmeniti tefito ko ia ʻo hono ʻiloʻi ha meʻa foʻou peá u pehē hifo kiate au, ‘Ko ia ko e founga ia naʻe fai ʻe he ʻOtuá.’ Ko ʻeku taumuʻá ke mahinoʻi ha kiʻi konga ʻo e palani ʻa e ʻOtuá.”—Henry Schaefer, palōfesa kemisitulī.
“Ki he tupuʻanga ʻo e ʻUnivēsí, ʻi he fekauʻaki mo e fakalahi ʻo e ʻunivēsí, ʻoku tuku ia ki he tokotaha lautohí ke ne fakamulituku, ka ʻoku taʻekakato ʻetau fakatātaá ʻi he ʻikai Iá [ʻOtuá].”—Edward Milne, faiʻasitalōnoma Pilitānia.
“ʻOku tau ʻiloʻi ʻoku fakamatalaʻi ʻa natula ʻaki ʻa e ngaahi fika lelei taha ʻoku ala maʻú koeʻuhi naʻe fakatupu ia ʻe he ʻOtuá.”—Alexander Polyakov, tokotaha matematika Lūsia.
“ʻI heʻetau ako ʻa e ngaahi meʻa fakanatulá ʻoku tau fakakaukau ai ki he ngaahi fakakaukau ʻa e Tokotaha-Fakatupú, maheni mo ʻene ngaahi fakakaukaú, fakaʻuhingaʻi ha founga ʻoku ʻAʻana ʻo ʻikai ʻatautolu.”—Louis Agassiz, faipaiolosī ʻAmelika.
[Fakatātā ʻi he peesi 8, 9]
Fanga penikuini Gentoo, Muitolotolo ʻAnetātiká
[Fakatātā ʻi he peesi 9]
Paʻake Fakafonua Grand Teton, Wyoming, U.S.A.
[Maʻuʻanga]
Jack Hoehn/Index Stock Photography