Talanoa ki he Moʻuí

Naʻá Ma Ngāueʻaki Homa Ngaahi Tuʻunga Feliliuakí ke Faifakamoʻoni Ai ki he Ngaahi Feituʻu Mamaʻó

FAKAMATALA FAI ʻE RICARDO MALICSI

ʻI he taimi naʻe mole ai ʻeku ngāué koeʻuhi ko hoku tuʻunga tuʻu-ʻatā faka-Kalisitiané, naʻá ku kole ai mo hoku fāmilí kia Sihova ke ne tokoniʻi kimaua ʻi he palani ki homa kahaʻú. ʻI heʻema lotú, naʻá ma fakahaaʻi ai ʻema holi ke fakalahi ʻema ngāue fakafaifekaú. Taimi nounou mei ai, naʻá ma kamata ai ʻi ha fononga hikihiki holo ʻa ia naʻe ʻave ai kimaua ki he ngaahi fonua muli ʻe valu ʻi he konitinēniti ʻe ua. Ko hono olá, naʻá ma malava ai ke fakahoko ʻema ngāue fakafaifekaú ʻi he ngaahi fonua mamaʻó.

NAʻE fāʻeleʻi au ʻi he ʻOtu Motu Filipainí ʻi he 1933 ʻi ha fāmili naʻe feohi vāofi mo e Siasi Filipaini Tauʻatāiná. Ko e kau mēmipa kotoa ʻe toko 14 ʻo homau fāmilí naʻa nau kau ki he siasi ko iá. ʻI hoku taʻu 12 nai, naʻá ku kole ai ki he ʻOtuá ʻi ha lotu ke ne tataki au ki he tui moʻoní. Ko e taha ʻo ʻeku kau faiakó naʻá ne fakahū au ki ha kalasi fakalotu pea naʻá ku hoko ai ko ha Katolika līʻoa. Naʻe ʻikai ʻaupito ke u liʻaki ʻa e kofesio ʻi he Tokonakí pe ko e Misa he Sāpaté. Kae kehe, naʻe hoko māmālie mai ʻa e tui veiveiua mo e taʻefiemālie. Ko e ngaahi fehuʻi fekauʻaki mo e meʻa ʻoku hoko ki he kakaí ʻi he taimi ʻo ʻenau maté pea fekauʻaki mo e afi ʻo helí pea mo e Tolu-Tahaʻi-ʻOtuá naʻá ne fakahohaʻasi au. Ko e ngaahi tali naʻe ʻomai ʻe he kau taki lotú naʻe taʻeʻuhinga pea taʻefakafiemālie.

Maʻu ʻo e Ngaahi Tali Fakafiemālie

Lolotonga ʻa e ako he kolisí, naʻá ku kau ai ki ha kautaha ʻa ia naʻá ne ʻai au ke u kau ai ʻi he fuhú, pelepaʻangá, ifí mo e ngaahi ngāue taʻetaau kehe. ʻI he efiafi ʻe taha, naʻá ku fetaulaki ai mo e faʻē ʻa e taha ʻo hoku kaungā kalasí. Ko e taha ia ʻo e Kau Fakamoʻoni ʻa Sihová. Naʻá ku fai ange kiate ia ʻa e ngaahi fehuʻi tatau naʻá ku ʻeke ki heʻeku kau faiako fakalotú. Naʻá ne tali ʻeku ngaahi fehuʻí kotoa mei he Tohi Tapú pea naʻá ku tuipau ai ko e moʻoní ʻa e meʻa naʻá ne leaʻakí.

Naʻá ku fakatau mai ha Tohi Tapu ʻo kamata ako ai mo e Kau Fakamoʻoní. Naʻe vave ʻa ʻeku maʻu ʻa e ngaahi fakataha kotoa ʻa e Kau Fakamoʻoni ʻa Sihová. ʻI he muimui ki he faleʻi fakapotopoto ʻa e Tohi Tapú ʻo pehē “ko e ngaahi feohi koví ʻokú ne maumauʻi ʻa e ngaahi ʻulungāanga leleí” naʻá ku mavahe ai mei hoku ngaahi kaumeʻa ʻulungāanga taʻetāú. (1 Kolinito 15:​33, NW) Naʻe tokoniʻi au ʻe he meʻá ni ke fai ha fakalakalaka ʻi heʻeku ako Tohi Tapú pea iku ai ʻou fakatapui kia Sihova. Hili ʻeku papitaiso ʻi he 1951, naʻá ku ngāue ai ko ha faifekau taimi-kakato (tāimuʻa) ʻi ha taimi. ʻI Tīsema 1953 leva, naʻá ku mali ai mo Aurea Mendoza Cruz, ʻa ia naʻá ne hoko ko hoku hoa mo e kaungāngāue faitōnunga ʻi he kotoa ʻo ʻeku moʻuí ʻi he ngāue fakafaifekaú.

Ko ha Tali ki Heʻema Ngaahi Lotú

Naʻá ma loto moʻoni ke ngāue ko e ongo tāimuʻa. Kae kehe, ko ʻema holi ke tauhi kakato ange kia Sihová naʻe ʻikai ke fakahoko vave ia. Naʻa mo ia, naʻe ʻikai tuku ʻema kole kia Sihova ke ne fakaava mai ha ngaahi faingamālie ʻi heʻene ngāué. Neongo ia, naʻe faingataʻa ʻa ʻema moʻuí. Kae kehe, naʻá ma tauhi maʻu ʻi he fakakaukaú ʻema ngaahi taumuʻa fakalaumālié, pea ʻi hoku taʻu 25, naʻe fakanofo ai au ko ha sevāniti fakaefakatahaʻanga, ko e ʻovasia tauhi ʻi ha fakatahaʻanga ʻa e Kau Fakamoʻoni ʻa Sihová.

ʻI heʻeku fakalakalaka ʻi he ʻilo Fakatohitapú pea maʻu ha mahino lelei ange ki he ngaahi tefitoʻi moʻoni ʻa Sihová, naʻá ku ʻiloʻi ai naʻe maumauʻi heʻeku ngāué ʻa hoku tuʻunga fakakonisēnisi ʻi he hoko ko ha Kalisitiane tuʻu-ʻataá. (Aisea 2:​2-4) Naʻá ku fili ai ke tukuange ia. Naʻe fakamoʻoniʻi ko ha ʻahiʻahiʻi eni ʻo ʻema tuí. ʻE anga-fēfē haʻaku tokangaʻi ʻa e ngaahi fiemaʻu ʻa hoku fāmilí? Naʻá ma toe ʻunuʻunu ai kia Sihova ko e ʻOtuá ʻi he lotu. (Sāme 65:2) Naʻá ma tala ange kiate ia ʻa ʻema ngaahi hohaʻá mo e manavaheé, ka naʻá ma toe fakahaaʻi kiate ia ʻa ʻema holi ke ngāue ʻi he feituʻu ʻoku lahi ange ai ʻa e fiemaʻu ki ha kau malanga ʻo e Puleʻangá. (Filipai 4:​6, 7) Naʻe siʻi ʻa ʻema ʻiloʻi ʻa e ngaahi faingamālie kehekehe ʻe fakaava mai kia kimauá!

Kamata ʻi Heʻema Fonongá

ʻI ʻEpeleli 1965, naʻá ku tali ai ha ngāue ko ha taha tāmate afi mo e supavaisa ʻi he fakahaofi moʻuí ʻi he Malaʻevakapuna Fakavahaʻapuleʻanga Vientiane, ʻi Lāosi pea naʻá ma hiki ki ai. Naʻe ʻi ai ʻa e Kau Fakamoʻoni ʻe toko 24 ʻi he kolo ko Vientiane pea naʻá ma fiefia ʻi he ngāue fakamalanga fakataha mo e kau misinalé pea mo e fanga tokoua tokosiʻi fakalotofonuá. Ki mui ai, naʻá ku hiki ki he Malaʻevakapuna Udon Thani, ʻi Taileni. Naʻe ʻikai ha toe Kau Fakamoʻoni kehe ʻi Udon Thani. ʻI he tuʻunga ko ha fāmilí, naʻá ma fai kotoa ʻia kimaua pē ʻa e ngaahi fakataha fakauiké. Naʻá ma malanga fale ki he fale, fai ʻa e ngaahi toe ʻaʻahi pea kamata ʻa e ngaahi ako Tohi Tapu.

Naʻá ma manatuʻi ʻa e ekinaki ʻa Sīsū ki heʻene kau ākongá ʻoku totonu ke nau “fua lahi.” (Sione 15:8) Ko ia naʻá ma fakapapauʻi ke muimui ʻi heʻenau faʻifaʻitakiʻangá pea hokohoko atu ʻa hono fanongonongo ʻo e ongoongo leleí. Naʻe vave ʻema maʻu ʻa e ngaahi fuá. Naʻe tali ʻe ha taʻahine Taileni ʻa e moʻoní peá ne hoko ko homa tuofefine fakalaumālie. Naʻe tali ʻe ha ongo ʻAmelika Tokelau ʻa e moʻoní peá na hoko ʻi he faai mai ʻa e taimí ko e ongo mātuʻa Kalisitiane. Naʻe hokohoko atu ʻema malangaʻi ʻa e ongoongo leleí ʻo laka hake ʻi he taʻu ʻe hongofulu ʻi he fakatokelau ʻo Tailení. He fiefia ē ko kimaua ke ʻiloʻi ʻoku ʻi ai ha fakatahaʻanga he taimí ni ʻi Udon Thani! Ko e niʻihi ʻo e ngaahi tenga ʻo e moʻoní naʻá ma toó ʻoku kei ʻomai pē ai ʻa e ngaahi ola.

Neongo ia, ko e meʻa fakamamahí, he naʻe pau ke ma toe hiki, pea naʻá ma lotu ai ki he “ʻEiki ʻoku aʻana ʻa e taʻu” ke ne tokoniʻi kimaua ke hokohoko atu ʻema kau ʻi he ngāue fakamalangá. (Mātiu 9:38) Naʻá ma hiki ki Tehran, ko e kolomuʻa ʻo ʻIulaní. Naʻe hoko eni lolotonga ʻa e taimi ʻo e pule ʻa e Shah.

Malanga ʻi he Ngaahi Feituʻu Faingataʻá

ʻI he aʻu atu ki Tehran, naʻá ma ʻiloʻi vave ai ʻa homa fanga tokoua fakalaumālié. Naʻá ma feohi mo ha kiʻi kulupu ʻo e Kau Fakamoʻoni naʻe faʻuʻaki ʻa e ngaahi fonua kehekehe ʻe 13. Naʻe pau ke ma fai ha ngaahi feʻunuʻaki koeʻuhi ke malangaʻi ʻa e ongoongo leleí ʻi ʻIulani. Neongo naʻe ʻikai te ma hokosia ha fakafepaki fakahangatonu, naʻe pau ke ma tokanga.

Koeʻuhi ko e taimi-tēpile ngāue ʻa e faʻahinga mahuʻingaʻiá, naʻe pau ai ke ma fai ʻi he taimi ʻe niʻihi ʻa e ngaahi ako Tohi Tapú ʻi he tuʻapoó pe ki mui ai—ʻo aʻu ki he hengihengí. Neongo ia, he fiefia ē ko kimaua ke sio ki he fua ʻo e ngāue mālohi ko iá! Naʻe tali ʻe ha ngaahi fāmili Filipaini mo e Kōlea ʻa e moʻoni faka-Kalisitiané pea nau fakatapui kinautolu kia Sihova.

Ko ʻeku vāhenga-ngāue hokó naʻe ʻi Dhaka, Pengikolotesi. Naʻá ma tūʻuta ai ʻi Tīsema 1977. Ko e toe fonua eni ʻe taha ʻa ia naʻe ʻikai faingofua ke fakahoko ai ʻema ngāue fakamalangá. Kae kehe, naʻe pau maʻu pē ke ma manatuʻi kuo pau ke ma hanganaki longomoʻui. ʻI he tataki ʻa e laumālie ʻo Sihová, naʻá ma malava ai ke maʻu ʻa e ngaahi fāmili lahi ʻo e kau Kalisitiane lau peé. Ko e niʻihi ʻo kinautolu naʻa nau fieinua ki he ngaahi vai fakaivifoʻou ʻo e moʻoní ʻoku maʻu ʻi he Tohi Tapu Māʻoniʻoní. (Aisea 55:1) Ko hono olá, naʻá ma kamata ai ʻa e ngaahi ako Tohi Tapu lahi.

Naʻá ma tauhi maʻu ʻi he fakakaukaú ko e finangalo ia ʻo e ʻOtuá “ke maʻu moʻui ʻe he kakai kotoa pe.” (1 Timote 2:4) Ko e meʻa fakafiefiá, naʻe ʻikai feinga ha taha ke fakatupunga ha ngaahi palopalema kia kimaua. Ke ikuʻi ha tomuʻa fehiʻa pē, naʻá ma fakapapauʻi ke ngāueʻaki ha fakaofiofi anga-fakakaumeʻa. ʻI he hangē ko e ʻapositolo ko Paulá, naʻá ma feinga ke “hoko ko e meʻa kehekehe ki he kakai kehekehe.” (1 Kolinito 9:22) ʻI he taimi naʻe ʻeke mai ai ʻa e ʻuhinga ʻo ʻema ʻaʻahí, naʻá ma fakamatalaʻi anga-ʻofa ange pea naʻá ma ʻiloʻi ai ko e tokolahi tahá naʻa nau mātuʻaki anga-fakakaumeʻa.

Naʻá ma maʻu ʻi Dhaka ha tokotaha Fakamoʻoni fakalotofonua pea fakalototoʻaʻi ia ke ne kau fakataha mo kimaua ʻi heʻema ngaahi fakataha faka-Kalisitiané pea ki mui ai ʻi he ngāue fakamalangá. Naʻe ako leva ʻa hoku uaifí mo ha fāmili pea fakaafeʻi kinautolu ki heʻemau ngaahi fakatahá. ʻI he ʻaloʻofa ʻa Sihová, naʻe haʻu ai ʻa e fāmilí kotoa ki he moʻoní. Ki mui ai, ko ʻena ongo tamaiki fefiné naʻá na tokoni ʻi hono liliu ʻa e ʻū tohi Fakatohitapú ki he faka-Pengalí pea naʻe toe hoko ʻa e tokolahi ʻo honau ngaahi kāingá ʻo ʻiloʻi ʻa Sihova. Naʻe tali ʻe he kau ako Tohi Tapu tokolahi kehe ʻa e moʻoní. Ko e tokolahi taha ʻo kinautolú ʻoku nau ngāue he taimí ni ko e kau mātuʻa pe ko e kau tāimuʻa.

Koeʻuhi ko Dhaka ko ha kolo tokolahi ʻaupito, naʻá ma fakaafeʻi ʻa e niʻihi ʻo e ngaahi mēmipa ʻi homa fāmilí ke tokoniʻi kimaua ʻi he ngāue fakamalangá. Naʻe tali ia ʻe he niʻihi pea nau kau fakataha mo kimaua ʻi Pengikolotesi. He fiefia ē ko kimaua mo e fakamālō kia Sihova ʻi he faingamālie naʻá ma maʻu ʻi hono malangaʻi ʻa e ongoongo leleí ʻi he fonua ko iá! Mei he ngaahi kamataʻanga mātuʻaki tokosiʻi ʻo e toko taha peé, ʻoku ʻi ai he taimí ni ʻa e fakatahaʻanga ʻe ua ʻi Pengikolotesi.

ʻI Siulai 1982, naʻe pau ai ke ma hiki mei Pengikolotesi. Naʻá ma mavahe mei he fanga tokouá mo e tō loʻimata. ʻIkai fuoloa mei ai, naʻá ku maʻu ai ha ngāue ʻi he Malaʻevakapuna Fakavahaʻapuleʻanga Entebbe, ʻi ʻIukanitā, ʻa ia naʻá ma nofo ai ʻo feʻunga mo e taʻu ʻe fā mo e māhina ʻe fitu. Ko e hā te ma malava ke fai ʻi hono fakalāngilangiʻi ʻa e huafa lahi ʻo Sihová ʻi he fonua ko ení?

Tauhi kia Sihova ʻi ʻAfilika Hahake

ʻI heʻema tūʻuta ʻi he Malaʻevakapuna Fakavahaʻapuleʻanga Entebbe, naʻe haʻu ai ha fakaʻuli ʻo ʻave au mo hoku uaifí ki homa nofoʻangá. ʻI heʻema mavahe mei he malaʻevakapuná, naʻá ku kamata malanga ai ki he fakaʻulí fekauʻaki mo e Puleʻanga ʻo e ʻOtuá. Naʻá ne ʻeke mai: “Ko e taha koe ʻo e Kau Fakamoʻoni ʻa Sihová?” ʻI heʻeku tali papau angé, naʻe pehē mai ʻe he fakaʻulí: “Ko e taha ʻo homou fanga tokouá ʻoku ngāue ʻi he taua fakahinohinó.” ʻI he taimi pē ko iá, naʻá ku kole ange ai ke ne ʻave au ki ai. Naʻá ma feʻiloaki mo e tokouá, ʻa ia naʻá ne fiefia lahi ʻi he sio kia kimauá pea naʻe fai ʻa e ngaahi fokotuʻutuʻu ki he ngaahi fakatahá mo e malaʻe ngāué.

Naʻe toko 228 pē ʻa e kau malanga ʻo e Puleʻangá ʻi ʻIukanitā ʻi he taimi ko iá. Naʻá ma fakamoleki fakataha mo ha ongo tokoua ʻi Entebbe, ʻa homa ʻuluaki taʻú ʻi hono tūtuuʻi ʻa e ngaahi tenga ʻo e moʻoní. Koeʻuhi ʻoku manako lautohi ʻa e kakai ʻi aí, naʻá ma malava ai ke tufaki ha ʻū tohi lahi, ʻo kau ai ʻa e ngaahi makasini ʻe laui teau. Naʻá ma fakaafeʻi mai ʻa e fanga tokoua mei Kampala, ko e kolomuʻá, ke nau tokoni kia kimaua ʻi he malanga ʻi he feituʻu ngāue ʻi Entebbe ʻi he ngaahi fakaʻosinga uiké. ʻI heʻeku ʻuluaki malanga maʻá e kakaí, naʻe toko nima ʻa e kau maʻu fakatahá—ʻo fakatahaʻi mo au.

ʻI he taʻu ʻe tolu hoko maí, naʻá ma hokosia ai ʻa e niʻihi ʻo e ngaahi mōmeniti fakafiefia taha ʻi heʻema moʻuí, ʻi he sio ki he faʻahinga naʻá ma akoʻí naʻa nau tali pea fai ha fakalakalaka vave. (3 Sione 4) ʻI he ʻasemipilī fakasēketi ʻe taha, naʻe papitaiso ai ʻa e toko ono ʻo ʻema kau ako Tohi Tapú. Naʻe pehē ʻe he tokolahi ʻo kinautolú naʻa nau loto-toʻa ke tuli ki he ngāue taimi-kakató koeʻuhi ko ʻenau sio mai ʻokú ma ngāue ko e ongo tāimuʻá, neongo naʻá ma maʻu ʻa e ngaahi ngāue taimi-kakato fakamāmaní.

Naʻá ma ʻiloʻi ko homa feituʻu ngāueʻangá ʻe lava ke toe hoko ia ko ha feituʻu ngāue fua lahi. ʻI he taimi ʻe taha, naʻá ku fakaofiofi atu ai ki ha ʻōfisa tāmate-afi ʻi he malaʻevakapuná ʻo vahevahe kiate ia ʻa e ʻamanaki makatuʻunga Fakatohitapu ʻo e moʻui ʻi ha māmani palataisí. Naʻá ku fakahaaʻi ange kiate ia mei heʻene Tohi Tapú tonu ko e faʻahinga talangofua ʻo e tangatá te nau moʻui ʻi he melino mo e fāʻūtaha, ʻo ʻikai toe faingataʻaʻia ʻi he masivá, ʻikai ha nofoʻangá, taú, puké pe maté. (Sāme 46:9; Aisea 33:24; 65:​21, 22; Fakahā 21:​3, 4) Ko hono lau ʻa e meʻá ni ʻi heʻene Tohi Tapú tonu naʻe langaʻi ai ʻene mahuʻingaʻiá. Naʻe kamata ai pē ha ako Tohi Tapu. Naʻá ne maʻu ʻa e ngaahi fakatahá kotoa. Naʻe vave ʻa ʻene fakatapui ia kia Sihová peá ne papitaiso. Naʻá ne kau fakataha ki mui mo kimaua ʻi he ngāue fakafaifekau taimi-kakató.

Naʻe mapuna tuʻo ua hake ha taʻemanonga fakalotofonua ʻi ʻIukanitā lolotonga ʻema ʻi ʻaí, ka naʻe ʻikai taʻofi ʻe he meʻa ko iá ʻema ngaahi ngāue fakalaumālié. Ko e ngaahi fāmili ʻo e faʻahinga naʻe ngāue ki he ngaahi kautaha fakavahaʻapuleʻangá naʻa nau hiki ki Nairobi, Keniā, ʻo feʻunga mo e māhina ʻe ono. Ko e faʻahinga ʻo kimautolu naʻe toe ʻi ʻIukanitaá naʻa mau hokohoko atu ʻi heʻemau ngaahi fakataha faka-Kalisitiané pea mo e ngāue fakamalangá, neongo naʻe pau ke mau fakapotopoto mo tokanga.

ʻI ʻEpeleli 1988, naʻe kakato ai ʻeku ngāue ʻi he ngāueʻangá pea naʻá ma toe hiki. Naʻá ma mavahe mei he Fakatahaʻanga Entebbe fakataha mo ha ongoʻi ʻo e fiemālie lahi ʻi he ngaahi fakalakalaka fakalaumālie ʻi aí. ʻI Siulai 1997, naʻá ma maʻu ai ha faingamālie ke toe ʻaʻahi ki Entebbe. ʻI he taimi ko ení, naʻe ngāue ai ʻa e niʻihi ʻo ʻema kau ako Tohi Tapu ki muʻá ko e kau mātuʻa. He fiefia ē ko kimaua ke sio ki he kau maʻu fakataha ʻe toko 106 ʻi he Fakataha Maʻá e Kakaí!

Hiki ki he Feituʻu Teʻeki Ngāueʻí

Te ma malava ke hū ʻi ha ngaahi matapā foʻou ʻo e faingamālié? ʻIo, ko ʻeku ngāue hokó naʻe ʻi he Malaʻevakapuna Fakavahaʻapuleʻanga Mogadishu, ʻi Somālia. Naʻá ma fakapapauʻi ke ngāueleleiʻaki ʻa e faingamālie foʻou ko ení ke ngāue ʻi he feituʻu teʻeki ngāueʻí.

Naʻe meimei fakangatangata pē ʻema ngāue fakamalangá ki he kau ngāue he ʻōfisi ʻamipasitoá, kau ngāue Filipainí mo e kau muli kehé. Naʻá ma faʻa fetaulaki mo kinautolu ʻi he māketí. Naʻá ma toe fai ha ngaahi ʻaʻahi anga-fakakaumeʻa ki honau ngaahi ʻapí. ʻI hono fakatahaʻi ʻa e pōtoʻi, mohu fakakaukau, fakapotopoto mo e falala kakato kia Sihová, naʻá ma malava ai ke vahevahe atu ʻa e ngaahi moʻoni Fakatohitapú ki he niʻihi kehé pea naʻe ʻomai ʻe he meʻá ni ʻa e fua ʻi he lotolotonga ʻo e faʻahinga ko ia mei he ngaahi fonua kehekehé. Hili ʻa e taʻu ʻe ua, naʻá ma mavahe ai mei Mogadishu—ʻi he ki muʻa pē ke mapuna hake ai ha taú.

Naʻe vaheʻi hoko ai au ʻe he Kautaha Vakapuna Sivile Fakavahaʻapuleʻangá ki Yangon, Maienimā. Naʻe toe fakaava heni ʻa e ngaahi faingamālie lelei kia kimaua ke tokoniʻi ʻa e faʻahinga loto-totonú ke nau ako fekauʻaki mo e ngaahi taumuʻa ʻa e ʻOtuá. Hili ʻa Maienimaá, naʻe vaheʻi kimaua ki Dar es Salaam, Tenisania. Naʻe faingofua lahi ange ʻa hono malangaʻi ʻo e ongoongo leleí ʻi he fale ki he falé ʻi Dar es Salaam koeʻuhí naʻe ʻi ai ha feituʻu lea faka-Pilitānia.

ʻI he kotoa ʻo e ngaahi fonua naʻá ma ngāue aí, naʻe siʻi ʻaupito ʻema ngaahi palopalema ʻi hono fakahoko ʻema ngāue fakafaifekaú, neongo ʻi he ngaahi tuʻunga lahi, naʻe ʻi ai ʻa e ngaahi fakangatangata ʻi he ngāue ʻa e Kau Fakamoʻoni ʻa Sihová. Koeʻuhi ko e tuʻunga ʻo ʻeku ngāué, ʻa ia naʻe faʻa fekauʻaki mo e puleʻangá, pe ngaahi kautaha fakavahaʻapuleʻangá, naʻe ʻikai ke fehuʻia ʻe he kakaí ʻema ngaahi ngāué.

Ko ʻeku ngāue fakamāmaní naʻe fiemaʻu ai kiate au mo hoku uaifí ke ma nofo hikihiki holo ʻo feʻunga mo e hongofuluʻi taʻu ʻe tolu. Kae kehe, naʻá ma vakai ki heʻeku ngāué ko ha founga pē ia ʻe taha ke lavaʻi ai ha taumuʻa. Ko ʻema ʻuluaki taumuʻá ke pouaki maʻu pē ʻa e ngaahi meʻa ʻa e Puleʻanga ʻo e ʻOtuá. ʻOkú ma fakamālō kia Sihova ʻi hono tokoniʻi kimaua ke ngāueleleiʻaki ʻa homa ngaahi tuʻunga feliliuakí pea ke fiefia ʻi he monū fakaofo ko hono fakamafola atu ʻa e ongoongo leleí ki he mamaʻó.

Foki ki he Feituʻu Naʻe Kamata mei Aí

ʻI hoku taʻu 58, naʻá ku fili ai ke mālōlō tōmuʻa pea foki ki he ʻOtu Motu Filipainí. ʻI heʻema foki ki aí, naʻá ma lotu ai kia Sihova ke ne tataki ʻema laká. Naʻá ma kamata ngāue ʻi ha fakatahaʻanga ʻi he Kolo Trece Martires, ʻi he vahefonua ʻo Cavite. ʻI heʻema ʻuluaki tūʻuta aí, naʻe toko 19 pē ʻa e kau fanongonongo ʻo e Puleʻanga ʻo e ʻOtuá. Naʻe fokotuʻutuʻu ʻa e ngaahi ngāue fakamalanga fakaʻahó pea naʻe kamata ʻa e ngaahi ako Tohi Tapu lahi. Naʻe kamata ke tupu ʻa e fakatahaʻangá. ʻI he taimi ʻe taha, naʻe aʻu ai ʻa e tokolahi ʻo e kau ako Tohi Tapu ʻi ʻapi ʻa hoku uaifí ki he ngaahi ako ʻe 19 pea naʻá ku maʻu ʻa e ako ʻe 14.

Naʻe vave ʻa e hoko ʻo fuʻu siʻisiʻi ʻa e Fale Fakatahaʻangá. Naʻá ma lotu kia Sihova fekauʻaki mo e meʻá ni. Naʻe fili ha tokoua fakalaumālie mo hono uaifí ke na meʻaʻofaʻaki ha konga kelekele pea naʻe tali ʻe he ʻōfisi vaʻá ha nō ki hono langa ʻo ha Fale Fakatahaʻanga foʻou. Naʻe kaunga lahi ʻa e fale foʻoú ki he ngāue fakamalangá pea naʻe tupulaki ai ʻa e maʻu fakatahá ʻi he uike ki he uike. ʻI he lolotonga ní, ʻokú ma fononga ai ʻo laka hake he houa ʻe tahá ʻi he ʻalu mo e foki taki taha ke tokoniʻi ha fakatahaʻanga ʻe taha, ʻo e kau malanga ʻe toko 17.

Ko au mo hoku uaifí ʻokú ma koloaʻaki ʻa e monū kuó ma maʻu ʻi he ngāue ʻi he ngaahi fonua lahi kehekehe. ʻI he sio atu ki heʻema moʻui hikihiki holó, ʻokú ma ongoʻi fiemālie lahi ʻi he ʻiloʻi naʻe ngāueʻaki ia ʻi he founga lelei taha naʻe ala lavá—ke tokoniʻi ʻa e niʻihi kehé ke nau ako fekauʻaki mo Sihova!

[Mape ʻi he peesi 24, 25]

(Ki he konga tohi kuo fokotuʻú, sio ki he tohi)

ʻIULANI

ʻIUKANITĀ

SOMĀLIA

TENISANIA

PENGIKOLOTESI

MAIENIMĀ

LĀOSI

TAILENI

ʻOTU MOTU FILIPAINI

[Fakatātā ʻi he peesi 23]

Mo hoku uaifí, ʻa Aurea