ʻOkú Ke Manatuʻi?
Kuó ke houngaʻia ʻi hono lau ʻa e ngaahi ʻīsiu fakamuimui ʻo e Taua Leʻo? Sai, sio angé pe ʻe lava ke ke tali ʻa e ngaahi fehuʻi ko ení:
• Ko e hā ʻa e ʻuhinga naʻe fili ai ʻa Tīsema 25 ko ha ʻaho ia ki hono kātoangaʻi ʻo e ʻaloʻi ʻo Sīsuú?
ʻOku ʻikai ʻomai ʻe he Folofola ʻa e ʻOtuá ha ʻaho ki he ʻaloʻi ʻo Sīsuú. ʻOku pehē ʻe he Enciclopedia Hispánica: “Ko e ʻaho 25 ʻo Tīsemá ki he kātoanga ʻo e Kilisimasí ʻoku ʻikai ko e tupu ia mei ha ʻaho fakamanatu totonu, ka ʻi hono kehé, ko hono ʻai ia ke Kalisitiane ʻa e ngaahi kātoanga ʻo e puli ʻa e laʻaá he faʻahitaʻu momokó.” Naʻe kātoangaʻi ʻe he kau Loma ʻo e kuonga muʻá ʻa e hopo ʻa e laʻaá ʻi he langí he faʻahitaʻu momokó ʻaki ʻa e kātoanga kai, paati longoaʻa mo e fefakafetongiʻaki meʻaʻofa.—12/15, peesi 4-5.
• ʻOku ʻuhinga ʻa e Ngāue 7:59 naʻe lotu ʻa Sitīveni kia Sīsū?
ʻIkai. ʻOku fakahaaʻi ʻe he Tohi Tapú ko e lotú ke fai fakahangatonu pē ia kia Sihova ko e ʻOtuá. ʻI he sio kia Sīsū ʻi he vīsoné, ʻoku hā mahino naʻe ongoʻi tauʻatāina ʻa Sitīveni ke tautapa fakahangatonu kiate ia, ʻo pehē: “ʻEiki Sīsū, ke ke maʻu atu hoku laumālie.” Naʻe ʻiloʻi ʻe Sitīveni kuo ʻoange kia Sīsū ʻa e mafai ke ne fokotuʻu hake ʻa e maté. (Sione 5:27-29) Ko ia naʻe kole, pe kōlenga ʻa Sitīveni kia Sīsū ke ne maluʻi ʻa hono ivi moʻuí kae ʻoua ke aʻu ki he toetuʻú.—1/1, peesi 31.
• ʻOku anga-fēfē ʻetau ʻiloʻi ʻoku ʻikai ke tomuʻa fakapapauʻi ʻa e ikuʻanga ʻo ha taha?
Kuo ʻoange ʻe he ʻOtuá ki he tangatá ʻa e tauʻatāina ke fili, ʻa ia ʻoku ʻikai kau ai ʻa e tomuʻa fakapapauʻi ʻo e tufakangá. ʻE taʻeʻofa mo taʻetotonu kia Sihova ke ne tomuʻa fakapapauʻi ʻa e ʻalunga te tau fou aí pea tuku leva ke tau fai ha fakamatala ki heʻetau ngaahi ngāué. (Teutalonome 32:4; 1 Sione 4:8)—1/15, peesi 4-5.
• Ko e hā ʻe taʻefakanānā ai ke pehē ʻoku taʻemalava ʻa e ngaahi maná?
ʻI hono ʻiloʻi ʻoku nau maʻu ʻa e ʻilo fakakonga pē ki he ngaahi meʻa fakaofo fakasaienisi ʻoku tuʻu mei mui ʻi he ngaahi fakatupu ʻa e ʻOtuá, ʻoku fakahaaʻi ai ʻe he kau saienisi ʻe niʻihi ʻoku ʻikai kei lava ke nau fakahaaʻi papau ʻoku ʻi ai ha meʻa ʻe taʻemalava. ʻI he tuʻunga lahi tahá, ʻoku nau loto-lelei ke pehē ʻoku ngalingali ʻe taʻemalava.—2/15, peesi 5-6.
• Ko e hā naʻe tala ai ʻe Fakamaau Samisoni ki heʻene ongo mātuʻá naʻá ne fiemaʻu ha ʻofefine ʻo e kau Filisitiá ke hoko ko hono uaifí? (Fakamaau 14:2)
Naʻe fepaki mo e lao ʻa e ʻOtuá ke mali mo ha tokotaha lotu loi. (Ekisoto 34:11-16) Neongo ia, ko e fefine Filisitiá naʻe “matamataleleiʻia” ki he vakai ʻa Samisoní. Ko Samisoní naʻá ne “kumi hano ava [pe faingamālie] ke fai mo e kau Filisitia,” pea naʻe feʻungamālie ʻa e fefiné ki he taumuʻa ko iá. Naʻe poupouʻi ʻe he ʻOtuá ʻa Samisoni fakafou ʻi Hono laumālié. (Fakamaau 13:25; 14:3, 4, 6)—3/15, peesi 26.
• ʻOku totonu ke ʻoange ʻe ha Kalisitiane ki ha tokotaha ngāue fakapuleʻanga ha tipi pe ko ha faʻahinga meʻaʻofa ki heʻene ngaahi ngāué?
ʻOku hala ke fai ha totongi-fufū ki ha tokotaha ngāue fakapuleʻanga, ke ʻoange kiate ia ha meʻa mahuʻinga koeʻuhi ke ne fai ha meʻa taʻefakalao, pikoʻi ʻa e fakamaau totonú, pe fai mai ha fakafeangai filifilimānako. Ka ʻoku ʻikai ko ha totongi-fufū ke ʻoange ha tipi pe ko ha meʻaʻofa ki ha tokotaha ngāue fakapuleʻanga ʻi he taimi ʻokú ne fakahoko ai ʻa hono fatongiá pe ke maʻu ai ha ngāue fakalao pe ke fakaʻehiʻehi ai mei ha fakafeangai taʻetotonu.—4/1, peesi 29.