ʻOku ʻAonga ke Hoko ʻo Mateaki?
“ʻOKÚ KE totongi ʻo fuʻu lahi ki he maluʻi moʻuileleí,” ko e lea ia ʻa Kalí, ko ha fakafofonga maluʻi.a “Kapau te ke liliu ki heʻeku kautahá, te ke fakahū ai ha euro ʻe 15 ʻi he māhina, ʻa ia ko ha fuʻu meʻa lahi ia.”
“ʻE moʻoni nai ia,” ko e tali ia ʻa Sení. “Ka kuó u fakahū ʻeku paʻanga maluʻi moʻuileleí ʻi he kautaha tatau ʻi ha ngaahi taʻu lahi. Naʻa nau tokoni lahi ʻaupito ʻi he kuohilí, pea ʻoku ou fiemaʻu ke u nofoʻaki mateaki kia kinautolu.”
“Ko e mateakí ko ha ʻulungāanga lelei ia,” ko e tali ia ʻa Kalí. “Kae kehe, ko e hoko ʻo mateakí te ke fakamole lahi ai e paʻangá!”
Naʻe moʻoni ʻa Kali. Ko e hoko ʻo mateaki, pe faitōnunga ki ha tokotaha kehé, ʻoku faʻa fakamole nai ai ʻa e paʻanga.b ʻOku toe fiemaʻu foki ai ʻa e tukupā ʻo e taimí, iví mo e ongoʻí. ʻOku ʻaonga ai ʻa e mateakí?
Lahi Ange Hono Vikiʻí ʻi Hono Ngāueʻakí
ʻI ha savea naʻe fakahoko ʻi Siamane ʻe he Kautaha Allensbach Fakatotolo Fakakaukaú, ko e peseti ʻe 96 ʻo e faʻahinga naʻa nau talí ne nau vakai ki he faitōnungá ko ha ʻulungāanga fakamānako ia. Ko ha savea Allensbach hono ua naʻe fakahoko ʻi he lotolotonga ʻo e faʻahinga taʻu 18 ki he 24 naʻe fakahaaʻi ai ko e toko 2 ʻi he kau tali ʻe toko 3 naʻa nau fakakaukau ki he faitōnungá ʻoku manakoa, ʻa ia, naʻa nau vakai pau ki ai.
Neongo ko e mateakí, pe faitōnungá, ʻoku vikiʻi lahi ia, ʻoku kehe ʻa e ngaahi meʻá ia ʻi heʻene haʻu ki he hoko moʻoni ʻo mateakí, pe hoko ʻo faitōnungá. Ko e fakatātaá, ʻi he ngaahi fonua ʻIulope lahi, ko e ngaahi hoa malí pe ngaahi mēmipa ʻi he fāmilí ʻoku nau faʻa fefakahāhāʻaki ʻa e mateaki siʻisiʻi. ʻOku faʻa taʻefemateakiʻaki ʻa e ngaahi kaungāmeʻá. Pea ko e mateaki ko ia naʻá ne haʻi vāofi ʻi he ngaahi taimi ʻo e kuohilí ʻa e pule ngāué mo e tokotaha ngāué pe ko ha pisinisi mo ʻene kau kasitomaá kuo ʻosi puli atu pē ia. Ko e hā hono ʻuhingá?
ʻI he taimi ʻe niʻihi ko e tuʻunga femoʻuekina ʻo e moʻuí ʻokú ne tuku mai ʻa e taimi pe mālohi fakaeongo siʻisiʻi ki he ngaahi tukupā ʻoku fiemaʻu ai ʻa e mateakí. Ko e kakai kuo nau loto-mamahi ʻi he ngaahi vā fakaetangatá ʻoku nau toumoua nai he taimí ni mei he hoko ʻo faitōnunga ki ha taha pē. ʻE fili nai ʻa e niʻihi kehé ia ki ha faʻahinga moʻui ko e ʻi-heni-he-ʻahó-ni-pea-mole-ʻapongipongí ʻa ia ʻoku ʻikai fiemaʻu ai ʻa e mateakí.
Pe ko e hā pē ʻa e ʻuhingá, ko e mateakí ko ha ʻulungāanga lelei ia ʻoku faʻa lahi ange hono vikiʻí ʻi hono ngāueʻakí. Ko ia ai, ko e ngaahi fehuʻí leva: ʻOku ʻaonga ke hoko ʻo mateaki? Kapau ko ia, ko hai ʻoku tau moʻuaʻaki ke mateaki ki aí, pea ʻi he ngaahi founga fē? Ko e hā ʻa e ngaahi ʻaonga ʻo e hoko ʻo mateakí?
[Fakamatala ʻi lalo]
a Kuo liliu ʻa e ngaahi hingoa ʻe niʻihi ʻi he kupu ko ení mo e kupu hoko maí.
b Lolotonga ko e “mateaki” mo e “faitōnunga” ʻoku ʻikai ngāueʻaki maʻu pē ʻi he potutohi tatau, ʻoku ngāueʻaki fetongitongi kinaua he taimi ʻe niʻihi ʻi he ongo kupu ko ení.
[Fakamatala ʻi he peesi 3]
Ko e mateakí ko ha ʻulungāanga lelei ia ʻoku faʻa lahi ange hono vikiʻí ʻi hono ngāueʻakí