Ngaahi Fehuʻi mei he Kau Lautohí
ʻE lava ke tauhi maʻu ʻe ha Kalisitiane ha konisēnisi lelei kapau ʻokú ne tali ha ngāue ʻa ia ʻoku kau ki ai ha toʻo meʻatau?
Ko e Kau Fakamoʻoni ʻa Sihová ʻi he māmaní kotoa ʻoku nau fakakaukau fakamātoato ki honau fatongia kuo ʻoange ʻe he ʻOtuá ke tokonaki fakamatelie maʻa honau ngaahi fāmilí. (1 Timote 5:8) Kae kehe, ko e ngaahi founga ngāue ʻe niʻihi ʻoku maumauʻi mahino ai ʻa e ngaahi tefitoʻi moʻoni Fakatohitapú pea ʻoku totonu ke fakaʻehiʻehi mei ai. ʻOku kau heni ʻa e ngāue ʻoku fekauʻaki mo e pelepaʻangá, ko e ngāuehalaʻaki ʻo e totó pea mo hono poupouʻi ʻa hono ngāueʻaki ʻo e tapaká. (Aisea 65:11; Ngāue 15:29; 2 Kolinito 6:19 [2Ko 7:1, PM]; Kolose 3:5) Ko e ngaahi faʻahinga ngāue kehé, neongo ʻoku ʻikai ke fakahalaiaʻi fakahangatonu ia ʻi he Tohi Tapú, ʻe lava ke ne maumauʻi ʻa hoto konisēnisí pe ko e konisēnisi ʻo e niʻihi kehé.
Ko e kau ʻi he ngāue fakamāmani ʻoku fiemaʻu ki ai ʻa hono toʻo ha meʻafana pe ko ha meʻatau kehé ko ha fili fakafoʻituitui ia. Kae kehe, ko e ngāue ʻoku toʻo meʻataú ʻoku fakaeʻa atu ai kita ke malava ai ʻo te halaia ʻi he toto kapau ʻe fiemaʻu ke ngāueʻaki ʻa ʻete meʻataú. Ko ia ai, ʻoku fiemaʻu ki ha Kalisitiane ke ne fakakaukau ʻi he lotu pe ʻokú ne loto-lelei ke tali ʻa e kavenga ʻo hono fai ha fili fakavavevave ʻi he meʻa ʻoku kau ki ai ʻa e moʻui ʻa e tangatá. Ko e toʻo meʻataú ʻoku toe fakaeʻa atu ai ha taha ki he fakatuʻutāmaki ʻo e lavea pe mate mei hano ʻohofi pe ko ha sāuni.
ʻE uesia nai foki ʻa e niʻihi kehé ʻi heʻete filí. Hangē ko ení, ko e fatongia tefito ʻo ha Kalisitiane ko hono malangaʻi ʻa e ongoongo lelei ʻo e Puleʻanga ʻo e ʻOtuá. (Mātiu 24:14) ʻE malava ke akoʻi ʻa e niʻihi kehé ke “nofo melino pe mo e kakai kotoa pe,” lolotonga iá ʻi he taimi tatau ʻokú ke ngāue ke maʻu ʻa e meʻa ki he moʻuí mei he toʻo meʻataú? (Loma 12:18) Fēfē ʻa e fānaú pe ko e ngaahi mēmipa kehe ʻi he fāmilí? ʻE ʻai ke ʻi ha tuʻunga fakatuʻutāmaki ai ʻa ʻenau moʻuí ʻi he ʻi ai ha meʻafana ʻi he falé? ʻIkai ngata aí, ʻe lava ke tūkia ʻa e niʻihi kehé ʻi he anga ʻo ʻete tuʻú ʻi he meʻá ni?—Filipai 1:10.
ʻI he “kuonga fakamui” ko ení, ʻoku tokolahi ange ʻa e kakai ʻa ia ʻoku ‘angafakamanu, ʻo ʻikai ha ʻofa ki he leleí.’ (2 Timote 3:1, 3) ʻI hono ʻiloʻi ení, ʻe lava ke kei “ʻikai ha lau” ki ha tokotaha kapau ʻokú ne fili ha ngāue toʻo meʻatau ʻa ia te ne fepaki nai ai mo e faʻahinga peheé? (1 Timote 3:10) ʻIkai ʻaupito. ʻI he ʻuhingá ni, ʻe ʻikai ke vakai ʻa e fakatahaʻangá ki ha tokotaha pehē ʻoku “taehalaia” kapau ʻokú ne hokohoko atu ʻa e toʻo meʻataú hili hono fai ki ai ha akonaki Fakatohitapu anga-ʻofa. (1 Timote 3:2, PM; Taitusi 1:5, 6) Ko ia ai, ko ha tangata pe fefine pehē ʻe ʻikai ke taau ia ki ha ngaahi monū makehe ʻi he fakatahaʻangá.
Naʻe fakapapauʻi ʻe Sīsū ki heʻene kau ākongá kapau te nau fakamuʻomuʻa ʻa e ngaahi meʻa ʻo e Puleʻangá ʻi heʻenau moʻuí, ʻoku ʻikai fiemaʻu ke nau tokanga tōtuʻa fekauʻaki mo hono maʻu ʻa e ngaahi meʻa ʻoku fiemaʻu ki he moʻuí. (Mātiu 6:25, 33) Ko e moʻoni, kapau ʻoku tau tuku ʻetau falala kakató ʻia Sihova, ʻe “poupou [kitautolu] ʻe ia: ʻe ʻikai te ne tuku ʻa e maʻoniʻoni ke ueʻia ʻo taʻengata.”—Sāme 55:22.