ʻĀmaketone—Ko ha Ngataʻanga Fakatuʻutāmaki?
ʻĀMAKETONE! ʻOku ʻomai ʻe he foʻi leá ni ha ngaahi ʻīmisi ʻo e fakaʻauha tavale pe ko ha vela lahi fakaeʻuniveesi? ʻOku ʻi ai ha ngaahi kupuʻi lea siʻi ʻi he Tohi Tapú kuo hoko ko ha konga lahi ia ʻo e fetalanoaʻaki fakaʻahó ʻi he ngaahi konga lahi ʻo e māmaní ʻo hangē ko e foʻi lea “ʻĀmaketone.” Kuo ngāueʻaki lahi ʻa e foʻi leá ke ne fakamatalaʻi ʻa e ngaahi ʻamanaki pōpōʻuli ʻoku fehangahangai mo e faʻahinga ʻo e tangatá. Kuo hanga ʻe he ngaahi meʻa ki he fakafiefiá ʻo fafanga ʻa e fakakaukauloto ʻa e kakaí ʻaki ʻa e ngaahi ʻata fakalilifu ʻo ha “ʻĀmaketone” ʻoku tuʻunuku mai. ʻOku fakaʻuliʻulilātaiʻi ʻa e foʻi leá ʻi he tuʻunga misiteli mo e ngaahi fakakaukau hala. Neongo ko e ngaahi fakakaukau ki hono ʻuhingá ʻoku lahi fau, ko e lahi taha ʻo kinautolú ʻoku ʻikai ke fehoanaki ia mo e meʻa ʻoku hanga ʻe he Tohi Tapú—ko e tupuʻanga ʻo e foʻi leá—ʻo akoʻi mai fekauʻaki mo ʻĀmaketoné.
Koeʻuhi ʻoku fakafekauʻaki ʻe he Tohi Tapú ʻa ʻĀmaketone mo e “gataaga o mamani,” ʻikai te ke loto-tatau ʻoku mātuʻaki mahuʻinga ke maʻu ha mahino lelei ki he meʻa ʻoku ʻuhinga moʻoni ki ai ʻa e foʻi leá? (Mātiu 24:3, PM) Pea ʻikai ʻe ʻuhinga lelei ke hanga ki he matavai fakaʻaufuli ʻo e moʻoní, ʻa e Folofola ʻa e ʻOtuá, ke maʻu ʻa e ngaahi tali fekauʻaki mo e natula ʻo ʻĀmaketoné pea mo e anga ʻene ʻuhinga kiate koe mo ho fāmilí?
Ko ha sivisiviʻi pehē te ne fakahaaʻi mai ʻi he ʻikai ko hano fakahoko mai ha ngataʻanga fakatuʻutāmakí, ʻe fakahoko mai ʻe ʻĀmaketone ha kamataʻanga fiefia ki he kakai ko ia ʻoku nau holi ke moʻui mo lakalakaimonū ʻi ha māmani foʻou māʻoniʻoní. ʻE fakapaleʻi koe ʻaki ha mahino lelei fekauʻaki mo e moʻoni Fakatohitapu mātuʻaki mahuʻinga ko ʻení ʻi hoʻo fakakaukau atu ki he lāulea ki he ʻuhinga moʻoni ʻo ʻĀmaketoné ʻi he kupu hoko maí.
[Puha/Fakatātā ʻi he peesi 3]
ʻOKÚ KE FAKAKAUKAU ATU KO E HĀ ʻA ʻĀMAKETONE?
• Ko ha fakaʻauha fakatokolahi fakaniukilia
• Ko ha fakatamaki fakaeʻātakai
• Ko ha fepaki ʻa ha naunau fakalangi pea mo e foʻi māmaní
• Fakaʻauha fakaʻotua ʻo e fulikivanú