Kau ʻĀngeló—Ko Hai Kinautolu

ʻOKU ʻikai meimei lava ke tui ha tuʻi ʻo ha ʻemipaea mālohi ki ha meʻa ʻokú ne mamata ki ai. ʻOku fakahaofi ha kau tangata ʻe toko tolu mei he matapā ʻo e maté ʻa ia naʻe tuʻutuʻuniʻi ke tutu ʻi ha fōnise afi! Ko hai kuó ne fakahaofi kinautolú? Naʻe folofola tonu ʻa e tuʻí ki he toko tolu ko ia naʻe fakahaofí: “Ke maloʻia muʻa ʻa [homou ʻOtuá], ʻa ia kuo ne fekau ʻene angelo, ʻo fakahaofi ʻene kau tamaioʻeiki naʻe falala kiate ia.” (Taniela 3:​28) Ko e pule Pāpilone ko eni laka hake he mileniume ʻe ua he kuohilí ko ha fakamoʻoni sio tonu ia ʻi ha fakahaofi fakaeʻāngelo. Ko e laui miliona ʻo e kakai he kuohilí ne nau tui ki he kau ʻāngeló. Ko e tokolahi he ʻahó ni ʻoku ʻikai ngata pē heʻenau tui ʻoku ʻi ai ʻa e kau ʻāngeló ka ʻoku nau toe ongoʻi ʻoku uesia ʻenau moʻuí tonu ʻi ha founga ʻe he kau ʻāngeló. Ko hai ʻa e kau ʻāngeló, pea ko e hā ʻa honau tupuʻangá?

Fakatatau ki he Tohi Tapú, ko e kau ʻāngeló ko e ngaahi laumālie, hangē pē ko e ʻOtuá tonu ko ha Laumālie. (Sāme 104:4; Sione 4:​24) ʻOku tokolahi ʻaupito ʻa e fāmili fakaeʻāngeló, ʻa ia ʻoku aʻu honau tokolahí ki he laui milioná. (Fakahā 5:​11) Pea ko e kotoa ʻo kinautolú ʻoku ‘lahi honau malohí.’ (Sāme 103:​20, PM) Neongo ʻoku hangē ʻa e kau ʻāngeló ko e tangatá ʻo ʻi ai honau ʻulungāanga pea ʻoku foaki ange kia kinautolu ʻa e tauʻatāina ke fai ha fili, naʻe ʻikai te nau ʻuluaki moʻui maí ko ha tangata. Ko hono moʻoní, naʻe fuoloa pē hono fakatupu ʻe he ʻOtuá ia ʻa e kau ʻāngeló ki muʻa ke ʻi ai ʻa e faʻahinga ʻo e tangatá​—naʻa mo e ki muʻa ke fakatupu ʻa e palanite ko Māmaní. ʻI he taimi naʻe “tanupou [ai] ʻa mamani” ʻe he ʻOtuá, ko e lau ia ʻa e Tohi Tapú, “naʻe hiva fakataha ai ʻa e ngaahi fetuʻu pongipongi [kau ʻāngeló], pea hiki mavava kotoa pe ʻa e ngaahi foha ʻo e ʻOtua.” (Siope 38:​4, 7) Koeʻuhi ko e kau ʻāngeló ko e fakatupu ʻa e ʻOtuá, ʻoku ui kinautolu ko e ngaahi foha ʻo e ʻOtuá.

Ko e hā ʻa e taumuʻa naʻe fakatupu ai ʻe he ʻOtuá ʻa e kau ʻāngeló? Ko e hā ʻa e fatongia kuo fakahoko ʻe he kau ʻāngeló, kapau ʻoku ʻi ai, ʻi he hisitōlia ʻo e tangatá? ʻOku nau uesia nai ʻa ʻetau moʻuí he ʻahó ni? Koeʻuhi ʻoku nau maʻu ʻa e tuʻunga ʻo e tauʻatāina ke fai ha filí, kuo muimui nai ha taha pē ʻo e kau ʻāngeló ʻi he ʻalunga ʻo Sētane ko e Tēvoló pea nau ʻai ai kinautolu ko e ngaahi fili ʻo e ʻOtuá? ʻOku tokonaki mai ʻe he Tohi Tapú ʻa e ngaahi tali moʻoni ki he ngaahi fehuʻí ni.