“ʻOku Totonu Pe ke Fai ki he Pule ʻa e ʻOtua ʻi he Pule ʻa e Tangata”

‘Ko Iaá Kuó Ne Hoko ko Hoku Fakamoʻuiʻanga’

NAʻE fehangahangai ʻa e kakai ʻa Sihová mo ha fili ke fai. Te nau fai ki he ngaahi fiemaʻu ʻa e pule anga-taʻefakaʻotua ʻo ʻIsipite motuʻá? Pe te nau talangofua kia Sihova ko e ʻOtuá, ʻo mavahe mei he feituʻu ko ia ʻo e nofo pōpulá pea maʻu ʻa e Fonua ʻo e Talaʻofá?

Koeʻuhi naʻe fakafisi ʻa Felo fakafetau ʻo ʻIsipité ke tukuange ʻa e kakai ʻa Sihová, naʻe tuku atu ai ʻe he ʻOtuá ʻa e Mala ʻe Hongofulu ki he fonuá. He fakahāhā moʻoni ē ʻe he meʻá ni ʻa hono mālohí! Ko e ngaahi ʻotua ʻo e kau ʻIsipité naʻe ʻikai lava ke nau fai ha meʻa ke taʻofiʻaki ʻa e ngaahi tā ko iá.

ʻI hono tala kia Felo ke tukuange ke ʻalu ʻa e kakai ʻa e ʻOtuá, naʻá ne lea manuki: “Ko hai ʻa Sihova ke u tokanga ai ki heʻene lea, ʻo tuku atu ʻa Isileli? ʻOku ʻikai te u ʻilo ʻa Sihova, pea ʻe ʻikai foki te u tuku atu ʻa Isileli.” (Ekisoto 5:2) Ko hono olá, naʻe hokosia ai ʻe ʻIsipite ʻa e ngaahi tā ko ení: (1) naʻe liliu ʻa e vaí ko e toto, (2) fanga poto, (3) fanga namu, (4) fanga lango lalahi, (5) tō ʻa e mahaki fakaʻauha ki he fanga manú, (6) hangatāmakia ʻa e tangatá mo e fanga manú, (7) ʻuha maka, (8) fanga heʻe, (9) fakapoʻuli, mo e (10) mate ʻa e ʻuluaki fānau ʻa ʻIsipité, ʻo kau ai ʻa e foha ʻo Feló. Naʻe iku ai ʻo tukuange ʻe Felo ke ʻalu ʻa e kau Hepeluú. Naʻe aʻu ʻo ne uki ke nau mavahe!​—Ekisoto 12:​31, 32.

Ko e kakai ʻe toko tolu miliona nai​—ko e kau tangata ʻIsileli, kakai fefine mo e fānau pea pehē ki ha fuʻu kakai kehe​—naʻa nau mavahe fakavavé. (Ekisoto 12:​37, 38) Kae kehe, naʻe vave ʻa e tulimui atu ʻa Felo mo ʻene fuʻu kau tau ikuʻingataʻá kiate kinautolu. Naʻe hā ngali fihia ʻa e kau ʻIsilelí ʻi he vahaʻa ʻo e Tahi Kulokulá, ko ha toafa fakatupu mate pea mo e ngaahi kongakau ʻa Feló. Neongo ia, naʻe tala ʻe Mōsese ki he kakaí: “Oua ʻe manavahe; mou tuʻu pe ʻo mamata ki he fakamoʻui ʻa Sihova.”​—Ekisoto 14:​8-​14.

Naʻe vaheʻi fakaemana ʻe Sihova ʻa e ngaahi vai ʻo e Tahi Kulokulá ke hola ai ʻa ʻIsileli. Ka ʻi he muimui atu ʻa e kau ʻIsipité, naʻe ʻai ʻe he ʻOtuá ke foki mai ʻa e ngaahi vaí. “Ko e ngaahi saliote ʻa Felo mo ʻene hosite kuo ne tolo [ʻe Sihova] ki tahi.” (Ekisoto 14:​26-​28; 15:4) Ko e fakafisi ke fakalāngilangiʻi ʻa Sihová kuo taki atu ai ki he ngataʻanga fakalilifu ʻo e loto-hīkisia ko Feló.

ʻI he Tahi Kulokulá, naʻe fakamoʻoniʻi ai ʻa Sihova “ko e pateʻitau.” (Ekisoto 15:3) “Pea vakai ʻe Isileli ʻa e ngaue lahi kuo fai ʻe Sihova ki he kau Isipite,” ko e lau ia ʻa e fakamatala fakamānavaʻí, “pea naʻe ʻapasia ʻa e kakai kia Sihova, pea naʻa nau tui kia Sihova.” (Ekisoto 14:31; Sāme 136:​10-​15) Naʻa nau fakahāhā ʻenau houngaʻia loto-moʻoni ki he ʻOtuá ʻi he kau fakataha ʻa e kau tangatá mo Mōsese ʻi ha hiva ʻo e ikuna pea ko hono tuofefiné, ʻa Meliame, naʻá ne taki ʻa e kakai fefiné ʻi he hulá.a

Hokohoko Atu ʻa Sihova ko ha Faifakahaofi

Ko e kau sevāniti ʻa Sihova ʻi onopōní ʻoku lava ke nau maʻu ha ngaahi lēsoni fakatuimālohi mei he ngāue tuʻu-ki-muʻa ko ia ʻo e fakahaofi fakaʻotuá. Ko e lēsoni ʻe taha ai ko Sihová ʻokú ne maʻu ʻa e mālohi taʻefakangatangata pea ʻe lava ke ne poupou kakato ki hono kakaí. ʻI heʻenau foʻi hiva ikuná, naʻe hiva fiefia ai ʻa Mōsese mo e kau ʻIsilelí: “Ko ho nima toʻomataʻu, ʻe Sihova, kuo ongoongo ia ʻi he ivi lahi: ko ho nima toʻomataʻu, ʻe Sihova, ʻoku ne laiki ʻa e fili ke lailai.”​—Ekisoto 15:6.

Ko e toe lēsoni ʻe taha aí ko e Māfimafi-Aoniú ʻokú ne holi lahi ke maluʻi ʻa hono kakaí. Naʻe hiva ʻa e kau ʻIsilelí: “Ko hoku malohinga mo ʻeku taʻanga ʻa Iaa; pea kuo ne hoko ko hoku fakamoʻuiʻanga. Ko hoku ʻOtua eni, pea te u fakamaloʻia.” Ko ha toe lēsoni ʻe taha ai heʻikai lava ke fakafepakiʻi lavameʻa ʻe ha taha ʻa e finangalo ʻo Sihova ko e ʻOtuá. ʻI heʻenau hiva fiefiá, naʻe hiva ai ʻa e kakai ʻa e ʻOtuá ʻa ia naʻe fakahaofí: “Ko hai ʻi he ngaahi ʻOtua ʻoku tatau mo koe, ʻe Sihova? Ko hai ʻoku tatau mo koe, ko e langilangiʻia ʻi he maʻoniʻoni, ko e manavaheʻia ʻi he fakamalo, ko e fai meʻa fakaofo?”​—Ekisoto 15:​2, 11.

ʻI he hangē ko Felo ʻo ʻIsipite ʻi he kuonga muʻá, ko e kau pule ʻo e māmaní ʻi he ʻaho ní ʻoku nau fakatangaʻi ʻa e kakai ʻa Sihová. Ko e kau taki hīkisiá ʻoku lava ke nau “lea fielahi ki he Fugani Maoluga, bea . . . fakaogojia ae kakai maonioni oe Fugani Maoluga.” (Taniela 7:​25, PM; 11:36) Ka ʻoku fakapapauʻi ʻe Sihova ki hono kakaí: “ʻIlonga ha mahafu ʻoku faʻu ke fai ʻaki ha kovi kiate koe, ʻe ʻikai siaʻa; pea ʻilonga ha ʻelelo ʻoku hopo mo koe ʻi he fakamaau, te ke fakahalaia. Ko e ʻinasi eni ʻo e kau tamaioʻeiki ʻa Sihova.”​—Aisea 54:17.

Ko e kau fakafepaki ki he finangalo ʻo e ʻOtuá ʻe ʻikai te nau lavameʻa, ʻo hangē tofu pē ko e ʻikai lavameʻa ʻa Felo mo ʻene kau taú. Ko e ngaahi ngāue faifakahaofi ʻa Sihová, hangē ko ia ʻi he ʻEkisoto mei ʻIsipité, ʻoku fakamoʻoniʻi ai ʻoku totonu ke muimui ʻi he tefitoʻi moʻoni naʻe fakahaaʻi ʻe he kau ʻapositolo ʻa Sīsuú, ʻa ia naʻa nau talaki: “ʻOku totonu pe ke fai ki he pule ʻa e ʻOtua ʻi he pule ʻa e tangata.”​—Ngāue 5:​29.

[Fakamatala ʻi lalo]

[Puha/Fakatātā ʻi he peesi 9]

NAʻÁ KE ʻILOʻI?

• Naʻe fakatupunga ʻe Sihova ha matangi mālohi ke puhi ʻi he poó kotoa koeʻuhi ke lava ʻa ʻIsileli ʻo kolosi ʻi he Tahi Kulokulá ʻi he kelekele mōmoá.​—Ekisoto 14:​21, 22.

• Ko ha halanga kilomita ʻe 1.5 pe lahi ange ʻa hono fālahí naʻe fiemaʻu nai ki he laui miliona ʻo e kau ʻIsilelí ke nau laka atu ai ʻi he Tahi Kulokulá ʻi ha taimi nounou pehē.

[Fakatātā ʻi he peesi 9]

Ko e ngaahi ʻotua loi ʻo ʻIsipité naʻe ʻikai te nau malava ʻo taʻofi ʻa e Mala ʻe Hongofulu meia Sihová

[Maʻuʻanga]

ʻĪmisi kotoa ʻe tolú: Faitā ʻi he anga-lelei ʻa e British Museum