Ko Hono Mahinoʻi ʻa e Tohi Tapú ko ha Fiefia Ia ʻOkú Ke Ala Maʻu
ʻOKU ʻi he Tohi Tapú ʻa e ngaahi moʻoni mātuʻaki mahuʻinga mei he ʻOtuá. ʻOkú ne tala mai kiate kitautolu ʻo fekauʻaki mo e taumuʻa ʻo e moʻuí, ko e tupuʻanga ʻo e faingataʻaʻia ʻa e tangatá, mo e kahaʻu ʻo e faʻahinga ʻo e tangatá. ʻOkú ne akoʻi mai kiate kitautolu ʻa e founga ke maʻu ai ʻa e fiefiá, founga ke fakakaumeʻa aí, mo e founga ke fekuki lavameʻa ai mo e ngaahi palopalemá. Ko e meʻa ʻoku toe mahuʻinga angé, ʻoku tau ako ai ʻo fekauʻaki mo hotau Tokotaha-Fakatupú pea ko ʻetau Tamai fakahēvaní, ʻa Sihova. ʻOku ʻomai ʻe he ʻilo peheé kiate kitautolu ʻa e fiefia pea ʻomai mo e taumuʻa ki heʻetau moʻuí.
Ko hono maʻu ʻa e ʻiloʻi ʻo e ʻOtuá ʻoku fakatatau ia ʻi he Tohi Tapú ki he kaí. Naʻe pehē ʻe Sīsū: “Oku ikai moʻui ʻa e tangata ʻi he ma pe, ka ʻi he ngāhi folofola kotoa pe ʻoku ʻalu atu mei he fofonga ʻo e ʻOtua.” (Mātiu 4:4; Hepelu 5:12-14) Hangē tofu pē ko e pau ke kai ha meʻakai lelei ʻi he ʻaho taki taha ke tau moʻui hokohoko atú, ʻoku pehē ʻa e pau ke tau lau tuʻumaʻu ʻa e Folofola ʻa e ʻOtuá ke tau maʻu ʻaonga mei he talaʻofa ʻa e ʻOtuá fekauʻaki mo e moʻui taʻengatá.
ʻOku tau fiefia ʻi he kaí koeʻuhi ko e founga naʻe ngaohi ai kitautolú pea koeʻuhi ʻoku fakalato ai ha fiemaʻu tefito. Kae kehe, ʻoku tau maʻu ha toe fiemaʻu tefito ʻe taha kuo pau ke tau tokanga ki ai kapau ʻoku tau fiemaʻu ke tau fiefia. Naʻe pehē ʻe Sīsū: “Fiefiaā ka ko kinautolu ʻoku nau ʻiloʻi ʻa ʻenau fiemaʻu fakalaumālié.” (Mātiu 5:3, NW) ʻOku malava ʻa e fiefiá koeʻuhi ʻoku malava ke fakatōliʻa ʻa e fiemaʻu ko iá fakafou ʻi hano mahinoʻi ʻa e Folofola ʻa e ʻOtuá.
Ko e moʻoni, ʻoku ʻiloʻi ʻe he niʻihi ʻoku faingataʻa ke mahinoʻi ʻa e Tohi Tapú. Ko e fakatātaá, ʻokú ke fiemaʻu nai ha tokoni ki ha ngaahi fakamatala ʻoku lave ki ha ngaahi anga fakafonua ʻoku ʻikai te ke alāanga mo ia, pe ko hono ngāueʻaki ha ngaahi kupuʻi lea fakaefakatātā. Pehē foki, ʻoku ʻi ai ʻa e ngaahi kikite naʻe tohi ʻi he lea fakaefakatātā ʻe lava ke toki mahinoʻi pē ʻi he felāveʻi mo ha toe ngaahi fakamatala Tohi Tapu kehe ʻoku fekauʻaki mo e tuʻunga-lea tatau. (Taniela 7:1-7; Fakahā 13:1, 2) Naʻa mo ia, te ke lava moʻoni ke mahinoʻi ʻa e Tohi Tapú. ʻE lava fēfē ke ke fakapapauʻi ʻe malava ia?
Ko ha Fiefia ʻOku Ala Maʻu ʻe he Tokotaha Kotoa
Ko e Tohi Tapú ko e Folofola ʻa e ʻOtuá. ʻI aí ʻoku fakahaaʻi mai ai ʻe he ʻOtuá hono finangaló kiate kitautolu. ʻE tokonaki mai ʻe he ʻOtuá ha tohi ʻoku taʻemalava ke makupusi pe ʻoku ala mahinoʻi pē ia ʻe he kakai tuʻunga fakaako māʻolungá? ʻIkai, ʻe ʻikai ke taʻeʻofa pehē ʻa Sihova. Naʻe pehē ʻe Kalaisi Sīsū: “Ko fē ha mātuʻa ʻiate kimoutolu ʻe tangi kai ika atu haʻane tamasiʻi, peá ne ʻoange ha ngata? Ko hai ʻiate kimoutolu ʻe tangi kai foʻi moa atu haʻane tamasiʻi, peá ne ʻoange ha sikopio? He neongo hoʻomou fai koví, ka ʻoku mou lava pē ʻo foaki meʻa lelei maʻa hoʻomou fānaú! Pea huanoa ai hoʻomou Tamai fakalangí ʻene fie foaki ʻa e Laumālie Māʻoniʻoní maʻá ha taha pē te ne kole ki ai.” (Luke 11:11-13, Ko e Kōsipeli ʻe Fā) Ko ia ai, ʻoku malava ke ke fakapapauʻi ʻe lava ke ke aʻusia hano mahinoʻi ʻo e Tohi Tapú pea kapau ʻokú ke kole loto-moʻoni ki he ʻOtuá, te ne tokonaki atu ʻa e tokoni ʻokú ke fiemaʻu ki hono mahinoʻi ʻo ʻene Folofolá. Ko hono moʻoní, ʻoku malava naʻa mo e fānaú ke nau makupusi pe mahinoʻi ʻa e ngaahi akonaki tefito ʻa e Tohi Tapú!—2 Timote 3:15.
Neongo ʻoku fiemaʻu ʻa e feinga ke mahinoʻi ʻa e Tohi Tapú, ko hono fai iá ʻoku lava ke ʻi ai hono ola mālohi mo fakalototoʻa kiate kitautolu. Hili ʻene toetuʻú, naʻe hā ʻa Sīsū ki he toko ua ʻo ʻene kau ākongá ʻo ne lea kiate kinaua fekauʻaki mo e ngaahi kikite ʻa e Tohi Tapú. ʻOku pehē ʻe he fakamatala ʻa Luké: “Ne kamata mei he ngaahi tohi ʻa Mosese, mo e kau Palōfita kotoa pe, ʻo ne fakaʻuhinga mei he Tohi tapu katoa ʻa e ngaahi meʻa naʻe kau kiate ia.” Ko e hā hono olá? ʻI he efiafi ko iá, ʻi heʻena fakakaukau atu ki he meʻa naʻá na akó, naʻe fepehēʻaki ʻe he ongo ākongá: “Hono ʻikai ne vela hota loto lolotonga ʻene talanoa mai ʻi he hala, mo ʻene vete kiate kitaua ʻa e Tohi tapu!” (Luke 24:13-32) Naʻe hanga ʻe he mahinoʻi ʻo e Folofola ʻa e ʻOtuá ʻo ʻoange kiate kinaua ʻa e fiefia koeʻuhi naʻe fakaivimālohiʻi ai ʻena tui ki he ngaahi talaʻofa ʻa e ʻOtuá pea ʻoange ai kiate kinaua ʻa e fakatuʻamelie ki he kahaʻú.
Mamaʻo ʻaupito mei he hoko ko ha fakakavengá, ko e hoko ʻo mahinoʻi ʻa e Folofola ʻa e ʻOtuá ʻoku fakamānako mo ʻaonga, ʻo fakafiefia hangē pē ko hono kai ha meʻakai leleí. Ko e hā kuo pau ke ke fai ke maʻu ai ʻa e mahino peheé? ʻOku fakahaaʻi atu ʻe he kupu hoko maí ʻa e founga ʻe lava ke ke fiefia ai ʻi he “ʻiloʻi ʻo e ʻOtua.”—Palovepi 2:1-5.
[Fakatātā ʻi he peesi 4]
ʻI he hangē ha tamai ʻofá, ʻoku foaki mai ʻe Sihova ʻa e laumālie māʻoniʻoní ke tokoniʻi kitautolu ke mahinoʻi ʻa e Tohi Tapú